بسم الله الرحمن الرحيم


الحمدلله والصلاة والسلام على خير خلق الله وبعد ...



من أين أبدأ ,,,

هل أخبركم .. بقرار اقترحته لكن لم يعتمد بختم الضمير ؟؟!


هل تعلمون .. لفترة قررت ان اغير اسلوبي .. نهجي وتكتيكي ..

الكثير يدخل المنتديات لــ (يونس) نفسه هربا من ( الواقع ) المخجل ..

لذلك في جدول مناقشات عقلي ( الباطن) نقطة مهمه ..تنص على :

عزوز غير اسلوبك .. هم بحثوا عن الوناسه .. فلا تزدهم احباطا ..وتطاردهم بالنكد حتى في عالمهم الوهمي , , ,

لكن حرقة في قلبي اعتدت ان اقذفها لعلكم تعينوني او بها ترموني فتحرقوني ..


حرقتي اليوم او بالاجدار هي حرقة من اسبوع احاول اطفئها..فلم اسطع , ,


اعلم اني ربما لم اعرف كيف ابتدي فكرتي ... لكن انسوا ما مضى ومن هنا ابدئوا..


في الاسبوع الماضي .. في جلسة ما .. وبينما نحن نقفز من موضوع الى اخر ..
ذكر لنا احدهم مانصه ..
( هل تعلمون ان في هذا العام تم استيراد المواشي من الصين ) ؟؟!



ربما البعض ياخذها ببرود ( خير يا طير ) ؟؟!

لكن اقسم لكم اني ( استحقرت ) من نكون ..
لكن اقسم لكم اني ( خجلت ) ماذا قدمنا ..


اعلم انا كنا نستوردها من قبل من افريقيا ومن غيرها .. كانوا يقولون لنا ..
احنا كثير والموجود مايغطي ..


لكن نعن ابو بليسنا .. الصين مليااااااااااار .. وذا المليار ماخلا لنا شيء ..

نعن ابو بليسنا .. الصين مليار .. المفروض هم عندهم عجز وبطاله ..

مو احنا الــــ22 مليون ...

ياناس ... كورة ولد خالي سنة وشهرين ( الله يحفظه) اقرا المكتوب عليها ..
MADE IN U A E
حسبي الله ونعم الوكيل ... حتى لستك عاجزين ننفخه .. ونبيعه بريالين ؟؟!

صار يجينا من الامارات ؟؟!

الابره .. لو قريت بتلقا مكتوب صنع فالصين ...


ياناس مافوجيهنا دم ؟؟!
مبلدين احساس ؟؟!

ملابسنا .. ادواتنا .. اجهزتنا .. كل شيء من برا ...؟؟!

اكلنا وعيشتنا من برا ..؟؟!


بالله لو فرض علينا حصر تجاري ( لاسمح الله) وش بنسوي ؟؟!

بنقعد عرايا و بنموت جوع .. والا انا غلطان ؟!


انظر من منظور اخر .. لتعلم مدى حجمنا ...
وان ((تعليمنا يعني اقتصادنا واقتصادنا يعني سياستنا وامننا ..))



الصين .. هل يستطيع احد يهددها ؟؟!

انت يالضعيف لو قالوا لك .. وش رايك نضرب الصين ... بننقسم قسمين كما انقسمنا على العراق والا كلنا بنقول لا ؟؟!

اجزم اننا كلنا بل العالم اجمع بل انه لااحد يستطيع يهدد الصين .. لانها قوة منتجه ..

الصين لها قيمه بالعالم .. فلن تتخيل هذا العالم بلا الصين ..
لكن ..


ماذا عنا نحن ؟؟!
مابقول ماذا لو طرح موضوع مهاجمتنا ( لاسمح الله) للعالم باسره .. وش بيكون الغالب..

لكن باسالك انت .. انا وانت وجيراننا و الدول ( الشقيه ) ماذا لو انعدمنا من الكون هل لنا وزننا ...؟؟!

بصراحه مالنا الا شيء واحد .. ان نشرات الاخبار بتكون الحلقه الاخيره يوم انعدامنا.. لاننا فقط استنكرنا و عزئنا وهنائنا وصوتنا.. والا غيره مااظن لنا دور ..


ماادري هل وصلت فكرتي والا لا ؟؟!

لكن ..

الدانمرك امس نقاطعها واليوم منتجاتها مغرقتنا ...
مو بعيده بكره دوله ثانيه تقول ترى نعولكم جد خنزير ..
ومشروباتكم ( معدله وراثيا ) و اكلكم به ( مواد مسرطنه)

ترى مايحك جلدك زي ظفرك ..

وش يضمنكم ان اللي نشربه وناكله مابه مواد مضره وبعضها قد تكون سبب للادمان ؟؟! ( بعضهم اذا ماشرب بيبسي يصدع )


الغنم اللي من الصين ( حري نجدي في ان واحد ) وش يضمنكم ماتكون استنساخ ؟؟!
< < ماشافها .. بس فرضيه ..

خلي حسن النيه موجود لكن ...

ماذا لو قالت الدول المنتجه .. لا بنرفع السعر .. كما حصل في الادوية ويحصل الان في السيارات .. والله اعلم وش الباقي ...!

لن أطيل .. لن أنقد واقف فقط .. لكن الى اليابان انظروا ..

وش سوت فيها الحرب العالمية ؟؟! والان اين صارت ؟؟!

اليابان ياساده ياكرام ان تذكرون .. او قرئتم - ياأمة اقرأ- في الحرب العالمية دمرتها امريكا ايما دمار بقنابل انواع واشكال منها المحرم دوليا .. فاقسم الرئيس الياباني لاغزونهم في بيوتهم ..

لم يقف .. ويبكي الاطلال -كما افعل انا- لكنه بدء بالتعليم .. ارسل بعثات .. اول بعثه كما سمعت كانت 40 او 400 طالب .. لا اذكر بالضبط .. كفلهم وحفلهم ذهبوا سنوات عدة هناك ضاعوا وداجوا .. وفي انواع المراقص حاموا ..الى ان عادوا..
اختبرهم ففشلوا .. استجوبهم ففضحوا .. امر فاعدموا ..
نعم اعدمت البعثه كامله ... لكنه اعدام للحياة ..
كونهم ماتوا صحيح .. لكن بموتهم عاشت البلاد ...

مابعدها من بعثات .. هاهم يجنون ثمارها منذ ازل .. وبالفعل غزاالامريكان في بيوتهم .. فاجهزتهم كلها يابانيه.. فكان ( قولا و فعلا )

هل رائيتم بالعلم غزا ..



بالعلم .. والعلم مو اقرا واحفظ ثم فرغ فالورقة ولا تطبق ..

العلم ان لم يعمل به فلا فائدة منه ...فهل تعلمون ياعرب ؟؟!
وان بغيتوها بعقولنا ..بالضبط كخطة المدرب ان لم تطبق بالملعب فلن تجلب الفوز ..

وخطة المدرب ( الجيده) لو طبقها كل لاعب من الحارس مرورا بالمدافع .. ثم الصانع فالهداف .. بالتاكيد سيفوزون ..

ولو اللاعب خاف ان فانيلته تنعدم او تتسوخ .. ماراح يتقن في عمله ..

لذلك الياباينون لم يتقرفوا من الزيت .. ومازهقوا من رفع المكينات ..

على طاري الوساخه ... هل تعلمون ياعرب ..

انه في زمن مضى .. وفنى .. كان هناك شاب ذا عينين ( مدورتين) لم يكن في وظيفة مرموقه .. بل كان مهاجرا في المانيا .. هناك ماذا عمل ؟؟!
عمل في ورشة سيارات كعامل .. سموه ماردتم .. منظف مساعد مدري وشو ..
اهم شيء كان شيء من اللي نستحقره هالايام ..
ذا الشاب ينظف ويساعد . الى ان عرف كيف تعمل الماكينه .. وكيف تسير السياره ..
ماوقف عند ذا الشيء .. ورضى بامره .. وقال انا عايش خلاص ماهمني غيري..
ذا الشاب ياشباب .. له الفضل بعد الله على اليابانيين كلها .. لانه هو من نقل فكرة الماكينه من المانيا الى اليابان .. وهاهي اليابان تصدر وترسل علينا ..
يعني ذا الشاب له فضل حتى علينا .... مبرووووووك لنا


انتهت محاضرتي .. لخصوها وافهموها زي ماتفهموها ..

لكن اياكم ان تستهينوا .. فتُستَبدلُوا..
الشاب الياباني ماانتظر شيء من الحكومه هو بنفسه عرق ...
يعني لاتوقف عند وظيفه حكومية .. اشتغل لو عامل ..
اصنع لو ابره .. لاتكون كالزائده فيكون استأصلك هو الدواء ..

انت يالمسئول المدرب ..
واحنا يا شباب اللاعبين ...
اذا بغينا الفوز .. احنا الاساس .. والاعلام والجمهور يجيون مع الوقت ..

اما اذا بغينا نبقى فالهزايم غارقين .. خالونا مستنكرين ومستهجنين وعلى قرارات الغير معلقين .. وبشماعة التحكيم مبررين..وترى الدوري ماراح يفقد اثارته ..




ختاما .. اعلم اني اطلت .. واستشهدت كثير .. لكن دعونا نعمل قبل ان نستبدل بقومٍ ثم لايكونوا امثالنا ..


لم يتبقى الا ان اشكركم .. على صبركم علي ... واستحمالكم لحرفي..ولاتنسوا الدعاء لنا بظهر الغيب ..

*ملاحظة .. القصص قرائتها و سمعتها .. ولم اشاهدها بعيني .لكنها تاريخ ..



حقوق النشر والنقل لكل مسلم بشرط الدعاء لكاتب وناقل وقارىء الموضوع ..

اخوكم /:
عبدالعزيز - جدة
5/1/1427هـــ