هالحين ندخل بالموضوع .. مثل ما أنتم عارفين ان التسويق والإعلام مبدأ اساسي عند التجار
ورجـال الاعمـال .. عشان يسوّقون ويروّجون بضاعتهم وسلعهم ..
ليحصّلون أكبر عدد من المستهلكيـن وبالتالي يربحون معرفة الناس وتعاملهم معهم
والربح السريـع عن طريق الدعايه ..



واختلفت طرق الدعايه والإعلان ومجالاتها واشكالها وفنوونها ..
والأغلب والاسرع للوصـول للمشتري عن طريق التلفزيون .. دعايات اشكال والوان
من مواد غذائيه واستهلاكيه وتكميليه وادوات كهربائيه واجهزة اتصال واثاث وغيرها الكثيـــــــر

وهالدعايات والاعلانات تغثنا وتضايقنا مانشوف برنامج اومسلسل الا وهي ناطه علطوول
يقطع البرنامج كم مرره بها الفواصل الاعلانيه اللي سببت لنا الملل وبزعمهم لو كرروها كم مره
بيرغمونا اننا نشتري .. ومثل دعايات رمضان اللي بالفتره الذهبيه ماهنا دعايه مايجيبونها
وخاصتن الاكل والشمغ ..
وهذا غير الدعايات الخارجه عن نطاق الادب وتحتاج لإعاده صياغه ..

ويعتمدون بالغالب على النساء في عمل الدعايه عشان تجذب اكبر عدد ممكن وهذا استغلال اساء
للمرأه وجعلها كالدميه يتلاعبون فيها في بعض الدعايات ..

ايضاً فيه بعض الدعايات موجهه للأطفـال وتستغلهم ويعرضون فيها الالعاب والادوات المدرسيه والملابس والحلويات
يحطونها بأسامي شخصيات كرتونيه محببه لهم ..
والأهل امام اصرار الاطفال بيلبون رغبتهم وبيوفرون لهم االاشياء الي يحبونها ..
لكن هالشركات والمصانع استغلت هالنقطه كل شوي وهم منزّلين اشياء جديده وتباع بأماكن محدده
والطفل بيتعوّد أي شئ يشوفه لازم يكون من نصيبه وهذا بيأثر على شخصيته في المستقبل ..



والطريقه الثانيه من طرق الدعايه .. وهي بيت القصيـد .. انتشرت وبشكـل كبير اللي هي البروشورات
والاوراق الدعائيه او المنشورات .. وماشاء الله مايحتاج تبحثون عنها تجيــكم لحد بيووتكم
ماعليكم الا تروحون عند باب البيت وتشوفونهن مدرعمات وداخلات البيت لا احم ولا دستور
اشكال والوان .. من عروض مطاعم ومنيو اكل .. محلات جديده توها فاتحه .. أو مخالفات مويه
ناس غاسلين حوشهم وصكهم موظف البلديه او محل ابو ريالين توه فاتح ومسووي سحب على سيارة لكزس ..
اعلانات اسواق جديده او مهرجانات تسوق ..دعايات مستوصفات جديده ومسووين خصومات .. كاتلوجات اثاث وغيــــرها الكثير ..

ماشاء الله صار البيت كله معارض تحت سقف باب واحد ..

وبصراحه هالطريقــه في الدعايه لها مســاوئ منهـــا :

1- المنشورات قد تحتوي على اسم الله وهذا يكون فيها اهانه برميها اوبالمشي عليها من دون قصد ..

2- منظـر غير حضاري وتشوويه للبيت قد تكون الاوراق عند الباب ويمكن يجون ضيوف
وفشيله يكون بداية البيت غير مرتبه ..

3- فيه اختراق لخصوصيتنا وخصوصية البيت يدخلونها للبيت عنوه دون استئذان وداقينها ميانه ..

4- تسبب بعض الاضرار .. منها مثلا اختي الصغيره كانت داخله للبيت ولا انتبهت للاوراق زلقت بالورقه
وفكها ربي يمكن المره الجايه ماتسلم ويصير كسر لاسمح الله ..

5- موزع البروشورات اذا جا يوزع ليته يحط ورقه وحده يحط 6 او 10 ولا من الذكاء يحط عند
كل باب رزمه يحسب كل باب فيه ناس مختلفه واتوقع عشان يتخلّص من توزيعها بسرعه ..

6- نجي لباب البيت اللي صار لوحة اعلانات .. ستيكرات ارقام توصيل مطاعم وبقالات .. ستيكرات
مستوصفات حقات تطعيم شلل وغيره .. ستيكرات تعداد سكاني .. وصار يلصقون ستيكرات منتجات غذائيه ..
.. مابقى الا المدرسين الخصوصين بدال مايلصقون عند البقالات والسوبرماركت يلصقون عند البيوت ..
من جد شوهووالابواب ومنصحين باللزق من النوع القوي الا مافيه امل تقشعه

وفيه البعض من العماله اللي يوزعون بروشورات يلاحقون اصحاب السيارات اذا وقفها بمواقف وراح لشغله
يرجع يلقى عليها كروت محلات وواوراق دعايه .. كأنهم يقولون وراكم وراكم والزمن طوووويل ..

وسمعت من فتره ان الامير سلمان منع هالدعايات اللي توضع اسفل ابواب المنازل ووضعت غرامه
بس للأسف للحين فيه جهات ومحلات وهايبر ماركت يسوونها وما انردعوا
ويووزعون ولاحياة لمن تنــادي ..

الأفضـــل .. ان الدعايه او النشره او البروشوور توضع في المحلات وهذا اللي صاير في البعض
اللي يبي ياخذها واللي مايبي هي محطووطه على الرف وانتهينــا ..وطبعاً هذي الطريقه يقبل عليها الكثير لأنها .. أوفــر وضمان وصوولها للمستهلك بصوره سريعه..



ومن طرق الدعايه .. الصحــف والمجــلات .. يعرض فيها اصحاب المحلات والاسواق والمراكز الطبيه
والمعاهد وغيــرها وغيــرها .. لكن فيه بعض الصحف غلبت عليها الإعلانات بشكل يشوّه الصحيفه
وتصبح الفائده من المحتوى قليله ..

وهناك العديد والعديد من طرق الدعايه والاعلان .. مثل ارسال رسائل الجوال sms ..
او عن طريق مندوبي المبيعات والتسوويق .. والاعلان بمواقع الانترنت ولوحات الاعلان اللي في الطرق
والاعلان على قمصان اللاعبين .. واللوحات الاعلانيه الموجوده بالملاعب .. وغيرهــــا الكثيــر ..



وفي الغرب ابتدعو طرق غريبه ومهينه ..منها ان البعض يأجروون جبينهم (جبهتهم ) اعلى الراس
او يدينهم او اي جزء من اجسامهم ..
ويطبعون عليها اسم المنتج ويقفون باماكن محدووده .. فيها استخفاف واهانه بأنفسهم ..

تعددت الدعايات والمغزى واحــد الا وهوو جيب المشتري واستغلاله في مواسم التخفيضات
بجعل الملابس بنص السعر ومن هالقبيل واخرتها بضاعه قديمــه او بضاعه مو في وقتها
مثل يبيعون ملابس صيف بالشتاء والعكس .. او بضاعه لاتصلح للاستعمال ..

وفي النهــايه عالم الاعلان والدعايه عالم كبيــر ومتشعـب ومتجـدد يحتاج لناس مفكره وواعيه
وناس عندها ابداع لكن في نفس الوقت نبغاهم بس شوي يحترمون خصووصيتنا ومايستخفون
فينا وتكون عندهم امانه في الطرح وان تكون الاعلانات تراعي الذوق العــام ..’’

اتمنى تعطوني رايكم في الموضووع .. ونتناقش بكم سؤال عاد ماعندكم عذر عطلتوا

1/ أي وسيله من وسائل الاعلانات تفضل او تفضلين .. واي اعلان أثر فيك او فيكِ ؟؟
2/ وش رايكم بالاعلانات اللي تصل للمنازل وتقتحمها بدون استئذان ..؟؟
3/ هل الاعلانات بصورتها الحاليه مرضيه للجميع .. ؟؟

والف مبروك النجاح لاخواننا الطلاب والطالبات وهذي حلاووة النجاح والفرحه وترى هذي مهوب دعايه ..






بانتظـار ارائكم حول الموضوووع ونقاشكم واسفه على الإطاله ..
والله يحفظكم ويرعاكم ومن كل شر يحميكم ..’’

دمتــم بخيــر ..’’
أختكم .. ’’ هلاليه سنعه ..’’