"يا عيالي البسوا ترى الجو بارد ، لا تمرضون" - نادي الهلال السعودي - شبكة الزعيم

alhawey · #1 27/11/2006, 10:34 AM

السلام عليكم ورحمة الله وبركاته،،

صبحكم OR مسيكم بالخير

هاااي ايفري بودي

نايس تو ميت يو أقين ، نوت آت أوول

بدايةً أبارك لكم هالامطار وهالخيرات والاجواء الجميلة

جعلها الله أجواء خير وبركه وعم بنفعها أرجاء البلاد ..

السبت 4/11/1427هـ
الساعة 9 مساءً

انشقت السماء على مدنية الرياض وهطلت الامطار بغزارة شديدة ، لدرجة أن الوالده حفظها حلفت على جميع المتواجدين بالبيت بأن لايخرجوا من المنزل ولا يستخدموا مواترهم في هذه الاجواء ..

تقبل الجميع قرار الوالده بصدر رحب

ما عدا أخي الاصغر( مايكل 20 سنة ) هداه الله

والذي أصر على الخروج بحجة أنه متواعد مع أخوياه لمشاهدة احدى مباريات كرة القدم في الدوري الصليبي..

خرج أخي من باب الفله متجهاً الى باب الشارع ومنه الى باب سيارته..

لحقت به وانا على عجل من أمري واستوقفته وقلت له بنبرةٍ حادةٍ قشرا :

الى أين أنت ذالف؟؟

قال: وما دخلك يا اخي الكبير المحترم ..

قلت : ماتشوف الجو أيها الغلام؟!والشوارع مليانه ماااااء

قال: نعم أشوفه ، ولكن حلاوة الطلعه الآن

قلت: بكيفك وعلى هواك

لكن انتبه وركز في القيادة ولاتسرع ولا تبلانا

قال: سم وأبشر

، ولكن يا أخي الكريم أريد 2 مائة ريال رحم الله والديك ..( في هذه الحزه عرفت ليش قال سم

)

وذهب اخي وسط دعاء مني بأن يحفظه الله ويستر عليه من شر هذه الشوارع..

وما هي الا نصف ساعة من الزمن وجوالي يرن ويرن وانا ياغافل لك الله ، لم انتبه له ولا أعلم أين أنا حاطه

وبينما أنا أتسدح في الصالة ، واذا ببنت اختي ( 5.5 سنة) تتمخطر وفي يدها جهاز ليس بغريب علي

وبعد تركيز النظر تبين انه جوالي

، ناديتها والليل جاوبني وبكاني

، وأخذت الجوال واذا بي أرى 3 مكالمات لم يرد عليهن ، وكل ابوهن لنفس الشخص " مايكل " !!

زهمت عليه ، ورد وقال: ياخي وينك لي ساعة وانا أتصل عليك

قلت: وش تبي ؟؟

قال: تعال لي تكفى، أنا بالشارع الفلاني والسيارة طفت علي

ظننت أنه يستهبل ويستخف دمه لأن سيارته جديدة نسبياً وبدري عليها موضوع الطفي

ولكن الحقيقه ان سيارته كانت فعلاً طافيه، فرُحت له وظبطنا الامور ، ورجعنا للبيت

وبعد أن توقف المطر ، قررت الذهاب الى شلتي في الاستراحه ..

وبينما كنت أستعد للخروج من المنزل ، و عند مروري من الصاله، رأيت مايكل لابساً قميص النوم ومنبطحاً عند التلفزيون

قلت له : هل ستخرج يا اخي الصغير المملوح

قال: يمكن

قلت : طيب ، جب بريال خبز وبريال صامولي، أنا تعبان ومابي حيل أطلع

قال وبكل بجاحه: منااااب طالع مطر وبرد!!

قلت له : ياكـ... ، قبل قليل كان المطر شديد وطلعت أنت ووجهك

والحين ياعمري ماتقدر!!

المهم لن أطيل عليكم بماحصل بعد ذلك

ما دعاني لكتابة هذه السالفة هو اني احسست برفعة الضغط عندما رفض اخي طلبي باخضار رغيف الخبز واسطوانات الصامولي ، رغم اني قبل ساعة ونص معطيه 2 مائة ريال، وبعدها رحت له وصلحنا سيارته!!

سبحاااااااان الله العظيم، السالفه ما تستاهل ورغم هذا ارتفع ضغطي واحسست بأن أخي تجاهل معروفي عليه ورفض مني طلب بسيط ما يسوى!!

وسبحااااااان الله العظيم، كبر الموضوع عندي ورحت لبعيـــــــــــــــــــــد

مافيه أحد له معروف علي وعلى اخوي كثر أمي ولن نوفيها حقها مهما عملنا، ورغم هذا كثيرا ما يتجاهل أخي طلباتها وكان احدها على سبيل المثال عندما طلبت منه عدم الخروج في هذا الجو الماطر..

هنا تساءلت، هل احست والدتي بنفس احساسي عندما تجاهل اخي ما طلبت منه ؟؟

ان كان نعم فوالله العظيم اني لا أروح لأخوي وألفعه تلفيعاً شديدا حتى يعرف أن الله حق

وان كان لا ، وهو الاقرب لأن قلب الام أكبر بكثير من أن يعكر نقائه خطأ من طفلها الصغير، فلا بد لنا أن نتوقف قليلاً ، ونتأمل سواءً كنا كبار أو صغار ، ما هو حالنا مع بر الوالدين؟ وبالذات الام ، ما الذي قدمناه لها لنوفيها ولو جزء يسير من حقها؟؟

جيلنا وللاسف الشديد مقصر تماما في حقوق الامهات ، بل يتعدى الامر أحياناً مرحلة التقصير ويصل الى مراحل العقوق..

أعتقد أن من عقوقنا لأمهاتنا تجاهل أبسط طلباتهن ، رغم أن غالبية ما تأمر به الام نابع من حرصها وخوفها على أولادها..

وسواء أبدت الام أسفها على عصيان أولادها لها أو أخفته بين ضلوعها ، فانه من الواجب علينا مراعاة خاطرها و احترام كل كلمة توجهها لنا و الالتزام بما تقول وتوجه به..

وأخيراً ، ودي أسألكم كم مره سمعتوا هالجملة من أمهاتكم خصوصاً في هالأيام:

" يا عيالي البسوا ترى الجو بارد ، لا تمرضون "

وكم واحد منا سمع كلامها وطيًب خاطرها ولبس وتدفى؟؟ NO Body

.. الله يصلح حلنا و يقدرنا على بر والدينا ..

فماااااااااااااان الله ،، سي يو ليــــــــــــــــتر

::::::::::::::>> مقطوع سري بلندن

تحياتي للجميع،،

الهلالي الثقفي · #2 27/11/2006, 12:01 PM

هههههههههههههههههههههههههههههههه

الشرهه عليك اللي مدلعه و مسميه مايكل

شوووف حبيب ألبي الهاوي

أذا سويت جميل في أحد فلا تنتظر منه شي و أطلب الأجر و العوض من الله
خاصة لمن تعمل معروف مع أهلك و قرايبك

لمن تعطي أخوك الصغير و تساعده و تسوي سيارته هذا يعتبر واجب عليك
قبل لا يكون تكرم منك لأنه لو ما ساعدته أنت مين بيساعده
و لو بتجلس تعد عليه جمايلك راح يركب راسه و يعند و بيعصيك في بعض الأمور

و لا تنسى أن الأخوان يختلفون أحيان في أشياء تافهة و ما يتقبلوا من بعض
فحاول تضيط الأمور و أمسك العصا من النص و راح تكون لك اليد الطولى عليهم
بحسن تعاملك و جميل معروفك و حاول أنك ما تحتاج لأحد منهم
في اللحظة هذي تجدهم كلهم يتسابقون لمساعدتك و كفايتك من بعض الأشغال

بعدين بيني و بينك أخوك صادز

الدنيا برد و مطر و هو متعقد و طفشان من السيارة
و الوقت مو مناسب تطلب منه يطلع بهالوقت

بعدين أنت رايح الأستراحة يعني مو مشوار عمل
و ألا موعد بالمستشفى حتى يمنعك ما تجيب خبز

أنا مؤيد أسلوبك لو كان أخوك الكبير مكان مايكل

لأنه بصراحة صعبة على قلبي أخوي الكبير ما يقدّر
أما لو أخوي الصغير عاااااااااادي عاااااااادي

أما كيف تخلي أخوك الصغير يفدّر ووقفتك معاه
فهنا الوالدة تتدخل بس لا يعرف أخوك الصغير
أن الوالدة جايه له من طرفك

أتفق أنت و أمك و خل أمك تقول له :
ليه يا مايكل و أنا أمك ما تسمع كلام أخوك
و خلها تقول : أنا ( أي الوالدة ) شوفتك لمن قلت ماني برايح أجيب خبز
ليه مو هذا أخوك اللي أكبر منك و عمل فيك معروف
مايكل و أنا أمك أنا أفرح و أنبسط لمن أشوفكم تساعدوا بعض
و تحبوا بعض و تحترموا بعض يمكن أنت تشوف أنه عادي ما تروح لمن يقول لك
أخوك روح و ألا تعال بس أنا مو هين على قلبي أشوفك ما تسمع كلامه

يعني من هذا الكلام

الوالدة

آآآهـ يالهاوي

في الأيام اللي فيها أمطار أمي ما تخلي أحد مننا يطلع و تصيح و تخاف

تخيل مرة من المرات كنا جالسين بالبت في وقت فيه أمطار و سيول

و أمي نايمة و أحنا جالسين نتابع الأمطار من البلكونة

و فجأة و الوالدة تصيح و تقول : يااااااسر ..... فهد ......

و نجيك كلنا مسرعين

قلنا وش فيك ؟؟

قالت : و أنا نايمة سمعت صوت واحد أخذه السيل و هو يصيح

قلنا بسم الله عليك هذا حلم و الحمد لله كلنا موجودين

ألا و الوالد داخل مع الباب و ينادينا واحد واحد

قلنا بسم الله علينا وش فيه ؟؟

و لمن أجتمعنا عليه

قال : نايف ولد جارنا جرفه السيل و مااااات

هنا مسألة مهمة

و هي (( أحساس الوالدة بهذي الشي ))

تخيل أخي الهاوي لمن توفي أخوي الكبير ( أبو سيف )
كانت أمي بالبيت و شعرت بشئ غريب و قامت و وقفت بالشباك
ألا و عمي يكلم أبوي عند باب المسجد و بيننا و بينهم شارع كامل
و أحنا ما نسمع فصاحت أمي و قالت : ولدي مااااات

قلنا بسم الله وش فيك ؟؟

قالت : سمعت عمك يقول لأبووووك

أمي لها أحساس غريب و شعور فريد عسى الله يحفظها لنا
و لا يحرمنا من طيبة قلبها و حنانها

تسلم أخوي الهاوي على مشاركاتك الرائعة

أنا من أشد متابعيك و أتمنى لك التوفيق

أستمر فأنت متميز

ღهلابوليღ · #3 27/11/2006, 12:08 PM

بالنسبة للجمله

سمعناااااهااااا كثيررررررر

البسوا وتدفوا ترى الجووووو صقيعه وثلج

O V E R · #4 27/11/2006, 12:36 PM

ههههههههههههههههههههههههههههه

عادي خلوه يتدلع دامه الصغير ( جونيور )
وطلعته الأولى لاجل شي هو يبيه
اما طلعته الثانيه لاجل شي مفروض عليه

وهنا فرق . :p << كله كوم الدوت كوووم

وبالنسبه للأمهات الله يحفظهن لنا ويخلينا لهم ان شاء الله
فهم احرص الناس فينا وقلوبهم علينا لكن اوقات الدلع
وقصة ( أمي ما راح تزعل ;) ) هي اللي تخلينا نسوي اللي نبي

طبعا ً هذاك اول .. الحين كبرنا وعقلنا

والله يديم العــقل على الجميــع

تحياتي ®

فرصه ضايعه · #5 27/11/2006, 12:45 PM

وعليكم السلام ورحمة الله وبركاته

هلا والله بالهاوي أبوعيون ناعسه

....

معاشر هنود الله يصلحك

....

أجل 2 مائه ريال

ماش وانا اقرى تمزع بطني من الضحك على جملك

اللي مدري وش تبي

....
هذا اللي يبي يتكلم فصحى وماعرف

خلينا بالأقتباسات .....

إقتباس


	وقلت له بنبرةٍ حادةٍ قشرا : الى أين أنت ذالف؟؟

أحلى ياقوي أجل ذالف

إقتباس


	قال: وما دخلك يا اخي الكبير المحترم .. قلت : ماتشوف الجو أيها الغلام؟!والشوارع مليانه ماااااء

وراك ماكتبت ألم ترى

>>> تصحح له الفصحى الله يخلف

ذكرتني بمقوله دايم نقولها ماذا دهاك ياابن حلّسه

بكسر الحاء
>>> الظاهر ماخذينها من مسلسل مصري تاريخي

إقتباس


	ولكن يا أخي الكريم أريد 2 مائة ريال رحم الله والديك ..( في هذه الحزه عرفت ليش قال سم )

ههههههههههههههههههههههههههه
ذكرتني بأخوي أمس

...
كان يهوش ويصارخ ويوم دق التلفون ولاه واحد من ربعه يبيه يلعب معهم كورة

عاد يوم قفل الخط قعد يستأذن من أبوي بكل رقه

وقعدنا نضحك عليه نقوله وين اللي تو شايش

ولا عشان المصالح تمشي

ههههههههههههههههههههههههه

إقتباس


	ولكن الحقيقه ان سيارته كانت فعلاً طافيه، فرُحت له وظبطنا الامور ، ورجعنا للبيت

ههههههههههههههههههههههههههههههههههه
من الهندي اللي كاتب ذا الجمله

...
ماتعرف ذهبت يعني

>>>> يكفي تدقيق عارفين أنه يستهبل

إقتباس


	قلت : طيب ، جب بريال خبز وبريال صامولي، أنا تعبان ومابي حيل أطلع

لاتصرف

توك تقول بطلع لأخوياي بالاستراحه

>>>> تحجير

إقتباس


	سبحاااااااان الله العظيم، السالفه ما تستاهل ورغم هذا ارتفع ضغطي واحسست بأن أخي تجاهل معروفي عليه ورفض مني طلب بسيط ما يسوى!!

ياشينهم لا أمرتهم ولا عطوك خبر

إقتباس


	هنا تساءلت، هل احست والدتي بنفس احساسي عندما تجاهل اخي ما طلبت منه ؟؟

إلا والله أنها تنقهر من عيالها بس وش تسوي فيهم

...
مالها إلا الدعاء أن الله يهديهم ويصلحهم:sad:

إقتباس


	ما هو حالنا مع بر الوالدين؟ وبالذات الام ، ما الذي قدمناه لها لنوفيها ولو جزء يسير من حقها؟؟

الله يتوب علينا :sad: ...
مقصرين في حقهم والله

...

إقتباس


	جيلنا وللاسف الشديد مقصر تماما في حقوق الامهات ، بل يتعدى الامر أحياناً مرحلة التقصير ويصل الى مراحل العقوق..

الله المستعان ...
عندنا وحده تقولنا وش دخلكم فيني على كل شي

...
الله يهديها

إقتباس


	وسواء أبدت الام أسفها على عصيان أولادها لها أو أخفته بين ضلوعها ، فانه من الواجب علينا مراعاة خاطرها و احترام كل كلمة توجهها لنا و الالتزام بما تقول وتوجه به..

جزاك الله خير على كلامك

...
ومهما فعلنا لهم لن نوفيهم حقوقهم

....

إقتباس


	وأخيراً ، ودي أسألكم كم مره سمعتوا هالجملة من أمهاتكم خصوصاً في هالأيام: " يا عيالي البسوا ترى الجو بارد ، لا تمرضون "

مابعد قالتها لنا

....

إقتباس


	.. الله يصلح حلنا و يقدرنا على بر والدينا ..

اللهم آمييييييييييييييييييين ..

يعطيك العافيه على التذكير

... وموضوع جبرني ارد مع أن لي فترة مارديت;)

ياسفابي

الكلاسيكي · #6 27/11/2006, 01:23 PM

هـــلا بالهــــــــــاوي ...
والمطــر عليــكـ مبــاركـ

< يسمع بالدعاء

والله يزيد ويباركـ .. بس ترى لو ماجاء من مطر من فعايل مايكل

..
انت بس اشــر عليه وأنا ارروح وألفعه عنكـ . . اجل طلب صغير ماجابه ..
وانت بعد حبيب لو اني منك يتم مصادرة مفاتيح السياره مع الـ 2 مائه <<الله يهديك اثرت علينا

إقتباس


	واسطوانات الصامولي

اجل اسطاونات .. وين غاز

انا اذكر يسمونه شفـّـاط المرق

ياحبني للأم بس .. والله دايم البسوا ادخلوا كلوا .. ياحبني لهم بس ..
والله احنا مقصرين مع انه مو تقصير بس احنا مهما سوينا لوالدينا ماراح نوفيهم حقهم ..

يآخي كان قلت لأخوك يوم انك صغير ماقالت امي ماراح اجهز لك حليب وهي في سابع نومتها

ياحبني للامهات بس ..

للأسف كثير من الشباب والاولاد مقصرين في حق والديهم .. والمشكله الأكبر انهم يردون عليهم
بنفس شينه ولو اتصل عليه واحد من اخوياه رد عليه بنفس زينه وابتسامه .. والله امر يضيق لصدر ..
الام مهما سوينا لها ماراح نوفيها حقها .. وهذا جزا اللي خياف عليك .. وهذا رد الجميل !!!!!!

عموماً الله يصلح اخوك ويصلح حال كل واحد مايسمع كلام اهله او خوه الكبير :p ..
وان شاء الله يحسون بقيمة الأم .. لانهم ماراح يحسون فيها إلا بعد فقدانها بعد عمر طويل ..

لك الف شكر على طرح هذا الموضوع الحساس ..
ودمت لنــا أخاً نافعاً

بس ماقلت لي وش اخبار الشنب

فيغو 10 · #7 27/11/2006, 01:32 PM

اللهم اطرح به البركه

هلالي وشقاوي · #8 27/11/2006, 02:56 PM

الله يرجك رجا مبرحا

شف تبي تسمع كلام واحد خبره ومنطقي أول شي تروووح تمسك اخوك وتلفعه لين يقرب من الموت أو تدري خله يموت علشان يتادب معك تراك اخوه الكبير >>> مهوب مورطك

ايه والله الله يقدرنا على معروف الوالدة ياكثر ماقلتها لي ياوليدي البس لايدخلك برررد بس يوم كبرت قالت ياوليد طس اللي كبرك متزوجين وعندهم بيوووت . ويوم جاني عيال قالت لبسهم لايدخلهم برد وانا تقولي بالطقاق اللي يطقك

بس لاتنسى أخوك وأنا متأكد انه اخذ 200 ريال يبي يشتري مخدرات

تغريد · #9 27/11/2006, 03:15 PM

إقتباس


	قلت : طيب ، جب بريال خبز وبريال صامولي،

الخبز غير الصامولي؟

>>>هذا الي طلعت فيه من الموضوع كله خخخخخخخ

موضوع حلو

والله يصبر امهاتنا علينا

عـز الهلال · #10 27/11/2006, 05:54 PM

][ السلام عليكم ][

والله للـ أسف كثير منا مقصر في حق امه ,, وخاصه الجيل الجديد << مسوي شايب

يعني بعضهم أمه تناديه لها ساعه , وهو معطيها على مـا يقولون ( معطيها ركبه )

* * *

امـا بخصوص أخوك الصغير , فمـا عليه شره
دامـcom مسمينه شوماخر

juve1897 · #11 27/11/2006, 06:35 PM

اقول تراك تصلح مؤلف مسلسلات مكسيكية

هلالي الظهران · #12 27/11/2006, 08:06 PM

هلا والله بهالطله .. هلا بريحة العطر .. هلا براعين الشانز والمدريقال

حيا الله الهاوي حطعش سابقا .. الهاوي ساده حاليا

..

والله يا أنت حليل يا الشايب .. اجل عقب مامشورك معه وعقب ما طلبك هالمايكل ويقولك مابي تسكت!! ياحيف بس على شياب اول اللي مايتكلمون الا بلغة العسيب :

..

إقتباس


	قلت له : هل ستخرج يا اخي الصغير المملوح قال: يمكن

هههههههههههههههه حركات ايام اول .. خبرك لازم الواحد يتركله باب مفتوح ..

راعي الحاجه:مايكل هل ستخرج؟

الزلع مايكل: يمكن

بعد ساعه .. راعي الحاجه: مايكل قم ودنا السوق ... مايكل رح بيت خالك وجب الاغراض ... مايكل .. الخ الخ

مايكل : لا قلت لكم اول انا طالع ..

بعد ساعه .. مايكل يلف بشوارع الحاره او متبطح بأحد القهاوي

,,

إقتباس


	هنا تساءلت، هل احست والدتي بنفس احساسي عندما تجاهل اخي ما طلبت منه ؟؟

امممممممممممممممممممممم فعلا هالشي دايم يصير ولاحول ولاقوة الا بالله .. والواحد مايعرف هالشي الا اذا ابتعد عن الاهل والام خصوصا ..

ايام المراهقه كان كل شي عندي ماشي عكس الناس بس الحمدلله الحين زان الوضع .. والعكس من عقب ماكان بتصرفاتي الحين صار بالمخ

..

فيه مثل يقول وانا اخوك " خلك بعيد حبك يزيد" وانا حاليا بحكم بعدي عن الاهل مقدر الوضع تماما .. واذا صرت عندهم تصير علاقتي معهم احلى مايكون خصوصا انها تكون بالاجازات فقط ومن الجهه المقابله مدلعيني ومرفهين عني بشكل ماينوصف لدرجة اني اذا رحت لمهم اسبوعين وزني يزيد 5 كيلو

..

احس ان الموضوع بوادي وانا بوادي

.. المهم عسانا نكون بارين بوالدينا طايعين لهم وقايمين بكل امورهم وحاجاتهم ,,

والله يعطيك العافيه يابو قذيله ولاتطول علينا ,,

سلاااااااااااااااااااام,,

الهلالي دائماً · #13 27/11/2006, 08:33 PM

^
^
^
منهو ذا

هلا وغلا بالغالي الهاوي

واه من البرد اه خخخخخخخخخ >>> تصلح اغنية :p

ياخي من قبل قلت ياليتك ابوي بس اللحين هونت ;)

وبقول ياليتك اخوي

2 مائة ريال مرة واحدة

والله اني يبيلي معاملة عشان اطلعها من اخوي >>>اقساط بعد

خخخخخخخخخخخخخخخخخخخخخخخخ

اما لو مايكل اخوي يا هو بيتصفق تصفيق ههههه

بصراحة نحن مقصرينا كثيرا مع امهاتنا حفظهن الله ...

وكثيرا منا لو طلبت منه امه اي شي يتكاسل !!

بس لو جاه الوالد يقول طيب وهو مايشوف الدرب

ينطيك العافية اخوي الهاوي على هيك موضوع مرتب كتير ...

على فكرة القصيدة ماهي لي !!

الذئـــ الأزرق ــــب · #14 27/11/2006, 11:13 PM

إقتباس


	" يا عيالي البسوا ترى الجو بارد ، لا تمرضون "

انا لا تقولي ايفري داي ياوليدي البس لا تمرض تراه برد ... اول اسبوع انا تقبلت ولبست .. وبدى يجي الحر ..
الوالده مازالت تقول ياوليدي البس .. قلت وييين الجو حار ترى مهب بتله .. ولا لبست ..
وطبعاً المعروف انه اذا الواحد عصبت عليه امه وش تقوله .. ؟ قالته لي ..

ـــــــــــــــــــــــــــــــــــــــــــــ

وان شاء الله نصير بارين بوالدينا ...

عزوز الأزرق · #15 27/11/2006, 11:42 PM

ههههههههههههههههههههههههه

اولا .. لك اعجابي باللغه الهواوية ..

ثانيا .. يعجبني نظرتك التأملية ..

الأم = كل ماتحتاجة في شخص واحد ..

انتهى , , ,