بسم الله الرحمن الرحيم

السلام عليكم ورحمة الله وبركاته

وبعد:

__ __ __ __ __ __ __ __ __ __ __ __ __ __ __ __ __ __ __ __ __ __ __ __

كالعادة.. يا أصحاب الزعامة والسيادة.. نحن بسعادة.. بفوز سكر زيادة <<< قسم بالله علي سجع موب صاحي

ألف مليون مليار تريليون دينار مبرووك يا زعماء بالفوز المستحق والتأهل بالغصب عن خشوم البعض<< ما يقصد فيصلوه

وكالعادة أعانقكم بهذا الموضوع بعد كل مباراة أحضرها للزعيم سواء بالرياض أو الشرقية..!

وفي البداية أحب أقول أنه في موضوعي هذا راح أحكي قصة حياتي.. فاللي اتصاله دايل أب أو مستعجل

فهو حر يطلع أو يقعد.. أهم شي ما أبي أحد يغثني ويقول لي وش نبي بقصة حياتك أو موضوعك طويل أو عريض

لأنه موضوعي وأنا حر فيه وعلى قول المتنبي: كـيـفـي هـلالـي....والـهـلالـي بـكـيـفــه

يالله عشان ما نطول بالمقدمة اللي مدري وش تبي خلونا ننزل تحت:


__ __ __ __ __ __ __ __ __ __ __ __ __ __ __ __ __ __ __ __ __ __ __ __

** اتصل علي خويي هلالي جامعة البترول <<<< ياحظه اشتهر

وسألني إن كنت بأحضر المباراة أم لا؟ فقلت له أني مدري لأن ظروفي ملخبطة هاليومين.. فقال لي: وش رايك نروح

مع باص مجلس الجمهور الهلال؟ فرفضت الفكرة مبدئياً.. لكني اقتنعت بعد ما أخبرني أن الباص تحت مسؤولية الأستاذ

علي العمري وما فيه إزعاج أو قلة حياء. بالإضافة أنهم بيعطونا تذاكر مجانية <<السبب الحقيقي..الفقر شين يالربع

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** وصلنا لمكان الباصات عند أستاد الأمير محمد بن فهد بالدمام الساعة الواحدة ظهر يوم الخميس.. ثم أتت الباصات

الساعة 1.30 وكان عددها 3 باصات.. لكن للأسف عدد المشجعين قليل وما ملأنا إلا باص واحد..

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** كان أغلب المشجعين لابسين لبس رياضي..وبعضهم ثياب بدون شماغ.. إلا أنا ووجهي لابس رسمي تقول رايح زواج

لا ومتعطر بعد

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** تحرك الباص حوالي الساعة 2.وكان معي 3 من أخوياي بالجامعة من ضمنهم هلالي جامعة البترول<< تأكيد للشهرة

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** الأستاذ علي العمري ذهب بسيارته الخاصة ولم يركب معنا.. لكنه قبل ذلك نبهنا على أن التدخين ممنوع

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** كنت مواصل ما نمت.. وكنت أخطط للنوم في الباص عشان ما أنام في الملعب:p لكن للأسف طلع لي هلالي جامعة

البترول وتناقشنا حول المفرج والمرشدي.. أنا مع المفرج وهو مع المرشدي.. وكالعادة استمر النقاش حول ساعة

كاملة حتى دخت من كثر الزعيق ونمت:p لكني قبلها تحديته أن المباراة راح تكون مباراة المفرج

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** كان الباص مريح جداً جداً والمشجعين هادين وكل واحد في حاله...!

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** توقف الباص فجأة ونزل السواق!! يقولون أنها دورية وقفتنا!! الظاهر أن راعي الدورية نصراوي نسى حبوب الضغط

وحب يحط حيله علينا...... بس يعقب

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** وصلنا الملعب الساعة 6.30 تقريباً... وانتظرنا نص ساعة ننتظر التذاكر لكن دون فايدة!! ثم مشينا كلنا مع بعض

ومشينا مشينا مشينا والظاهر أننا درنا على الملعب 3 مرات من كثر ما مشينا:p

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** التفت على خويي هلالي جامعة البترول وبغيت أفقع وجهه قلت له: جايبني من الدمام عشان أوفر قيمة التذكرة

وآخر شي ما لقيناها والله لأشرب من دمك

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** بغيت أروح أنا وأخوياي نشتري لأنفسنا تذاكر.... لكن لقينا زحمة زحمة زحمة غير طبيعية على منافذ بيع التذاكر

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** وأخيراً وبعد طول عناء وجدنا الأستاذ علي معتوق العمري وبطريقته الخاصة أدخلنا إلى الملعب بدون تذاكر

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** قبل الدخول وعند منافذ التفتيش كان التفتيش دقيق جداً.. ينخلون الآدمي نخل.. المهم يوم جاء دوري للتفتيش

فتشني عسكري ورع حتى الشنب ما خط في وجهه ما حصّل معي شي إلا كتيب حصن المسلم حق الأذكار والجن

<<<<<<<< يخاف مووت من الجن

المهم جاء العسكري واخذ الكتيب وعطاه خويه ... أنا قفلت الأخلاق معي خصوصاً وأنا مواصل

مديت يدي ومسكت الكتاب بيد العسكري وقلت: سلامات.. كتاب دين هذا موب مجلة

قال خوي العسكري: أعطيه الكتاب؟ قال العسكري الورع: بكيفك..

أنا انتهيت ذيك الساع ودفيت الكتاب للعسكري وقلت: خذه ولا يكثر.. تتعازمون عليه؟ قال لي العسكري الورع

يبي يرفع ضغطي: خله عشان تكسب فيني أجر.. قلت بصوت عالي: اي والله خلني أكسب فيك أجر.. بس أهم

شي أنك تعرف تقرأ زين؟!!:p سكت الورع وكمل تفتيش...!!

<<<<< والله أني ما كذبت عليكم.. تروني قوي يجي مني

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** بعد ما دخلنا جاني هلالي جامعة البترول يقول لي ان خوينا رامي مسكوا معه سكين

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** رجعت أنا وخوياي الأثنين نبي نشوف وش صار مع رامي فجانا عسكري وقفنا وقال لنا ندخل.. رفضنا وقلنا

نبي نشوف خوينا اللي ما سكينه!! فسألنا وش عنده؟ فقلنا ما ندري.. قال: أجل أرجعوا دامه خويكم وما تعرفون وش

عنده.. قلنا وهي قافلة معنا: شايفنا أمه ولا أبوه عشان نقعد نفتش ملابسه؟ سكت العسكري ورجع مكانه..

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** يوم قربنا من منافذ التفتيش شفنا خوينا يصورونه عشان يشهرون به <<< يا حظه بيشتهر ليتي مكانه

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** بعدها جانا الأستاذ علي العمري وسألنا وش عندنا فعلمناه السالفة.. فقال خلاص ادخلوا وأنا أشوف الموضوع..

راح لهم علي العمري وحنا دخلنا الملعب.. وعلى حسب الاتصالات اللي بيننا وبين رامي أخبرنا أنهم راحوا القسم

عشان يكتبون محضر بالشرطة.. طبعاً الأستاذ علي العمري بيض الله وجهه ما قصر وحاول قدر ما يستطيع أنه

يحل المشكلة لكن دون جدوى..

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** دخلنا المدرجات ولقينا المدرجات المخصصة لجماهير الهلال فلللللللللللللللللل وعجزنا نلقى لنا مكان

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** فجأة وأنا واقف في السلالم أتفرج مر من جنبي خويي وصديقي بالمطار الأستاذ عبدالرحمن البابطين..

جيت أبصوره زين.. فنزلت تحت شوي عشان تضبط الصورة من قدام وعشان ما يشوفني ويدري أني جيت الرياض

<<<< الله يهديه أخاف يعزمني ويتكلف

المهم أني صورته بس هو الله يهديه التفت وما ضبطت الصورة زين... وبأحط لكم الصورة بعدين..!

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** قبل المباراة شغلت إدارة الملعب أغنية تجيب النوم لواحد ما أعرفه بس قال لي خويي أن واحد اسمه محمد عبده

الأغنية هذي جابت لي النوم خصوصاً وأنا مواصل وبغيت أنام وأنا أدور لي سرير.. قصدي كرسي عشان أجلس

عليه

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** بعدها بدأت الأهازيج الجميلة من أسد المدرجات أبو خليل... فهزّ بصوته العذب كل المدرجات وتحمس الجمهور كله..

حتى أنا طار مني النوم وبغيت أستنزل

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** بطلعة الروح حصلنا كراسي في موقع جيد جداً ..أما غيرنا فمساكين يتابعون المباراة من على الدرج

<<< كلها من بركاتك يالدب فيصلوووه

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** أسد المدرجات كان لابس فنيلة الهلال مكتوب عليها اسمه: "HAQAWI" ورقم: "45" << لحد يسألني عن سر الرقم

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** سجلت بعض الأهازيج لوضعها في هذا الموضوع.. وإن شاء الله أضعها لاحقاً حتى تستمتعون بصوت أبو خليل

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** مع دخول اللاعبين للاحماء لاقى الكابتن سامي الجابر موجة من التصفيق وترديد اسمه كثيراً من الجماهير..<<ياحبني له

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** لوحظ الكثير من جماهير المسيار حضرت لتشجيع الوحدة.. فتفاءلنا بالفوز كالعادة بوجود جماهير النحس

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** أثناء المباراة تزحلق أحد لاعبي الوحدة في المضمار.. وتبعه لاعب وحداوي آخر.. << لا تسألوني وش أساميهم

لأني ما عرفتهم.. كل لاعبي الوحدة أصلاً نفس الماركة نفس الشكل ونفس اللون

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** حارس الوحدة مدري وش يبي؟!! ما يبدع هو وخشته إلا بمباراة الهلال!! حسبي عليه!!:p

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** مع دخول سامي والشلهوب والبرقان للأحماء هتف الجمهور كثيراً وطالب بمشاركتهم خصوصاً البرقان

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** ما بأتكلم عن المستوى الفني للمباراة.. لكن بصراحة أعجبني فهد المفرج بقتاليته وروحه العالية..

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** فهد المفرج يملك إمكانيات هائلة وكونه يخطئ فالكل يخطئ.. ولكن مشكلتنا أننا نركز على المفرج دون البقية

وننسى أو نتناسى أن جميع المدربين المتعاقبين على الهلال مقتنعين به.... (والمدربين أبخص) ;)

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** بصراحة كنت ألوم الجماهير وأقول أنهم يبالغون بخصوص الأمن.. لكن بعد اللي شفته ما ألومهم والله... حتى أنا

صرت حاقد على العساكر كل أبوهم:p حتى أخوياي أيام الثانوي اللي دخلوا العسكرية مسحت أرقامهم من جوالي

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** بعد نهاية المباراة ذهب أبوسلطان لتحية الجمهور الهلالي الكبير.. وكان يؤشر بيديه للجمهور: بأنهم في

قلبه وعلى رأسه..

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** رد الجمهور الكبير التحية بقيادة أبوخليل بترديد اسمه أكثر من مرة في الأهازيج..

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** عندما وصل أبوسلطان لمحاذاة المرمى الوحداوي داعب الجمهور بنفس الحركة التي فعلها أمام الإتحاد

وحط اصبعه على خشمه وهو يضحك (ويقصد من فوق خشومهم)

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** بعد خروج أغلب الجماهير تغنى أبو خليل بمنوعات غنائية جميلة منها: لنا الله... ونحمد الله جت على ما نتمنى..
__ __ __ __ __ __ __ __ __ __ __ __ __ __ __ __ __ __ __ __ __ __ __ __

** بعد خروجنا من الملعب كان منظر الجماهير مهيب.. من كثر الزحمة والناس تخيلت أني بشوارع الثقبة <<< لا عمرك تشبه

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** عند وصولنا للباص شاهدت أحد السكرتيه يقود طفل صغير بعمر 13 وأربعة أشهر و13 يوم تقريباً <<< كل ذا وتقريباً

المهم الولد كان يبكي.. وحسب خبرتي في مشاهدة مسلسل كونان عرفت أن الولد ضايع يدور على أهله.. الله يجمعه

بأهله... آمين..!

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** برايفت لأول رد تحتي: رحلة العودة كانت تراجيدية جداً.. فخلها مستورة.. خصوصاً وأن أخوياي تخلوا عني وقعدوا

بالرياض وخلوني وحيداً.......!!!

__ __ __ __ __ __ __ __ __ __ __ __ __ __ __ __ __ __ __ __ __ __ __ __

** المباراة ككل ما كان فيها شي غير ما ذكرته لكم.. عشان كذا ذكرت قصة حياتي أنا وأخوياي عشان أكبر الموضوع

شوي.. فاعذروني... واللي ما بيعذرني يروح يقشر بصل


__ __ __ __ __ __ __ __ __ __ __ __ __ __ __ __ __ __ __ __ __ __ __ __

وأخيراً:

إن أحسنت فمن الله وحده لا شريك له..

وإن أخطأت فمن الدب فيصلووه والشيطان

__ __ __ __ __ __ __ __ __ __ __ __ __ __ __ __ __ __ __ __ __ __ __ __

مع السلامة

الــمــشــاغــب