مساكم الله بالخير جماهير الزعيم ،،، والشهر عليكم مبارك /
أول شي مبروووووك البطولة الجديدة للزعيم وعقبال اللي بعد السوبر انشاء الله .
هذي القصة صارت لواحد من الشباب واللي معه بطاقة عضوية من نادي الهلال ،،، يقول خوينا انه مرة من المرات توه واصل للنادي على اساس أنه ناوي يحضر التمرين مثل العادة يوم تو خوينا واللي بنفرض ان اسمه مشعل ،،، المهم يقول مشعل أني حصلت واحد عند باب النادي شكله جاي من قرية او شي من هذا القبيل ،، والسبب واضح من شكله وهيئته وسيارته ،، المهم ان مشعل يقول ان الرجال سأله وقال له يااخوي ما حولك نادي كورة هنا ؟ قال مشعل / أي نادي تبي بالضبط الرياض مليان اندية كورة ؟ قال الرجال / أنا رجال ساكن بديرة بعيدة عن الرياض وكنت راعي مزارع وبعارين ولا أعرف شي اسمه كورة وأصلاً ما قد شفت وش ذا الكورة لأني منيب راعي تلفزيونات او غيرها ،،، وفي الفترة الأخيرة جلست صدفة عند حدى الربع وكان فيه مباراة كورة وخويي ذا وبعض الشباب كانوا متحمسين ويشجعون ،، فقلت يا ولد ورا مانصير مثلهم ونطيح في الكورة ونشجع الفريق الفلاني والفريق الفلاني ؟
قمت وسألت خويي ذا اللي كنت عنده وقلت له / يااخوي انا ابي أطيح في الكورة مثلكم وشلون ؟ ،،، وبحكم ان خويي مثلي ماطاح في التلفزيونات الا تالي قال لي / أنا أتفرج الحين على كورة ولا أدري من اللي يلعب
،،،، لكن تدري اتصل على خوينا فلان في الرياض واللي اكيد بيكون ادرى منا في هذي الأمور واسأله عن الكورة وعن الفرق المضبوطة عشان نشجعها ولا تنسى تسأله عن ازين فريق مهوب تورطنا بأي فريق ،،، قلت له طيب ،،،، وأروح اتصل على الرجال من تلفون البقالة (( مافي ديرتنا الا هو )) يوم كلمت خوينا وصف لي هنا وقال بتلقاني حاضر التمرين في النادي وبتعرفني على طول لأن مافي التمرين الا انا واثنين ثلاثة غيري ،،، قلت له طيب وشغلت وجيت للرياض عاد الحين ابي اسأل هذا النادي اللي يقصده خويي أو لا ؟
قال مشعل / خويك وصف لك هذا الشارع بالضبط ؟ قال الرجال / لا يمكن هنا ويمكن حدى الشوارع اللي حوله !!
قال مشعل / طيب تعال وبنشوف ،،،، أبرز مشعل بطاقته العضوية ودخل النادي مع خوينا اللي مايعرف شي ،،، ودخله بدون بطاقة بحكم علاقة مشعل القوية من كثر ما يحضر تمارين ،،،،، المهم مشعل راح بالرجال لملعب الرديف ووراه ناشئين النادي وسأله / ماقال لك خويك أن ذا الفريق له قاعدة قوية وانه كل موسم يطلع نجوم جدد ؟
قال الرجال / لا يااخوي ،،،، ماقال لي خويي ،،،، وبعدين خويي قال لي انه فريقه دايم يشتري لاعبين من سن الثلاثين وفوق بحكم ان النادي يبحث عن الخبرة اكثر من الموهبة (( كثّر منها )) !
المهم مشعل طلع من الرديف ووداه للملعب الرئيسي واسأله / ماقال لك خويك أن تمرين النادي يحضرونه جماهير يفوق عددهم جماهير الفرق في المباريات الرسمية ؟
قال الرجال / لا يااخوي ،،،،، ماقال لي خويي ،،،، وبعدين نسيت اني قلت لك ان خويي يقول بتعرفني على طول لأن مافي التمرين احد حاضر الا اثنين وثالثهم خويي وذولي ماشاء الله لو اجلس ادور فيهم حتى الصبح ما عرفت خويي !!
طلع مشعل من التمرين وودا الرجال لمكان ثاني بالنادي يوم وصلوا لغرفة ،، وتو مشعل بيفتح الغرفة الا وعيا الباب ينفتح ،،، قام مشعل ودز الباب بقوة ودخل يده بين الباب والجدار وبصعوبة ولع النور ،،، وبعدين سأل الرجال / ماقال لك خويك أن في ذا النادي غرفة مليانه بالكؤوس والدوروع وكؤوس الهدافين وافضل اللاعبين وشهادات الأفضلية للفريق وان الغرفه من كثر ما فيها من كؤوس وميداليات ما تنفتح من الزحمه ؟
قال الرجال / لا يااخوي ،،،،، ماقال لي خويي ،،،، الا بالعكس خويي قال ان عندهم غرف بالنادي خاصة بالكؤوس والدروع بس مهيب مثل هذا ما تنفتح بالعكس ،،، الا قال انه بينومني فيها لا وبيخلي نصها الثاني مطبخ من فضاوتها !!!
قام مشعل وصك الغرفة وراح ويا خوينا ومر به على الغرفة الجديدة واللي تنبني للكؤوس الجاية انشاء الله ،،،، مشعل سأل خوينا وقال له / عندي لك سؤال أخير ،،، خويك هذا ماقال لك ان النادي فريق نجوم بمعنى الكلمة ؟
قال الرجال / لا ياخوي ،،،، ماقال لي خويي ،،،،، بس هو قال أن عندهم لاعب قديم رقمه 20 – 11 وأنهم الا الآن يتكلمون في ذا اللاعب على أساس أنهم يقولون ماطلع في نادينا الا هو ،،،، قال مشعل في نفسه (( 20 أخافه يقصد الشلهوب بس )) ووده للتمرين وأشر على الشلهوب وقال / هذا اللاعب اللي تقصد ؟ قال خوينا / لا يااخوي ،، على وصف خويي ان لاعبكم ذا المفروض يكون ولد للاعب المقصود !!!
المهم مشعل عرف الرجال وش يقصد ووين خويه موجود ،،، قام وقال له / والله ياالغالي خويك اجل مهوب هنا لكن لو تبيني أوصف لك النادي اللي يقصده خويك تراي حاضر ؟
قال الرجال / لا يااخوي ،،،، شكلي بطنش خويي !!!
قال مشعل / أفا ،،، ليش تطنش الرجال ؟
قال الرجال / لأنه بغا يورطني بنادي ويفوت علي تشجيع ذا النادي ،،،، لا ويقول لي بنومك في غرفة الكيسان ونصها الباقي اقلبه مطبخ من وسعها !!!!
=============================
ملاحظة / الفرق المقصود أعلاه من نسج الخيال ولا تمت للحقيقة بصلة (( أيه هيّن ))
------------------
عديّت بامجادك وغيرك يعدد ،،
==============
[email protected] 
الوضع العادي
