اقول انتم ماتشمون ريحة او تحسون ان المنتدى صار ماله لاطعم ولا ريحة من تالي والله اني صادق اشبقول لكم كل اللي بقلبي ولا حد يزعل من بصراحة لاني انا احب المنتدى واحبكم لازم اصير صريح معكم وافتح قلبي لكم
انا الصراحة صرت الاحظ ان المنتدى وخصوص المجلس العام صار تقول قهوة عجاجن طاير ولاهنا ريحة زينة من المعسل للباعشن وانتم رايحين يعني المواضيع صارت ماااااااااااااصخة الا ماقل من بعض الاخوان والخوات المجتهدين لكن به ناس يادافع البلا لو تجيه مكالمة جوال ويقول له اللي كلمه ترى فلان عازمنا باكر على طول دق سلف وفتح المنتدى ونزل موضوع باااااااااااااايخ مثل وجهه وكتب فلان اتصل بي وعزمن صراحة انا اتكلم معكم على بلاطة وبلهجتي العامية ما اعرف ازبرق ولا اعرف انافق واجامل لالالالالالالالالا انا رجال سيدة الصح صح والغلط غلط ومردود على راعيه اللي يرضيه ولا بسلامته ماناب مجاملن احد على حساب المنتدى وصورته اللي حنا خابرين قبل مدة قريبة لكن هالحين ياهملالي كل من طرى براسه طاري قال منتدى الهلال لالالالالالالالالا منتدى الهلال مهوب ملطشة للي رايح وللي جاي يعني بالعربي اللي عنده مواضيع زينة ياهلا ويامسهلا وعين فراش وعين غطا واللي يقول لاوالله انت منتب مسؤل عنا اقول له سم بس حتى لو مالي سلطة انا او غيري من الاعضاء مانرضى بالمواضيع الماصخة وانتم عارفين وش اقصد وسبق انه قالة اخوي نايف قبلي لكن للاسف مازالة المبزرة تدهر بالمنتدى لاحسيب ولارقيب .
حنا مانقول كل المواضيع لازم تكون علمية او دينية او الغاز لا نبي طرائف ونكت مرحة وزينة بس اللي مانبيه انه ينط لنا واحد او اثنين مثل الجني ويفتح لنا موضوع طويل عريض واذا فتحته ولا ماغير سطرين كنهن وجهه مغسولات بمرق لاطعم ولا ريق اما يكون مسوي فيها خفيف دم ويقول سحبتكم ولا مسوي فيها ذكي وهو مستدلخ مايدري من هي هابة واللي على راسه بطحا يحسس عليها مثل ماقال نايف . وسلامتكم
وارجو ان ماحد يزعل من اسلوبي او قسوتي بالكلام بس كل شي له حد والمنتدى يهمكم مثل مايهمن ولا تسمحون انة تنزل صورته عن ماكانت عليه قبل وتطيح هيبته وتسمج مواضيعه . انا فرجت عن همي وقلت اللي بقلبي وانتم كلن حر برايه بس الاختلاف لايفسد للود قضية
وفعلا فقدناك يابراهيم انت وسفر والباقين .