بسم الله الرحمن الرحيم

شوفو القصة هاذي صارت لي وأنتم الحكم وأعطوني آرائكم لما حدث .

الساعة 7 مساء جاني اتصال من زوجتي .

زوجتي : السلام عليكم .
أنا : وعليكم السلام
زوجتي : تعال ابو فهد الحق علي فهد أكل حبوب الظغط حقت الوالدة ..
أنا : يالله انا جاي اللحين ماتدرين كم أكل حبة ؟ >>> أسلوب تهدئة لام فهد العزيزة

زوجتي : مادري طلعت من فمه ثنتين والظاهر بلع ثنتين .

أنا : لا إنشاء الله بسيطة حاولي تخلينه يتقيأ لين أوصل لكم خمس دقائق بس .

غيرت وجهتي واتجهت على البيت وأنا أدعي رب انه يستر على ولدي وواجه ذيك الإشارة واقسم بالله كان لونها أصفر .

لو أنت في مكاني هل ستقف للإشارة ..؟

طبعا عديت الإشارة وأول ماتعديتها صار لونها أحمر . وكان في سيارة مرور منخشة تحت شجرة تصيد اللي يقطعون الإشارة .

مشيت في طريق واتفاجأ بوجود نقطة تفتيش وقفت عنده قال لي رخصة وإستمارة قلت له ياطيب أنا ولدي ماكل حبوب ضغط وماعندي وقت للرخصة والإستمارة وربي ماازود عليك في كلامي .

قال لي : رجل المرور المحترم . علينا التصريفات جيب الرخصة والإستمارة ووقف على جنب واركب الباص ولاتكلمني .

قلت : يالغالي وربي الولد لو نزل عنده الظعط يموت حاولت افهمه اشرح له . عطاني ابتسامة . وقال الأعمار بيد الله يالله عجل علي وقفت السير . طبعا عطيته الرخصة والإستمارة . وقال لي وقف على جنب . >>>>>>>> " ايه هين يبي يوقف "

وحط رجلي من عنده وانطلق للبيت يالله لو تشوفون وشلون العرق يصب من ولدي والجو برااد ماتصدقون . أخذت الولد وزي البرق انقز لمستشفى اليمامة عيادة الأطفال وهم ماقصرو هناك ولله الحمد والمنة سوو للولد غسيل معده وقالو لازم يكون عندنا تحت الملاحظة 24 ساعة .
" اقسم بالله منظر الليات وهم يدخلونها بفمه وبكاء ابني خلاني ابكي حسيت ان نهاية فهوودي قريبة .

اتصلت على زوجتي وقلت لها الولد بخير بس لازم يجلس عندهم 24 ساعه وطمنتها . وجلست ذيك الليلة في المستشفى .

نسيت سالفة الرخصة والإستمارة وماتذكرتها الا بعد ثلاث أسابيع من السالفة وقلت يالله نروح الناصرية ونشوف وش يقولون .

رحت الناصرية ودخلت قسم المرور وقلت لهم السالفة . قال لي ياحبيبي وحضرتك مين علشان تنحاش . قلت انا مانحشت السالفه ومافيها وقلت السالفه . قال اقول التصريفات هاذي قلها لأصغر عيالك . " كذا الأخلاق والا بلاش صح ياأمن الدولة "

المهم جاب لي الرخصة والإستمارة وكان موجود نفس العسكري اللي ماخذها . قالو ماتطلع من عندنا الا مسدد القسايم . " قطع إشارة وهروووب "

أنا مااذكر عندي غير القسايم هاذي . واتفاجاأ بوجود مبلغ في القسائم وقدره خمسة الآف ومئتين ريال .

سالت قلت وش السالفه قالو قسايم عليك زمان قلت ياجماعه انا في حياتي اخذت قسايم قالو سدد والا وضعناك في الحجز قلت لا لازم اعرف وش القسائم .

طلع رجل المرور الحبيب الطيب اللي مامثله عنده رخصتي واستمارتي ويروح لم أخوياه ويقول يالله اكتبوا قسايم على الشخص هذ1 عشان يتأدب ويحترمني ولاينحاش من عندي مرة ثانية .

ويوم رجعنا القسايم طلعت بأسماء عساكر مختلفه وعددهم سبعة عساكر قلت طيب وش الحل .؟ قالو : سدد وخذ استمارتك ورخصتك وبعد قدم شكوى على العسكري .

أمرنا لله سددنا القسايم وطلعنا واشتكينا وصار على السالفة عشرة شهور وأنا اراجع وكل واحد يصرفني وحتى الآن لم يؤخذ لي حق .

ياترى كم من الناس اخذ من المخالفات المرورية ظلما ....؟

ياترى هل يتم محاسبة العسكري على كتابة المخالفات ..... .؟ اللي اعرف اللي يخلص دفتر له اجازه يومين .

ياترى لو وقفت لهم في ذاك اليوم وانخفضت دقات قلب ابني وتوفي ماذا وقتها سيحدث .؟

ياترى هل العسكري الذي كتب لي المخالفات مع زملائة ستكون لهم نقود هذه المخالفات .؟

ياترى لو كان العسكري هو " ابو فهد " وحصل له ماحصل لي ماذا سيعمل .؟

في النهاية " لاحول ولاقوة الا بالله " وحسبي الله عليهم ونعم الوكيل "

د هدف

البارق

إقتباس الحمد لله على سلامة الولد وهذا هو المهم

الله يسلمك ويسمنك

إقتباس أما من جهة رجال المرور حدث ولا حرج

والله عارفين ان نصهم ماعندك احد وغالبيتهم مخدرات وجاهليين وأميين

إقتباس صحيح النظام مطلوب وتطبيقه واجب على الجميع .. لكن والله إن نصف هالعساكر يبي لهم تأهيل من جديد

قبل مايتكلمون عن النظام خلهم هم بأنفسهم يعرفون النظام وربي نص رجال المرور مايطبقون النظام .
أما يبي لهم تأهيل وأنت الصادق يبي لهم لجنة تحقيق وتكون صارمة معاهم .

إقتباس تصدق ولد عمي لقى عليه مخالفتين في بقيق مع إنه طول حياته ما راح لبقيق ولا شافها

قبل ماتصير لي السالفة مااصدق لكن بعد السالفه لا والله اصدق اجل شايب جائ لهم معارض يقولون عليه قسيمة وهو يحلف انه مايعرف يسوق أبد .

إقتباس على العموم لو إنك مأخر نفسك دقيقة واحدة كان ما حصل اللي حصل

ولاا فكر أخر نفسي ربع ثانية حتى لو كان على موتي أهم ماعلي عيالي وصحتهم .

إقتباس موفق دوم يا ابو فهد والله يحفظك ويحفظ فهد

آآمين ويخليك يارب مشكور على مرورك الأكثر من رائع .