#1  
قديم 01/12/2006, 04:23 PM
شبكة الزعيم
تاريخ التسجيل: 06/12/2005
مشاركات: 15
مجلة طريق الإقلاع .. > العدد العاشر < ..













وانهطل المطر ، بقطرات كالسعد تذوب ع الندى ، وارتوت أرضنا بـ الماء وجرى كنهر يملأ السد وبه الوادي ينعم ، سحاب أطل فوقنا بـ سمائنا ورعود أرجفتنا خشية لـ ربٍ له كل الخلائق تسجدُ ، أجواء باردة وسحب غائمة ونفوس طالعة ..

هـ نحن لازلنا معكم ، نركب سوياً بـ طائرتنا " كشخه عندهم طياره " التي تجوب الآفاق وتشق السحاب وتداعب هياكلها قطرات المطر المنسكبة من عنان السماء ..

بلا فلسفه ، هذا العدد العاشر نصب أعينكم ، تمعنوا فيه كيف شئتم .





مساكم الله بالخير واسعد الله صباحكم بالمسرات وعساكم سالمين
وعلى طاري سالمين وكون الإخوة بمجلة الإقلاع وهقونن وقالوا نبي تكتب لنا مقال
ساخر أو مضحك حزتها بحلت أنا بأه .! وش شايفينن الهليل !!
رحت لفيديو الماسة وقلت لهم عطونن كل مسرحيات مصر وترى كازتن الماسة
قالوا مسرحيات آكو ماسات ماكو .. قروشك الله لا يهينك .. المهم ما لكم بالطويلة
خلكم على القصيرة بذبذبه قدرها 25 درجه شرقاً AM ...... أيام اللولو قصدي أيام الثانوي
وتحديداً أول ثانوي شرى لي الوالد هوندا اكورد سوداء اللون اللي عيونها تتغبى وتطلع
تقل ضفدعه يحلفون ما كملت 80 كيلو وانا امرنها بالحارة راجع للبيت ابشيل عشاء للوالد
عازمن بعض العمام جايين من الرياض على البحر وقبل البيت بثلاث تقاطعات كان فيه سيارة
واقفة مزدوج ولا فيه إلا مسار واحد .. مشيت معه وأتفاجأ برجل يقطع الشارع فما كان مني
إلا أن ظفيته من الكبوت على التنده على الازفلت فتدحرج بصراحة كان يمديني
أتفاداه بس كان خياري الوحيد يا اقشعه يا اصدم السيارة المتوقفة بوسط الشارع طبعاً فضلت
الجسد على الحديد .. حرام السيارة جديدة وحسافه تنصدم المهم الرجال طلع أبو جيراننا
شالوه للمستشفى بعد الكشف عليه جى للمرور وطلعني طبعاً ما دخلوني للتوقيف
لان مدير المرور كان صديق الوالد بس الوالد كان مطنقر خربت عليه العشاء وسحبت عماني وراه
للمرور والمستشفى ... المهم الوالد قرر يبنشر كفرات الهوندا ( امحق هديه ) يشتري لي سيارة
ويبنشر كفراتها .. رجعت للسيكل ورجعت الرفرف اللي قدام وحطيته ورى وشريت
سفنجات غسيل وشبكتها بالاسيام وطلعت كني باكستاني مضيع دربه جلست على هال حال
أسبوع طفشت وقررت السفر عند خوالي .. ثاني يوم قال خالي رح وأنا خالك جب وايت ماء
شغلت الددسن غمارتين ورحت في أمان الله لا لي ولا علي كان الشارع محدد برصيف على الجوانب
وبوسط الرصيف تراب مابعد حطوا البلاط وكان جنب الرصيف تراب على الازفلت فجأة يا كثر فجأتي
طلع لي مصري على صبح خميس رايح يدرس خصوصي للراسبين أنا مسكت فرامل زحفت الددسن تبي
أي ماصوره ما دريت إلا الددسن متوسطه ماصورة عدوان اللي يعرفها المتينة ذيك المهم إني جالس
مكان السواق والصندوق جنبي من الجهة الثانية .. المصري قال أنت اللي طالعن على
رحت للبيت أبعلم خالي لقيته يسبح بالحمام ويغني الطشت ألي الطشت ألي قلت اطلع
شف الطشت متوسط الماصوره بعدها بيومين كان عند خالي الثاني ميتين أل اللي بها كمبيوتر
اللي يقول إن الباب الخلفي مفتوح وكان عند خالي مباراة العصر وأنا جالس أتفرج
إلا الكمبيوتر يقول إن المفتاح في وضع التشغيل صفرت لخالي وأشرت له إني بروح قريب وبرجع
هي لفتين على كم شارع وأنا ابحث بالأشرطة إلا ذاك اللي ماخذ الريتيرن ومديور بقوه ولا كن احد
جاي على ميتين ال اد الدنيا .. ما يمديني ارفع راسي إلا وأنا راكب أنا والميتين أل جنبه
طبعاً كالعادة أنا المخطي حيث أني صغير وهم الكبار اللي ما يخطون .. درى الوالد وقرر انه
يشنقني طبعاً ما هجيت ولا شي بالعكس رحت له وقلت تبي تشنقني اشنق موب أنت أبوي
وأنا ولدك اللي يحبك اشنق يقالي ابستعطفه ما دريت انه كاع لخوالي قيمة تصليح السيارتين ..
بصراحة ما شنقني لا ... إلا ربطني بحبل وجرني بالموتر لين تزلغ جلدي عادي أبوي ويمون
لا عاده الله من أسبوع سميته أسبوع الحوادث .. السنة اللي بعدها كنت عاقل وش حليلي
وجى غزو الكويت والوالد يبي يرجع للخبر فا قلت أنا اللي برجعك تعرفون عنده دوام والخبر
صايره مدينة أشباح فاضيه .. في هاك الليلة شفت لي غريب داخل للديره قلت خل الحقه
أشوف منهو لا يكون عراقي متسلل وكانت مطر وبعد مطارده يائسة قررت إني أتجاوز السيارة
علشان اسكر عليه !! أول ما لفيت أبحده إلا هاك الماصوره تحتريني وتعرفون مع المطر ما شفتها
وكانت طافية لمبتها وقرقع !! رجعت للبيت وغطيت السيارة وقلت لأهلي فكني الله
صدمت بعير صاحوا شوي ونمت وقلت لهم إذا جاي أبوي لا يصحيني لأني متأثر .. بصراحة صحيت
على ترفيس لان الديره صغيره والخبر ينتشر بسرعة قال بعير قال ,,,,,,, ومن بعدها رجعت
للسيكل وصرت كل ما أشوف تقاطع انزل وادف السيكل مثل الهنود حرصاً على سلامة الآخرين ...
وسلامتكم والحمد لله بس حبيت أوضح إني ما قد صار لي آي حادث بحياتي


بقلم .. سهل





"مردخاي" قصيدة تلامس الواقع كثيراً خصوصاً في ما تفعله "اسرائيل" خلال مفاوضات "السلام" مع الفلسطينيين ...

واذا قرأنا ما قاله شاعر هذه القصيدة الأمير عبدالرحمن بن مساعد حيق قال : (إذا كان أسلوب اليهود في المفاوضات مع نبيهم موسى عليه السلام . الذي يؤمنون به .. كما ورد في سورة البقرة .. فكيف سيكون أسلوبهم في المفاوضات مع أعدائهم ؟) سنعرف حتماً ما هو المقصود من هذه الرائعة ،،،


لن أطيل عليكم ... سأترككم مع قصة مردخاي .. سيد الزمان الجاي !!

اليكم القصيدة :



سمعتوا قصة مردخاي .. ؟!
من زمان قالوا لخوكم مردخاي
" مردخاي هذا زمانك جاي "
شفت هالخوان قاتلهم .. خذ أرضهم .. اهدم منازل بعضهم .. وشردهم
غيّر معالم ارضهم . .واطمس ملامحهم ..فرّقهم وتصير سيّدهم !!
وامسك بتلمودك ودينك .. وبعّثر مبادئهم
وبعد ماتزرع بذور الحقد فيما بينهم .. وتحصد مشاعرهم
قد ماتقدر حيّد اكبرهم .. رد له كامل حقوقه
واعزف على اوتار فرقتهم
واضرب أغناهم بـ افقرهم
حاربهم بهم .. واشعل معاركهم
وبعد مايستنزفوا قوة بعض ..
خذ مابقى منهم .. وفاوضهم
فاوضهم على الفتات ..
واذا عطوك حق الفتات .. رجّع لهم ربعه
وسالمهم
هذي قصة مردخاي سيد الزمان الجاي
عاجبكم ؟!










إقتباس
المستقبل لازال واعدا يابن الشلهوب .. ومحبة الناس تحيط بك من كل جانب .. وطلبنا أن يكون الرد صاعقا لهم .. عبر المستطيل الأخضر .. وأنت لها يابن الشلهوب ..

صح لساانك



إقتباس
بداياتي في تصليح الشاهي كانت ماتبشّر بالخير ..يعني دايم اخلّيه خفيف وحلاه زايد
من يقول الزين مايكمل حلاه ,,

وماكنتِ تخلين المويه تغلي زين :p



إقتباس
ولكن الأدهى والأمر من ذلك بأن خلفان لم يكن أبداً متفوقاً على الشلهوب في نقاطهم التي أقاموا عليها الترشيح !

الله حسيبهم .



إقتباس
وبهذا سوف تكون موبايلي هي أول شركة سعودية تقدم لعملائها خدمة «البلاك بيري»،

ماهقيت الإنفصالات تخليها



إقتباس
انامن الرياض بس ولدت في جده وعايشه في جده ومكه وادرس في مكه

ومااتكلم زي اهل الرياض

ارضي بـ حالك موب لازم تحسين نجدي :p .






فـ هذه الزاوية ، نعرض لكم مواقف يرويها محبين الكشتات .. فـ إليكم اول المواقف التي حصلت مع اعضائنا الأعزاء :

والله المواقف كثيرة لكن المشكلة إن بغيتها تضيع ..

لكن ممكن أذكر هالموقف وهو ماهوب لي بشكل مباشر لكن مع شلة الدجة اللي هم خوياي الخاصين ..

بداية الموقف إننا في احد الطلعات تزهل لنا أحد الشباب إنه يجيب دباب وفعلا جابه وما شاء الله الدباب جديد ..دخلنا البر وواحد من الشباب على هالدباب ..وإلى الحين ما جت السالفة ..

أول ما حطينا الرحال وفرشنا الفرشة ( طبعا هي طلعة يوم ) بالعادة كنا ننقسم لقسمين قسم يشب النار ويضبط القهوة وقسم آخر يروح يحطب

طبعا الاحتتطاب عندنا ممنوع لأنه بصراحة الناس ما تنعطى وجه ..

من حُسن أو سوء حظي إنهم قالوا لي ذاك اليوم أنت إجلس سو القهوة ولا نجي إلا أنت مضبط الأمور ( طبعا قالوها باسلوب زين وبدون أي سب )

الشكوى لله وافقت ( غصب علي لأن أميرنا نشيط وما أحد ينطحه ) ..

عاد تخبروني شقردي ما يحتاج بديت بسواة القهوة والشاهي وشبيت النار على بعض من العيدان البسيطة ( عشان القهوة بس وإلا الحطب جاي )

طبعا الشباب راحوا حتى إن القهر إنهم اخذوا الدباب والددسن ما بقى عندي إلا الجيب اللي فيه الأغراض ..

القصة الآن يرويها ( أبو علي ) أميرنا واللي ما أحد ينطحه لأنه قوي

يقول حفظه الله ووفقه دوما وأبدا والله يكفينا شره :

إننا بعد ما رحنا بدينا نحطب ، ( وعاد ما شاء الله صوتهم يسمعه اللي ببيوتهم والحطب اللي يجيبونه حق يوم يكفي لسنة )

المهم مالكم بالطويلة

أبو علي أميرنا بصحن الددسن يرص الحطب ، وما درى إلا جيب الزراعة جايهم من بعيد

صوت لسواقنا يقول له جاء الجيب !! انحش !!

خوينا ما صدق يسمع الكلمة .. على طول شغل الموتر وحط رجله ...!!


لكن الغريب إنه باتجاه جيب الزراعة (( الله من زين النحشة ))

( حتى إنهم يذكرون إن راعي الجيب يحسب خوينا بيسوي فيه عملية انتحارية )

طبعا وهو يصوت : أبو علي ..غط الحطب

بعد ما مر من جنب جيب الزراعة يقاله منحاش عنه إلا وذيك الشجرة اللي مرت علينا - الحديث لأبو علي - وهو مغطي الحطب بجسمه

بعد ما نطوا ذيك الشجرة أظنهم نطوا مسافة مترين طبعا أبو علي فوق الحطب .. وما أدري وشلون تتخيلون واحد فوق الحطب وناط مترين وش بيصير له
بعدها أبو الشباب سواقنا وقف الموتر وقال أبو علي ..شكلهم مسكونا

طبعا الاستفهامات ما فارقت الجميع بما فيهم راعي جيب الزراعة .. إلا سواقنا اللي ما أدري وش يبي بفكرته ذي لأنه إلى يومكم وهو يشوف نفسه مسوي الحل الصحيح ..

طبعا عاد وقفهم راعي الجيب وأخذهم للمركز حقهم وصادر الحطب والإجراءات إنهم يصادرون السيارة بعد .. لكن الحمد لله بعد حب الخشوم اكتفوا بتعهد خطي وفكوا ربعنا .. طبعا بدون حطب ..

نسيت أقول لكم وش صار على الدباب .. طبعا أول ما مسكهم جيب الزراعة خوينا راعي الجيب اللي فيه الأغراض جاء على الدباب ووقفه فوق النفود ونزل يركض

قلت له وش فيه ..رد علي بسرعة وهو يشغل الجيب يقول الزراعة شالت العيال ومشى

طبعا هم رايحين يحطبون العصر وما رجعوا من المركز إلا بعد صلاة المغرب وأنا أصلح القهوة وما عندي ولا التمر لأنه بالجيب يعني أنا والدباب والقهوة

لكن يوم رجعوا قلت له ليش وقفت الدباب فوق النفود ..قال لي عشان ما يشوفه راعي الزراعة


عاد ذيك الليلة اللي ما يشتري يتفرج تعالوا وشوفوا وش كانت سواليفنا :p

لكن خرجنا إننا أطلقنا على تلك المهمة بــ " الهــروب الــكـــبـــيــــر" ..

مشاركة .. البارق



يــاهــلا ومسهـــلا بالحبايب ..
كيفكم والجــو .. هاليومين الله لا يغير علينــا أمطــار وبركه الحمد لله ..
والشباب ماغير مراكض للبراري والطعوس .. الله يرزقهم مايصدقون خبر
بس يسمعون ان فيه مطر معاد تشوف الا غبرتهم من قدامك << مو من ظمنهم

تحذير:
قبل الرحله اربطوا الاحزمه لان الاقلاع مش ولابد الحامل تنزل ..
واللي فيه سكر لا يسكر اليوم .. واللي فيه ضغط وش جابه اصلاً
وفيه أكشن .. اصحاب القلوب الضعيفه الرجاء يقوونها شوي
<<فاندام


ما ابي اطول عليكم الهرجه وهي طويله :p

انتم عارفين ان أيــام الأمطار محد ينثبر وينطق في بيته .. كل الناس تهجهج من بر لبر ..وانا من ضمنهم .. في هذاكـ اليوم كانت لنا رحله إنما ايــه مع الشباب .. ورحلتنا ماتخلوا من الاقلاع لأن الشباب كلهم مجموعة شله دايخه

المهم اتفقنا وقلنا خلاص ووزعنا المهام .. انت جب كذا وانت جب كذا ..ولازم فيه معارضات بس نقول لاتدلع ترى في انتظار غيرك ..نصيحه : لازم تآخذون واحد يبغى يروح وانتم ماتغبونه .. وبقول لكم وش فايدته

المهم ورحت انا آخذ العزبه مع انها الظاهر من سنه محد جايها بس واثق ان فيها كل شي..:p ورحت اقول للوالده يالله ترا بطس للبر وبمسي فيه .. قالت وانا امك البس تراه برد قلت اكيد اني بلبس اجل بروح ***** :p

وجاء وقت الروحه .. وكنا متواعدين الفجر .. وانا اللي انتظر وانتظر وبعد انتظر <مسوي تشويق ومحد جاء .. قلت بتصل وبشوف .. اثاري كل واحد معتمد على سيارة الثاني وقلت وانا معصب جهزنا الديك وطار الماء
واحد قال السياره خربانه والثاني قال ماتدخل سيارتي <مهوب اهو
والثالث قال مع اخوي راح يطعس
المهم نط واحد من اللي يتمرجلون وقال انا لها < مسلسل ديني :p
وهو اللي قلت يبغى يروح واحنا مانبيه <شفتوا فايدته الحين :p

ومرنا بالجيب ورحنا واحنا بالطريق كل واحد يذكر الثاني اغراضه وفجأه وفجأه <قايل لكم تشويق
قلت وين ماطور الكهرب قالوا يووووه مع سلطانبير <هذا اسمه سلطان بس نسبه لشكسبير صار سلطان بير .. قلت وين سلطانبير ؟ قالوا نسيناه
وش لون تنسونه هو كيس تنسونه قالوا مو مشكله نجيبه ..

المهم رحنا وجبناه لقيناه يغلي عند الباب .. بسسكتناه بكم كلمه حلوه <فيه عرق مصري:p ورضي على طول .. ورحنا ولما وصلنا قالوا يالله انصبوا الخيمه وناس يزينون القهوه .. نط واحد وعكر الجو نسينا السكر وجع وشو سكره انا حاطه في العزبه .. قال لا ماشفت إلا نمل يفرشون اسنانهم شكلهم قضوا عليه
يووووووووووووووووه خلاص زين قهوه .. وزين القهوه وشربناها
بس ترى قهوه بريه يعني بنكهة التراب يمكن بعدها


وسوالف وحش وكذب لما جت الساعه 11 قالوا بنروح نقيل <امحق طلعه
عاد انا مستنشط قلت طسوا .. انا نشيط ومافيني النوم .. قلت وش اسوي وش اسوي رحت قلت بآخذ السياره وبروح اتمشى شوي واخذته وادق سلف
وكان الجو روعه وجلست اتمشى ومافيه حصاة الا رقيتها .. ولا حفره الا طبيتها <متبع جلد مو جلدك جره على الشوك وانا توني اجر على الشوك الا والله اكتشف اني بعدت عنهم قلت ماله داعي ياذن الظهر وانا بعيد مالهم غناة عني << مو خايف ترا .. وانا راجع وداعس إلا واطيح بذاك الجرف وتتعلق السياره يؤ يؤيؤ وش اسوي الحين واحاول يمين يسار يسار يمين فوق تحت ال ون ال تو مانفع .. وش السواة يابن العرب .. قلت مالي الا اروح لقبيلة الاعرج واقول انا دخيلك رجعني لاهلي


المهم انتظرت احد ومحد عطاني وجه ولا مر احد ولا فيه ابراج واللي مير يرحمني شوي واتهور واقول بروح على رجولي واروح امشي وامشي وامشي وكأني المح خيمه قلت اخيراً شفت كائنات حيه واروح داعس قلت بعد لايختفون مافيه الا اهم ولما قربت شفت الدلاخه اخوياي يدوروني واروح اركض لهم وانا فرحان واصارخ والمخرج حاط الحركه بالبطيئ وحاط مسيقه رومانسيه لاني وصلت لاخوياي ..


لما وصلت قالوا وينك قلت رايح الضبب <مسوي يصرف .. قالوا والسياره قلت حبيت امشر رياضه < رياضه وانت جاي تركض قالوا ايه قلت خلاص روحوا جيبوا السياره وانا بزين الغداء .. تبون مندي ولا مضبي ولو انه حدكم صينية دجاج

قالوا اي شي قلت طيب .. ولما جيت ازين الغداء صرنا ناسين الملح وش جبنا اجل .. مو ناقصنا إلا صاع ضروس وسداح ونصير هين هين يالضبان .انا عاد ذكي ويسموني عادل طون .. نسبه لأفلاطون قلت منين اجيب الملح .. تذكرت ان فيه واحد من اللي معنا يبي يروح واحنا مانبيه قلت بس هو اللي بيفزع لك .. واناديه قلت رح تسلف من الجيران قال طيب <شفتوا هذي الفايده الثانيه وراح يجيب وكل مانقص شي وصيته لما آخر مره طردوووه :p وصلحت الغداء وبغى يروح الغداء بما حمل لان واحد جاي مسر ويبي يوقف صار الشارع زلق بغا يروح في الخيمه والغداء وبعد هذي المعاناة قررت اني انوم واتركهم ويا رحلتهم اللي تلوع التسبد وما جاء المغرب الا حنا راجعين مع اننا ناوين نمسي بس كل شي ناسينه :p .. طبعاً هذا بعد الاختصار .. ولا كل رحلتنا مواقف وطلعات مالها داعي .. وماتنقال << بعد في غير كذا


مايستفاد من القصه .. ::
1/ اسمع كلام امك والبس لاني اول مارجعت صرت اقول بدال ماما بابا بسبب الزكمه
2/ لازم تآخذون معكم واحد يبي يروح وبيفحط علشان الروحه علشان تتشروطن عليه
3/ لحد يروح لوحده ويقول بشم هوا ترا مايرده الا حدود العراق :p

4/ الطلعه اللي يعتمدون فيها على واحد مثلي بيروحون في خبر كان



وفي الختام نستودعكم إلى أمل اللقاء لكم في طلعه جديده <<كنك خذت عليه :p
يالله قود باي

مشاركة .. الكلاسيكي





****




بالنسبه لـ الموقف ..


اذكر العام كنا في مخيم مع العائله وكان النظام انه يكون الغدا آخر النهار وبالنسبه لـ العشا يكون شيء خفيف .. عاد انا كنت مع حزب المعارضه على النظام هذا
جبنا مكرونه من المحطه وقلنا نبي نطبخها مع الحرص ان ماحد ياكل غير افراد الحزب
المهم كان فيه حراسه مشدده على خيمة المطبخ نخاف يجي قصف ولا هجوم مباغت
كملنا الطبخ .. وقلنا لازم ناكل قدامهم وجبنا قدرنا والصحن وحطينا البارد نبي نسوي شوي اغراء لـ الوجبه طبعا مافتحنا القدر الا في الخيمه اللي كانوا موجودين فيها الباقين .. ووليتنا فتحناها في خيمة المطبخ لاننا ماتوقعنا انه نبي نفتح القدر وننكبه وبدل ماتطيح قطعة لحم طاحت زراديه طبعا كذبنا الموضوع وقلنا يمكن عظم ولا شيء .. بس طلعت زراديه فعلا...!!!
قلنا يلا ماهي مهم نبي ناكل ناكل الله لا يعوق بشر .. طبعا باقي مكرونه في القدر وكملنا الباقي وماتوقعنا انه تبي يصير فيوز اللمبه بدل الكوووسه موجود
ماصارت مكرونه طلعت عدة بنشر في قدر
طبعا حاطين في راسنا اننا ناكل مكرونه واكلناها بالهنا والعافيه علينا .. وطبعا بدت التريقه علينا بس ياجبل مايهزكـ ريح .. وللحين ماندري من حط ذي الاغراض في القدر .. مع اننا حطينا اربع قدور مكرونه للي يقول عنه بس ماحد جانا وطبعا اكلنا المكرونه و ماجانا شيء ولله الحمد بس يقولون ان فيه ثلاث من افراد الحزب شافوهم صادين اخر الليل بعيد عن المخيم ماادري وش كانوا يسوون
طبعا المقادير للحين موجوده واللي يبيها يبشر فيها



*****



الف شكر لكم .. واتمنى لكم التوفيق ,,




اخوكم
...SoMe OnE...



والله المواقف كثيره

اذكر العام طلعنا لساموده وهي فيضه يم حفر الباطن
المهم شرينا من راعي غنم هريفي يحبه قلبك ;) واتفقنا نذبحه بعد يومين من شراه
ربطناه باحد المواتر وكان غثيث كل مابه يبي ينحاش الين حوطنا عليه بالحطب
من الطفش
يوم جات على قولتهم حزة الصفر واصبحنا وافطرنا وصلينا الظهر عزمنا نذبحه
فكه واحد من العيال يوم شافه هاجد لهى عنه شوي مادرينا الا هو مجلعد
الحق ماتلحق يلعن بليسه فيه نشاط هالهريفي موب صاحي سلفح بنا جميع ماقدرنا عليه , العجيب ان كل اللي بالفيضه مخيمين طلعوا يطردون معنا , قسم بالله تشوفهم من بعيد تقول يفتون كوره من الطردي , بالاخير تم القبض عليه الحمد لله
لكن للاسف ماذبحناه الا اليوم الثاني لانه اخذ مجهود موب سهل وماينفع تذبحه وهو يلهث وهذي صورة الضحيه المقرود

هذا احد المواقف اللي حصلت العام فاعتبروا ياراعين الكشتات

مشاركة .. ولد وايل




هلا والله بمجلة المقلعيــن
مشكووورين على الدعووه الحلوووووه في المجله الروووعه ..
اووووه الكشتات وما ادراك مالكشتات لا وبالشتاء انووواع الفلاتي لايحضرني موقف طريف <<<تقلد اي احد يستضيفونه ببرنامج
عندي موقف صار لي مهووب طريف بس ابقووله موقف حزين :sad: ..هذا مرتن من المراررريت .. تقريبا من اربع سنيين او خمس
طنت براس اهلي انهم بيكشتووون كان فيذاك الوقت ربيييع وخييير وعلووم طيبه ..المووهم اتفقوو اهلي مع عماني وطلعنا من الفجر
طلعنا لروضة الخفس كانت جنة الله في ارضه بساط اخضر ماودي الا مثل هايدي نتمددعلى ذيك الخضره
بس هيهااات والناس محاوطينا من كل الجهاات عاد تخبروون السعوديين لا طلعووو يسكروون على الحريم من كل الجهات وودهم لو يحصل يسكروون السقف بعد ..
عاد في الرووضه مايمديهم ماتدخل السيارات بس حنا جلسنا قريب من الشبك والسيارات
حطوو شراااع بس من جهه وحده المهم بصراحه كانت بسطه وجمعه ووناسه ..ولا فيها حركااات وتصوير فيديو للبزران وللربيع وللأكل
بعدين قمنا نتمشى تخبرون انحن يالبنات نحب التنزه بين احضان الطبيعه ..رجعووو بعض البنات الا انا وبنت عمتي اخذتنا السوالف وحنا نمشي..ويووم جينا بنرجع الطامه الكبرى ماندري وين معه اهلنا
انحن حاطين علامه تدلنا عليهم الجمس العنابي وبزارينا بعضهم لابسين بدل هلاليه
ويوم تلفتنا ورى اغلب السيارت مثل لون هالجمس وكثير لابسين لبس الهلال شووفو الشعبيه حتى بالكشته
ياربيــه وش السـواة ..والله خفنا بس نركض ومن زين الطبايع معنا جكيت احمر مغير نشّر فيه
كوود احد ينتبه لنا من أهلنا باين علينا اننا خايفيين من ركضنا جتنا كم حرمه وهدووونا وعطونا مويه الله يجزاهم خير
والله ابطينا على اهلنا انا خفت على ابوي فيه ضغط وبنت عمتي ابوها فيها سكر
وانتشرووو شباب العائله وحريم واطفال يدوروون علينا وحنا بس صيااااح تخيلوو الناس بدو يروحوون وبدا يظلم الجو
والجوالات مافيه ارسال .. والحمدلله لقيناهم بعد تخيلو تقريبا ساعتيين ونص او ازود والله لقاء مؤثر وامهاتنا مرره متروعات
ويصيحوون والحريم مررره متأثرات والبزارين يناظروونا تقل اول مره يشوفوونا طايره بوهتهم .. ورجل عمتي الله يصلحه مغير يهوووش علينا الله يقلع ابليسه حنا متروعين وطايحه عظامنا فيني حره للحين بدال مايسمي علينا ..والشغالات يدعن كسبي الله على روضة الكفس <<الترجمه حسبي الله على روضة الخفس بس ذيك بلهجتهن
عادخربنا طلعتهم حتى الغدا رحمته ماووكل اللومي مترزز فوق الرز ..والسلطه مقطعه وكل شئ موولم بس ماكلوووه مع ان بدايتها مرره روعه الله لايعييد ذاك اليوم ااذا تذكرته تجيني نفاضه انا وبنت عمتي عاد صار يسمون ذيك السنه سنة سنعه وبنت عمتها يوم يضيعوون ..;)
وهذا موقفي ادري طووويل بس تخبرون انا احب افصّل ..
يعطيكم العافيه على الدعوه الكريمـه .. والله يووفقكم ويحفظكم ..
دمتــم بخيــر..,,


مشاركة .. هلاليه سنعه





من المواقف الطريفة في الشتاء الماضي ..
أننا كنا طالعين للعاذرية ورحت أنا وواحد من خوياي بالدباب
نطاعس كان هو يسوق وأنا رديفه .. أبو الشباب كان مسرع
وكان في قدامنا قص حاد جدا وحنا عارفينه لكني استغربت انه متجه له ؟ ولا قدرت أتكلم لان الموضوع صار خارج السيطرة
ونطيح ذيك الطيحة القشرة ...
أنا أخذت دقيقة لين استعدت توازني .. وإصاباتي كانت طفيفة ..
أما خوي حالته حاله خشمه انفقع وبراطمه تشققت ..
المهم وأنا جالس أسعفه نادني وطلب مني إني أقرا عليه !!
استغربت من ها الطلب وأنا ما عمري قريت على احد
لكن لشدة الموقف بديت أقرا عليه سورة الفاتحة وكررتها سبع مرات ولما خلصت فتح عيونه وهو منسدح وتعبان وقال لي :
(( يا ماجد أنت منت بحافظ من القران كله إلا سورة الفاتحة ..؟
ياخي وين راحت المعوذات وأية الكرسي ..! ))
طبعا أنا انفقع بطني من الضحك عليه وعلى شكله واسلبوه
وقلتله قم بس قم ما فيك إلا العافية ...



مشاركة .. ماجد مقبل


كل الشكر لمن استجاب لـ طلبنا وسرد لنا مواقفه .







سنكون مع الابداع ، صاحبه الريشه الساحرة ، المبدعـه الــ قمرـــهـلال ، لنتحاور معها في طريق الابداع .. مع الــ قمرـــهـلال ..

كل الشكر والتقدير لـ الاخت " الــ قمرـــهـلال " على قبول الدعوة الكريمة لـ اجراء هذا الحوار المميز ..






حيا الله ضيفتنا [ الــ قمرـــهـلال] تفضلي أشربي القهوة ، وعطينا بطاقتس نشوفها بس قبل لاتعطيناأمسحيها مانبي صورتس تنتشر؟

الله يحييك ويبقيك ..
والله للأسف القهوه مانيب احبها ابد
إن كان عندكم لبن عشان التمر فياليت والله
بطاقتي :
طخمى واشق الوجه
صورتي في الطفوله


وماحطيتها وانا كبيره عشان ماتقصها الرقابه
الأسم : قمر وفي راويه اخرى ( تم تم )
تاريخ الميلاد : 15/15/ 1900 وحطبه
آنسه وماعندي نيه اتزوج ابد
بنظام ( فلها وربك يحلها )
مشرفه في منتديات القناص
بس هذا اللي عندي ...
بقي شيء ؟؟


سولفي لنا عن بداية طقطقتك بالكيبورد ووشلون دليتي طريق الشبكة


بداية طقطقتي طق الله راس العدو ..
أذكر البدايه كانت قبل دخول الأنترنت للسعوديه
وعلى ايام عز صخر وكان يروح يومي وانا العب البطريق
بعدها جاء الكمبيوتر وبديت على البرامج بسبب لقافتي الزايده في الإلكترونيات
وكانت البدايه مع النت في آخر عام 98 او اول عام 99 ناسيه الصراحه كم بالضبط ..
ودليت طريق الشبكه إن كاني ماني واهمه لقيته بالجريده بس اي وحده ناسيه ..
بس اللي متأكده منه اني من عرفت الكمبيوترات وانا ام اربع

2/الــ قمرـــهـلال ، مشاركاتها فـ المجلس العام نادره ! ماسبب ذالك ؟!
اسباب كثيره .. قبل كنت اغلب الوقت مشغوله في الديزاين وفي قسم الجمهور الهلالي



وبعدها انشغلت في منتديات القناص ..


وفي اسباب اخرى احتفظ فيها لنفسي ..



3/من خلال مسيرتك فـ شبكة الزعيم ماذا استفدتي؟
استفدت الكثير بصراحه
منها معرفة اخبار الهلال بشكل يومي ومباشر
خاصه وأن وضعي كأنثى لايساعد في القرب من النادي
وجودي في الشبكه منذ بدايتها
ساعدتني في معرفة بعض الأخبار الحصريه
والأهم من ذلك كله ..

ساعدتني في معرفة أن الرجال بقي منهم جزء مازال لديه رجوله وشهامه

من خلال بعض المواقف داخل الشبكه
وافتخر ان بداياتي كانت منها ولايمكن انسى فضلها



4/الــ قمرـــهـلال كيف كانت بدايتك في الابداع مع الفوتوشوب ، هل بالامكان الافصاح عن بدايتك في عالم الفوتوشوب؟
بداياتي كانت معارك
وكانت مع الإصدار الخامس وكانت مجرد تجربه وعبث في بعض الأدوات والخط فقط
بعدها صار بيني وبين الفوتوشوب خلاف عائلي وطلقته وحملت الفوتوبرش والثري ماكس
وصادق اللي قال ( ماتعرف قدري لين تجرب غيري )
يوم جربت هالثنائي عرفت قدر الفوتوشوب لسخافة الأول وتغلي الثاني
حذفتهم وحملت الفوتوشوب من جديد بعد حل الخلاف ودياً بيننا ..
وبديت اجرب كل شيء فيه واشوف تصاميم الآخرين لمحاولة التطبيق اكثر
بعد ماحسيت ان كل شيء جربته ومليت ابي شيء جديد
جات ظروف الدراسه والملل منه بحكم عدم وجود جديد
وانقطعت عن الفوتوشوب حوالي السنه
بعدها رجعت وبديت في الدروس الموجوده في المواقع والمنتديات
إلى أن تخطيت مرحلة المبتدئه ووصلت إلى مرحلة متوسطه في عالم الديزاين
ودعواتكم عشان ادخل عالم الإحتراف ..


5/ هل استطعتي تكوين علاقات خارج الشبكة مع العضوات الزعيم ، وماهي العقبات التي واجهتك بـ حكم أنكِ فتاة ؟!
علاقات خارجيه كما هي حال علاقات الشباب مع بعضهم في المنتديات لا طبعاً

كونتها من خلال الجوال فقط مع من كان بيننا ارتياح متبادل وتوافق في الأفكار
لكن لم تتم لقاءات ابداً ... ولا اعتقد انها ستتم حالياً ..
بحكم وجودنا في مجتمع سعودي ( يموت في الحتسي )
إضافه إلى ان معرفتي في اغلب البنات لما تتجاوز السنه او السنه وعدة اشهر
بالتالي لم تصل لمرحله قويه حتى تكون هناك ثقه لدرجة انني استطيع كشف هويتي كامله



6/ الــ قمرـــهـلال .. صاحبه الريشة المبدعه ، كيف تصورين المبدعين في الشبكة ، خاصه وان المبدعين عددهم قليلجداً وحضورهم متقطع ؟
ليست قمر الهلال هي من تصور وتقيم المبدعين في شبكة الزعيم
خاصه وأن نسبة 99% اعتبرهم في عالم المحترفين
ولكن اتفق معكم في ان حضورهم متقطع وبقوه
وربما لإنشغال الأغلبيه
لكن المعروف عن شبكة الزعيم انها كحال الهلال في تفريخ النجوم في كل المراكز
نشاهد هناك تفريخ مبدعين في قسم الجمهور الهلالي ..
بسبب وجود اهتمام من المشرفين والإداره والتوجيه المستمر ..
لكن قسم الديزاين يوجد فيه بعض المجتهدين فقط
يحتاجون للتوجيه ووجود مشرف او مشرفين متمكنين
حتى يتم احتواء المبدعين في بداياتهم ..
وستجدون ان المبدعين كُثر في الزعيم ..


7/ الــ قمرـــهـلال ، أنتِ متهمه بـ تهمة تدمير الشبكة في سنة 2002 وذلك بسبب اختفائك المفاجىء عن الشبكة، كيف تبررين نفسك وموقفك؟!


ياااااوك على الذاكره ماشاء الله
على كذا انا كنت في منظمه ارهابيه
الصدز كانت ظروف دراسيه وبعض المشاكل في الخطوط
كعادة شركة الإنفصالات
اما الحين لو يصير بركان بدخل بدخل الله لايعوق بشر
حتى في عز شغلي لازم اطل لو من الشباك عليها

8/


[CENTER]
وأنتِ ماشيه في هالحياة مامر عليك موقف وحلفتِ أنك ماراح تنسينه طول عمرك!


المواقف المضحكه كثيره
منها مره ايام المتوسط كنت في اولى
وكنت ارجع مع صديقتي وماشاء الله بناتهم واجدين
المهم بحكم اني كنت في مرحله جديده فكانت سنه عجيبه
كنت فيها قمة الخجل .. طالعه من المدرسه ادربي راسي قدامي
والمح السياره واجي مدرعمه واركب والسياره مليانه بنات
والتفت عليهم ( يعني خير ورى ماتمشون خلاص انا ركبت )
واتأمل اللي يسوق الا مهوب ابوها ..
وطلعت مو سيارتهم
حبكت ابوها يغير السياره هذاك اليوم

والمصيبه انهم شافوني وجالسين يضحكون ( اشوف فيهم يوم )
من بعدها وانا اتأمل السياره واللي فيها
واتأمل اللوحه ويمكن إذا اضطريت اخذ كم لفه عليها


اما الجديه برضوا المواقف كثيره وإن كان اهمها والمحفوظ في الذاكره هي شخصيه
لكن بعطيكم عنوان اهم موقف بدون ذكر تفاصيله

وهو وجود مشكله ظـُلمت في احد المواقف امام الوالد
فماكان منه الا ان ثبت على موقفه في ثقته بي
والأهم من ذلك هو اقسامه على ان ثقته بي تفوق ثقته بأي شخص
على وجه الأرض ..
هذا الموقف بتفاصيله لايغيب عن مخيلتي ابداً


9/ كلمة أخيرة ودك تختمين فيها اللقاء ؟
اولاً : الف شكر لكم على المجله الرائعه والتي تميزت في اسلوبها وطرحها
عن بقية المجلات الإلكترونيه العامه ..
ثانياً : الف شكر على الإستضافه الجميله والمشرفه لي ..
ثالثاً : 45 مليون شكر خاص لـ ( ابو فهد – ابو محمد ) .






ثيمات لموديلات نوكيا

3230, 6260, 6600, 6620, 6630, 6670, 6680, 6681, 6682, 7610, N70, N72,





ثيمات لموديلات نوكيا

3250, E60, E70, N80, N91









ثيمات لموديلات نوكيا

E50, N71, N73, N92, N93










كان لنا حضوراً مع هذه الاجواء الرائعة ، بـعد هطول الامطار جعلها الله امطار خير وبركه كنا على الموعد ، في الثمامه ..

لنتجول بعدستكم ، لـنريكم هذه الاجواء المميزة في الثمامـه ..

















كما يسرنا ان نعلن عن الفائز بـ جائزة اشتراك DSL ..
وذلك بعد فوزهـ في مسابقة " اجمل تعليق " .. والفائز هو :

عزوز الأزرق

وكان التعليق هو :

راعي الددسن /: ااااااااااااااااااه بس .. ان ماطاعك الزمان طيعه ..

نبارك له .. وحظاً اوفر للجميع ..




في مسابقة " العب سودوكو " .. للاسف لم يكن هناك اي فائز !
حظاً اوفر للجميع ..





في النهاية .. نتمنى ان نكون قدمناً ما يرضي على اعجابكم ..
وان نكون قد وفقنا فيما كنا نبحث عنه ، من رسم الابتسامه على شفاتكم ..
- لأي نقد أو إقتراح أو مشاركة نرجو إرسال رسالة على يوزر المجلة

دمتم في حفظ الله ورعايته ..





مجلة طريق الإقلاع
1 - 12 - 2006 م

اخر تعديل كان بواسطة » مجلة طريق الإقلاع في يوم » 01/12/2006 عند الساعة » 10:55 PM
اضافة رد مع اقتباس
  #2  
قديم 01/12/2006, 08:09 PM
زعيــم مميــز
تاريخ التسجيل: 19/01/2006
المكان: ســواار المقبـــره !
مشاركات: 5,409
الله يعطيكم العافيه .. مجهود جباااار
اضافة رد مع اقتباس
  #3  
قديم 01/12/2006, 08:30 PM
زعيــم مميــز
تاريخ التسجيل: 16/10/2005
مشاركات: 15,366
[ السلام عليكم و رحمة الله و بركاته ] ..

الف مبروك العدد العاشر و عقبال العدد المليون مجهود جبار الله يعطيكم الف عافيهـ , مواقف الاعضاء طريفة يُشكرون عليها .. و الشـُـكر موصول لـقـمر الهلال !

دائمـًـا مـُـبدعين ما شاء الله ..
الف مبروك عزوز الدي اس ال و يتربى بعزك :p

سـلام ,,
اضافة رد مع اقتباس
  #4  
قديم 01/12/2006, 08:43 PM
الصورة الرمزية الخاصة بـ ســــ 9 ـــــام
زعيــم مميــز
تاريخ التسجيل: 05/12/2005
مشاركات: 2,177
ماشاء الله تبارك الرحمن ..

وش اقول وش اخلي يالاقلاع

مبدعيـــن مبدعيـــن .. ألف شكر لكم ..

واعتذر عن كتابة الموقف .،

لاهنتــم جميعاً يامبدعين
اضافة رد مع اقتباس
  #5  
قديم 01/12/2006, 08:55 PM
زعيــم فعــال
تاريخ التسجيل: 10/03/2006
مشاركات: 350
يعطيكم الف عافيه على هالابداع الي مو جديد عليكم


من جد العدد راااائع



بس شد انتباهي صوره


او باالاحرى كلمة قعدت ادور عليها بالقاموس ماعرفت معناها






<< قاعد لهم تصحيح اخطاء خخخخ << الله يستر لايكون حاطينه عمداً



مره ثانيه يعطيكم العافيه
اضافة رد مع اقتباس
  #6  
قديم 01/12/2006, 11:04 PM
مشرف سابق في منتدى السيارات
وعضو سابق في اللجنة الإعلامية
تاريخ التسجيل: 23/12/2001
المكان: معـ سـامي ! ..
مشاركات: 6,077
الاخ الكريم .. Al-7ooot

اشكرك على التنبـيه ..
تم التعديل والمعذرة على الخطأ المطبعي .

تحياتي ،،
اضافة رد مع اقتباس
  #7  
قديم 01/12/2006, 11:43 PM
زعيــم مميــز
تاريخ التسجيل: 11/07/2005
المكان: حيثُ يعيشُ الأملْ
مشاركات: 3,080
الله يــعطيكم العــافيه..
مجهود جــبار .. من مجله ولا أروع
ومشــاركات رائعه من أعضاء رائعين ..
تسلمون ..وبنتظار القـــادم..
اضافة رد مع اقتباس
  #8  
قديم 02/12/2006, 03:02 AM
الصورة الرمزية الخاصة بـ الكلاسيكي
عضو مجلس إدارة الموقع الرسمي
تاريخ التسجيل: 06/04/2003
المكان: دنـيــآي ~
مشاركات: 18,713
معذبهم .... فيو .....

الماسه الزرقاء .. منادي .. الداوود

عدد مميز كعادتكم .. ومجهود اكثر من رائع ..

وتنوع جميل .. وموضوع اجمل عن الكشتات والطلعات ..

وثيمات روووووووووووووعه .. ولقاء جميل مع المبدعه قمر الهلال ..

ماتوقولن لي وينها .. المهم اتمنى انها ترجع لنا ثانيه ..

ولكم الف شكر على المجله الناجحه المميزه كالعاده ..

بانتظار العدد القادم ..

دمتم بخير ..
اضافة رد مع اقتباس
  #9  
قديم 02/12/2006, 06:01 AM
زعيــم مميــز
تاريخ التسجيل: 12/12/2005
المكان: الرياض
مشاركات: 3,390
الله يعطيك العافية
اضافة رد مع اقتباس
  #10  
قديم 02/12/2006, 07:50 AM
الصورة الرمزية الخاصة بـ ♫ ROMAntico
زعيــم مميــز
تاريخ التسجيل: 24/07/2006
المكان: a l z a e e m
مشاركات: 2,833
أما المقال حق المنسّم سهل والله منتهي الرجّال,, ضحكت من هنا إلى مالانهايه

والله يعطيهم العافيه الأعضاء اللي قالوا مواقفهم بالكشتات كلهم حلويييين ..

ومقابله ممتعه و خفيفه مع المصممه المبدعه الــ قمرـــهـلال ..

ومشكووورين على الثيمات ..

باختصار مجله متكامله ومتنوعه ..

الله يعطيكم العافيه : معذبهم _ الفيروسه الزرقاء

الداوود _ منادي _ الماسه الزرقاء

مجهود كبير تشكرون عليه ..

ننتظر العدد القادم ..
اضافة رد مع اقتباس
  #11  
قديم 02/12/2006, 08:02 AM
شمعة المجلس العام
تاريخ التسجيل: 07/02/2005
المكان: ريــ العز ــاض
مشاركات: 2,687

إقتباس
وماكنتِ تخلين المويه تغلي زين


هههههههههههه كنكم تناظروني <<عجله مالها خلق تصبر

مجلتنا المحبووبه .. مجلة طريق الإقلاع ..
بصراحه عدد رووعه .. تنظيم رائع .. وإعداد مميز ..
مواقف طريفه .. وقصيده مميزه .. وثيمات جميله
ولقاء مميز مع المبدعه قمر الهلال ..
وصوور حلوووه ...
ومبرووك لعزووز ..
مجله تنوووعت بالروائع والطرائف وتميزت عن الاخرين ..
مشكووورين وماقصّرتوو ويعطيكم العافيه
على المجهووود الكبير ...
بانتظار الاعداد القادمه ..
دمتــم بخيــر ..’’
اضافة رد مع اقتباس
  #12  
قديم 02/12/2006, 04:06 PM
الصورة الرمزية الخاصة بـ ڪـيــف الـζــآل ؟
زعيــم مميــز
تاريخ التسجيل: 03/11/2005
مشاركات: 5,656
يعطيك العافية..
اضافة رد مع اقتباس
  #13  
قديم 02/12/2006, 08:45 PM
مشرف سابق بمنتدى المجلس العام
تاريخ التسجيل: 06/01/2001
المكان: w w w . a l z a e e m . n e t
مشاركات: 6,596
كل الشكر لكم على هذا العدد المميز ( أكيد مميز لأن فيه اسمي ) ..

بصراحة جهد كبير تقومون به .. وما ندري وين نودي جمايلكم ..

مقالات منوعة ومواقف مضحكة وثيمات ما أبيها لأن ما أملك جهاز نوكيا ..

واعتذر عن موقفي لأني صراحة يوم قريت المواقف حسيت إني ثقيل طينة

أشكركم مجددا وعساكم على القوة ..


لكم كل الشكر والتقدير ،،،
اضافة رد مع اقتباس
  #14  
قديم 02/12/2006, 08:54 PM
زعيــم مميــز
تاريخ التسجيل: 11/10/2004
المكان: الريــ ( حيث الزحمة ) ـــاض
مشاركات: 7,051
مشكورين على المجهود



توي ادري انه مب بس انا الدلخ بالكشتات
اضافة رد مع اقتباس
  #15  
قديم 04/12/2006, 06:28 PM
زعيــم مميــز
تاريخ التسجيل: 21/03/2004
المكان: مسنتر بالمجلس العام
مشاركات: 5,764
الله يعطيكم العافيه مجهود جبار الله يقويكم

منوره ياقمر الهلال ومنوره مشاركات الاعضاء واعضاء المجله اولهم

وعلى طاري حوادث سهل اثاريك غشيم الله يعافينا وين الجاحظ عنك ايام اول

بس وانا اخوك الحياة احيانا تكون صعبه في بدايات امورها
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 08:37 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2019, Jelsoft Enterprises Ltd

Google Plus   Facebook  twitter  youtube