|
لاتعتـــــــزل |
سمعت ان سامي بيعتزل وكثير قالووها بس ما اتووووقع .. سامي زي مانقرأيحضر تمارين .. صحيح انه يغيب بإذن من الإداره بس اتووقع انه بيرجع وبيكمل هالمووووسم معنا.. .. ســامي ملك الفن والإبداع .. ملك المراوغه والهجمه .. ملك الذكاء والفطنه .. ســـــامي قائد الكتيبه الزرقاااااء لاندري كيف سنووودعك حينما يحين وداعك .. :( ســامي لازلت قادرا على العطـــــاء فلماذا التوووقف وانت في قمة ابداعك ؟؟ :( .. شكرا اخوي هلالي الظهــران .. دمت بخيــر ..’’ |
هلالي الظهران .. لاتكون محامي عن سامي .. وجلاّد للطرف الثاني ..!! ســامي .. ابن الهلال .. وكلنا يعرف حب الهلاليين لسامي من رؤساء للنادي واعضاء شرفه وجماهيره وصحافة الهلال .. الشوشره اللي حاصلة الان لا تنفع سامي ولا تفيد نادينا .. هالشيء هذا يتمناه.. اي منافس للهلال .. عاد ياكبرها يشوفونها حرب بين سامي والهلال .. الهلال أعطى سامي وسامي أعطى الهلال .. علاقة طرديه ومعادلة عادله .. أما قولة النادي اعطى سامي وسامي ماعطاه او سامي اعطى النادي والنادي ماجازاه .. هالكلام لا يودي ولا يجيب يخلق مشاكل ويجلب زعزعه احنا في غنى عنها .. فيه ادارة مسؤلة .كفيلة بالشيء هذا .. اما ان احنا بناخذ حقوق اي لاعب مفضّل عندنا من خلال سطورنا ..هذا يدل على اننا فعلا نشجع اللاعب لا النادي .. سامي سيرحل .. كما رحل غيرة .. رحل عن بعض الانديه نجمها الوحيد ولازالت تحاول النهوض .. ولكن الهلال يرحل منه نجوم وليس نجم واحد سواء بالاعتزال او الاحتراف او الاصابه وهاهو يغرد خارج السرب في بطولاته وحتى في صدارتة لاي بطولة .. يدخلها .. سامي من المفروض منه كلاعب عرف برقي فكره ومعرفته لخبايا الامور يصرّح بأن الامور بينه وبين الاداراة فقط ..ويجب ان تقف الامور الى هذا الحد .. |
معك حـق اخوي هلالي الظهران سامي مانقدر نجازيه سامي لا قبلك ولا بعدك |
هلالي الظهــــــــران الله يحرم اصابعك عن النار كلامك عين العقل والصواب واللي يقول سامي أخذ أكــثر من ما اعطى أقولها وبالفم المليان هذا كذب محض سامي طول مشواره مع الهلال قدم الكثير والكثير اللي مااقدر اعده اخذ منه الجهد والتعب والحريه حتى الزواج ماتزوج الا بعد الثلاثين بسنوات جدد ووقع على بياض لم يكلف النادي فوق طاقته وماساوم او استهبل على النادي عد النادي مو مجرد نادي يلعب فيه كان النادي بيته اللي قضى فيه اكثر من عقد من السنوات أصبح لاعب مكروه عند جماهير الخصم وتقبل الشتائم والتلفيقات والتزوير ضغط على نفسه و "نفسيـتـه " لعب وهو مصـاب خاطر بحياته مهوب شرط يكون سامي اللي قدم بس مجرد لعب فيه نفسيات وفيه تضحيات وفيه التزام مواعيد وفيه مهاره وفيه انه يقدم للنادي وكـأنه نــاديه هو من شدة عطائه الاا محددود وتفانيه نادر الوجود وآخر شي جاايين تقولون انه اخذ أكثر والله من شد الصدمه ماقدر اعبر او اتكلم لتذهب الكوره الى الجحيم بعدك ياساااامي آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآخ ياسامي |
سامي لاعب نتفق جميعاً بانه لن تنجب الملاعب كـ اخلاقه ولعبه .. لوكن هذي سنه الحياة .. الثنيان وش صار بعد اعتزاله .. الكل زعل بس وش نسوي .. وسامي هذا وقته يعتزل .. ليتفرغ باقي حياته لحياته وابنائه .. وكلنا معك يابو عبدالله .. في حلك وترحالك .. وبيظل سامي في القلوب في الحضور وفي الغياب .. ولن ينسى من الذاكره يوم واحد .. اللي قدمه للزعيم ماهو هين .. او سهل ينسونه الهلاللين .. اتمنى له التوفيق .. عوافي هلالي الظهران سامي اعتزل .. بس هذي سنة الحياه .. |
إقتباس:
مانبي نطول النقاش على السامي لانه ماهو من مصلحة احد وهدي هدي تراه نقاش ودي لاتخليها تخرب عشان سامي إقتباس:
قلنا لكم هذي وجهة نظر ورأيي في سامي خصوصا في هالسنه الاخير لكن مايعجبكم احد ياتكذبونه او تجردونه من هلاليته احترم حبكم لسامي لكن لا احد يلومني في حبي للنادي فهو همي الاكبر لا سامي ولا ياسر ولا غيره ولا حتى يوسف لانه كل هالنجوم صناعة هالنادي الكبير يايليت مره ثانيه اللي يبي يرد علي وماهو عاجبه كلامي يحسن النية على الاقل ماطلبت شي كثير انا اللي اخاف منه وان شاء الله انه مايصير مثل جار الهنا ( النصر ) لهم عشر سنين يتغنون بماجد لان حبهم لماجد طغى على حب النادي وافهم يافهيم |
لا عاد ياولد وايل تراك شبيت على راعي الموضوع سامي ترى اعتزاله موب بالساهل وصعب علينا كمشجعين هلاليين مو عاد محبين لسامي تقبل هالموضوع والحمد لله ابشركم طلع اشاعه سامي يبي يستمر هلالي سامي أسطورتنا نحبك |
ولد وايل هذي مهوب وجهات نظر هذي حقائق وانت عكستها .. اذا يهمك النادي بس ماشفنا شعار النادي بتوقيعك شفنا تمجيد للاعب انت تناقض كلامك ووش جابنا للنـصر الحين يعني نكره سامي ولا نقول انه لاعب اي كلام عشان مانصير مثلهم ؟؟ عليك منطق مدري شيبي بصراااحه |
,,, ,, , رحل سامي ... لا لم يرحل ...!! قصة بدأت ولا اعلم متى نهايتها.. ولكن هي كلمه اقولها وكلي يقين بـ محتواها ... سامي الجابر لو احس يوما ما .. انه قادر على تقديم شيء لـ الكيان الهلالي .. فـ لن يبخل ابدا .. ولكن ربما حان الوقت لـ ان يمتطي الجيل الثاني صهوة جواد النجوميه شكرا سامي لو بقيت .. وشكرا فيما لو قررت الرحيل ... هلالي الظهران سؤال لو كانت اجابته بـ نعم ..!! فـ من المحال ان يعجب اي مشجع هلالي .. ولكن عطفا على المعطيات .. نريد سامي وايضا نريد الهلال ...:) دائما ماتشدني اطلالتكـ .. حتى لو كانت مجرد ( استفهامات ) فـ باركـَ الله فيكـ ومنحكـَ الله التوفيق ,, **** كن بخير ...SoMe OnE... |
إقتباس:
انا قلت وجهة نظري في سامي كلاعب مثله مثل اي لاعب خدم وراح يعتزل السنه هذي او اللي بعدها مثله مثل اي لاعب نجم على طاري التوقيع لو كنت امجد يوسف ماجلست اشجع الهلال الان :) وعلى فكره التوقيع ماحطيته الا قبل حفل اعتزال يوسف بيومين والى يومك موجود للذكرى لا اقل ولا اكثر ولو كنت احب يوسف على النادي كان مشيت مع يوسف انتي شفتي التوقيع ماشفتي الصوره اللي تحت اسمي لا تناظرين بطرف عين لاهنتي المنطق اللي ماقدرتي تفهمينه ياوخيتي هو لا لتغليب مصلحة لاعب على مصلحة كيان بسألك سؤال جاوبيني بصراحه ؟ هل قلت انا اكرهوا سامي لا تحبون سامي ؟ عجبي منك إقتباس:
انا طرحت وجهة نظري مااسات لاحد ولا احد يزعل لاني متاكد لو سامي بنفسه قرا كلامي ماراح يزعل وان شاء الله انتم مثله تحيه للجميع |
صراحه إلى الحين ماصدقت السالفه اللي صارت مع ابو عبدالله والاداره.. بالله عليكم ابو سلطان بيسوي كذا يعني مو معطي سامي حقوقه؟! الا بيعطيه :) بس لو يصبر شوي ..لان الاداره حسب ماسمعت انها تمر بأزمه ماليه.. وربي مو ضايع حق سامي.. لاتنسون أن ابو سلطان يوفي بوعوده :) بس ابو عبدالله الله يهديه استعجل شوي :( .. مشكلة بعض جماهير الهلال يفضلون اللاعب على النادي.. |
مرحبا بالجميع .. قبل كل شي أبي كلمة راس لولد وايل .. سعد وانا اخوك ياخلفهم انت شلون اهدي؟ وش انا مسوي؟ لاني باللي كذبك ولاني باللي جردت احد من هلاليته!! بالعكس ماقلت كلمه لواحد وكلامي للجميع ومافيه اسائه لاحد .. وهو وجهة نظر وحقيقه تخفى على الكثير .. فأين الجزئيه بكلامي تدعو لان نخسر بعض!! اذا كنت تعرف حقيقة ما أخذ سامي وتصر على انه أخذ فهذا شأنك ووجهة نظرك .. واذا كان ماسمعته حديثا عليك ايضا الامر لك.. بقية حديثي لسندريلا والجميع .. انا لست محاميا عن سامي!! فما قدمه خلال عقدين من الزمن داخل المستطيل وخارجه كفيل بأن يدافع عنه على مر الازمان.. نعلم ان سامي ابن الهلال ومحبوب من اعضاء الشرف.. لكن وش نتيجة الحب؟ وعود وهميه وتهميش .. على مدار 12 سنه يوعد سامي بمقدمات عقود من (هالمحبين) ولم يلتزم احد ويوفي بعهده!! والسامي لم يشأ الحديث او يثير شوشره .. والان سامي في حاجة لكل حق من حقوقه فعليا .. ولا أي حس ولا خبر من هالمحبين الاوفياء!! اجزم بان سامي اذا كان في غنى عن هالاموال سيستمر في الصمت لكنه يحتاجها وآآآه يادنيا :sad::sad: بعدين على مهلكم .. أشوفكم جردتوني من هلاليتي ونسبتوا تشجيعي لسامي!! لم يكن سامي وجمهور الهلال الكبير دنيئاً لكي يفتح هذا الملف ويناقش الإدارة أين هو التكريم الذي وعد به القائد ؟! السامي أرادها صمت وانتظار لما وعد به ومن خلفه جمهور الهلال الكبير الذي لن ينسى الجابر فهو الأسطورة الأكبر من النسيان لكن لو حدث (لاقدر الله) وان مضى الذيب في قراره وبهذه الطريقه المشينه لتاريخه ستكون نقطه سوداء في تاريخ ادارة محمد بن فيصل .. ولن ابالغ ان قلت انها ستبقى النقطه الابرز .. وللاسف الناس لاتذكر الا الجانب السلبي .. نأتي للنقطه الاهم .. وهي نتيجة التعامل مع الاسطوره بهكذا طريقه .. اولا: موقف الهلال قدام المتابعين والاعداء .. هالشوشره الحاصله وش اسبابها؟ سامي أحد صناع مجد الهلال وأحد رموزه والرمز الأوحد في تشكيلة الفريق حالياً يعامل بهالشكل ؟! أولاً هاوي .. ثانياً تعال تمرن ويصير خير .. ثالثاً أصبر علينا !! هالشي يبي يفتح مجالات تشمت كثيرة من قبل اللاهلاليين .. ثانيا: موقف الهلال وادارته امام جمهوره.. هذا جزاء رمز من رموز الهلال؟ وهذي نهايته! يعني لازم يلوي ذراعكم حتى توفون معه وياخذ حقوقه! ثالثا والاهم : تاثير هالموقف على عزيز والشلهوب والغامدي والبقيه .. اذا كان هذا التعامل لرمز من الرموز ومثلهم الاعلى وش تتوقعون بيسوون؟! اذا الاسطوره عومل بهالتهميش والنكران وهو الاسطوره مانظرتهم المستقبليه؟ اسألكم بالله اذا جا للشلهوب عرض من الهلال بـ6 مليون ومن البلوي جاه الضعف .. وش بيقرر؟ يستلم الــ12 كاش ولا يضحي ويعتمد على وعود وكلام بانه ياخذ 6 .. والله العالم يستم شي منها ولا مصيره مصير مثله الاعلى؟!! اجيبوني يامن جردتمونا من هلاليتنا .. يعني يانمدح او نسكت ولا احنا مشجعين لاعب!! ختاما .. انا مشجع بسيط وراس مالي علم ارفعه وصوت اهتف به للهلال الكيان ووالله ثم والله ان عشقه يجرى بدمي .. وكل من ارتدى القميص الازرق محل تقدير .. والاساطير محلهم القلب .. صالح .. يوسف .. سامي .. الدعيع.. لكن اذا كان التعامل مع الاسطوره في نهاية مشواره بهالطريقه المقززه واسكت فوالله مافيني خير ولا وفاء لانسان صنع المستحيل والفرح للملايين .. سامي فلتعذرنا فوالله لم نقدرك حق قدرك .. مات التقدير .. مات التقدير.. مات التقدير.. |
إقتباس:
سامي من مقدمات عقوده الثلاثه الماضيه لم يستلم اي ريال!!! اما عقده الاخير فهو مازال بانتظار حقوقه .. حنا مانبي سامي يعصى الاداره او يضغط عليها .. لكن الى متى يستمر ابو عبدالله وهو ساكت عن حقوقه؟ واذا جحدوه مثل الاولين من اللي بيفيده؟ القهر ان سامي يحتاج لكل ريال حتى يعوض من خسائره .. وماسفراته هالسنه الا لتدارك مايمكن تداركه او تعويض لخسائره .. وين التقدير لرمز من الرموز ؟ هل هذا هو الوفاء والحب؟! للتوضيح.. يا ناس نعرف ان سامي بيعتزل في يوم من الايام وهذا حال الدنيا ومصيرنا نحزن على فراقه لكن اللي يحز بالخاطر الطريقه المخزيه اللي يعامل بها هالاسطوره وفي اخر مشواره :sad: |
هلالي الظهران وشلونك ;) كلامي كان موجه للجميع ماهو لك حتى في بداية ردي الاول عممت على الجميع محد يحتلف ان سامي لاعب ذكي وتصرفاته موزونه ويشهد له الكل وانا اولهم انا وانت ياهلالي الظهران من عرفنا الدنيا وحن نشجع الهلال على كثر السنين اللي مرت على الهلال ماعمري شفت مثل هالسنه الصعبه على النادي اول بالسابق كان الهلال محارب من تحت لتحت لكن السنه هذي عيني عينك اجلس مع نفسك وفكر في وضع الهلال هالسنه ............ الكل ضده الاتحاد السعودي الامانه العامه ثلاث ارباع الانديه ضد الهلال الجماهير اللاهلاليه اتحدت مع بعض حتى جماهير الشباب صارت تكرهك ياهلالي مع ان الهلال طلع من رحم الشباب حتى اللي مايسوى صار يطلع بيانات رسميه حكوميه ضد الهلال :upset: محمد بن فيصل في وضع لا يحسد عليه الله يكون في عونه بس الفريق محتاج مدرب ومحتاج لاعب مهاجم مع ياسر ويمكن لاعبين بدل التايب وقوارو محمد الشلهوب وعمر الغامدي عقودهم بتنتهي بعد خمس شهور اعضاء الشرف مامنهم دعم محمد بن فيصل او النادي بكبره عليه ضغوط ماهيب طبيعيه بطوله اسيا والبطولات المحليه اللي حامل لقبها الهلال والاهم بطوله الدوري قلي وش الاهم سامي والا الاهتمام بتجديد العقود وجلب لاعبين اجانب ومدرب وتحسين وضع الفريق ياعمر محد اكل حق سامي وانا اول اللي يعرضون هالشي لكن كلامي اللي كتبته ومتاكد منه مثل ما انا متاكد اني اكتب ردي لك الان ان سامي حقوقه الكامله في جيبه والاختلاف في تجديد عقده الحالي ;) |
| الوقت المعتمد في المنتدى بتوقيت جرينتش +3.
الوقت الان » 08:05 PM. |
Powered by: vBulletin Version 3.8.7
Copyright ©2000 - 2025, Jelsoft Enterprises Ltd