بسم الله
ونكمل حكايتي معها
كما قلت لكم كان الاتجاه للياباني وبالتحديد لسيارات عبداللطيف جميل وبالتحديد أكثر للاند كروزر VXR موديل 2000
رصاصي اللون فل كامل
نقزت للأمارات عام 1421 وفي اجازة عيد الفطر المبارك وشريته من هناك
وللحقيقة كان من أفضل السيارات الي سقتها ان لم يكنها افضلها على الأطلاق { اتكلم عن الجيوب } باستثناء عذروب واحد فيه وهو كثرة استهلاك الوقود
*** للفائده مشرفكم البارق مشخص فيه وكان أول لقاء بيني وبينه ومن بركات هالموضوع اني دريت انه ما يعرف بالسيارات
وهنا كان البارق جالس 
جلس معي الموتر سنتين ما شاء الله تبارك الله
بعد ذلك جاه سومة طيبه والحقيقة ان واحد من الشباب امتحني عنده كل يوم بعه علي بعه علي
الصحيح صجني عنده والولد اشهب ( يعني يمكن يصكه بعين ) قلت ياولد بعه عليه لا يجيك او يجي الموتر بلا منه
بعته عليه ابي الفكه بس
ثم قعدت عشرة ايام بسيارة آجار ( تخيل عقب الجيب آجار )
والسبب اني كلمني اخوي وكان في الأمارات وقال لقيت لك VXR ابيض موديل 2000 يعني نفس اللي معي بس يفرق ان المراتب كانت جلد
والقير كان عادي مهب تماتيك
قلت بكم لقيته قال بقيمة سيارتك اللي بعتها قلت توكل على الله واشتره
نقزت للبنك وحولت الدراهم وفعلا اشتراه من الغد وشحنه عن طريق البسامي ووصل بحفظ الله بعد عشرة ايام
منها يومين كان اخوي يتمشى فيه بالامارات ويوم سألته ليش تأخر الموتر ما جا قال توي اخلص أوراقه
ثم اخذ يومين بمنفذ البطحاء ثم يومين بالرياض قبل شحنه للقصيم
وصل بعدها الجيب بحفظ الله ورعايته مستقبلا بكل حفاوة وتقدير
*** على فكره السيارة اللي استاجرتها خلال الأيام هذي كانت هونداي سوناتا
والله السيارة حلوه وخفيفه واقتصادية بالوقود
الصراحه اشجع الشباب انهم يشترونها
جلس الـ VXR معي سنه وشوي
الحقيقية VXR وقير عادي ما تنبلع أبد
عجزت اصبر عليه
التماتيك أفضل بكثير لأن المكينة قويه جدا { ثمانية سلندر } والقير عادي مافيه أي تناسب
يعني بالمختصر المفيد السيارة قير عادي تبي جبال زي الجنوب
ما تنفع للخطوط ابد
مليت منه وفي أقرب فرصه جت زحلقته على واحد من الشباب
وللحقيقة فقد نصحته بعد ملائمته له
لكنه قال ابشتريه لشايب من الجماعه ما يبي الا قير عادي
قلت توكلنا على الله وبعته عليه بخمس وثمانين الف ريال { يعني برأس المال }
وكان اخوي اثناء هالسنة اللي مضت قد اشترى شيروكي سبورت م 99 قير تماتيك لون سماوي
سقته كم يوم وجاز لي واللي شجعني اشتريه من اخوي سعره المناسب جدا
موديل 99 اخذته منه بثلاثين الف
الصراحه لا يوجد اي مقارنه بين السبورت والقراند
القراند هو اللي بهذل بي وكرهني في الشيروكي وسبق ذكر سالفته معي سابقا
ولكن السبورت عدل من الصورة قليلا
بعد شهرين من شراء الشيروكي
طلب مني اخوي الأصغر { القعده } أن ابيع له سيارة كان قد اشتراها من معارض جده
بثلاثين الف وهي ميركوري قراند ماركيز م 99 ذهبية اللون
قلت بكم تبي تبيعها
قال بثلاثين
قلت اشتريت
لأن الموتر نظيف ورخيص
قلت اخليه للخطوط والشيروكي للبر
وفعلا جلسن معي سنة كامله وتزيد قليلا
بعد مارح سنه وكم شهر
جتني فكرة بيعهن كلهن وشراء يوكن يقيمتهن
والحقيقة انه قرار غبي
لأن اليوكون مهما كان فلا يقوم مقام سيارتين
يعني لن يكون أفضل من الشيروكي في البر
وكذلك لن يكون أفضل من الميركوري في الطريق
ولكن اراده الله هي الغالبه
وفي العام الماضي وبالتحديد في شهر اثنين { 2 - 1426 هـ }
بعت السيارتين في المعارض
الشيروكي بثلاثين
والفورد بتسع وعشرين
واخذت الدراهم وعلى جده
لأن في جده يقام مزاد على السيارات الأمريكية كل اربعاء وخميس
وتكوت الأسعار غالبا ارخص من السوق
وفعلا لقيت يوكون م 2001 رصاصي فل كامل بدون فتحه بخمس وستين ألف
ومازال معي حتى الآن ولله الحمد
والسلام عليكم ورحمة الله وبركاته
ملاحظة :: السيارة الحقيقة تحتاج الى تصوير ثم رفع { يعني تبي وقت }
ففضلت الصور الجاهزة
الوضع المتطور
