قصة صارت لي اليوم قبل الفطور؟؟ - نادي الهلال السعودي - شبكة الزعيم

عابر القارات بالريوس · #1 07/10/2006, 12:49 AM

طالع من الدوام بعد العصر بشوي شغلت سيارة أبوي لأنه ما خذ سيارتي يقول ودي أصير شباب خصوصا أن سيارتي شروكي مرفوع وجنوط واستكرات ما أدري وش قصته أهم شي أخذه
مشيت وكلي أمل أني بأرجع للبيت لكن أنا أواقف عند الإشارة ومسرح ولعت خضرة
مامشيت لأني ما دريت عنها الي وراي وهو بطل القصة ماطنب لي لالا دف السيارة من ورا
ورجع ريوس وهج قدامي قلت والله ما أخليك يابن ... (اللهم إني صائم ) وراه من شارع لشارع
ومن داحوس لداحوس الرجال مب يمزح يمشي فوق الــ 200 وقلت والله لو تمشي ألفين وراك وراك
جايبك جايبك والله ويمسك طريق مكة قلت بنفسي لا يكون رايح مكة وأنا ألحقه بس أروح مكة وماله
أهم شي أجيبه وبعد ما قطعت وراه تقريبا 25كم <<<< فاضي ولا لا ، قررت أحده خربانة خربانة سيارة الشايب
وأحده بغى يجيب العيد بس وقف ونزل ولاه رجال كبير عمر حول 40 سنة قال وش تبي كل ذا علشان دفيتك
قلتله والله انك كبير بعقل صغير ولوما الشيب الي على راسك كان أفطرت عليك عاد هالشايب المنسم قال بدري
عليك وش بتسوي مد يك والله لأكسره لك ابليس ركب راسي وقال اقض هاليوم بشوال افطر عليه بسرعة
وأنا بعد ما هنا قصور بجسمي دبدوب شوي (مب كثير ) وجثة شوي قمت مسكته مع ثوبه قلتله سيارة أبوك
هي حتى دفها طنب مب تدف السيارة وهو يقولي وخر يدك لأكسرها وأنا أقوله أكسرها وشف وش أسوي
فيك عاد شوي واصكه كف الرجال داخ قام يرفس برجلينه وأنا ماسكه مع ثوبه والله مب قادر يتحرك شوي
ولا أمن الطرق وقف شافني ماسك هالشايب قال أكيد ذا سكران قام ركبنا الأثنين بسيارته يبي ودينا القسم
وأنا وإياه قاعدين نتهاوش ورا والعسكري يصارخ استح على وجهك أنت وإياه صايمين يا هووه
آخر شي وصلنا للقسم وخلونا عند الباب لين يجي ظابط خفر جاء الظابط وقلتله القصة قال العسكري انت الغلطان
يعنين أنا بغيت أقوم أتضارب مع العسكري قال العسكري جب واحد يكفلك أنت متعدي على واحد ووووومن
هالخرابيط دقيت على أبوي قلتله تعال أكفلني قبل الفطور جاء مسكين وهنا المصيبة لقى الرجال الي أنا جالده
صديقه وابوي صار وجهه تلاوين مب مستوعب الموقف عاد أبوي لطف الجو وقال لخويه هذا الي مسوي فيها
قوي من أول ويفرد عضلاته علينا بالإستراحة وأنا وأنا وين هالعضلات وولدي فرشك عاد مسوي أنا فاهم
بأكحلها عميتها قلت كأني حاس انك تعرفه علشان كذا صرت حليل عليه ولا ناوي أجيب فيه العيد قام ضربني
على رقبتي من ورا عاد العسكري قال قم اضرب أبوك بعد قلت ما عندي مشكلة قال الله يفك العالم من شرك
برد أعصابك عاد الضابط قال يلا كل واحد على بيتهم ولا عمري أشوفك يعنين أنا قلت أنا أمسك لسانك احسنلك
عاد أبوي مسكني وطلعني بره وقاعد يقولي وش هالمشاكل اجل راعي مشاكل وأنا ما أدري وأنا أقوله لا
]ولله هو هو وبعدين أبوي دق على خويه وقاله الفطور عندنا اليوم وجاء وسويت فيه مقلب ماينساه طول عمره
سيارته توه شاريه فرحان به وقفها عند باب البيت ودخل يفطر قمت أنا فكيت الجنوط ودخلتهن بالمستودع ووقف السيارة على بلوك يوم طلع بغى يصيح من القهر يوم طلعتهن له طلعت من عيونه الشرار وبغينا نتضارب مرة ثانية
لكن الحمدلله عدت على خير ومشت الأمور بسلام
وأبوي مب مصدق الي يصير

الدريبي الهلالي · #2 07/10/2006, 01:17 AM

هههههههههههههههههههههههههههههههه

عليك حظ

ومشكور

فزاع الاجيال · #3 07/10/2006, 01:18 AM

قصه بوليسيه

..

بس ياليت انك مكبر الخط شوي ..

برنسيسة الهلال · #4 07/10/2006, 01:23 AM

هههههههههههههههه وربي مو صاحي

مشكووووووور خيوو

الكناري الأزرق · #5 07/10/2006, 02:07 AM

الـسلام عـليكم و رحمه الله و بركاتــــه ,,

الله يرجك و الله يا عليك قـصص مـا شـاء الله فـلة

..

إقتباس


	جايبك جايبك والله ويمسك طريق مكة قلت بنفسي لا يكون رايح مكة وأنا ألحقه بس أروح مكة وماله

خـذ عمره بالمره

..

و خلها تكفير للسب اللي سبيته

,,

إقتباس


	قلتله والله انك كبير بعقل صغير ولوما الشيب الي على راسك كان أفطرت عليك

هـذي مراهـقة متأخـرة

..

و لا الرجال شايف لـه فـلم مطاردات و قال خل اقلدهم

,,

مشكور آوي على مواضيك المــُــمتعة ..

<< صار يدخل مغمض اذا شاف اسمـكـ ,,

و السلام خير ختام ..

الهلال موتي · #6 07/10/2006, 02:34 AM

والله إنك راعي مشــــاكل ..

ولاحقه يعني لاحقه هاااااا >> فاضي ونص ..

شوف يالغــــالي .. هو غطــان ما فيها كلام ..

لكن لو مـا كنت لحقته ما كان صــار شــي ..

وكله كووووم .. وهذي كوووم ..

إقتباس


	دخل يفطر قمت أنا فكيت الجنوط ودخلتهن بالمستودع

ما تستــحي إنت ..

على العموم حصل خيـــر ..

وأضبط أعصــابك في أي موقف مُشــابه يالغـــالي ...

مع خــالص الإحتــرام والتقدير ،،،،

=مـاجــد= · #7 07/10/2006, 03:03 AM

والله انك عربجي اربع حبات مو حبتين وبس شكلك وانت تطارده تمشي على كفرين من شدة العربجه الي فيك

مع احترامي لك الا ان حركاتك تذكرني بحركات المتوسطه ايييييه الله يرحم زمااان اول

حبيبي ترى الناس الحين ثقلوا وتركوا هالحركات والغريب انك تذكر الموقف وتعتبره موقف بطولي

اي بطوله تسميها هذي؟ مع الاسف بعض الشباب السعودي لا يزال يعيش حركات زمن قبل عشرين سنه

مع احترامي لشخصك الا انك أنسان فاشل با التعامل مع الآخرين واسلوبك هذا اسلوب واحد عايش با الربع الخالي
اتمنى انك تكون شخصيتك ارفع من كذا واتمنى لك التوفيق وين ما كنت ...........

الهلالي النايم · #8 07/10/2006, 03:10 AM

خخخخخخخخخخخخخخخخخخخخخخخخخخخخخخخخخخخخخخخخ

الله يررجك رجاا مبرحااا

اما فكيت جنوووووووووطه

مشكوووور

سندريلا الهلال · #9 07/10/2006, 03:24 AM

الله يصلح قلبك ان شاء الله

... طيب اذا أنت ماتبي عمــرك وش ذنب أمك وأبوك وأهلك أنت الان ماشي بسيارة يمكن أول مره تسوقها يمكن فيها خلل مايعرف لها الا اللي يسوقها افرض مافيها فرامل او كفراتها فيها شي او ابوك ما خلى سيارته الا ان فيها شيء طيب ما تخاف وانت مسرع هالسرعه هذي لا ووقت ذروة بعد ان يصير فيك شيء ..!!!

ترى العمر مره وحده مو كل يوم بينكتب لنا عمر جديد .. الله يعين أهالينا على عيالنا ..!!

الحمد لله على السلامة .. بس خل في بالك ان مو كل مره تسلم الجــرة...

الله يحفظك لوالديك يارب ....

ḌĘẊṬĘЯ · #10 07/10/2006, 03:57 AM

إقتباس

الرسالة الأصلية كتبت بواسطة عابر القارات بالريوس


	عاد العسكري قال قم اضرب أبوك بعد

ههههههههه ما عرفلك الا العسكري

بس الله يهديك لاتنسى قول الرسول صلى الله عليه وسلم

(( ليس الشديد بالصرعه ولكن الشديد من يمسك نفسه عند الغضب))

البالون · #11 07/10/2006, 04:18 AM

قـصـة مجـنونـة

خـاصـة يـوم أنـه طـلـع خوي أبـوك

الكناري الأزرق · #12 07/10/2006, 04:19 AM

إقتباس

الرسالة الأصلية كتبت بواسطة =مـاجــد=


	والله انك عربجي اربع حبات مو حبتين وبس شكلك وانت تطارده تمشي على كفرين من شدة العربجه الي فيك مع احترامي لك الا ان حركاتك تذكرني بحركات المتوسطه ايييييه الله يرحم زمااان اول حبيبي ترى الناس الحين ثقلوا وتركوا هالحركات والغريب انك تذكر الموقف وتعتبره موقف بطولي اي بطوله تسميها هذي؟ مع الاسف بعض الشباب السعودي لا يزال يعيش حركات زمن قبل عشرين سنه مع احترامي لشخصك الا انك أنسان فاشل با التعامل مع الآخرين واسلوبك هذا اسلوب واحد عايش با الربع الخالي اتمنى انك تكون شخصيتك ارفع من كذا واتمنى لك التوفيق وين ما كنت ...........

و انت الله يهديك اسلوبك بالملاحظة اسلوب واحد بالربع الخالي ..

=مـاجــد= · #13 07/10/2006, 04:24 AM

و انت الله يهديك اسلوبك بالملاحظة اسلوب واحد بالربع الخالي ..
_______________

المعذره أخوي لكن وش اسوي والله نرفزني بحركاته أجل واحد يمد يده على واحد عمره اربعين سنه؟

هل يعقل هذا؟؟ غصب عني اسلوبي كذا ما ودي تحصل مثل هالاشياء في مجتمعاتنا وما اطيق هالنوع من التعامل

عزيزي أهم شي الاخلاق المرء من غير أخلاق وأدب لاشيء وقال الرسول صلى الله عليه وسلم

(انما بعثت لأتمم مكارم الاخلاق) والتعامل مع الأخرين فن وذوق وسياسه مو عنف وضرب وحركات اطفال

وأنا آآآسف على ردي السابق لو كان فيه شيء من القساوه أو تجاوز الحدود....

عابر القارات بالريوس · #14 07/10/2006, 05:46 AM

الدريبي الهلالي

فزاع الأجيال

برنسيسة الهلال

أشكركم على مروركم وتعليقكم

عابر القارات بالريوس · #15 07/10/2006, 05:49 AM

إقتباس


	<< صار يدخل مغمض اذا شاف اسمـكـ ,,

شهادة أعز بها وأشكرك على مرورك

وأشكرك كذلك عن الدفاع عني اتجاه ماجد ولا كنت ناوي أحرقه برد
أخليه ما يدخل موضوع فيه اسمي مرة ثانية <<<<< مب معصبي أبد ههههههه