#1  
قديم 09/11/2006, 05:06 AM
شمعة المجلس العام
تاريخ التسجيل: 07/02/2005
المكان: ريــ العز ــاض
مشاركات: 2,686
Smile يامحـلا الفنجــالـ وسيحــة البــالــ ..

.. السـلام عليـكم ورحمـة اللـّه وبركاتـه ..

هلا والله بأعضائنا الكرام .. أعضاء مجلسنا العام .. حياكم الله على قل الكلافه ..
لحد يقرا الموضوع الا ماخذ فنجال ومتقهــوي ولا ترا ابزعل مايصيرتسيّرون ولاتقهوون




موضوعي ياطويلين العمر عن القهوه مهوب اي قهوه اقصد .. القهــوه العربيــه ..
محبوبة الجميع .. ومعشوقة الجماهير >> مهوب الكوره بس





القهوه تعبر عن أصالة الماضي وعبق التاريخ .. وفي الحاضر تراثنا الجميل وكرمنا الأصيل ..
القهوه رفيقتنا في أحزاننا وافراحنا .. رفيقتنا في حلنا وترحالنا .. رفيقتنا براًوبحراًوجواً.. تكونت معها ذكريتنا الجميله ..
القهوه جزأ لايتجزأ منا .. نشربها في جميع الأوقات هناك من يبدأ فيها يومه .. وهناك من يشربها بعد صلاة الظهر <<غالباً يوم الجمعه .. وعصراً <<تقدّم للضيوف مع انواع التمر والحلى .. والمغرب <<اساسي عندنا يالسعوديين .. والعشاء << وقت العزايم والعروس والمناسبات ..



أجمــل ماقـــيل فــي القهـــوه ..


القهوه تغنو فيها الشعراء ومدحوها في قصائدهم .. اصبحت محبوبتهم وتغزلووا فيها ..

يقول الشاعر راكان بن حثلين :

يامحلا الفنجال مع سيحة البال ..... في مجلساً مافيه نفساً ثقيله
هذا ولد عم وهذا ولد خال ...... وهذا رفيقاً مالقينا مثيله


ويقول الشاعر محمد بن عبدالعزيز القحطاني وهو يوصي ابنه

يابو محمد شب واقضب مكاني
في غيبتي قهو الرجال المشاكيل

وفل الحجاج لكل من جاك عاني
وابدا التحيه قبل سوق الفناجيل


احد الشعراء يوصي ابنه نمر وهذا يدل على كرمه وجوده ..

امل الوجار وخلو الباب مفتوح *** خوف المسير يستحي ماينادي
يانمر مافي صكة الباب مصلوح *** ولاهي لهلكم يامظنة فؤادي


وصفوها بأجمل الصفات .. ووصفو كيفية اعدادها ..

ياكليب شب النارياكليب شبه ,,, عليك شبه والحطب لك يجابي
وعلي انا ياكليب هيله وحبه ,,, وعليك تقليط الدلال النجابي


ويقول خلف بن هذال :

سوولي من الكيف وارهو لي من الدله ـ ـ ـ البن الاشقر يداوي الراس فنجاله
كيف لنا نحـرقه بالـنار ونــزله ـ ـ ـ وليا انقطع لو ورى صنعاء عنينا له



طريــقة إعــداد القهـــوه ..




القهوه طريقة تصليحها سهله ولا تستغرق وقت طويل .. واللي وده يزين قهوه ولا يعرف الطريقه
الشيف سنعه تعلمه المقادير <<الله واكبر يالشيف رمزي
المقادير :
قهوه محمووسه ومطحونه + ماء حار + بريق قهوه + زعفران +هيل
الطريقه :
نجيب بريق القهوه ونحط فيه مويه مغليه همين تحطوون كم فنجال قهوه على حسب الكميه وعلى حسب البريق وحطو شووي زعفران وخلوو القهووه تغلي (تفووح) واقصروو لها شووي تقريبا ربع او ثلث ساعه همين جيبو الترمس (زمزمية القهوه) وحطو فيها ملعقة هيل مطحون وشووي زعفران وصبو القهوه فيها .. وبالهناء والعافيه مطرح مايسري يمري..


إضافات القهــوه ..

يختلفون الناس في اضافات القهوه ..::
1- فيه ناس يشربوونها ساده بدون اي شئ <<مدري وشلوون يستسيغونها
2- فيه احد ييضف عليها الزعفران والهيل << هذا حنا وفيه اكيد غيرنا ياسلام على ريحة الهيل
3- وفيه احد يضيف مع الزعفران والهيل المسمار <<مهوب الحديد المسمار اللي هو (القرنفل )ويكون مطحون ..
4- وفيه احد يضيف لها كوفي ميت عشان يتفتح لونها ..
5- وفيه ناس يضيفون لها انواع من الاعشاب مدري وشي بصراحه ..



أنـــــواع القهــــــوه ..


1.. القهوه العاديه (البن ) 2.. قهوة قشور القهوه 3.. قهوة الشعير <<زينه للي فيهم سكر
4.. قهوة نواة التمر (العبس )<< صرتو تعرفون معناها
توها طالعه يقولون لها فوائد كثيره ..هذا اللي اعرف اللي عنده انواع ثانيه يعلمنا ..


الــدله تــراث فقط ..أم حاضــر ..


مايخفى عليكم ان الدله هي احد ركائز اعداد القهوه .. وكانت قديماً مرتفعة السعر لانها كانت تصنع يدويا .. اما في الوقت الحاضر اختفت الدله واصبح القله يستخدمونها واصبحت من التراث وتقتنى لتكون كالديكور يزين فيه المجالس والملاحق (الوجار ) تعبيرا ورمزا للكرم ..


واصبحت تستخدم في اضيق الحدوود عندما توقد النار في الشتاء<<( كن الشتاء بدأ اليووم )يعملون القهوه بأنفسهم ..ايضا في الكشتات البريه وفي مناسبات قله .. واستغني عن الدله واستبدلت بالترامس او حافظات القهوه والشاي (زمزميه )
وذلك حتى تحفظ الحراره وتبقى مدة اطول .. وايضا اشكالها متعدده ومختلفه تلبي كافة الأذواق ..


برأيكم هل الدله اصبحت من التاريخ والتراث ورمز للكرم ...؟؟؟

كيفيــة تقديـــم القهــوه ..

القهوه لها طرق كثيره وتختلف بأختلاف العادات والتقاليد ..
انا مثلاً.. يوم اني بالثانوي كانت القهوه عقدتي اذا قالو فيه عزيمه زملت وضاق صدري
تخبرون اوول كننا نخاف من صب القهووه يمكن تنكب ولا شئ ولا نكثر ولا نقلل ماعرفنا لهم لكن الحين اشوى
زارتنا ام جيراننا اول مره وكانت من الشمال وصبيت لها قهووه وتجيكم اختكم في الله وتملى الفنجال ملي <<< يقالها كريمه .. ورى ام جيراننا تطير عيونها قلت وش فيها ذي يووم طلعت الحرمه قالت امي ان الفنجال عندهم مايملى تصبين بأسفل الفنجال قلت اجل راعية طوويله ابقعد اصب 15 فنجال
قالت امي الله يحفظها عندهم اذا مليتي الفنجال انتس ماترحبين فيهم وانه ضيف مهوب مرغوب فيه وانتس اذا صبيتي شووي يدل على شدة الكرم قلت لأمي عشنا وشفنا اللي صار الشووي كرم
ومن يومها صرت ما املى الفنجال اصب وسط <<لاهجوم ازين



المووهم نجي لطريقة صب القهوه لقيتها لكم ..:

- 1مسك الدلة باليد اليسرى والفناجيل باليد اليمنى
2- الوقوف أثناء صب القهوة >> ماهوب تدقين سوالف مع الحرمه وتنسين صب القهوه
3- -أن تقول لمن تقدم له الفنجال تقهو أو سم أو تفضل أو خذ
4- الاعتدال بعد صب القهوة
5- حمل الفناجيل باليد
6- أن تبدأ بالوالد
7- أن تبدأ بمن في صدر المجلس
8- أن لا يصب القهوة أحد الضيوف
9- أن لا يصب القهوة الأب والابن موجود
10- أن لا يصب القهوة الأخ الأكبر في وجود أصغر منه سناً من أخوته
- 11- أن لا يصب القهوة الكبير في وجود من هو أصغر منه سناً
12- أن لا يبدأ بصب القهوة من اليسار
- 13- ان تبدأ باليمين


فوائـــــــــــد القهـــــــوه ..





القهوه لها فوائد كثيره كشفت البحوث الحديثة ان استنشاق البخار الصادر من فنجان القهوة يعتبر مصدرا لتهدئة الاعصاب ويساعد على التركيز وأن هناك 800 مادة مفيدة في البن ، فشرب القهوة يقضي على التوتر العصبي ويساعد على التأمل، وهناك دراسة أخرى تقول ان تناول فنجان من القهوة المركزة قد يخفف من أعراض حمى القش وأنواع أخرى من الحساسية الشديدة مثل لسعات الحشرات والمواد المسببة للحساسية مثل اللوز والبندق وغيرهما والأشكال البسيطة من الحساسية التي نواجهها يوميا وذلك بسبب قابليتها للحد من افراز مادة (الهستامين) في الجسم، إلا أنه على الرغم من ذلك كله يجب عدم الافراط في تناول القهوة لأن الجرعة المثلى للكافيين في اليوم الواحد هي من 100 إلى 200 مليجرام أي حوالي فنجانين من القهوة يوميا<< ايه هين تكفي فنجالين ومن الفوائد ايضا
انها تزيد نشاط المخ ..2 تحسن المعنويات ..3 تقاوم بعض الامراض مثل مقاومة السرطان -امراض القلب - ظهور التجاعيد ..4 تزيد من الطاقه ..5 تساعد على ابعاد شبح مرض( باركنسون ) ..6 تعالج السيلولاليت ..7 تمنع جفاف الجسم ..8 تساعد على تخفيف ازمات الربوو .. وغيرها من الفوائد .. اشربوو قهووه ولاتخافوون ..


القهوات الحديثه وحرب ضد القهوه العربيه ..

مثل ماتلاحظون انتشار الكوفي ومحلات تناول القهوه واصبح الجيل الجديد يقبل على هذي القهوات الغربيه بشكل كبير .. كابتشينو ..فرابتشينو ..موكا .. اسبريسو وغيرها من القهوات
واصبح لهذي القهوات عشاقها في ظل تناسي للقهوه العربيه وانكارها ..


هل تتوقعون ان القهوات الغربيه سحبت البساط من القهوه العربيه عندالجيل الجديد ..؟؟
وهل ستظل القهوه العربيه شامخه وباقيه في الاجيال القادمه..؟؟



ادري طولت عليكم العذر والسموحه منكم .. بس انا علمتكم من البدايه قلت تقهوو وانتم تقروون
اللي يعد كم تكررت كلمة قهوه بالمووضوع له دلة قهوه مع صحن برحي ..؟؟<<مضروبه على راسها برحي هالوقت .. عاد احس اني ظلمت الشاهي رفيق القهووه ولاجبته بالطاري ولا شئ اخاف يشره ولا شي..



.. ان شاء الله عجبكم الموضوع واستفدتوو منه ..
دمتـم بخير وعافيه وقهوه دايمه ..,,
أختكم .. هلاليه سنعه ..
اضافة رد مع اقتباس
  #2  
قديم 09/11/2006, 05:38 AM
زعيــم مميــز
تاريخ التسجيل: 02/09/2005
المكان: الرياض
مشاركات: 3,545
هلا وغلا بالسنعة

بصراحة القهوة جزء من تاريخنا وجزء من حاضرنا وجزء من شخصيتنا وتعبير عن كرمنا

القهوة اصبحت رمز من الرموز اللي نعرف بها

مااحد يستغني عن قهوتنا لكن بصراحة ماانيب من الناس المدمنين عليها

يعني ان جت جت ماجت بسلامتها

لكن اللي عجزت اتخلص منها الامريكان كوفي خصوصا قهوة دانكن دونت >>> ماربحه الا انا واشكالي :p



نجي عاد لصلب الموضوع


إقتباس
يختلفون الناس في اضافات القهوه ..::
1- فيه ناس يشربوونها ساده بدون اي شئ <<مدري وشلوون يستسيغونها
2- فيه احد ييضف عليها الزعفران والهيل << هذا حنا وفيه اكيد غيرنا ياسلام على ريحة الهيل
3- وفيه احد يضيف مع الزعفران والهيل المسمار <<مهوب الحديد المسمار اللي هو (القرنفل )ويكون مطحون ..
4- وفيه احد يضيف لها كوفي ميت عشان يتفتح لونها ..
5- وفيه ناس يضيفون لها انواع من الاعشاب مدري وشي


حنا بصراحة نحط معها ( شوي ) حليب علشان يفتح لونها ويصير طعمها احسن بعد

إقتباس
انا مثلاً.. يوم اني بالثانوي كانت القهوه عقدتي اذا قالو فيه عزيمه زملت وضاق صدري



فيصلي والا فيحاء ;)


إقتباس
زارتنا ام جيراننا اول مره وكانت من الشمال وصبيت لها قهووه وتجيكم اختكم في الله وتملى الفنجال ملي <<< يقالها كريمه .. ورى ام جيراننا تطير عيونها قلت وش فيها ذي يووم طلعت الحرمه قالت امي ان الفنجال عندهم مايملى تصبين بأسفل الفنجال قلت اجل راعية طوويله ابقعد اصب 15 فنجال
قالت امي الله يحفظها عندهم اذا مليتي الفنجال انتس ماترحبين فيهم وانه ضيف مهوب مرغوب فيه وانتس اذا صبيتي شووي يدل على شدة الكرم قلت لأمي عشنا وشفنا اللي صار الشووي كرم

والله ماش اخاف انه من العجز ماتبين كل شوي تصبين



إقتباس
القهوه لها فوائد كثيره كشفت البحوث الحديثة ان استنشاق البخار الصادر من فنجان القهوة يعتبر مصدرا لتهدئة الاعصاب ويساعد على التركيز وأن هناك 800 مادة مفيدة في البن ، فشرب القهوة يقضي على التوتر العصبي ويساعد على التأمل، وهناك دراسة أخرى تقول ان تناول فنجان من القهوة المركزة قد يخفف من أعراض حمى القش وأنواع أخرى من الحساسية الشديدة مثل لسعات الحشرات والمواد المسببة للحساسية مثل اللوز والبندق وغيرهما والأشكال البسيطة من الحساسية التي نواجهها يوميا وذلك بسبب قابليتها للحد من افراز مادة (الهستامين) في الجسم، إلا أنه على الرغم من ذلك كله يجب عدم الافراط في تناول القهوة لأن الجرعة المثلى للكافيين في اليوم الواحد هي من 100 إلى 200 مليجرام أي حوالي فنجانين من القهوة يوميا<< ايه هين تكفي فنجالين ومن الفوائد ايضا
انها تزيد نشاط المخ ..2 تحسن المعنويات ..3 تقاوم بعض الامراض مثل مقاومة السرطان -امراض القلب - ظهور التجاعيد ..4 تزيد من الطاقه ..5 تساعد على ابعاد شبح مرض( باركنسون ) ..6 تعالج السيلولاليت ..7 تمنع جفاف الجسم ..8 تساعد على تخفيف ازمات الربوو .. وغيرها من الفوائد .. اشربوو قهووه ولاتخافوون


صدقتي كل هذه فوائد لها لكن بعد في بعض المضار واولها انها تعد من اكثر المنبهات تأثير

اتذكر عمتي الله يرحمها كانوا بيسوون لها عملية عجزوا يبنجونها بشكل كامل حاولوا معها فترة طويلة بصعوبة كبيرة قدروا بسبب انها من مدمني القهوة


إقتباس
مثل ماتلاحظون انتشار الكوفي ومحلات تناول القهوه واصبح الجيل الجديد يقبل على هذي القهوات الغربيه بشكل كبير .. كابتشينو ..فرابتشينو ..موكا .. اسبريسو وغيرها من القهوات
واصبح لهذي القهوات عشاقها في ظل تناسي للقهوه العربيه وانكارها ..

هل تتوقعون ان القهوات الغربيه سحبت البساط من القهوه العربيه عندالجيل الجديد ..؟؟
وهل ستظل القهوه العربيه شامخه وباقيه في الاجيال القادمه..؟؟


قديمك نديمك لو الزمن اغناك

ومهما كان تظل ( لقهوتنا ) مذاق وجو خاص الله لا يخلينا بس

كل الشكر للسنعة على مواضيعها المتميزة دائما
اضافة رد مع اقتباس
  #3  
قديم 09/11/2006, 05:41 AM
عضو استشاري سابق للمجلس العام
تاريخ التسجيل: 28/01/2005
المكان: الريـــــاض
مشاركات: 6,514
هلا وغلا .. بالسنع كله قهوووة دايمة ان شاء الله ..والله قهوتك تهبل اكييد قهوة أهل سـدير ;) والنعم والله

القهــوة .. حسبي الله على ابليسها وهقت العالم صاروا ما يتبنجووون

أدمان اللهم ياكافي تصدقين ان صديق ابوي ماشاء الله عليه الله لايضره يشرب نص درزن زمزميات قهوة في اليوم

بصراحة كفيييتي ووفيتي .. بس والله ياسنعه وييين حاطتن 13 شرط لصب القهووة .. والله انا مرة صبيت باليمين جدي قام يقول فيني شعر اني منب سنعه .. :sad: طيب مافيها شيء وجهونا مهب تحطمونا ,, اصلاً جدي معه ماجستير تفشيل .. دكتوراه تحطيم

قهوتنا مثل قهوتكم ياسنعة;)

الله يعطيتس ألف عـــافية وموضوعك في الصميم جاء مع بداية الشتاء الجميل عااد قهووة وحنيني يالله من فضلك

مشكووورة يا شعلة المجلس ..
اضافة رد مع اقتباس
  #4  
قديم 09/11/2006, 06:59 AM
زعيــم متألــق
تاريخ التسجيل: 27/06/2005
مشاركات: 1,435
شكرا لك وطبعا نا معروفه لدي يعني لا يحتاج شرح

وشكرا
اضافة رد مع اقتباس
  #5  
قديم 09/11/2006, 07:26 AM
الصورة الرمزية الخاصة بـ الكلاسيكي
عضو مجلس إدارة الموقع الرسمي
تاريخ التسجيل: 06/04/2003
المكان: دنـيــآي ~
مشاركات: 18,711
ماشاء الله عليك ياهلاليه سنعه ..
حتى في علوم العرب وصب القهوه سنعه ماشاء الله عليك ..
وان شاء الله تكوني سنعه في ادارة بيتك وعيالك ..
والقهوه مالنا عنها .. وفيه ناس خاصه ادمنوا عليها يعني لو يمر يوم ماشربها يعورها
راسه وماينام ولا يهدا له بال .. وفيه ناس ولا مره ف حياتهم شربوها .. مثل والدي ..
وجيل الحين الصغار يقولون مو شاربين القهوه الا لما تحطون فيها سكر .. الله يخلف بس ..
انا اشربها كل يوم تقريباً كل مغرب بس مو ادمن عليها ولا يكني راسي لو ماشربتها ..
وصحيح ان المقاهي كثرت .. والانواع والاشكال من القهوات الاجنبيه انتشرت .. مثل الكابتشينو وغيرها ..
بس هذي تكون عاده في آخر الليل .. اما الظهر والصباح والمغرب تكون العاده القهوه العربيه ..
وانا بعد مثلك من الناس اللي تحاسبني المناسبات الخاصه لاني بصب .. وانا ما احب اصب ..
بس الحمد لله لما كبر اخوي اللي اصغر مني وكلته على كل شي ..

واشكرك على الموضوع اللي اطلعنا فيه على كل مايخص القهوه العربيه ..
شكراً لك على المجهود الطيب .. والرائع .. بانتظار الشاي <<مكسر الحديد ..
ودمتي لنا مبدعه ..
اضافة رد مع اقتباس
  #6  
قديم 09/11/2006, 08:52 AM
زعيــم فعــال
تاريخ التسجيل: 30/08/2006
المكان: سديراوي
مشاركات: 366
والله اليوم بدون قهوه مامهب يوم

بس حنا نحط معها ( مسمار(عويدي) - هيل - زعفران - مستكه)

وتطلع خياليه خاصة اا كانت من يدين الوالده

وانا لي مواقف كثيره يوم اني صغير

يعني لازم ايطيح مني كم فنجال و املي الفنجال لين يفيض والخ الخ الخ ..........
اضافة رد مع اقتباس
  #7  
قديم 09/11/2006, 10:40 AM
زعيــم مميــز
تاريخ التسجيل: 09/08/2006
المكان: الريــاض
مشاركات: 2,214
,,,
,,
,







هلاليــه سنعـه





ربما هذا الموضوع اخذ من اسمكـِ النصيب الاكبر ,, فـ ( السنع ) بات وشاحا يرتدي هذا الموضوع ,, وتفاصيله تعز الكلمات عن وصف مدى تكامله وتوافقه مع قرب فصل الشتاء وروعة القهوه العربيه في لحظاته ..
ربما هي اضافة بسيطه لهذا الموضوع .. هو انه شرب القهوه العربيه دونما تقديم معها بعضا من ( الحلا ) ولربما كان الاساس هو ( التمر ) يجعل من مذاقها نكهة هي الاروع بخلاف ما ان قُدمت يتيمه لـ وحدها .. اذكر ذات حين انني قدمت القهوه العربيه لاحد الاشخاص الغير سعوديين .. وشرب فنجال القهوه دونما ان يأكل من التمر .. وقال لي هذه القهوه لا تمتاز بـ السكر كـ غيرها من اصناف القهوه فـ استغرب طعمها كيف بدا له .. وحينما قدمت له تمره .. والحقتها بـ الاخرى .. ومن بعدها ثالثه .. فـ قلت له الان اشربها .. واخبرني عن طعمها .. وحين فعل ذلكـ استرسل في طلب القهوه حتى انه طلب قهوة يُعدها في البيت
وصفه اخرى / يُقال ان شفط القهوه العربيه من الفنجال بـ واسطة عصا ( التويكس ) المكسور ومن بعد ذلكـ اكله .. له نكهه رائعه .. عني انا لم اجربها
ولكن دائما اسمع هذه العباره من اخوتي بعد الانتهاء من اكل التويكس فـ دونما لا يشعرون .. تُغمض الحين ويبدا لحن ( اممممممم :p )
جربيها واخبرينا عن مدى حلاوتها .. ;)
شكرا لكـِ على هذه الزاوية الكريمة بـ محتوياتها ,, حقيقة جهد يستحق الثناء والتقدير ,, وعنوان الموضوع كان هو الاروع .. وتوشحت لغة الجمال حينما اكتمل عقد الروعة بين اسطركـ كل الاماني لكـِ بدوام التوفيق والنجاح ,,





****



كوني بخير
...SoMe OnE...
اضافة رد مع اقتباس
  #8  
قديم 09/11/2006, 11:19 AM
زعيــم مميــز
تاريخ التسجيل: 16/10/2005
مشاركات: 15,355
السلام عليكم و رحمة الله و بركاتـــه ,,

هلاليه سنعة

انا اشهد انك سنعة

القهوة العربية رمز من رموزنا .. و لها طعم و نكهة خاصة ..

شخصيا لا احب شربها .. يعني ان حطوهـا فنجال و ان كثرت فنجالين و بس !

بس بعض الاحيان و هذا الشي نـــادر اجيب شوكولاتة " توفي لك و تويكس و هالشلة ام اصابع " ..

و اجيك و اكسر الاصبع من فوق و الاصبع اللي تحت اكسره

و اغمس شوي منها بالفنجال و اشفط من فوووق

قسـم بـالله يا طعم خيالي

و لا الكاكاو يصير طعمه رهيب

و التوفي لك ابو نص ريال و هو سايح على بالي سنكرز

شكرا هلاليه على الشرح الجميل

و الظاهر ان العنوان بووه غلط اذا منب واهم

يا محـلا الفنجالـ و سيحه البالــ

هي يا محلا الفنجالـ مع سيحة البالـ

على العموم حصل خير ,, و كل واحد يصلح سيارته و يضف وجهه ,,

ابتكلم اذا كنت قاعدن اصب لشايب ..

اتعذب كلمة قليلة بحقي ,,

اصب فنجال .. فنجالين .. ثلاثه .. و الرابع و الخامس و السادس و السابع همن اقول للشايب برب اخليهم يسون قهوة ثانية

و يصب الثامن و العاشر و الحدعش بعدين تقضي القهوة و اجيب الدلة الثانية و الرجال فال الحجاج

القهوة عندهم صارت ادمان زي الهيروين اذا تركته ..

يعني اذا حطيت دلة بالمجلس و جيت بعد خمس دقايق و لقيته فاضية اعرف ان يا ابوك يا امك صار شايب

و اخر الكلام

السلام عليكم و رحمة الله و بركاته ,,
اضافة رد مع اقتباس
  #9  
قديم 09/11/2006, 01:26 PM
زعيــم متألــق
تاريخ التسجيل: 13/08/2006
المكان: أرض الله الواسعه
مشاركات: 1,057
شو هي ياسنعه يخرب بيت عدوك والله مانتي سهله على العموم ماعندي شي اضيفه على كلامك الا إني اقول انتبهو انتبهو لاتدمنون على القهوه
اضافة رد مع اقتباس
  #10  
قديم 09/11/2006, 01:27 PM
زعيــم مميــز
تاريخ التسجيل: 17/03/2002
المكان: الرياض
مشاركات: 2,196
مشاء الله عليكي

سنعه من جد


انا مو مررره مع القهوه صراحه
يعني يادووب في السنه مرتين
بالشده امشيها بالشوكولاته


إقتباس
استنشاق البخار الصادر من فنجان القهوة يعتبر مصدرا لتهدئة الاعصاب

انا اعشق ريحة القهوه التركيه
لكن مااشربها....

انا افضل الشاهي على القهوه
يعني مدمنة شاهي

موضوع حلو
ويستفاد منه بصراحه

مشكوره...
اضافة رد مع اقتباس
  #11  
قديم 09/11/2006, 02:09 PM
زعيــم مميــز
تاريخ التسجيل: 18/03/2005
المكان: سّــــــــــــــــــــواح
مشاركات: 2,772
أوويلااااااااااااااااااااااه يا نفله ..


وانا اقول وش هالريحه اللي اشمها من منتدى الجمهور وصاقعتن بدميجتي ,,


إقتباس
لحد يقرا الموضوع الا ماخذ فنجال ومتقهــوي ولا ترا ابزعل مايصيرتسيّرون ولاتقهوون

ههههههههههههههههههههههههههههههههههههههههههه

انا قلت الحين بتقول علي الطلاق .. اذبحلكم تيس .. اعطيكم حلاوه .. اما ترا بزعل قويه هذي طيب ازعلي وطقي راسك بالطوفه بعد ..


إقتباس
ويقول خلف بن هذال :

سوولي من الكيف وارهو لي من الدله ـ ـ ـ البن الاشقر يداوي الراس فنجاله
كيف لنا نحـرقه بالـنار ونــزله ـ ـ ـ وليا انقطع لو ورى صنعاء عنينا له

هالله هالله صح لسانه .. وقال محاكيكم هلال بن ظهران المقفع :

لا صرت بالبر والجو خلاوي ××× شب على الدله واضرب فيذا القدوعي



عوافي يا السنعه موضوع بوقته خصوصا وان البارحه انكب علينا البرد بصوره مفاجئه في الشرقيه .. مع اني مدمن قهوه وشاهي ولو بعز القايله ..


يالله ان شاء الله ربي يرزقنا بالمطر وتحلى النعيريه ,,


سلااااااااام,,
اضافة رد مع اقتباس
  #12  
قديم 09/11/2006, 02:28 PM
زعيــم متواصــل
تاريخ التسجيل: 02/11/2006
مشاركات: 136
ياااااااااااسلااااااااام سللللللم

رييييييييحتها واااصلتن بيت جيرااانااا

ماا شاء الله عليييتس ,,

تسنتس دااريه اني هاليومين طاايحه اقهوي بهالحريم

والله قهوتنا ولا كل القهااوي ,, مطيحه سوقهم

وهذاني شربت فنجالي ,, (())(())(()) >>> يقالك تهز الفنجال D :

تسلمين بنت ديرتي على الموضوع السنع
اضافة رد مع اقتباس
  #13  
قديم 09/11/2006, 02:42 PM
زعيــم مميــز
تاريخ التسجيل: 29/07/2004
المكان: شبكة الزعيم
مشاركات: 7,277
الله يعطيك العافية اختي هلالية سنعة على الموضوع الرائع

القهوه أصبحت مصدر أساسي في كل بيت وعاده مستحيل تترك من الجميع

الصراحة انا لست مدمناً على القهوه ، إن حصلت فلابأس وإن لم يكن ليس هناك اي مشكلة

وفيه بعض الناس ماشاء الله عليهم إدمان على القهوه

أذكر واحد من الجماعه الله يستر عليه لما جاء الدكتور يعطيه المخدر مانفع

اعطوه تقريبا 6 ابر مخدره والرجال مافيه امل يخدر

وفي الأخير قال الدكتور هذا عنده ادمان على شي وإكتشفوا انها القهوه .......

وفي الأخير
الف شكر لك اختي هلالية سنعة
اضافة رد مع اقتباس
  #14  
قديم 09/11/2006, 02:57 PM
ميسو
تاريخ التسجيل: 22/06/2002
المكان: حيث أنا ..
مشاركات: 7,243
ما شاء الله عليك والله سنعة من جد ,,,
موضوع متكااامل وراائع جداً ,,

من ناحيتي لستُ من عشاق القهوة العربية إلا مع "جمعة البنات" في الجامعة حيث يكون لها رونق خاص جداً ,,

ومن ناحية صب القهوة ما زلت أعاني إلى الآن في ذلك .. فأحياناً لا يخطر على بالي بأن انتبه لقواعد صب القهوة ,
فإذا بي أملأ الفنجال ملياً , ولكن لم ينبهني لذلك أحد إلا خالي ,,
ومن ناحية مجتمعنا النسائي خصوصا الشابات والأمهات بخلاف كبيرات السن لا يدققن في ذلك الموضوع ,


إقتباس
هل تتوقعون ان القهوات الغربيه سحبت البساط من القهوه العربيه عندالجيل الجديد ..؟؟
وهل ستظل القهوه العربيه شامخه وباقيه في الاجيال القادمه..؟؟

نعم ستظل شامخة وباقية في الأجيال القادمة , ,, لأنها رمز للكرم والأصالة ,
ولأنها شيء أساسي في البرستيج السعودي ,, يعني حتى لو لم تكوني تشربيها فإنك بالتأكيد ستقدمينها لضيوفك ,,
بنت خالي لا تحب شرب القهوة العربية منذ كانت طفلة وقد شبت على ذلك ,, وجارتها التي تسكن بجانبها حالياً أيضاً لا تحب شرب القهوة ,, ولأنهما اصبحتا كالصديقتين فإنهما في وقت القهوة يحضرون " الكابتشينو" بدلاً من القهوة العربية

إقتباس
يقول الشاعر راكان بن حثلين :

يامحلا الفنجال مع سيحة البال ..... في مجلساً مافيه نفساً ثقيله
هذا ولد عم وهذا ولد خال ...... وهذا رفيقاً مالقينا مثيله

ويقول الشاعر محمد بن عبدالعزيز القحطاني وهو يوصي ابنه

يابو محمد شب واقضب مكاني
في غيبتي قهو الرجال المشاكيل

وفل الحجاج لكل من جاك عاني
وابدا التحيه قبل سوق الفناجيل

احد الشعراء يوصي ابنه نمر وهذا يدل على كرمه وجوده ..

امل الوجار وخلو الباب مفتوح *** خوف المسير يستحي ماينادي
يانمر مافي صكة الباب مصلوح *** ولاهي لهلكم يامظنة فؤادي

وصفوها بأجمل الصفات .. ووصفو كيفية اعدادها ..

ياكليب شب النارياكليب شبه ,,, عليك شبه والحطب لك يجابي
وعلي انا ياكليب هيله وحبه ,,, وعليك تقليط الدلال النجابي

ويقول خلف بن هذال :

سوولي من الكيف وارهو لي من الدله ـ ـ ـ البن الاشقر يداوي الراس فنجاله
كيف لنا نحـرقه بالـنار ونــزله ـ ـ ـ وليا انقطع لو ورى صنعاء عنينا له

جميع الأبيات التي ذكرتيها عن القهوة يالغالية رووووعة ,,
ذكرتيني بأيام العيد ,, استخدمنا فيه " الداتا شو " ,, وكان من ضمن الفقرات لما يجي وقت القهوة نحط انشودة صبوا هالقهوة لسمير البشيري وإلي مطلعها يقول :

صبوا هالقهوة وقولوا يا حيا الله من جانا
ليالي الهنا طلت وقلوبنا فرحانه
نجمة هالعيد تلالي وعيوننا سهرانه
يالله عساها الفرحة تذكرنا ولا تنسانا

وكان يطلع لهم بالعرض صور دلال ووجار "كمار" قديمة وجديدة مع عرض لأبيات عن القهوة والدلة ,, وأعجبتهم جداً ,


إقتباس
ادري طولت عليكم العذر والسموحه منكم .. بس انا علمتكم من البدايه قلت تقهوو وانتم تقروون

فرق عندما يكون الموضوع طويل وممل ,, وبين الموضوع الذي تنتقلين فيه بسهولة ومتعة وتصلين إلى النهاية وإن كان ظاهره طويلاً وموضوعك يدخل في الفئة الثانية

هلالية سنعة .. استمري في تميزك ونكهتك الخاصة , وزيدينا من مواضيعك الممتعة والرائعة
اضافة رد مع اقتباس
  #15  
قديم 10/11/2006, 12:22 AM
زعيــم مميــز
تاريخ التسجيل: 29/10/2005
المكان: زمن اغبر
مشاركات: 2,790
الله عليك الله

جيتي على الوتر الحساس ياسنعه

ادمان قهوه بجميع الانواع وطريقتنا بالقهوه العربيه مثل طريقتكم (بمااننا حولكم يااهل سدير فالطبع واحد )

some one نيصحه لاتجرب التويكس مع القهوه لانك ماراح توقف (امممم تطلع من صميم قلبك )

وبالنسبه للحلى مع القهوه شي اساسي ويمكن نشرب قهوه بس علشان الحلى الي معه ,بس الي يعجبني في بعض الحريم قهواتهم تقدر تشربها لحالها من الطعم الحلو فيها.

وعندي عقده بصب القهوه خاصه لما تكون مفتوحه وتصب كثير ولاتدرين وش تسوين والي قدامك كبيره بالسن يالله يالله فشيله !

تسلمين يااسنع هلاليه على الموضوع الي غير شكل صراحه
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 05:46 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2024, Jelsoft Enterprises Ltd

Google Plus   Facebook  twitter  youtube