" صك المزلاج على من أراد الزواج " - نادي الهلال السعودي - شبكة الزعيم

alhawey · #1 23/12/2006, 12:06 PM

السلام عليكم ورحمة الله وبركاته،،

الله مير يحييكم جمعيا ً..

كالعادة من تالي سواليف وبتمشي حياتي

حقيقة ًٌ يجب أن تقال وهي أن البرد هاليومين يجخر العظم كما يجخر المسمار الجدار..

ارحل أيها البرد غير مأسوف عليك فوالله انك قد ذبحتنا وعن الروحات والجيات قطعتنا ..

لا علينا من البرد وسواليفه ، وخلونا في الزواج ومطاريسه

أبتي ،أمي أبشركم فقد نويت أن أتزوج

عجل يا أبي ودبر لي مبلغاً تساعدني فيه على أكل هذا المطب ، وبسرعه يا أمي شوفي لي أقرب بنت بعباتها..

لقت لي أمي بنت الناس الأجاويد ، وبدأت تمدحها وتسرد علي بعضاً من صفاتها ، فقلت : خلاص يا أمي أبروح أشوفها والله يكتب اللي فيه الخير..

ذهبت وشفتها وشافتني ، وشاف بعضنا البعض ، وأحسست بأنها هبة ٌ من الله ، وأحسّت بأمي مـَلك منزل من السماء، المهم اننا صلحنا لبعض وقلت لوالدها متى نعرس

عدت إلى المنزل وبغيت أصدم مرتين لأني مازلت أرى صورتها أمامي ولا أرى غيرها في الطريق ..

قلت لأبي خلاص ترى الامور تمام بس قلي كم هو المبلغ الذي تقدر تساعدني فيه؟؟
قال: والله ياوليدي عندي 30 ألف ريال
قلت: الله يجزاك خير ويطوّل عمرك

أخذت الورقة والقلم وبدأت أحسب التكاليف الاوليه لزواجي من مهر وحفلة للزواج وسكن وأثاث ولبس وهدايا ، فوجدتها بحدود الـ 100 ألف ريال وتزيد قليلاً ( من واقع المحيط اللي أعيش فيه ولاّ فيه ناس يكلفهم أكثر بكثير وفيع ناس يكلفهم أقل بقليل)..

30 ألف من الوالد + 10 آلآف قد تأتي من هنا وهناك + 60 ألف قرض من البنك ،، حلوين حلوين كملنا 100 ألف..

أبشركم تملكت وراح جزء من قريشاتي للمهر، وصارت ساره( تدرون ليش ساره؟؟) زوجتي على سنة الله ورسوله ، وصرت أغازلها بالتلفون عااادي مرتي ما فيها شي ، وأنواع النصب على بعض والبرستيج الكاذب يلعب لعبته..

تسألني زوجتي وش يعني لك البحر ؟؟

فأقول: يعني لي الأمل في اللقاء
وأسألها وش تعني لك السماء ؟؟

فتقول: تعني لي الصفاء والنقاء

وسواليف مالها سنع من هالخرابيط اللي تحوّم التسبد لكن وش نسوي مجبورين..

ثم ندخل بسواليف تنظيم العرس، ونطلع منها لسواليف شهر العسل

أسألها: وين تبين نقضي شهر العسل يابعد عمري ؟؟
هي : ياحبيبي أنا راح أكون سعيده معك بأي مكان
أنا : داري ، لكن لازم تتحددين مكان
هي : لأ أنت حدد
أنا : لأ أنتِ قولي
هي : لا لا لا ، أنت اختر أي مكان
أنا : لا يكثر وقولي وين تبين
هي : خلاص أحرجتني، خلنا نروح لباريس
أنا: وشو؟؟ باريس باريس!!

هي : أو لندن كان تحب

أنا : شوفي ياحياتي لندن حلوه وباريس أحلى لكن الله يرحم والديك خلينا نروح للشرقيه أول وبعدين انشاء الله نروح لجزر الكناري
هي : لأ الله يخليك حبيبي ودي لو مره بحياتي أروح للخارج
أنا : نبي نروح ان شاء الله لكن اذا طلع البرد
هي (مخفه): أجل خلاص نروح للخبر وبعدين اذا جاء الصيف نروح لباريس ، بس توعدني
أنا : أوعدك ياقلبي ( وفي نفسي ايه هيّن تبطين مارحتي باريس )

وجاءت ليلة الفرح ، والرجال جالسين بالقصر كنهم بعزا والحريم يرقصن ويستانسن ، وقضى العرس وكلن راح لبيته ، وطرت أنا و ساره إلى عش الزوجيه..

وبعد مرور شهر زوجتني تصحيني للدوام وتقول بصوتها المهبول:

قم يا بعد عمري لا تتأخر على عملك ..

ثم تذهب للمغسلة وتفتح الماء الساخن(عشان من أجل إذا جيت ولا الماء حار) وتأخذ فرشة الأسنان وتحط فيها شوي معجون وتقول : تعال وغسل خشتك وفرّش أسنانك ياحشاشة جوفي ..

ثم تذهب مسرعة إلى المطبخ لتضبط لي القهوة وتصف لي القدوع ، وتحشي لي بيدها الناعمة صامولية حبنا..

وبعد أن أفطر معها، تأخذ يدي لتوصليني إلى باب المنزل قائلة ً " اذهب في حفظ الله ورعايته وانتبه لنفسك"

وما أن أصل إلى عملي ، يرن هاتفي الجوال وانظر الشاشة لأجد زوجتي في الموعد وكأنها قد علمت بأني وصلت سالماً غانماً..

وعندما تكون الساعة الحادية عشر ، تأخذ زوجتي المملوحه ورقة وقلم وتتصل علي وتقول " طلباتك بالغداء وهل تريد اللحم well أو well done ؟؟ ..

وعندما أعود إلى المنزل أجد رائحة العطر تتطاير في أرجائه ، وتهب زوجتي مسرعة إلي لتستقبلني كأحسن ما أنا مـُستـَقبل ، ثم أذهب للغرفة لأرتاح قليلاً وبينما أنا هناك إذا بها تنادي " تعال أيها الوسيم النائم ترى الغداء ولام "

وبينما نحن جالسون نتمالح الغداء ،
قالت : تذكر يوم توعدني اننا نروح لباريس؟!
أنا غصيت وقلت: هــاه ؟! متى قلت هالكلام؟؟
ضحكت و قالت : بسم الله عليك أمزح، بس حبيبي أريد أن أذهب إلى السوق اليوم كان ما عندك شغل
قلت: أبشري يابعدهم ، وكم يكفيك من الدنانير؟؟
قالت: مايهم اللي تقدر عليه
قلت: ياحلوة اللبن ، يكفيك ألف
قالت: لا الالف كثيره ، يكفيني نصفها

وبعد صلاة العصر ذهبنا سوياً الى السوق وأخذت زوجتي حاجتها وقالت:
خلاص خلنا نطلع من السوق ملـَيت

فقلت: لا ، خلينا نتمشى شوي

ولكنها أصرت على الخروج ، فخرجنا وعدنا إلى البيت ، وبعد صلاة المغرب ضبطت لي قهوة تعدل المزاج ، وبينما نحن نحتسي القهوة ونضرب في السكري ، قالت:

ودي أروح لأهلي أقعد عندهم شوي

فقلت: ok ، وأنا سأذهب لأحضر بعض الحاجيات للمنزل

فذهبنا إلى بيت أهلها وعندما وصلنا قلت لها:

ترى أبجي آخذك الساعة 11.30 ، لأن عندي دوام بكرا ولا ودي أتأخر

فقالت : وليش تجيني 11.30 ؟!! تعال الساعة 11

قلت: وهو كذلك،،

وعندما صارت الساعه العاشره و خمس وخمسين دقيقه لبست زوجتي عباتها وأنهت جميع السواليف مع أهلها كي تكون مستعده للخروج من المنزل حالما أصلها..

وما ان وصلت بيت أهلها ، اتصلت عليها لتخرج ، وفي غمضة عين لقيتها بجانبي..

ياسلاااااااااااااام على التفاهم أنا وزوجتي حياتنا هادئة جميله..

مرت سنه وكأنها لحظه عشنا فيها أجمل الاوقات، ومرت بعدها السنه الـ 2 والـ 3 والـ 4 وكان لابد من المشاكل والمنغصات ولكن إجمالا مازلنا نعيش أجمل اللحظات...

تدرون ليش أنا وساره مبسوطين؟؟ لأن أنا رجل بعمري وعقلي وهي حرمه بعمرها وعقلها

ههههههههه و هههههههه بعد ثانيه ، يا حبي لي جالس أتخيل مرتي

، اللي يلقى لي زوجه تتعامل معي بنفس تعامل ساره سأكون له من الشاكرين اللافزين دراهم بمخباته ;) عااادي شغل خطاّبات

الصراحة إن هالوقت لا الرجال رجال ولا الحريم حريم ، يعني اليوم نبارك لهم بالعرس وبكرا نتوسط بينهم ونحاول نحل مشاكلهم..

ياجماعة المشاكل كثرت ونص اللي يتزوجون اليوم ينفصلون بعد شهر أو شهرين ، وكثير من الناس يسولفون بموضوع الطلاق وأسبابه خصوصا للأزواج الجدد وكيف نعالجها ، ودائما ما ينسون أو يتناسون السسب الأهم من وجهة نظري وهو بكل بساطة وعفوية أن المعاريس بزرااان ما يعرفون يتعاملون مع أبسط المشاكل...

22 سنه و23 و 24 هذولا أغلبهم اذا نظرنا إلى أعمارهم وأجسامهم نقول إنهم رجال ، لكن عقولهم بزرانيه رائحة إلى وطي ونفس الشي البنات (ولن أقول حريم)..

مشكلتنا الولد والبنت إذا قضوا من الجامعه قالوا اللي حولهم زوجوهم على طول بغض النظر عن عقولهم وتفكيرهم، ياجماعه منوّل الطالب اللي بالمتوسطه تلقى شنبه يوقف عليه الصقر والحين تلقى الذباب يسبح بالسعابيل تحت شفّته، وهذولا الى هالحين يقولون لأبو 22 سنه تزوج!!

بكل أسف أجدني مضطراً مجرجراً مسحوباً إلى أن أقول أن تأخير الزواج إلى أن تكبر عقلية الزوجين هو حل وطريق لحياة زوجية أكثر هدوءاً وسعادة ، وهذي وجهة نظري من خلال اللي أشوفه.

ولقياس عقلية الرجل والمرأه شوفوا تصرفاتهم واهتماماتهم وستعرفون أن أغلب من يسبحون في بداية العشرينات ما عندك أحد..

ولهذا فاني انصح كبار المسؤلين في الاسرة( ولست بأكبر منهم علماً وخبرة ً) بصك المزلاج على من أراد الزواج من البزران .

.
.
.
.
وتقبلوا تحياتي واشواقي،، ولا تواخذون أحياناً تمسك معي أكتب وأدخل اربعطعش سالفه مع بعض، بس ان شاء الله ما تطول هالحاله..

لحظه شوي ،، تذكرت واحد من العيال تزوج وحده أكبر منه بـ2 سنه ، يوم سألته وشلون ماشاء الله عليك قررت هالقرار؟؟
قال يارجال ودي أتزوج ولا ودي آخذ بزر

ياحبي لك يابو خالد الفكره صح لكن التنفيذ غلط

..فماااااااااااااان الله..

(ياجماعة عليك بأمهات الـثلاثين)