بسم الله الرحمن الرحيم .
" قصة واقعية "
خالد شاب في مقتبل عمره خلووودي الله يهديه حالتهم المادية ضعيفة والولد منحرف وخذ يابلع حبوب وشرب حشيش وجميع أنواع المخدرات .
أولها دلع وآخرها هلع المهم خلووودي شوي شوي لين صار تاجر مخدرات بس توه صغير يعني مابعد صار يبيع عن طريق الفاكس >>>>> " خبرة "
ويجي ذالك اليوم ويتم القبض على خالد وبحوزته كمية كبيرة من المخدرات وكان عمره 21 سنة .
ودخل السجن وحكم عليه 14 سنة . إنا لله وإنا اليه راجعون .
طبعا خالد استغل دخوله السجن بالعبادة والطاعة والرجوع الى الله سبحانه وتعالى وقد جائه عفو بعد عشر سنوات من السجن . وهنا بدأت قصته .
رجع لأهله والفرحه على محيأ وجه وكل شي زي ماهو دجه في دجه قال ياناس أنا لها وش الفقر اللي احناء فيه خلاص لازم أنا أتحمل المسئولية مع الوالد .
كل ماراح مكان يقدم فيه على عمل قالو له 
ياخريج السجون . " ياهو يبي يلقى وظيفة " 
المهم راح وتسلف من كذا شخص واشترى له ذيك اللكززس " ددسن غماره صندوق موديل 81 "
وقال بسم الله على الله الرزق وصار يراكض يمين ويسار يحمل هنود وينقل عفش وعايش حياته .
وفي يوم من الأيام الا ذاك رجل المرور يوقف خالد ويصكه بقسيمة ليه يحمل ركاب المشكلة السيارة غمارة والهنود بالصندوق والرجال يترزق الله .
كره خالد الشغله وقال ياولد مابدهاااش الصيف موسم الحب حب أو كما يطلق على المتطورن البطيخ أو كما يسمونه القصمان جح . وفي لغة أهل الكويت رقي وفي لغة إيران مهراااوية وفي لغة الهند تورموز . " اخس يالغات "
المهم ويطمر خالد لم سوق العزيزية ويشتري له ذيك شحنة البطيخ بالف ريال وينقز عند قصر الف ليله وليه ويبدأ يبيع ويغرد بالصوته الشجي على عشره وعلى خمس عشر والناس تشتري وخالد مبسوووط ويقول وداعا للفقر وداعا لديونك ياوااالدي رزقني الله من حيث لااحتسب .
واستمر على الحال هاذي يومين لين جاء اليوم الثالث وخلودي جالس يحرج ومبسوط في حراارة الشمس الممتعة " جربو حرارة الشمس الممتعة بالرياض لاتفوتكم "
وتوقف عنده سيارة البلدية ويعطونه إنذار . قال خالد طيب اللحين وش اسوي مالي أي شغل الا البطيخ . قالو له مالنا شغل .
ويجي اليوم الثاني ويحمل شحنة بطيخ يبي رزقه الا والله والبلديه طابه عليه وياخذون رخصته وبطاقة الاحوال وقالو راجعنا في البلدية .
طبعا خالد قال تبطون عظم . ولاراجعهم . وقال هذا رزقي ولازم ابيع وهو يروح ويشتري مره ثالثة ويسوي نفسه ذكي ويغير المكان الا هاذي البلدية غير اللي أمس يوقف عنده وبدون أي تفاهم يحمل سيارة خالد على سطحة هي والبطيخ اللي فيها . وبدون أي رحمه .
والله شفته وأمام عيني يبكي كما يبكي الطفل الصغير ياناس ياعالم انا ابوي فقير أنا أمي مريضه أنا مدمن مخدرات وتبت الى الله ومن بيع المخدرات وتناولها ياناس أنا تعبت وأنا أدور وظيفه ماحصلت إذا مو مصدقيني تعالوا شوفو كيف عائيشين , والله السيارة متسلف قيمتها الله يرضى عليكم لاتقطعون رزقي وهو يحب رأس موظف البلدية ومره يحب إيده ولكن بدون فائدة .
وأجي اطمر وأتدخل قلت ياخي خاف الله في نفسك مالقيت الا المسكين هذا ؟؟؟ ياخي روح وشوف مياه المجاري اللي ذابحتنا في الشوارع ..؟ رووح وشوف المباني اللي تعمر وخصوصا اللي شمال الرياض . وش تبي من الضعيف هذا ؟؟ التفت علي رااعي البلدية وقال هذولا قطعوا رزق المسلمين " سبحان الله " قال لي ترضى إنك صاحب محل خضار ويجون مثل هذولاء ويبيعون وأنت ياصاحب المحل تدفع إيجار وكهرب وثلاجات وعمال .
وقلت أنا له ترضى يجي أحد ويقطع رزقك وأنت تشتغل في البلدية ويناظرني خالد نظره وقال اسمع يابن الأجواد أنا اذا رجعت المخدرات أو ذبحت إنسان ترى هذا السبب .
وحاول في رااعي البلدية ورفض وراحت سيارة خالد عاد انا اعرف واسطة في البلدية ونروح من بكره انا وخالد ونطلع سيارته وخلونا ندفع 250 ريال حق السطحه .
ياسلام عليكم قاطعين رزق الرجال وتخلونه يدفع والله ونشوف السيارة مافيها ولاحبة بطيخ " أكيد باعوها البلديه 
ويجلس خالد ويقول لي قصة حياته من أولها لآخرها وربي حراام ياناس تراه بشر وأخطا ولكن خير الخطائين التوابين .
ـ ـ ـ ـ ـ ـ ــ ـ ـ ـ ـ ـ ـ ــ ـ ـ ــ ـ ـ ــ ـ ـ ـ ـ ـ ـ ــ ـ
نقاط مضيئة
لو رجع خالد للمخدرات من السبب .
هل يستطيع خالد أن يبحث عن رزقه وهو لايملك مال كي يفتح محل ..!!؟
لو كان رجال المرور أو موظفين البلديه مثل حالة خالد ماذا سيعملون ..؟
من خلال المنتدى أشكر أحد رجال الخير الذي قام بمساعدة خالد وجزاه الف خير
على حكومتنا الرشيدة دراسة أوضاع هؤلاء الذين يخرجون من السجن ووضع حل لهم باسرع وقت ممكن ...
فكم من سجين خرج ليعود الى السجن مرة أخرى .
الوضع العادي
