بسم الله الرحمن الرحيم

الحمد لله الذي أنعم علينا بشهر العبادة في هالشهر كل المعاني تظهر وكل الصفات تكون هي الأجمل والكل يتسابق لكِ يكون الأفضل..

باقي من الشهـر ان شاء الله أربعة أيام بس انا عقب رمضان هالسنه خلاص اعتزلت الاعتماد على أحساسي ابعتمد على عيون الخضيري الله يعطيه الصحه والعافيه ويطول بعمره ان شاء الله على طاعته .. يعني أربعة أيام هذا احساسي يقول أما الخضيري ماش له كم سنة وهو يخالف توقعاتنا .. وش نسوي نتمسك بأي زيادة برمضان الله يعيده علينا وعليكم بالصحة والعافية والطاعه باءذن الله..


نجـي لفرحة المسلمين الكبرى : العــــــــيد

طبعاً كلنا تختلف برامج العيد عندنا فيه ناس عيدهم الصباح .,فيه ناس عيدهم الظهر,, فيه ناس في الليل..,

وكل واحد منا له برنامجه المعين في يوم العيد :

الأطفال لهم حق علينا ,, المساجد لها حق في دعم هدايا العيد للأطفال .. العمالة الموجوده عندنا أو في الشارع .

كلهم لهم حقوق علينا ..

احنا من خلال هالموضوع نبي نعرف برنامج كل واحد في العيد بحيث الاخرين يستفيدون يمكن فيه اشياء كانت غايبه عنهم واعضاء اخرين يسوونها ممكن ننبه بعض لاشياء تكون غايبه عنا .. فيه ناس أعيادهم كانت تقليديه حاولوا يغيرون منها نستفيد من تجاربهم نحاول نطور من سعادتنا في العيد نحاول نبتكر أشياء ماتدفن جمال وحلاوة العيد وأنه العيد فرحه للمسلمين لازم نستشعر فرحة العيد وننبذ من تفكيرنا كلمة ان العيد تغير وان العيد مو مثل أول العيد نفسه اذا فيه احد تغير فهو احنا .. ليش في مناسباتنا الثانيه نجتهد ونتحمس مع انها فرحه تقليديه كل يوم ممكن تصير ..

لكن الفرحة الكبرى فرحتنا بعيد المسلمين لازم نحسس أنفسنا ان فرحتنا فيه لازم تكمتل لأن سعادتنا بالعيد تعني الفرحة بتمام صومنا وقيامنا وان العيد شيء فرضة علينا رب العالمين وسعادتنا فيه شيء بديهي ونابع من أنفسنا ..

ــــــــــــــــــــــــــــــــــــــــــــــــــــــــــــــ

تجـــارب مع الخـــير:

الأيتــام ,, المعاقين ,, المحروم من أي نعمة من نعم الله علينا .. كل هؤلا فئاات تحتجنا أيام العيد

أنا أبغى استفسر اذا كان فيه أحد من الأعضاء له تجربه مع يتيم او معاق أو اي انسان محروم كيف كانت الاجراءات

وكيف أقدر أستضيف يتيم أو يتيمه خلال أيام العيد تعيش حياة أسرية مثل مانعيشها وتنعم بكل ماننعم فيه ويحسون بمثل مايشعر به أطفالنا ويكون لهم مثل ما لأطفالنا من نصيب الهدايا والحلويات والملاهي والمسابقات ..

أتمنى من له تجربه حقيقيه أو قد فكــّر في هالاستضافه يعلمنا هل نتائج ما سوف نقوم به مريحه لهم أو أنهم لا يرغبونها ..!!!

ــــــــــــــــــــــــــــــــــــــــــــــــــــــــــ

أفكـــار لمسابقات العيد وتجمعات العيد للكبار والصغار:

نبغى يكون هالموضوع تجمع لأفكارنا من خلال المسابقات الهدايا الحلويات ونستفيد من سلبيات وايجابيات بعض في مثل هالبرامج ...!!

وان شاء الله يتفاعلون الأعضاء بأفكارهم ونتائج تجاربهم ويحكون لنا برامجهم في العيد وان شاء الله نستفيد

ــــــــــــــــــــــــــــــــــــــــــــــــــــــ

كل عـــــــــــام وجميـــــــع المسلميــن والمسلمـــات بخــير وعــــــافية ..