السلام عليكم ..

بدايةً هارد لكم يا زعماء وإن شاء الله نعوضها في درة الملاعب

ولكن عندي كلام يقرقع في قلبي له اكثر من مباراة بس ماسك اعصابي ومهدي الوضع ولكن لين هنا وبس ! مانبي تضيع علينا بطولات الموسم بسبب اخطاء اقل ما يقال عنها تافهة !.


الدعيع : عمـــــلاق بمعنى الكلمة ماقصرت يا ابو عبدالعزيز وبيض الله وجهك .

تفــاريس : صخرة الدفاع الهلالي ! لاعب مقاتل وحماسي لو لعبنا امس بخطة 1 في الدفاع اللي هو تفاريس و5 وسط و4 هجوم كان على الاقل استفدنا في الهجوم, والدفاع ماراح يفرق كثير لأن اصلاً تفاريس يلعب لحاله ! وبالعكس ابو خثران وابو مفرج انواع النكبات الله لا يهينهم.

العنقري : ابتدا بمستوى ضعيف ثم تحسن مستواه شوي شوي ولكن اشوفه المباراتين اللي راحت زي قلّته بصراحة, مافيه قتالية على الكورة وفي الدفاع اقل من ضعيف.

الخثران : مدري وش جاه انقلب مستواه 180 درجة ! ابو خثران ترى كثرة فلسفتك واستعراضك, ياليت تغطي خانتك.

الغامدي : مستواه اكثر من ممتاز الله لا يخلينا منك يا عمر .

خالد عزيز : مالك معاذ .. مالك امل تفر والله خالد عزيز كتف مالك ماخلاه يعرف ينفس تسلم لنا يابطل.

الشلهوب : والله يا شلهوب اتعب معك احبك واقدرك بس تكفى واللي يرحم والديك لا تقلد التايب ! يامحمد ترى حبيناك لأنك الشلهوب مانبي منك الا ترجع مثل ماكنت تصنع اللعب وتجهز الكور للهجوم سريع في الهجمات المرتدة مانبي منك باص عيون ولا غيره نبيك مثل ما كنت !.

التايب : البرنس الليبي مبـدع مبــدع مبـــدع , ولكن امس ماكان في مستواه .

نواف : لا جديد يا نواف لا جديد ! نواف خلنا نذكرك بالخير واعتزل .

ياسر : آخخ يا ياسر انت موهبة والكل يتوقع تكون اسطورة الكورة السعودية الجاية ولكن الظاهر كثرة الترزز في الاعلام أثرّت على مستواك , اكثر شي يذبحني في ياسر هو انه مايعرف يتخلص من الرقابة ! ياسر شوف سامي يرحم والديك تكفى تعلم منه والله فرصة لا تضيع من يديك دام الذيب جنبك.

رودريقاو : لاعب قناص يسجل الهدف من انصاف الفرص ولكن مستواه مش ولابد في النواحي الثانية امس كان مستواه اقل من عادي, واضح عليه ضعف اللياقة والبطئ.

احمد الصويلح : ياعين لا تبكين , ما ادري على اي اساس نركن الخراشي ونلعب الصويلح !.

سامي : سامي امس كان في قمة الإبداع ولكن مستوى باقي اللاعبين ما ساعده, ماشفنا التسديد من خارج منطقة الجزاء للهلال الا بعد مادخل الامبراطور كل اللاعبين يحاولون يخترقون مع ان الدفاع الاهلي مقفل ماله حل الا التسديد , وانا اشهد انك ذيب يالذيب.

المفرج : كنه يقول طقوا روسكم في الجدار قاعد لكم قاعد لكم .


وإجمالاً الأداء امس كان ضعيف , كثير من اللاعبين كان يلعب بكل برود وشفناهم يوزعون الإبتسامات بعد المباراة ابد كأنهم متعادلين في مباراة دوري, ماكنهم ماكلين 2 صفر ! اذا هم ماهمتهم البطولة ولا همهم الفوز على الاقل يهمهم هالجمهور اللي ماقصر وهو يدعمهم.



وفي النهاية مثل ما يقولون "العتب على قد المحبة" ولكن والله انذبحنا ماعاد نقدر نسكت كل مرة نقول لا ان شاء الله بيعوضونا ولا نشوف شي ! الواحد يرتفع ضغطه ويعصب وحالته حاله وآخرتها يتبسمون بكل برود.


سلامي,,