√ண ¨`الأخضـــر في مهــب الريــح ¨` ண√ - نادي الهلال السعودي - شبكة الزعيم

هلاليه سنعه · #1 20/01/2007, 03:45 AM

.. السلام عليكم ورحمة الله وبركاته ..

هلا وغلا بالأعضــاء الرائعيـن .. ومرحبــا بالعائدين .. وحـي الله الزائرين ..
ادري متجمــدين

هي اختبارات .. هي برررررد .. هي طفش .. الله يرحمنا برحمته
..

وفالــــكم الدفـــا والتوفيـــق والملاييـــن ان شاء الله <<ماتقلّد الشاعر حمد السعيد

واليـــوم يووم رائــع .. بدايته مطـر وخيـر .. بدايه حلووه لسنه جديده ..
وقصّينـــــا شريط عام 1428هـ ..
ياسررع الدنيا أمس يالله تعوودنا على 1427 واليووم جاء 28 بلمح البصر

السنه راحت بخيرها وشرها .. ونبـــــدأ من جديد مع أوول ورقة تقوويم
نحاوول نحاسب انفسنا ونعينها على الطاعه ونتعهدها بفعل الخير وهذا الرصيد
اللي بينفعه بكره ..

الله يجعلها سنة خير ونصــر وسعــاده للمسلمين وتحقيق الآمــال للجميع ..

..

لحظــــه ’’ اصبرووووا ........
بصراحــه ماتووقعت هذي اخرتها مع الأخضر ..

سنيين خدمنا وهذي نهايته ........!!!

حملنا له الووود وحفظ لنا احلامنا .. ماتوقعت يجي يوم من الأياام ويطيح كرتك
اخاف يصير احمر يعني طرررررررررد

..!!!!!

اييه ياحزم الضامي .. دايم معنا في لحظاتنا وآيامنا ... هذا اخر ماوصل اليه

..؟؟

لحظـــه ’’ اخـــاف تنقلون موضووعي لمنتدى خليجي 18

صراحه الأخضر ماقصّر
خصوصا ياسر ومالك مع ان المستووى ماكان المطلووب ويبيلهم جهد اكبر وعقبال الكاس للمره الرابعه
12 >15> 16 > وان شاء الله 18 ..

موضووعي ياطوويلين الاعمار عن الأخضر بس مهوب المنتخب .. موضوعي عن الملف الاخضـــــر (الملـف العلاقي )
ايه الملف الاخضر ونعم فيه والله اجووودي تحملنا وتحمّل اوراقنا ..

[IMG]

هذا الملف مخـاوي الجميع من كبير وصغير .. من رجل او امراه .. من مواطن او مقيم .. ..من تاجر او فقير ..يعني هذا الملف مر على الكثير ..
ملف عـاش معنا لحظاتنا وهموومنا .. وبداياتنا ودراستنا واعمالنا .. نفرح منه بعض الأحيان واحيان نقسوو عليه في احيان اخرى اذا ماتحققت طموحات الانسان وخاب امله ..

:. ماهو الملف الأخضـر .:

في تركيبته ملف يتسّم بالبساطه .. لوونه اخضر اتووقع استنبط اللون من لوون العلم .. من الورق المقوى ..في اطرافه حدوود معدنيه وفي الأعلى والاسفل ثنيه بسيطه نسميها بلغتنا ’’ علاّق ’’ عشان اذا بغو يحفظوونه او يخزنوونه يقدرون يعلقوونه بالادراج وياصلوون له بسهووولة.. تعددو صانعيه والملف واحد .. بعض الناس تربطهم بها الملف علاقه حتى صارووا مايثقوون الا بهذا الملف بتعاملاتهم .. وبعض الجهات قديما تشترطه .. مع ان طلعت اشكال جديده .. واحجام مختلفه .. والوان كثيره .. الكل ياخذ اللي يناسبه ويرتاح له ..

:. علاقتنا معه منذ الصغر .:

من يووم مايولد الطفل يستخدم الملف ويحطوون فيه الاوراق الثبوتيه وشهادة التطعيم والفحووصات وغيرها .. ويحفظووون فيها ملف الطفل يستخدمونها عند الحاجه وعند المراجعات والتطعيمات مع انهم ينزلوونها على الكمبيووتر بس هذي تكوون ثبووتيه ..

:. احتياجنا له عند الدراسه بالمدارس .:

اذا جو يسجلوونا اهلنا بالمدرسه اول شئ نسوويه يجيبون ملف طبعا واهلنا يدبروون كل شئ
ويوودونا الوحده الصحيه ويحطون كل الطلبات والأوراق حقت التسجيل وحنا بس علينا الصياح بالمدرسه

.. يازين الاسبووع الأول كان له ذكريات حلووه كله دلع ولعب وحلوويات وبالوونات

وطبعا نحتاج ملفات ثانيه كثير في ابحاث ونشاطات واعمال وعمل المجلات طبعا مهوب بالملف الاخضر الملفات الحلووه واشكالها الغريبه ..

وابذكر لكم موقف صارلي مع الملف العلاق ابد يوم كنت بالمتوسطه بسم الله علي قلت ياميمتي وشووله تروحين معي وتسجليني انا حرمه واعرّف اصرّف عمري قالت : متأكده ..قلت حطي يدينتس ورجلينتس بموويه بارده

<<هذا الكلام بالصيف متعقده من المويه البارده بالشتاء الله يخلي السخانات ويحفظها ..

المووهم رحت للمكتبه الصبح وشريت ذاك الملف الأزرق اللي يفتح النفس يازين الازرق ولوونه .. واحط فيه االوراق واتووكل على الله .. يووم دخلت بققت عيونها علي قالت وش عندتس .. قلت ابسجل .. قالت وين الملف واعطيها ملفي ..قالت : لااااااااااااا نفخت علي ذيك النفخه اللي انغرف قلبي عقبها وبدت عيوني تغوورق

..قلت يابنت امسكي نفستس وواجهي مشاكل الحياة وقووي قلبتس ..قالت ابي العلاق الاخضر ..قلت بنفسي بس اهلاوويه

.. قلت لها وش علاق اول مره ادري ان الملفات نعلقها .. وعاد فهمتني السالفه وانتهينا على خير ..

:.في الجامعات والمعاهد .:

يحمل امــال وطمــوح الكثيرين والكثيرات .. يحملوونه معهم وكلهم امل بتحقق حلمهموقبوولهم بالتخصص الي يميلون له ولكن ’’
هيهـــات البعض طمووحههم ينتهي وينصدموون ويحطوون الحرّه بها الضعيف ويرموونه ويسطحون فيه بأي مكان الله يكون بعونه..

:. في البحــث عن عمــل .:

هذا الملف صار مخــاوي اليديـن .. يشتروون كميات منه ويحطوون فيه عشرات الصور من الوثائق والشهادات والخبرات ويصطحبوونه معهم برحلاتهم المكووكيه للشركات والمؤسسات والوزارات والمكاتب والمدارس وغيرها ويحطونه فيها ..

بعض الجهات ياخذون الملفات ويركنوونها بالأدراج زيادة عدد او تجميل مكاتبهم اوو لأقرب سلة مهملات ..
او تستخدم اسامي المتقدمين دون علمهم تحقيقا للسعوده الوهميه وذلك عند تفتيش وزارة العمل وقيدهم في كشووفاتها او البعض يتقبل هذه الملفات ببشاشه وفرح وترحيب وتقووم بتوظيف المتقدم اذا كانت مؤهلاته تشفع له ..

:. في المعـاملات الرسميه والعقود .:

يضع المواطن او المواطنه فيه معاملاته واوراقه ويبدأ بمتابعتها من وزاره لوزاره او جهات حكوميه او خدميه او امنيه او مستشفيات
وغيرها .. يمسك ملفه من صباح الله مطـارد بها المعامله من وزاره لوزاره ومن موظف لموظف ياخذ ارقام ويحتري دوره لين يجي
ويمكن يصادف اهل راجعنا بكره او اذا كان حبيب خلّص المعامله وسنعها ووقعها ويرتاح بعد مايشوف الختم والتوقيع ويكحل عيونه فيها ..
يعني ذكرت لكم بعض الأمثله عن علاقتنا مع هذا الملف ودوام الحال من المحــــال ..

نهـــــاية هالملف ووداعه بيصير بعد كم سنه تقريبــاً .. لأن مثل ماعرفنا وسمعنا ان بعض الدول بدت باستخدام الحكومه الإلكترونيه
وتسيير معاملاتها عن طريق الحاسب الآلي دون التعب والذهاب لتخليص المعاملات والأوراق المهمه وذلك لتقدم العالم في المعلومات ..

والتعامل الإلكتروني .. بدت بوادر تنبئ عن بدايه فعليه باستخدام الحاسب وربط الجهات المختلفه بعضها ببعض ..
وفي الاسبوع هذا اقيم فيه مؤتمر التعاملات الإلكترونيه برعاية خادم الحرمين الشريفين الملك عبدالله حفظه الله .. وهذا المؤتمر يعطي اشارة البدء بانطـلاق هذهالخدمات الرائده والمتفدمه بدا السبت وانتهى يوم الاربعاء الماضي وصار فيهاالكثير من الورش والمحاضرات ..

اللي توضح التعريف فيها وكيفية تطبيقها والاستفاده من خبرات الدول في هذا المجال الكبير ..

إقتباس


	وكان محافظ هيئة الاتصالات وتقنية المعلومات الدكتور محمد بن إبراهيم السويل قد أوضح في تصريحات صحافية أن التعاملات الإلكترونية ستقضي على الروتين والبيروقراطية، كما سيكون لها مردود إيجابي على الاقتصاد المحلي، بالإضافة إلى اسهامها في إيجاد فرص عمل للسيدات للعمل من بيوتهن دون الإخلال بالضوابط الشرعية، مشيرا إلى أنه تمَّ ربط 14 جهة حكومية لتكون البداية الحقيقية للحكومة الإلكترونية في المملكة. وأوضحت مصادر أنه من بين القطاعات التي تم ربطها: الاتصالات والمالية والاستثمار والصناعة والتجارة والمرور والجوازات والموارد البشرية والتعليم والحج والشؤون الإسلامية والصحة والعقارات والبلديات.

نقلا عن مجلة الاتصالات والعالم الرقمي

واللي يبي معلووومات اكثر عن التعاملات الإلكتروونيه الحكوميه يدخل هالمووقع وراح يستفيد بإذن الله ..

www.yesser.gov.sa

قريبــا بإذن الله سينتهي زمن العنــاء وحمل الملف وسيبدا زمن الرخــاء والراحه بضغطة زر لتسيير المعاملات والأموور ..
مع اني امس وانا اتصفح جريدة الرياض شفت هالكاركتير عسى بس ماتصير كذا بكره الله يستر

وأخــــر شئ أحس اني بربرت علييكم كثير واقلقتكم بهذرتي عن الملف بس يالله تحملووني..
ومعليش اصبرووو كملووو جميلكم واللي وده يجاوب يجاووب منيب ملزّمه على احد واعتبروها تجربه للإختبارات

:. وش يعني لك او لكِ الملف الأخضر .. سواء معاناة .. او علاقة ود .. او مواقف .. او ذكريات
لكم مطلق الحريه في التعبير ..؟؟
:. هل تتوقع في كم سنه الجايات تتفعل التعاملات الإلكتروونيه وتصبح حقيقه او مجرد احلام ..؟؟
واخيـــراً اتمنى للجميـــع التوفيق والنجاح والصلاح ..

دربكـــــــم خضـــر ..’’
دمتــم بخيــر .. ’’
أختكم .. ’’هلاليه سنعه ’’ ..

سندريلا الهلال · #2 20/01/2007, 04:35 AM

وعليكم السلام ورحمة الله وبركاتة ..
هـــلالية ســنعة .. وملف أخضــر الله يستــر

هلا والله وغلا ..بأم المواضيع السنــعة والمرتبة والهادفة ..

ــــــــــــــــــــــــــــــــــــــــــــــــ

تصدقين عااد .. اذكر يوم اني اسجل اولى ابتدائي ..دخلت المدرسة .. ولما بدوا البنات يصفون طابور رحت مع صف رابع

ماجازوا لي بنات أولى

بس والله ياهي ونااسة أولى

مدري وراي مستعجلة على الشقاء

الله يذكر ريكو بالخير

وحلاو مصاص من اول وحدة تصير حلاوتها علك

ـــــــــــــــــــــــــــــــــــ

هذي الساعة اللي كلها بركة اللي نرد فيها على هالأسئلة>>>>>> كنها ترحب بأحد

:.

إقتباس


	وش يعني لك او لكِ الملف الأخضر .. سواء معاناة .. او علاقة ود .. او مواقف .. او ذكريات لكم مطلق الحريه في التعبير ..؟؟

الملف الأخضر من الابتدائي الى الجامعة وانا وياه صافي يالبن

بس يوم خلصت الجامعه ماش في الاخير خربها الملف

بس والله الحق يقال العتب مو على الملف الأخضر العتب علي أنا لأني ماسعيت اني احط هالملف في مكان ثاني بعد الجامعة

إقتباس


	:. هل تتوقع في كم سنه الجايات تتفعل التعاملات الإلكتروونيه وتصبح حقيقه او مجرد احلام ..؟؟

ان شاء الله بأذن الله والدليل انهم الان اعطوا مدراء الشركات والموظفين فرصة لتعلم الحاسب تحسباً

للتعاملات الالكترونية ..

الله يعطيك ألف عافية يارب .. موضوع في غااااااية الأهمية تطرقتي له ياهلالية بكل شفافية ..ربي يحفـظك ..

صاحبة المجد الهلالي · #3 20/01/2007, 05:21 AM

اســيتس بالخيــر

شوفي انا تربطني علاقه مع هذا الملف الشفاف اللي يحطون فيه التقارير

يااوك اذا قالوا اشتروه عشان بكرا نبي نوزع التقارير انواااع المـغص وتمطط الخشش من ضيقة الصدر

الا صدز يامال الفقر مدارسنا حتى الملف الشفاف ابو نص مهوب معطينا اياه

والله ياتعليمنا بايخ

إقتباس


	وش يعني لك او لكِ الملف الأخضر .. سواء معاناة .. او علاقة ود .. او مواقف .. او ذكريات لكم مطلق الحريه في التعبير ..؟؟

يعنـي لي الكئابه بكل انواعها

حتى لونه تحسين انتس قاعده بحديقة بقدونس

امـا الموقف يوم رحت اسجل بالمتوسطه ومحطوط داخل العلاق الاخضر شهادة الابتدائي والصحيه والتطعيمات والكمبيوتر<< الله من الصدز

وكانت امي رايحه معي تسجلني

تعرفين انا حيويه ما اسطي اروح لحالي

ورايحه مالي خلق توني قايمه وفيني الصيحه ليش مدري ومفهييه مرره
يوم دخلنا على المديره واعطيها الملف وتفتحه وماتلقى فيه شي

اثري الله يصلحني طاحت الاوراق مني بالسياره ولا انتبهت المشكله ان الشهاده كانت كنها صحيفه من متنها
بس الفهاوه الله يكفينا شرها

عاد رجعت واخذتها وانا طايح وجهي من امي ومن المديره

إقتباس


	:. هل تتوقع في كم سنه الجايات تتفعل التعاملات الإلكتروونيه وتصبح حقيقه او مجرد احلام ..؟؟

نقــول ان شاءالله

وتفائلـوا بالخير تجدوهـ

عسى الله يجعل هالسنه سنة خير على الجميع
ويـعز فيها الاسلام وينصر المسلمين

أنــا أجيز موضوعتس للتثبيت

ياحبي لتس على هالموضوع الختــير اللي لامس جراح كثير من شباب هذا البلد

شكراً لتس ياسنعتنا

alhawey · #4 20/01/2007, 08:59 AM

وعليكم السلام ورحمة الله وبركاته،،،،

ياهلا والله ومسهلا بالسنعه

الاخضر في مهب الريح

أنا بس قلت راحوا وطي الصقور ما ادري النسور ما دام فيها ريح وبالشبط بعد

بالنسبه لي مالي خلق اللون الاخضر

ولا أحب من درجاته الا ذاك الفاتح مرررره

ما أدري وش يسمونه الظاهر فستقي

يازينه لاصار فرشه بالصاله أو كنب ربع كشخه بالمجلس

إقتباس


	:. في المعـاملات الرسميه والعقود .:

خبرك عتيق

الحين أغلب الجهات الحكوميه ترفض هالملف العلاق وبعضهم يطلب ملف شفاف وبعضهم مثل اللي عندنا يطلب أن تكون المعامله مدبسه فوق ورقه خضراء من النوع المقوى

ولا أدري ليش الاصرار على الاخضر

والله انه لا جتني معامله تحوم تسبدي

الاخضر العلاق ( أبو سيم )يمكن مازال منتشر بالمدارس والجامعات..

إقتباس


	وش يعني لك او لكِ الملف الأخضر .. سواء معاناة .. او علاقة ود .. او مواقف .. او ذكريات لكم مطلق الحريه في التعبير ..؟؟

ذكريـــــــــــــــــــــــــــــات فيها ونااااسه وفيها معاناة

إقتباس


	هل تتوقع في كم سنه الجايات تتفعل التعاملات الإلكتروونيه وتصبح حقيقه او مجرد احلام ..؟؟ واخيـــراً اتمنى للجميـــع التوفيق والنجاح والصلاح ..

حالياً عندنا كم ادارة تتناقل المعلانلات بينها عن طريق الكمبيوتر، وهو اسلوب متحضر وراقي ويحفظ المعامله بطريقه رائعه بحيث يسهل الرجوع اليها وتنتقل من ادارة لأخرى أو من جهة الى أخرى بسرعة وهو مايسهم في انجاز معاملات خلق الله بسرعه وبدون تعطيل

لكن أتوقع وأكاد أجزم بأن الحكومة الالكترونيه ستبدأ وتطبق فعلياً عندنا بعد 10 سنوات من الآن وليس قبل ولو بيوم واحد

يامال العافيه يالسنعه

موضوع خفيف ومرتب

تشكرااات،،

الكلاسيكي · #5 20/01/2007, 10:10 AM

أهــلاً وسهــلاً بالسنعه أم المواضيع السنعه ..
وكل عام وانتي بالف خير ..

يووووووووووووووووه .. جبتيها ع الجرح

..

يآ آ آ ه .. أيــام ما انساها مع هالملف .. بدايه بتسجيلي بالمتوسطه .. وبعدها بالثانوي ..
وختاماً بالجامعه الاكثر تعقيد .. وبعدها لانهاء بعض المعاملات الحكوميه ...
وعقبال الوظيفه ان شاء الله ..

الصراحه انا من اشوفه يضيق صدري .. لاني اعاني معه دايم .. عاد يابعدها
برفع الملف واحطه فوق راسي .. او اني بجدعه وادوس عليه برجولي ..

والعاده انها تحت القدمين ..

الصراحه الملف الاخضر ما يبغى لهم يقولون جيبوا ملف ..
تلقى الواحد جاي يقدم وجايب الملف وناسي الاوراق

.. من حرصه ع الملف ..

لانه صار مهم .. واحياناً اذا ماجبت ملف علاق اخضر يقولون اقضب الباب اللي جيت معه ..
ورح لاقرب مكتبه وجب لك ملف . . علشان كذا صار من البديهي ان الواحد قبل اي معامله
او تقديم يجهز الملف من الليل قبل مايجهز ملابسه :p .. ويهتم بالملف والعاده يصير ناقصه اوراقه

الصراحه خطوات التقديم في الجامعات متعبه جداً ..
يعني لازم يكون كل شي الكتروني اسهل لنا ولهم .. واوفر جهد ووقت .

والحين نجاوب على الاسئله < ماخذين عليها هالوقت ..

انا آخر مره حملت هذا الملف لما سلمت لي الثانويه ملفي وقت التخرج ..
والمره الثانيه وانا اقدم على رخصة قياده .. انواع البهذله ..

إقتباس


	:. وش يعني لك او لكِ الملف الأخضر .. سواء معاناة .. او علاقة ود .. او مواقف .. او ذكريات لكم مطلق الحريه في التعبير ..؟؟

الملف الاخضر يعني لي سر النجاح .. لانك بدون ملف اخضر ولا شئ ..
وكل السنوات اللي درستها بفضل الله ثم بفضل الملف الاخضر اللي حفظ اوراقي الثبوتيه والشهادات ..
انا بدون الملف الاخضر .. مثل السماء بدون قمر . مثل العين بدون نظر ..

إقتباس


	:. هل تتوقع في كم سنه الجايات تتفعل التعاملات الإلكتروونيه وتصبح حقيقه او مجرد احلام ..؟؟ واخيـــراً اتمنى للجميـــع التوفيق والنجاح والصلاح ..

اتمنى .. لكن اشك في ذلك .. لاننا تعودنا ان احنا نكون آخر ناس في التقدم . .
ولو صار .. راح يكون حسب اللي صار بالكاريكاتير .. او عذراً هناك عطل فني .. !!

في الختام ..
اشكركـ اختي هلاليه سنعه على مواضيعك الدسمه المدعومه بالصور ..
والمواقف .. وبالاسئله .. الصراحه موضوع نفض الغبار عن ذكرى قديمه ..
موضوغع ممتع ورائع .. ودائماً مميزه .

تقبلي ارق التحايا .
دمتي لنا متألقه ..

ابويارا المغترب · #6 20/01/2007, 10:31 AM

وعليكم السلام ورحمة الله وبركاته

شدني عنوان الموضوع بصراحه .....

كل عام والجميع بخير بمناسبة 1428هـ.

تحية عطرة لشخصك الكريم واشادة بفاعليتك بالمنتدى...

دمت في رعاية الله يالغالية ........

أبو راس · #7 20/01/2007, 12:12 PM

يسلمووووووووو ع الموضوووووع المرتب

حال الشعب السعودي مع الملف العلاقي:

وراك يالأخضر .. وراك يالأخضر
وين ما يروح الاخضر انا وياه ... بيض الوجه وما قصر ربي يرعاه

اما الحكومة الالكترونية فما يكفي تشتري برامج وكمبيوترات
يبيلها عقول تستفيد وتوظف الخدمة

بس من فين يا كافي
خصوصا اذا الادارت يمسكونها ناس من نوعية فيصل عبدالهادي!

اجل الاتحاد السعودي يراسل الفيفا من بريد ياهو وهو الوحيد اللي عنده الباسوورد

محبكم
ابو راس;)

الهلالي دائماً · #8 20/01/2007, 04:19 PM

هلا وغلا بـ السنعة راعية المواضيع السنعة

هلالية سنعة :

اه يا الاخضر جد انت في مهب الريح خخخخخخخخخخ

>>> فاهم الموضوع خطاء ;)
بصراحة انا متعقد من أي شي علاقي ولا احبه سواء ملف
او فنيلة او ثوب ههههههههههههه

واما علاقتي مع الملف العلاقي فهي علاقة متوطدة مع الزمن >>> يتفلسف ;)
لكن علاقتي مع الملف الشفاف اكثر
وحتى ملفي الاخضر حق الابتدائية قلب لونه وصار بني خخخخخخخ

يعني ولله الحمد مافي ملف اخضر في حياااااااتي 

الرائعة سنعة ..
اعتقد ان الحكومة الالكترونية قادمة وبقوة وهذا هو الشيئ الصحيح
مع العلم ان الاستغناء عن الملفات بشكل كامل مستحيل جداً
ودمت بخير وعافية ,,,

افتخر بالزعيم · #9 20/01/2007, 10:08 PM

هلا بالسنعة

الملف الاخضر وماادراك مالملف الاخضر

من عرفنا الدنيا وحنا نعرفه

عاش معنا مراحل عمرنا من الوحدة الصحية الين تخرجنا من الجامعة :p

إقتباس


	هذا الملف صار مخــاوي اليديـن .. يشتروون كميات منه ويحطوون فيه عشرات الصور من الوثائق والشهادات والخبرات ويصطحبوونه معهم برحلاتهم المكووكيه للشركات والمؤسسات والوزارات والمكاتب والمدارس وغيرها ويحطونه فيها .

مع الاسف ان هذا يحصل..

ارتبطت صورة الملف الاخضر في اذهان كثير من الناس بصورة الشخص اللي يدور وظيفة ومو محصل او اللي يدور قبول بالجامعة

الله يكون بعونهم ويوفقهم

إقتباس


	يضع المواطن او المواطنه فيه معاملاته واوراقه ويبدأ بمتابعتها من وزاره لوزاره او جهات حكوميه او خدميه او امنيه او مستشفيات وغيرها .. يمسك ملفه من صباح الله مطـارد بها المعامله من وزاره لوزاره ومن موظف لموظف ياخذ ارقام ويحتري دوره لين يجي ويمكن يصادف اهل راجعنا بكره او اذا كان حبيب خلّص المعامله وسنعها ووقعها ويرتاح بعد مايشوف الختم والتوقيع ويكحل عيونه فيها .. يعني ذكرت لكم بعض الأمثله عن علاقتنا مع هذا الملف ودوام الحال من المحــــال ..

لا ابشرك تطوروا صاروا يستخدمون الملف الشفاف

إقتباس


	والتعامل الإلكتروني .. بدت بوادر تنبئ عن بدايه فعليه باستخدام الحاسب وربط الجهات المختلفه بعضها ببعض .. وفي الاسبوع هذا اقيم فيه مؤتمر التعاملات الإلكترونيه برعاية خادم الحرمين الشريفين الملك عبدالله حفظه الله .. وهذا المؤتمر يعطي اشارة البدء بانطـلاق هذهالخدمات الرائده والمتفدمه بدا السبت وانتهى يوم الاربعاء الماضي وصار فيهاالكثير من الورش والمحاضرات ..

نتمنى تكون خطوات تطبيق الحكومة الاكترونية اسرع من كذا

فيه دول حولنا تقدمت كثير بهالمجال واحنا مانمشي الا ( نزحف )

على سبيل المثال حكومة دبي اصبحت اكترونية بالكامل وكذلك الكويت تقدمت كثير بهالمجال

إقتباس


	وش يعني لك او لكِ الملف الأخضر .. سواء معاناة .. او علاقة ود .. او مواقف .. او ذكريات لكم مطلق الحريه في التعبير ..؟؟ :. هل تتوقع في كم سنه الجايات تتفعل التعاملات الإلكتروونيه وتصبح حقيقه او مجرد احلام ..؟؟

ملفي الاخضر من رحت للوحدة الصحية الين تخرجي بالجامعة عندي بالدرج

بين فترة وفترة اناظره اتصفحه وكل صفحة فيه اكيد تحمل لي كثير من الذكريات

باختصار توجد فيه مراحل عمري كلها

اما عن التعاملات الاكترونية اتمنى اتمنى تصبح حقيقة باسرع وقت

طبعا اكيد بيجي يوم تصبح حقيقة لكن اكثر شىء اخافه ان نصل ( كالعادة ) متأخرين

هلالية سنعة مواضيعك دائما مختلفة و ( مميزة ) بنفس الوقت

الله يعطيك الف عافية

هلالي في مانع · #10 20/01/2007, 10:37 PM

thankx

البارق · #11 20/01/2007, 11:15 PM

مرحبا بك أختي هلالية ..

أجل الأخضر في مهب الريح ..

كانه الملف أقول : اللهم اجعله في مهب الريح وأزود بعد ..

ما أدري ليش يجيب الكآبة هالملف ..

المشكلة شوي ونكره لون علمنا بسبب هالملف ..

نقول يارب تجي الحكومة الإلكترونية ونخلص من هالروتين اللي يجيب المرض ..

بالنسبة لي حكايتي مع هالملف اللي ما أنساها يوم أسجل بجامعة الملك سعود بالرياض .. طبعا كان قبل ما يسوون التسجيل الفوري ..

طلبوا مني أوراق وكملتها.. وطلبوا إني احطها بملف علاقي أخضر ..

والمشكلة يوم جيت أقدمها أول ما سوى اللي يشيك على الملف هو إنه يشيل الحديد حقات الملف ..!!!

طبعا ما صار علاقي ..

طبعا جلست ثلاثة أيام أتردد على الجامعة من الساعة 7 إلى الساعة وحدة ونصف..ما غير نصف سرى على غير فايدة وإذا جاء الظهر قالوا لنا بكرا ..!!!

بعد ثلاثة أيام لقيت لي واسطة يستلم ملفي ..

يعني ما أدري وش صار على ربعي اللي كانوا يصفون سرى ..

وبعدها بشهرين انقبلت بكلية المعلمين ورحت أصف سرى عشان أسحب الملف ..

اما الحكومة الإلكترونية واللي مانيب متفائل فيها أبد ..بصراحة ما أشوف أي تقدم حسب علمي بالأشياء اللي ما تحتاج معاملات ..!!!

شكرا لك أختي على هالموضوع الجميل والبحث المتكامل ..

تحياتي للجميع ،،،

ابوندى الهلالي · #12 21/01/2007, 09:14 PM

هارحين من زين اتصال الانترنت عشان يحطون حكومة اكترونية

تبي تقعد سنة عشان تدخل على الموقع

هذا غير الظغط على الموقع

تحياتي لك شاكر موضوعك الرائع

عزوز الأزرق · #13 21/01/2007, 10:30 PM

حيا الله كل السنع ..

مرحبا مليووووووون والله ولا تكفين < < انا فاهم وانت فاهم افهم يافهيم ...

الملف العلاقي الأخضر ...

خابره من الشروووط .. في كل ورقه .. تسجيل .. مدري ليه ..

مواقف .. ماهنا كثير لكن اللي اذكره قبل كمن سنه اراد الله اني اروح اتونس ابسجل بكلية المدمرين اسف اقصد ( المعلمين ) الموهم ( ع قولتك) ..

معاي صورة الشهادة مختمه ومدري وشو ..بس مافيش ملف علاقس اخضر ..

مااخفيك .. والله اني ماكنت بسجل بس زود وناسه ( ويجيك العلم)

اخوكم ومن معه دخلوا لجنة القبول .. قالوا وين الملف الاخضر ؟؟

وانا عاد مافوتهاش .. صكيتهم بتعليق محترم .. ماله داعي نذكره .

الموهم .. طلعت واقول لولد خالي .. تعاااااال .. وندخل قاعه ثانيه اي قاعه الا غرفه . لا ومكيفاتها عاديه .. و فيها ريش حمام ههههههههههه < < يحب يفضحهم..

المهم دخلت .. والظاهر كان في لجنه قبلنا .. ونلقا الملفات ياكثرهااااا .. وناخذ اثنين والى اللجنه ونرمي لهم الاوراق ..

الشيء اللي قاهرني وش هوله الملف كانهم يرمونه وياخذون الاوراق ؟؟!

المهم ياخيتو .. من يوم ماشفت ( ريش الحمام - الفصول الضيقه وليست قاعات - حشرات ) وشميت ريحه مايحتاج اوصفها...من استرعتني ه الاشياء وانا اصفهم ..

وماله الا جامعتي .. الله يحفظها ويزيدها تطووووور ..
تصدقين .. نسيت ذا الملف فيها .. لان التسجيل كان بالنت والحمدلله القبول كان لي فوري .. ورحت لهم بصور وصورة الشهادة و درجة القياس .. وصلى الله وبارك .. اعطوني ايصال صغير اننا استلمنا منك هالاوراق .. وانك ياعزوز مايحتاج تتعب نفسك ..

بصراحه ( اسهل معامله رايتها في حياتي كانت تسجيلي في الجامعه والله اقولها بلا مكابره .. مااخذت فاللجنه دقيقتين )

هون وانتهت بربستي يا السنعه ادام الله سنعك يام السنع كله...

انتهى , , ,

~بنت الزعيم~ · #14 22/01/2007, 01:38 AM

وعليكم السلام ورحمه الله وبركاته..
هلا وغلا فيك اختي هلاليه سنعه ..
ايه والله برد واختبارات ورباده مدري وشلون تجي
وفالك مثل اللي قلتي وزود يالغلا
ااايه هذي السنين تركض وحنا لاهيين بالدنيا
الله لا يشغلنا الا بطاعته ويرزقنا رضاه وجنته ..
ايه ان شاء الله المنتخب ياخذ الكأس بس ما اتوقعه ..

لا موب النعم فيه هذا اهلاوي انا ملفي ازرق هلالي ههه
يا كثر اللي يقسون عليه ويقطونه بالشارع لا قالو لهم ما هنا وظائف
عاد هم يموتون قهر ويحطون حرتهم بهالمسيكين الملف الاخضر

صار لي نفس موقفك بس انا جبت اخضر على بالي نظاميه
قامت صرخت بوجهي وقالت روحي جلديه بلون وردي
قمت قلت لها ما شاء الله غيرتم النظام امحق لون بس ..
كان ودهاا تعطيني اطراق ذاك الحزه ومن الخوف رحت جلته ورجعت

يا حسااافه بيروح ملفنا الاخضر والله ابنفتقده يا حبك للقديم بس

تخيلي عاد اروح اراجع معاملتي بالنت ويطلعلي كذا
والله قهر واحباط ...

:. وش يعني لك او لكِ الملف الأخضر .. سواء معاناة .. او علاقة ود .. او مواقف .. او ذكريات
لكم مطلق الحريه في التعبير ..؟؟
الحمد لله لهالحين وحنا حبايب بس اخوي كارهه حيل واختي بعد
من كثر حظهم الشين معه بس الله يستر لا اضحك عليهم وترجع فيني

هل تتوقع في كم سنه الجايات تتفعل التعاملات الإلكتروونيه وتصبح حقيقه او مجرد احلام ..؟؟
اتوقع ليش يعني احلام فيه دول اقل منا امكانيه ويتعاملون الكترونياً

واخيـــراً اتمنى للجميـــع التوفيق والنجاح والصلاح ..
اللهم امين .. ومن قاله

دمتي بحفظ الله ورعايته ...

التنين · #15 22/01/2007, 01:40 AM

يا شينه شيناهـ ذاك [ الملف ] ..

المشكله إنه موب أخضر ,, >>> لا تدقق ..

يعطيك العافيهـ ..

..