موقف مرعب ومحرج في نفس الوقت (اطلق من موقف الاسطورة والكلب )
هلا والله بالشباب :
والله ما ادري شلون ادخل في الموضوع واقولكم الي صار .
اليوم اليوم كان عندي اختبار فيزياء وانا داخل الفصل واحط الدروس على الماصة ويدخل الاستاذ ويزع الاوراق بدون سابق انذار , طبعا انا كنت اراجع المراجعة الاخيرة وطبعا الاستاذ عطاني الورقة وعلى الطاولة كل اوراق الفيزياء <==== من كثر الاوراق تقول هذا طاب في مستودع ورق , المهم وادخل الاوراق باسرع ما يمكن واجلس احل ومع الربشة نسيت اكتب الاسم وما كتبته الا بعد نص الوقت .
نجي للزبدة وانا جالس واشوف المجموعة الي جنبي ( طبعا كالعادة لقافة ) واشوف في اختلاف في الاوراق يعني ورقة فيها رسمة والثانية فيها رسمة غير , قلت يمكن الاستاذ يبي يسوي تمويه على الطلاب ويجرجرهم المهم يوم رن الجرس وسلمت الورقة اشوف الاستاذ وهو يجمع نفس اوراق مجموعتي ان في شي غريب .
هذا الشي ان الورقة لها وجهين ومادريت عن ها الشي ( انا في ثالث يعني اي خطأ كبير يوديني في داهية ) انا يوم شفت الوجه الثاني قلت يمكن انا اتوهم , بس السالفة ما طلعت توهم السالفة طلعت صدق , انا عيوني قبت وقلبي صار ينبض مليون نبظة بالدقيقة , وجا الاستاذ يبي يسحب ورقة الي وراي ومر من عندي وناديته وقلت له : استاذ ما دريت عن الوجه الثاني للورقة , الاستاذ ارتبك وقال : لا يا فهد ما لك داعي ليه كذا , وجالس يدور ورقتي وسلمها لي وقال حل الحين , الحمد لله ان الوجه الثاني سهل والاختيارات الي فيه الاستاذ معطينا زيها بالضبط في المراجعة ويوم خلصت من الاختيارات جا الاستاذ وهو متربك وقال لي : رح اول واحد الحين ونشوف لك حل , رحت اول واحد وانا مرتبك مرة وما اقدر اكتب وارتجف تقول نافضني كهرب وانا احل الورقة يدي ترتجف ومااقدر احل ابد وجا استاذ الاحياء ( علينا الحصة الثانية ) وجا استاذ الفيزياء ويقول لي : فهد حل على مهلك قدامك وقت لا تخاف , وانا شوي وانفجر من الضغط , وقال لي بعد : احسن لك تروح تحل في غرفة المدرسين , واقوم مع الاستاذ الي كان يراقب علينا واطلع برى الفصل , قال لي : احسن شي نروح لغرفة الوكيل , ونروح لغرفة الوكيل ونقول له عن السالفة <=== من العجلة والخوف زرفت الة حاسبة حقت واحد من الشباب بدون ما استاذن , وادخل الغرفة وارتاح شوي نفسيا واحل بسرعة ( الحمد لله الاسئلة كانت مرة سهلة ) وخلصت بسرعة واسلم الورقة وانا مافيني حيل افكر ولا استوعب الي صار .
وادخل الفصل والاستاذ يشرح وانا نفستي مرة تعبانة وحتى الاستاذ جالس يسال الشباب , قلت في نفسي : لو يسالني ابخرب الاخلاق , وفي الحصة واتذكر موقف الاسطورة وجلست اضحك شوي وقلت كنت اتشمت فيه هذي عقوبة من ربي على الشماتة .
للعلم فيه اكثر من 6 شباب في ثالث علمي صار لهم هذا الموقف .
وفي النهاية اقول للشباب اذا جيت عند الاختبار تاكد زين من الورقة هي وجهين ولا لا .
تدري قد صارلي نفس ها الموقع بس اختبار انجليزي وخليت الانجليزي عبري ما دريت الا على اخر الوقت مره وتشووووووووووووف الخط وشلون قايل بس عاد انا خطيط انجليزي ما فيه امل تقراء شي وانا احل المهم الاستاذ كان يجمع الاوراق قلتله قالي (مش زنبي انا منبه انها على الوجهين) تعرف مدرس مصري وانا الضغط واصل مليون وانواع النرفزه هو يسحب الورقه وانا كتب و الورقه في الهواء
طيب وش شعورك والإستاذ يقول ماعليش ويواسيك كنه يواسيله واحد عليه قل صح
بس ما عليش أنا أقول السبب الحقيقي وتراه من جد هالكلام...
والسبب هو إنك تذاكر مع توزيع الأسئلة وهذا خطأ يطيح فيه الكثير من الناس لأنها تسبب (( خلط في العلم )) على قول علماء التربية يعني إنك تلقاك تتذكر الجواب ومكانه بالكتاب ولا تقدر تكتب الجواب وبعدها تشوف القهر من جد
من المفترض أن تنتهي من المذاكرة على الأقل قبل الإختبار بربع ساعة على الأقل وشوف النتايج ساعتها
على العموم فكك الله المرة ذي واحمد ربك واشكر مدرسك اللي فزع معك هالفزعة ( أكيد هلالي )
الحمد لله على كل حال وزين اللي انتهت على كذا ...
الله يوفقك في الإختبارات النهائية وباقي هالإختبارات طبعا ونشوف معدل يحبه قلبك إن شاء الله
لجين : لا يا اختي لا تتشمتين ترى والله يصير لك موقف مال امه داعي بسبب الشماتة , ها كيف اختبارك ذاكرتي زين وحليتي زين , واهم شي تاكدي ان الورقة وجهين ولا لا .
bahr01 : اي والله الحمدلله والمدرسين مرة طيبين , اخوي بالنسبة لوصفك لي بالدافور هذا والله شي اعتز فيه لان ودي اصير دافور , بس الي صار في الاختبار مع الربشة وغيره حاولت اني اكمل الورقة باي طريقة ولو ان شاء الله غلط المهم اكملها علشان يمكن الاستاذ يدزني في شي , لو اني دافور كان جلست ولا عرفت وش اسوي لان اهم شي عندي الدرجات , وهذا يعني ثاني اهم شي عندي في تلك اللحظة .
زعيم اسيا : فرحان ؟ ها العلامة الي جنب السؤال ما عجبتك ( ) , لا ودك اني ناسيه علشان اجي وافش راسك يا بابا , وبالنسبة للتحدي انس انه يتم خير شر لاني من اول اختبار وانا دجيت <=== يعني لو متحديني على 90% مافي امل يتم التحدي .
Rui Costa : تقوله انت , اليوم في اختبار علم الارض جالس اقلب الورقة 010 مرة قبل ما احل اتاكد يمكن في شي ما شفته ورى ولا لا , ماتذكر قصته يوم يلحق وراه الكلب الي طوله وهو على رجوله زي طول الاسطورة .
البارق 2000 : شعوري طال عمرك ان نفسي في خشمي وودي اقول له يا اخي اتركني في حالي , والله شف يا اخوي كلامك عين العقل واغلب الطلاب يصير لهم مثل ها الشي والي صار لي من ربشة توزيع الورق وانا مادخلت اوراق المراجعة حتى قلت اني ما كتبت اسمي الا بعد نص الاختبار , والله يا البارق ما ادري وش يشجع ( تراه سوري ) , اي والله الحمد لله يا الغالي ومشكور على دعوتك لي .
اخر اخبار الشباب ال6 الي صار لهم الموقف : الحمدلله كلهم بخير ومبسوطين من الاختبار يعني على ما اعتقد انهم كلم حالين صح ( الحمد لله ) .
حتى انتم تهتمون وترجفون في هالمواقف :p :p :p على بالي ما تصير ألا فينا وبس .. ايه اظهروا على حقيقتكم
موقفك هذا يذكرني بموقف صاير لي , بس باختلاف بسيط .. مرة بامتحان نهائي وزعت الاستاذه علينا الامتحان وحليت وكان سهل .. بس المشكلة أني خلصت قبلهم وقبل نصف الوقت .. والبنات يحلون , ما خلص الا انا وبدت الشكوك والمخاوف .. اتلفت والكل منهمك يحل .. اقلب الورقه يمين يسار فوق تحت ( فصفصتها ) ابي سؤال ناسيته شيء مافيه امل .. الا يوم بقى على الوقت وينتهي شوي وتقول لنا المراقبة ( تأكدوا من عدد الاوراق يابنات , تراهم ورقتين ) .. وانا واكلمها بصوت متحشرج يحاول يسبق الدمعه أنا ماعطيتوني الا وحدة ..وتجيب لي الورقه الثانية واقعد احل وانا ارجف والخط الله اعلم به( نقش دجاج) .. وزادوا لي شوي بالوقت لين خلصت .. والحمدلله انتهت على خير ..
بس بعدها كلما خلصت اول وحده تجيني نفس الحاله لين اتأكد أنها شطاره مني مهوب شيء ثاني .. الله يستر
بس على فكره القلب اللي انت حاطه رهيب (( اعتقد لو اني بعد دقات قلبي يوم لحقني الكلب لابارك الله فيه )) (( كان حطيت مليون قلب في الموضوع وعسى يفكي )) ,,,
راح الشر ياغالي والمهم الجاي وكأني اشوف في كل امتحان جاي (( بتشوف الاسئله من بعيد وقبل لايحطها على طاولتك هي وجهين والا لا ))
مع تمنياتي لك بالتوفيق ياغالي دوم ولكل طلابنا وطلابتنا
أخوي الغالي (( ريو كوستا))
الله لايويك الموقف (( رعب تمنت معي احد منكم علشان اذبه على الكلب )) ,,,
دقش 2002 : حبيب بقوة , والله الى الان ما وصلت الدرجات .
محب الشلهوب : بغيت اموت الا اما بالنسبة ل100% بقوة هين .
الصبحي : ان شاء الله ابقلبها بس برهوم ما راح اتركه .
عنود الصيد20002 : لو هي في غير ثالث كان اخر ما افكر فيه الدرجة اهم شي انجح , اما قصتك مرة ضحكت عليها , بس انتبهي مرة ثانية .
الاســـطــــوره : وش حالة هستيرية , ماصار لي شي بس ضغط ارتفع وبغيت اموت من القهر والضغط , وترى ام الركب ما كنت اعرفها من قبل الاختبار والحين اعرفها زين , انت تقوله الحين في الاختبار اقلب الورقة عشرين الف مرة علشان اتاكد هي وجهين ولا لا .
موقف مرعب ومحرج في نفس الوقت (اطلق من موقف الاسطورة والكلب ) 
, وجا الاستاذ يبي يسحب ورقة الي وراي ومر من عندي وناديته وقلت له : استاذ ما دريت عن الوجه الثاني للورقة , الاستاذ ارتبك وقال : لا يا فهد ما لك داعي ليه كذا , وجالس يدور ورقتي وسلمها لي وقال حل الحين , الحمد لله ان الوجه الثاني سهل والاختيارات الي فيه الاستاذ معطينا زيها بالضبط في المراجعة ويوم خلصت من الاختيارات جا الاستاذ وهو متربك وقال لي : رح اول واحد الحين ونشوف لك حل , رحت اول واحد وانا مرتبك مرة وما اقدر اكتب وارتجف تقول نافضني كهرب وانا احل الورقة يدي ترتجف ومااقدر احل ابد وجا استاذ الاحياء ( علينا الحصة الثانية ) وجا استاذ الفيزياء ويقول لي : فهد حل على مهلك قدامك وقت لا تخاف , وانا شوي وانفجر من الضغط , وقال لي بعد : احسن لك تروح تحل في غرفة المدرسين , واقوم مع الاستاذ الي كان يراقب علينا واطلع برى الفصل , قال لي : احسن شي نروح لغرفة الوكيل , ونروح لغرفة الوكيل ونقول له عن السالفة <=== من العجلة والخوف زرفت الة حاسبة حقت واحد من الشباب بدون ما استاذن , وادخل الغرفة وارتاح شوي نفسيا واحل بسرعة ( الحمد لله الاسئلة كانت مرة سهلة ) وخلصت بسرعة واسلم الورقة وانا مافيني حيل افكر ولا استوعب الي صار .
الوضع العادي
