نادي الهلال السعودي - شبكة الزعيم - الموقع الرسمي - يامحـلا الفنجــالـ وسيحــة البــالــ ..

- منتدى المجلس العام (http://vb.alhilal.com/f1/)

وش ذا الزين وش ذا الزين ,,,

ياهلاليه ياسنعه موضوع قمه بصراحه ,,
انا احب القهوه وخاصه اللي انا اسويها >>من مدح نفسه :D......هع

واهم شيء تكون بالزعفران الأيراني الزين والا بلاش ,,,
الحمدالله الى الآن ماشربها وصلت حد الأدمان والا اشربها يوميا,,
بس اذا جاتنا اختي :D

ودي ازيد لكن موضوع مايحتاج مايقيتي لنا شيء,,,

>> مدري احس ردي ماله داعي لكن كنت مستعجله :D

ياحبيلك ياوخيتي هلاليه ,,,

جيت ابكمل ردوووود .. :)

.. abu_riman ..

هلا والله وغلا اخوي ابو ريمان
شكرا لمروورك وردك الكريم ..

----------

.. 9سامي لا تزعلونه9 ..

هلا والله اخوي سامي

إقتباس:

وبالنسبه لعدد كلمة القهوه اربعين مره كتبتيها <<< فاضي يعد

:) مااشا ءالله عليك وتراي مدري كم مره كتبتها <<<متعيجزه تعد
خلاص السنه الجايه ابجيب للمجلس العام شماريخ برحي لاطلع التمر ..
يعطيك العافيه اخوي على المروور والرد ..

----------

.. سهل ..

هلا والله وغلا بمشرفنا الكريم سهل ..

إقتباس:

يالله صبو هالقهوه وزيدوها هييييييييييييييييييل

اخبرها بالله صبو هالقهووه ..عاد تصدق احسب اللي يغنونها اردنيين .. :)

إقتباس:

الله يرجك انتي وعنوانك هههههههههه
إقتباس:
يامحـلا الفنجــالـ وسيحــة البــالــ ..
قلت وش هالخواجه اللي كاتبتن موضوع

مهوب من صالحكم ااذا انرجيت همين قهوتي تصير مرجووجه ولاتقدروون تشربوونها من الهيل :)
الواو ومع كلهن نفس المعنى :)

إقتباس:

عموماً كما سمعنا بأن القهوه بيضاء باليمن وتسوّد حتى تصل للشام
وهذا دليل فأهل الجنوب قهوتهم بيضاء حيث يضاف لها الحليب
واهل نجد شقراء وكل ما اتجهنا شمالاً تسوّد والدليل القهوه التركيه

والله معلومات جديده علي بعذر قهوتنا شقراء بين البياض وبين السواد

إقتباس:

القهوه على نار هادئه لمدة ربع ساعه على الاقل
اذا اردت ان تقنـّـد راسك

اثرك حرّيف قهوووه ماشاء الله بس تقند مدري وش معناها ..؟؟
الله يعافيك اخوي سهل مشاركه جميله ورائعه وعطيتنا معلومات جديده شكراً .. :)

...........

.. الهلالي النايم ..

هلا والله وغلا اخوي النايم

إقتباس:

بس انا مشكلتي الووحيده ان القهووه عندي مخلصه .. عشاان كذا ناااااااااااااااااااااااااااااايم

بعذرك اجل نايم .. يبيلك خياش قهووه عشان تصحصح :)
مشكوور اخوي على المروور والرد ..

------------

.. فرصه ضايعه ..

هلاوووين خيتووو فرصه كبر سدير مرتين :)

إقتباس:

وشذا الحركات الدعوى فيها قهاوي وشهاوي

ايه ما ألعب انا هههههههههههههههه

إقتباس:

مانشربها زيكم وقت المغرب إلا إذا كنّا مع أخوالي لازم القهوة عقب العِشاء أما ببيتنا ماأشربها إلا في السنه حسنه مع أني أحبها لا جابوها بس ماأفقدها

حنا لازم يوميا المغرب بس انا طنات اشربها اذا صار فيه حلى ولا شئ ..:)

إقتباس:

هذي من القصايد اللي دايم اسمعها مع أهلي ....

هههههههههههه اجل هذي ماركه مسجله مثلنا ..

إقتباس:

الله يعيدها قريباً لاجا البرد

ان شاء الله تعيدينها وعاد طلعات الشتاء وناسه حطب وشبه وسعة صدر .. :)

إقتباس:

هذا ماخبرت أهلي يسوونها ....
ولا أنا قد سويتها <<<< بتعلمكم أنها تزين قهوة

منتب سهله اجل خلاص ذوقينا قهوتس ونبي حلى زين :)

إقتباس:

وين السناعه المفروض تقولين نجيب الدله مب زمزميه

ههههههههههههههه انا سنعه مودرن .. يابنت الحلال الدله شغله تبرد ومايصلح تحمينها
الزمزميه تخليها حاره واي احد يجي يشرب منها بأي وقت ..

إقتباس:

حتى لوهم قاعدين على الارض

هههههههههههه ايه خليتس واقفه ولاتدنقين << بتعقدها :)

إقتباس:

دايم اصب وفيه تحتي ثنتين ماعمرهم اعتقوني من الصب

ههههههههههههههههه مثل حالتي

إقتباس:

تصدقين أنهم بدوا يدخلونهن في الزواجات وفي العزايم ....
في آخر السهرة يجي دور الكابتشينو والحركات

ياحليلهم .. اجل تطورووا مابعد وصلتنا ذي :)

إقتباس:

عاد لا تنسين تجيبين لنا الشاهي المرة الجايه

<< توهقت :) ابشري عاد الشاهي محبووبي الأزلي وان شاء الله اذا قدرت نزّلت موضوع
تامرين امر خيتووو فرفر ..

إقتباس:

ادعو لي بالتوفيق عندي امتحان
يوم الأحد يحدد مصيري الله الله بالدعاء

الله يووفقتس يارررررررب ويجعله مثل شربة الموووويه ..
يعطيتس العافيه يالغاليه على مروورتس وردتس الحلوو مثلتس مشكوووره ..

-------------

دمتـــــم بخيــر ..,, ولي عوووده ..,,

هلا فيكم مررره ثانيه ..

.. ~بنت الزعيم~ ..

هلا والله بالطش والرش نووور المنتدى والمووضوع ياغاليه

إقتباس:

ربنا يسامحك يا ختي تراي اقرا وانا صايمه
واشتهيت القهوه من كثر ما تكررين قهوه قهوه<<اخذتي ذنبي

الله يتقبل منا ومنتس خيتووو .. اجل استاثمت فيتس <<انبها ضميرها :(

إقتباس:

دايم اتفشل لمن يجونا ضيوف وانا لوحدي بالبيت
لاني ما اعرف كيف يسونها ولا مكوناتها ولا اعرف اصب باليمين...

ماعاش من يفشلتس اي شئ تبينه حاضره :)
انا من قريب اتقنتها والا قبل تجارب :)
يعطيتس العافيه يالغلا على المروور والرد الجميل والرائع ..

------------

.. صدى الامس ..

حي الله اخوي صدى

إقتباس:

الوقت : بعد صلاة المغرب .

المكان : اي مكان في الدنيا ما تفرق

اهلك حولك وقهوة وتمر قمة الوناسه في هالدنيا ..

هههههههههههههههه احسبه توقيت مباراة

إقتباس:

اكره ما عندي اذا شفت القهوة بالترمس (( زمزمية عشان يفهم البعض )) ..

نظامي نظام شياب لازم تكون دلة والا منب متقهوي

ههههههههههههههههههه عاد مشكله ماعندنا الا زمزميات خلاص
الشكوى لله نبي نصلّح لك دله صغيره <<حالفه ان الكل يتقهوى :)

إقتباس:

اذا صكتك الخرمة والله لو بـ طاسه تبي تشربها

الخرمه اخبرها مدينه اشوفها بالنشره الجويه ههههههههههههههه
ممكن تعرّف لنا الخرمه وشي ..؟؟؟

إقتباس:

وياشينها اذا صرت مشتهي القهوة وكنت عند واحد تستحي منه !!

اكره حياتي !! ابي اتفنجل على راحتي ما اعرف !!

اجل تعذيب .. تصير رسمي يابن الحلال عند الاكل والشرب مافيه حياء
دق الميانه وفض الدله راس مالها قهووووه ..:)

إقتباس:

مشكلته حياوي

هههههههههههههههه ما اصدق
ميرسي خيوو صدى على المروور والرد اللطيف والجميل والرايق ..

------------

.. ماجد مقبل ..

هلا والله وغلا اخوي ماجد

إقتباس:

اقول ما عندكم كابتشينو .....

القهوة وما ادرك ماالقهوة وتراني ما احب القهوة

بس يوم شفت موضوعك قلت لازم اشرب قهوة

عندنا قهوه طبيعيه <<وراه القهوات الثانيات مهبولات هههههههههه
الله يحييك ياماجد وبالعافيه ترى قهوتنا ماتنعاف ..

إقتباس:

يامحلا الكوكتيل في سيحة البال

اجل من عشاق الكوكتيل

إقتباس:

اللحين يجي واحد ماشي مليون ما عنده ديموقراطية يقول وش يبي ذا

لا عاد انحن موب ديكتاتوريين نعطي فرصه للحوار الشعري ههههههههههه

إقتباس:

بعدين وش ها التعقيد في صبة القهوة والله لوانها خلطة العمر
>>> ياما تصفق بسبب ها القهوة

:) بلاي متليّعه من صب القهووه قلت خليني اقوولكم الشرووط
شروط اتفاقية اوسلو على غفله <<< تسمع فيها بس ماتدري وشي

إقتباس:

اتمنى انك تسيرين على الشاي الاخضر تراه هو المفيد

مشكله منيب اواطنه الحمدلله على النعمه بس يقوولوون فوايده عظيمه
الله يخلف علي مدمنة الشاهي الاسود :( <<اللي مافيه فايده
يعطيك العافيه اخوي ماجد على الرد الجميل والرائع ..

-----------

.. مجنون @ الزعيم ..

هلا والله اخوي مجنون

إقتباس:

زينة القهوة بالدلة

مافيه شك زينه بس اللي يخربها انها تبرد وخاصه بالشتاء ..
شكرا اخوي علىالمروور والرد ..

-----------

.. راشــد ..

هلا والله اخوي راشد
يعطيك العافيه اخوي على مروورك وردك ..

--------------

.. iq1399 ..

هلا والله وغلا اخوي اي كيو

إقتباس:

بشرب من الدلة ولو كانها سم & ما اهز فنجالي ولا اقول كافي

صح لسانك .. بيت رائع

إقتباس:

وللمعلومية فقط { الشيء اذا زاد عن حده انقلب ضده }

أكيد المفروض اننا نعتدل في كل شئ ..

إقتباس:

انني من مناصرين القهوة التركية

,
اجل من مناصري غلطة سراي :) سبحان الله اغلب القهوات ذقتها الا التركيه عجزت :(
عوافي خيوو اي كيووو على المشاركه الجميله والرائعه .. شكرا ..

-----------

.. Turki(الرايق)Turk ..

هلا والله اخوي الرايق

إقتباس:

بصراحة اثرك فنانة بتصليح القهوة

عاد قهوتي ماتجي شئ عند قهوة الوالده الله يحفظها
الله آميــــن .. جزاك الله خير اخووي ..
وشكرا على مروورك وردك الكريم ..

-------------

.. ســـفير الزعيم ..

هلا والله اخوي سفير

إقتباس:

بس انا عمري ماشربت قهوه عربيه سعوديه

غريبه طيب يمكن تلقاها بالسفاره عندكم ..

إقتباس:

اتمنى اشربها بس ما اعرف
اصلحها اتمنى اتعلمها

يالله عاد عطيتك الطريقه وان شاء الله تضبطها ..

إقتباس:

قهوه مغربيه بس مو حلوه

وشلوون قهوتهم ؟؟؟

إقتباس:

وان شاء الله لما اجي السعوديه اشربها

ترجع بالسلامه اخووي .. شوكرا على الرد والمروور ..

------------

.. الـــوردة الزرقاء ..

هلا وغلا باللي نورها غطى الكهرباء

إقتباس:

وش ذا الزين وش ذا الزين ,,,

من بعض ماعندكم ياغاليه

إقتباس:

احب القهوه وخاصه اللي انا اسويها

طيب ذووقينا قهوتس <<<نشبه :)

إقتباس:

واهم شيء تكون بالزعفران الأيراني الزين والا بلاش ,,,

اكيد الزعفران صارو يغشوون فيه واهم شئ يكوون الأصلي

إقتباس:

مدري احس ردي ماله داعي لكن كنت مستعجله

بالعكس ياقلبي اهم شئ طلتس وردتس وش ملحه ..

إقتباس:

ياحبيلك ياوخيتي هلاليه ,,,

ياحبيلتس اكثر :)
مشكووره وردتنا على المروور والرد الزين ..

------------

مشكوريــــن يا زعماء على ردودكم واضافاتكم الرائعه الله لايحرمنا منكم ..
دمتــم بخيـــر ..,,

هلا بالسنع كله ...

ههههههههههههههه

والله ياهي دله ... بجد محكوووووووووره << مايحب يحطم..

على المستوى الشخصي..
القهوه .. لاهتم بها كثيرا ... يعني اذا رحت عزيمة اشرب.. مارحت ماادور... حتى بالبيت .. احيان اشرب والغالب اصف..

اما الشاهي.. وااااااااه على الشاهي.. ( سؤال يالذيب هو شاي والا شاهي ؟؟! )
انا ابدع في ذا المجال.. يعني احسن وافضل من يحكر الشاي في ( اورانس) وبدون فخر أنا...
خصوصا اذا كان ف(كشته) وعلى ( السمر) يووووووووه ياهي خطيره ..<<الكوره الاخيره ..هع

مابدي اطول.. ومن اخرها . انا انسان افضل الشاي... واشربه بشكل يومي ولله الحمد..

اما عن غزو القهوه الاجنبيه للقهوه العربيه .. فما هقيت الا انه شيء عااااااااادي في ظل انجرافنا نحو الاخر الغير المتزن .. وان كان هذه القهوه لاتؤثر الا تأثيرا بسيطا في انتمائنا وحبنا لاصالتنا ..مقارنة بتاثير غيرها ..

في امان الله ياكل السنع ..

( تابع )

موقف نسيت اذكره....

في صبت القهوه .. قبل امد ليس بالقريب ... كنت مرافقا لاحدهم لمنطقة خارج جدة .. هناك استقبلنا احدهم ... في غير بيته .. بطبيعة الحال كنت اصغرهم ..
فتبرعت بصب القهوه رغم اني اعتبر ضيف... لكن من ضرب صدره للناس ماقال اح ..
المهم صبيت فنجان .. واسوقه على الرجال وعلى خويي.. اناظر فالرجال الا وهو يطالع في... قال .. لاتصب كذا .. انا كن واحد ضاربني لما قال هالكلمة..
طوووول عمري اصب قهوه ... وهذي صبتنا.. ونهايتها يجي يعيب هالادمي..
يعني صبتنا عاديه لا تعبي الفنجان ولا تقلله مررررره ...
لكن الادمي الله يهديه .. حاسب حساب الدله .قال لاتكثر علشان تكفينا لليل..
حينها علمت ان الرجال ماحوله ( معزبة ) ويبي الدله تكفينا...

في امان الله ,,

( ( هـــــــــــلالـــــيـــــه ســـنــــعه ) ) اسم على مسمى
رائعه دائما اختي (( السنعه )) اهنئك على رقه اسلوبك في
كتابة ابرز شي في عاداة العرب موضوع مفيد وموضوع لائق
وموضوع متكامل ..

شهويتيني بالقهوه وانا بالدوام >هههههههه

http://vb.alhilal.com/attachment.php...1&d=1163423709
:D
قلب ((هلاليه سنعه)) :D

..................

بمناسبه الموضوع لقيت صورة
ابيكم تركزون فيها ..:)

http://vb.alhilal.com/attachment.php...1&d=1163425434

وش الغريب بالصورة ..؟؟:D

... وعليكم السلاااااام ورحمة الله وبركااااااته ...

wow

... هلاليه سنعه كعادتك مبدعه s60s
... وكلامك عن القهوهـ ما يوصفه واصف :clapping:
... ماشاء الله عليك ...

... شكرنااااات سنوعه على هيك مزووووع لتييييف وزريف ...

... إيييه سح نسيت أقووول يعتيك العاااافيه على فنجاااان -> وشو فنجااان :p :razz:
... أقسد فنجاااال القهوهـ :d

... إلااااا أقووول فنجاااال فسحى وإلاااا فنجااااان :confused: :D

... براااايفت الورته http://www.des-spot.com/fm/images/smilies/cuteflo.gif

... السووورهـ فيها فيس مدري جمجمه راااااقل :eek: :D

... الفيس تحت في اليسااار على الزاااويه <- وسلتي للمكااااان :p :p

واااااااااااااااااااااااوك خرمت للقهوة ابقوم أقحن لي دلة أو دلتين
مع تمر سكري ياويلييييييييييييييه....

هلا بـ هلاليه سنعه :)

إقتباس:

لحد يقرا الموضوع الا ماخذ فنجال ومتقهــوي ولا ترا ابزعل مايصيرتسيّرون ولاتقهوون

لأ تسلمين خيرتس سابقتس :d ، الحمدلله تقهويت المغرب مع خالاتي "حريم خوالي ":yes: .. يـ كثر جمعاتهم هـ الحريم :razz: --->> اجتماع مافيه بنات وجايه لأنه فـ وسط اسبوع :d .

إقتباس:

طريــقة إعــداد القهـــوه ..

إيه الله يعافيتس علميني وشولون اسويها:) ، أعرف للموكا والكابتشينو وفرابنشينو وقهوة تركيه ولا اعرف شلون اسوي قهوة عادية :dead: ..

إقتباس:

المقادير :
قهوه محمووسه ومطحونه + ماء حار + بريق قهوه + زعفران +هيل
الطريقه :
نجيب بريق القهوه ونحط فيه مويه مغليه همين تحطوون كم فنجال قهوه على حسب الكميه وعلى حسب البريق وحطو شووي زعفران وخلوو القهووه تغلي (تفووح) واقصروو لها شووي تقريبا ربع او ثلث ساعه همين جيبو الترمس (زمزمية القهوه) وحطو فيها ملعقة هيل مطحون وشووي زعفران وصبو القهوه فيها .. وبالهناء والعافيه مطرح مايسري يمري..

هي سهلة لكن العجز يصعبها :d ..
الله لايحرمني بس من اهلي :shy:، مااعرف اصلح القهوة ولا اشتهيها الا بـ الجمعات + لازم يصير فيه حلى وإلا أشرب من دون مـ أكل مـ أعرف :D .. واحياناً والله مااشتهيها بـ الجمعات نطلع برا ونجيب لنا ونرجع ---->> إستحاله تروح لـ إستراحه وتجلس فيها لين الليل لازم تطلع منها وتهجول :d

المصيبه صار أسمي مرتبط بـ القهوه الغربية ، زي مثلاً إذا ركبت مع واحد من خوالي قالي هاه نشتري لك كافيه لاتيه :d ، معروفه بـ الإدمان :( عاد من كثر مـ اشرب قهوه ماصارت تأثر فيني :d يعني ايزي اشرب لك كابتشينو وأنام :d ..

إقتباس:

2- فيه احد ييضف عليها الزعفران والهيل << هذا حنا وفيه اكيد غيرنا ياسلام على ريحة الهيل

يب لازم زعفران وهيل s13s

إقتباس:

3- وفيه احد يضيف مع الزعفران والهيل المسمار <<مهوب الحديد المسمار اللي هو (القرنفل )ويكون مطحون ..

ياشينهم :mad: زي مره رايحين نسلم ع خال أمي ورايحه انا مع خالاتي وامي ، قلت وش اسوي بـ الحالي بجي معكم :mad: --->> دائما تحشر نفسها بينهم :D .
المهم رحنا وسلمنا عليه ودخلنا بـ مجلسه وجابوا القهوة ، عطوني الفنجال وشربت ولاشعورياً قمت ورجعت الفنجال وحطيته ع الطاولة :D قال خال امي وراه قهوتنا ماجازت لك ،امي قامت ترقع لي تعرف بنات هـ الجيل مايشربون قهوتنا ، ولو تشوفين امي وخالاتي والله ماشربوها :D .. اهلي مايحبون قهوة بـ المسمار:rolleyes: يـ اختي ريحتها شينه وقوية :mad: :d

إقتباس:

1.. القهوه العاديه (البن ) 2.. قهوة قشور القهوه 3.. قهوة الشعير <<زينه للي فيهم سكر

ايه هـ القهوة نكبتني :D ، اتذكر فـ رمضان جالسين ع السفره بـ الاستراحه ننتظر يأذن ونفطر :) ، قدامي ترامس القهوة ، اخذت الترمس الصغير وصبيته لـ جدتي " متعوده دائما شي صغير حافظه صغيره ترمس صغير لـ أمي:) " واشم الريحه شينه وعطيت بنت خالي تعطي جدتي قالت تبين جدتي تكبها عليك :rolleyes: ، قلت خير موب انا مسويتها :mad: بس صبيتها قالت يالخبله ذي شعير وجدتي ماتشربها بعدين هـ الترمس لـ امي :dead: من جد تفشلت :D واشوى اني ماعطيتها جدتي والا كان تنكدت فـ ذاك اليوم:rolleyes:

إقتباس:

ايضا في الكشتات البريه وفي مناسبات قله .. واستغني عن الدله واستبدلت بالترامس او حافظات القهوه والشاي (زمزميه )
وذلك حتى تحفظ الحراره وتبقى مدة اطول .. وايضا اشكالها متعدده ومختلفه تلبي كافة الأذواق ..

صااادقه أحنا ماعد نستخدم دله :) كلها ترامس وزمزميات حتى للشاي :yes: ..

إقتباس:

انا مثلاً.. يوم اني بالثانوي كانت القهوه عقدتي اذا قالو فيه عزيمه زملت وضاق صدري
تخبرون اوول كننا نخاف من صب القهووه يمكن تنكب ولا شئ ولا نكثر ولا نقلل ماعرفنا لهم لكن الحين اشوى
زارتنا ام جيراننا اول مره وكانت من الشمال وصبيت لها قهووه وتجيكم اختكم في الله وتملى الفنجال ملي <<< يقالها كريمه ..

يوووووووووووه يـ شينها ، يـ أختي أكره نفسي لـ قالوا صبي القهوة :mad:
إذا صبيت ليتهم يسكتون ولا يعلقون لا يجلسون يعلقون :upset: ، زي دائما لا شعورياً امسك لك الزمزميه بـ اليد اليمنى والفنجال بـ اليد اليسار واعطيهم بيدي اليسار :d ، تعالي شوفي المسخره ع وإلا يقولون لا ترجين القهوة :mad: طيب شلون مـ أرجها ترمسكم كمخه كبير :d .. من جد بهذله :rolleyes: ..
مشكلتك نفس مشكلتي أحب أملي الفنجال :d

إقتباس:

3- -أن تقول لمن تقدم له الفنجال تقهو أو سم أو تفضل أو خذ

شوفي ماقد صبيت لأحد غريب :d " الحمدلله " إن صبيت فـ تلقيني صابه لـ جدتي وإلا وحده من حريم خوالي وإلا خوالي ، اما خالاتي وبنات خالي الله لايهينهم احط قدامهم الترمس واقول كل وحده تصب لـ عمرها فاضيه لهم :d
وطبعاً اللي اصب لهم مـ اقول لهم سم وإلا خذ :rolleyes: ، تفضل والا امد الفنجال وانا ابربر :d ---->> اكثر شي تسويها الاخيره :d .

إقتباس:

5- حمل الفناجيل باليد

شلون اشيل كل الفناجيل بيد وحده ! علشان تتكسر الله لايحرمنا بس من الطاولة :d

إقتباس:

7- أن تبدأ بمن في صدر المجلس
8- أن لا يصب القهوة أحد الضيوف
9- أن لا يصب القهوة الأب والابن موجود
10- أن لا يصب القهوة الأخ الأكبر في وجود أصغر منه سناً من أخوته
- 11- أن لا يصب القهوة الكبير في وجود من هو أصغر منه سناً
12- أن لا يبدأ بصب القهوة من اليسار
- 13- ان تبدأ باليمين

هذي شكلها نصائح للي عندهم مناسبة وإلا ضيوف غرباء :yes: ، الحمدلله فـ هالحاله مانعرف نصب القهوه لا أنا ولا بنات خالي :d الله يعافي الصبابات موجودات :yes:

إقتباس:

هل تتوقعون ان القهوات الغربيه سحبت البساط من القهوه العربيه عندالجيل الجديد ..؟؟
وهل ستظل القهوه العربيه شامخه وباقيه في الاجيال القادمه..؟؟

لأ ، القهوة العربيه لها مكانتا :)
وحلاتها المغرب مع الأهل + حلى :d ، اما تشربينها لـ حالك مالها طعم :yes: ..

إقتباس:

ادري طولت عليكم العذر والسموحه منكم .. بس انا علمتكم من البدايه قلت تقهوو وانتم تقروون
اللي يعد كم تكررت كلمة قهوه بالمووضوع له دلة قهوه مع صحن برحي ..؟؟<<مضروبه على راسها برحي هالوقت .. عاد احس اني ظلمت الشاهي رفيق القهووه ولاجبته بالطاري ولا شئ اخاف يشره ولا شي..

لأ ماطولتي إلا وسعتي صدري :yes:

يسلمو خيتو هلاليه ع هـ الموضوع السنع :d .

الفيروسه الزرقاء

حياكم الله :)

.. عزوز الأزرق ..

هلاوالله وغلا خيوو عزووز ..

إقتباس:

ياهي دله ... بجد محكوووووووووره << مايحب يحطم..

ايه هين اذا ماطلتها يابا الحصين بارجمه هههههههههههه << افلقني ان عرفت معنى المثل :)

إقتباس:

اما الشاهي.. وااااااااه على الشاهي.. ( سؤال يالذيب هو شاي والا شاهي ؟؟! )

يابن الحلال كلهن نفس المعنى بس شاهي احس لها وقع اخر :)

إقتباس:

انا ابدع في ذا المجال..

احس ان شاهيك اسوود تقل شاهي مصاريه هههههههههههههه

إقتباس:

يحكر الشاي في ( اورانس) وبدون فخر أنا...

اورانس وينها فيه ؟؟؟؟ ... ماشاء الله وتمدح نفسك يالشيف عزووز :)
عاد الشاهي كلن يضبطه مهووب مثل القهووه يبيلها خبره ..

إقتباس:

خصوصا اذا كان ف(كشته) وعلى ( السمر) يووووووووه ياهي خطيره

ايه شاهي الحطب له طعم ثاني ونكهه خاصه اصلا كل شئ بالبر يحنط :)

إقتباس:

انا انسان افضل الشاي... واشربه بشكل يومي ولله الحمد..

بالعافيه خيووو ..انا وحده يصكني راسي اذا ماشربت الشاهي ..

إقتباس:

( تابع )

حي الله التابع :)

إقتباس:

انا كن واحد ضاربني لما قال هالكلمة..

ياشين اللي يفشلووون :(

إقتباس:

الادمي الله يهديه .. حاسب حساب الدله .قال لاتكثر علشان تكفينا لليل..
حينها علمت ان الرجال ماحوله ( معزبة ) ويبي الدله تكفينا

انواع القعط بعدين انتم ضيوف المفروض مايفشلكم :(
يعطيك الف عافيه اخوي عزووز علىالمرورين والردين الأكثر من رائعين ..

.. مقدر الهلال ..

هلا والله وغلا اخوي الكريم مقدر
شكرا اخوي على الإطراء والثناء :)
ويعطيك الف عافيه على المروور والرد الجميل ..

.. الـــوردة الزرقاء ..

هلا والله بوردتنا الحلوووه حياتس الله مره ثانيه

إقتباس:

http://vb.alhilal.com/attachment.php...1&d=1163423709

صراحه روووعه الصووره والقلب مشكوووره .. يعني قلبي كلبووه قهوه ههههههه

إقتباس:

http://vb.alhilal.com/attachment.php...1&d=1163425434

الغريب ان شي محموس وشي ما انحمس زين هههههههههههههه <<<روقينا :)
تصدقين عاد احوولت عيوني وانا اشووف الصوره ركزت فيها شفت راس واحد طالع وجهه وموقعها تحت
<<<<< وشي الجايزه هههههههههههه
ميرسي خيتو ورده على الصور والمروور المميز يعطيتس العافيه .. :)

.. محبوبة الزعيم ..

هلا والله وغلا اختي محبووبه

إقتباس:

وكلامك عن القهوهـ ما يوصفه واصف
... ماشاء الله عليك ...

الله يسلمتس ..

إقتباس:

... إلااااا أقووول فنجاااال فسحى وإلاااا فنجااااان

هههههههههههه علمي علمتس خيتووو بس اتوقع والله اعلم فنجان
لأن احس فنجال عاميه ..
مشكوووره يالغلا على مروورتس وردتس اللطيف ..

.. ياما وياما ..

هلا والله اخوي ياما وياما

إقتباس:

ابقوم أقحن لي دلة أو دلتين
مع تمر سكري ياويلييييييييييييييه....

ماشاء الله بالعافيه .. اجل مدمن قهوووه :)
شكرا على المروور والرد اخووي ..

.. الفيروسه الزرقاء ..

هلا والله وغلا بخيتوو فيووو

إقتباس:

الحمدلله تقهويت المغرب مع خالاتي "حريم خوالي "

ايه ميخالف فنجال مهووب ضار :)

إقتباس:

اجتماع مافيه بنات وجايه لأنه فـ وسط اسبوع .

ايه تحنط الطلعات وسط الاسبوع :)

إقتباس:

الله يعافيتس علميني وشولون اسويها

ابشري من عيووني بس بشرط علميني وشلون اسوي موكا وحده بوحده :)

إقتباس:

ولا اشتهيها الا بـ الجمعات + لازم يصير فيه حلى وإلا أشرب من دون مـ أكل مـ أعرف

كل شئ بالجمعه حلوووو .. اكيد اهم شئ الحلى .. بس ماشاء الله فيه ناس يشربوونها
بأكواب من دون تمر او حلى ..

إقتباس:

وتجلس فيها لين الليل لازم تطلع منها وتهجول

هههههههههههههههه تبين الصدق خيتوو صرنا نمل هالاستراحات تحسين انتس مقيده :(

إقتباس:

من كثر مـ اشرب قهوه ماصارت تأثر فيني يعني ايزي اشرب لك كابتشينو وأنام ..

ههههههههههههههههه انا غيرتس مدمنةشاهي وصار الشاهي مايأثر فيني على قوولتس ..

إقتباس:

رايحين نسلم ع خال أمي ورايحه انا مع خالاتي وامي

ماشاء الله عليتس واصله

إقتباس:

مايحبون قهوة بـ المسمار يـ اختي ريحتها شينه وقوية

صادقه .. ريحتها حاده وطعمها مهوووب زين .. يمكن مسمار اهوون
مره كنت مع امي عند ام الجيران صبت لنا قهووه ترووع :( حاطه فيها مليوون عشبه ولونها
استغفر الله اخضر ... صدق ان الناس يختلفوون ..

إقتباس:

ماعطيتها جدتي والا كان تنكدت فـ ذاك اليوم

يووووه زيين فكتس الله والا ان كان علوووم ..:)
لا

إقتباس:

ترجين القهوة طيب شلون مـ أرجها ترمسكم كمخه كبير

هههههههههههههههههههه دايم يقولوونها لي يقولوون لاترجينها همين تنفجر احس انهم يأرنبوون
يختي والله لوان فيها قنبله نووويه .. انواع الترامس تعقد وتبهذل شي يصب وشي مدري وشلون ينفتح ..
عشان كذا ابعتزل الصب شكلي <<متى حفل الاعتزال هههههههههه

إقتباس:

واقول كل وحده تصب لـ عمرها فاضيه لهم

ايه حلوو اللي تمونيين عليهم ماتشيلين هم ..

إقتباس:

وانا ابربر

إقتباس:

الله يعافي الصبابات موجودات

اي والله الله يعافييهن فكن ازمه .. عاد سووقهن ماشي حتى العزايم الصغيره
صارو يجيبوونهن الله يوووسع لهن فرجوو لنا .. :)
يعطيتس العافيه يالغاليه على مروورتس وردتس المميز والأرووع والاضافات الحلوووه
الله لايحرمنا منتس ..

دمتم بخيــر وعافيــه .. ,,

موضوع رآئع و "سنع" على كآتبته ..
القهووهـ رمز "عربي" أصيل .. وترآث تقليدي .. لا يمكن الاستغنآء عنه أبداً ..
عن نفسي اذا شفت الدله "تهيضت " خذيتلي فنجال :d .. اما اني يجيني صداع اذا ما شربتها .. الى الان ما وصلت لـ المرحله :p .. بس اعرف نآس اذا ما شربوا قهووه في ذاك اليووم تجيهم حاله صعبه :d ..
ويازين الدلة اذا كانت مصلحه ع الحطب :) في عز الشتاء وفي البر .. يجي لها طعم مووب صآحي :d ..
مشكوورهـ يالسنعه ع الموضوع المميز .. كما هي عآدتك دآئماً ..

.. MeToOo ..

هلا والله وغلا خيووو ميتووو

إقتباس:

عن نفسي اذا شفت الدله "تهيضت " خذيتلي فنجال

تهيضت وفنجال قل خمسه سته :)

إقتباس:

بس اعرف نآس اذا ما شربوا قهووه في ذاك اليووم تجيهم حاله صعبه

الله يعييينهم ادمان اجل :(

إقتباس:

ويازين الدلة اذا كانت مصلحه ع الحطب في عز الشتاء وفي البر

اووووووه كل شئ على الحطب يهبل :)
مشكوور خيوو ميتوو علىالمروورالجميل والرائع ..
دمت بخير ..,,

الله يعطيتس العافيه على الموضوع الرائع

.. صاحبة المجد الهلالي ..

حياتس الله يالغاليه صاحبة المجد
ومشكوووره ياقلبي على المروور والرد .. :)
دمتي بخيــر..,,