هذي قصة صارتلي مع أبوي والي عماني اتفقعوا ضحك وابوي منقهر ..

قبل اسبوعين تقريبا رحت لإستراحتنا وكاالعادة اختلاط حريم ورجال ( لا أحد يفهم غلط ياجماعة تراهم عماني وعماتي)
المهم وحنا جالسين سواليف بسواليف والجماعة إذا شافوني ما عندهم سالفة غير في أرقام مميزة أبي رقم مميز أبي ..
المشكلة كلهم أرقامهم مميزة بس الطمع <<<<< محدثكم شغال بالإتصالات ..
المهم وحنا قاعدين نسولف حسيت بشد بظهر ي مو معقول حتى اني صرخت بصوت عالي (قولوا بسم الله عليك) قاموا
عماني وعماتي وأبوي يتطامرون وش به ذا يصارخ المهم تحولقوا لمي وش بك قلت مابي شي شد بسيط لزموا إلا تروح المستشفى
رحت لم المستشفى برفقة أبوي وعمي المطيور الي مانزل عن 180 ويقوله أبوي بالله لو وقفوك المرور وش بتسوي يقول بأقولهم
عندي مريض بأوديه المستشفى وهو يقولي لا أوصيك إذا وقفونا أبدى تعصر وسو نفسك تعبان وأبوي يقهره يقوله
لا ولدي ما يكذب ، المهم وصلنا المستشفى على خير ومن دون مرور ولا غيره وعلى الطواريء على طول وبعدين دخلت
على الدكتور قال الدكتور لازم الولد يجلس على شي مريح سواء بالسيارة وأو وقت النوم وعطاني مرهم وطلعنا
وبعدين ركبنا السيارة وأنواع التلعين قلنالك اترك هالشروكيات ( يقصدون سيارتي ) والله انها تكسر الظهر وخذلك
سياارة حلوة تريح ظهرك ومرة وحدة تكشخ فيها وخويكم إذا بغى يكشخ يشحت سيارات عمانه وعيال عمه وأبوه
والي زاد الطين بلة وصلنا الإستراحة واسمعوا الهرج عماتي وبدا شغلهم الشاغل سياراتي معي سيارتين كلهن شروكي
وما حد يقدر يجبرني أبيعهن لأني شاريهن من دراهمي خصوصا أنهم رفضوا يشرولي شروكي وبعد إلحاح شديد
لم أقتنع آخر شي قالوا بع واحد من الشروكيات وحنا نكمل الدراهم ونشتريلك سيارة صغيرة ويصير عندك شروكي
وسيارة كشخة كما يزعمون ، لم أقتنع <<<< والله من يبوسة الراس ، بعد شوي قالوا طيب عطنا شوي من دراهمك
وحنا نكمل الباقي وبدوا يبرمون راتبك أكثر من.... (ماراح أعلمكم ) وعندك أربع محلات وشغال بالأسهم ولا عندك أحد تصرف عليه وبخيل شوي لا حظوا شوي مب مرة ومن هالخرابيط المبالغ فيها جدا ، عاد أنا قمت زعلان وقلت إذا تبون
اشري سيارة قطوا قطة وعطون الدراهم وأنا أشري سيارة كشخة ، انفقعوا ضحك وكل واحد بدى يبرم بما يحلوا له
رجعت للبيت وجالس على النت جاء أبوي من الإستراحة ومد يده بشيك وقال رح أشر موتر وفكنا تكفى أنا
انبسطت من داخلي مب علشان السيارة لا علشاني انتصرت عليهم ، قمت السبت الصبح ورحت أدور بها الوكالات من وكالة
لوكالة وقررت أشتري كابريس وفعلا شريت كابريس وكل ما يسألني أبوي وش شريت أقوله بأخليهما مفاجأة
بعدين يقولي متى طيب راح أعرف قلتله يوم الخميس بالإستراحة الي هو أمس لعب علي ابليس وقال سو فيهم مقلب
خلهم يكرهون أعمارهم وأبوي حسب مافمهت من ولد عمي قاعد يقول لعماني والله الولد شاري سيارة كشخة
وبيسويلكم مفاجأة اليوم علشان تشوفون السيارة المقلب هو أني استأجر سيارة شروكي 2006 من ذيب وأروح
للإستراحة وأشوف ردة فعلهم دقيت على ولد عمي وقلت له شف بأخلي الكابريس برة وإذا سمعت صراخ ولا شي
دخل الكابريس قال طيب وأدق على أبوي قلتله خلوكم بحوش الإستراحة بأدخل السيارة المفاجأة قال طيب يوم اتصلت عليه قلت مستعدين قال مستعدين وأدخل عليهم الشروكي الي بغى يتكسر وبدا التلعين والصراخ وكادت أن تصل
إلى الإشتباك بالأيادي ولولا رحمة الله لمات أبي من هول الصدمة ، الحمدلله دخل ولدعمي بالكابريس وقال هاذي
سيارة الولد بس حب يمزح معاكم وبغيت انجلد مرة ثانية من أبوي الي قال ناقص انا حركاتك ذي وبدا بعضهم
يصرف انا كنت متوقع انه مقلب بس حبيت يمشي المقلب كامل وهو كان أول من بدا يصارخ

بالله وش رايكم فيني والله اني سنايدي ذيب وحبيب ولا أحب الإزعاج والمشاكل