ســـهل وكـــــــــلمة حــــــــــلالي....!!! - نادي الهلال السعودي - شبكة الزعيم

المنتدى الاستشاري · #1 08/10/2006, 04:22 AM

سهل]

ليلة سهل طرز بها نور القمر شط البحر والليل من فرحه عريس ليله سهل
اليوم 15 يعني نصف الشهر ونصف القمر ( الهاف مون ) ..
والله أيام عن الهاف مون وعن الكورنيش من 1423هـ وأنا أصارع البقاء
بالعاصمة الحبيبة .

ما علينا راحت أيام الخبر والبحر بخيرها وحلاوتها

الساعة ثنعش .. ثنعش ونص موعد العودة لعش الزوجية وبوسه على جبين موكا
قبل لا ينام تزيل تعب يوم كامل

دردشت مع أم حاتم أنا بجهازي وهي باللاب توب

.. كيفك يا بنت ال ..

وهي تقول سلمنا من شرك يالمسافر .. طبعاً ما تقدر تقول شي وألا احذف ردها
بس كني شفت فراشي بالمجلس !

تعرفون المدرسات ملتزمات بمواعيد نوم وخلافه !
ورب الأسرة يراعي هالشئ .. فا يخلى لي الجو واقلب الشات صدق

لا والله امزح أروح افتح النت أذاكر شوي

( بعد شوي أقول لكم وش أذاكر )

أتسحر واثبت موضوع اليوميات واحذف واقفل وانقل اللي يقدرني عليه ربي

ثم اقرأ ما تيسر من القرآن همن افرش اسناني

لا سمح الله يطلع دم يقولون
انك تعتبر مفطر فالحذر طيب ..اصلي همن أندعس بفراشي بشويش لا يصحي موكا
وتنقلب النومه صباحي ...

استيقظ على عشر وأمارس هوايتي الصباحية ( طنباز الصباح )

اخذ دش

وأداوم بكل نشاط وحيوية ( السيارة تدل المكتب ) وعيني على
سهم إعمار ( بايعه بايعه )

<< منتب عاقل يا الهامور
بس أنظمة البنوك وهيئة السوق قالوا لي اصبر ما ودنا تبيع يا سهل برخص
إذا رفعنا السهم بعد قرن بنسمح لك !

صليت الظهر بالدوام والعصر قبل العودة لعش الزوجية .. بعد العصر حسيت بتعب ببراطمي
لأني البارح حذفت مواضيعن واجد.. فا قلت أنام شوي ساعة بالكثير غدي يفش شوي

عقبها قلت اطلع شافني حاتم قال ( خودي ) يعني خذني معك

رحنا لبيت الوالد
أنا وموكا نشوف العمال وين وصلوا بالبناء .. كبير القوم شارن له ارض جنب البيت
ومسويها حديقة ومشب ( المشب .. بيت التنور ) يعني قهوة للرجاجيل وقت الرجال ..
وللحراريم وقت الحريم .. وللسملق وقت الزقرت

أفطرت الفطور الأول مع الوالد والوالدة والأخوان والأخوات
وكالعاده سألت الوالده وش فطوركم قالت اختك الله يحفظها هي اللي مسويه الفطور

سألت اختي قالت مسويه مكرونه ايطاليه وشوربة جبن قلت لها حركات

من وين جبتي هالطبخات قالت من النت !! ايه النت

قلت للوالد ترى سيارة الهلال الاحمر عند الباب

اذا حسيتوا بشئ
عندها زرفت دمعات عين اختي الحبيبه وما ارضاها الا قبله على الجبين
ووعد بهديه ( عيديه )

بعد هذا الموقف رجعت لبيتي لان الأهل يتعشون بعد التراويح وأنا ما عندي وقت .

فتحت النت أشيك على مسابقة اليوم اللي اشكر الماسة الزرقاء كل الشكر على جهودها
في إعداد وطرح هذه المسابقة

أفطرت شوربة عدس ولقيمات منتفخة وفاضيه من داخل مدري ليش !!
وسنبوسه وجرجير وسلطه حارة مطحونة وهمبرقر صغار يالله تنشاف مقطعه أربع قطع
كل قطعه تقول الزود عندي

صليت العشاء والتراويح ورحت للنادي عندي مسابقه رمضانيه ومشترك بالبولينق
لبست جزمتهم اليابسه بعد ما نسيت الشراب القطن اللي مزهبه من البارح ..
العب شوي وتنزلغ رجلي شوي .. بصراحه عجزت اركز فا قلت للفلبيني افصخ شرابك لا هنت ..
قال ما عليك زود مستر

.. قلت لا يكثر وقف عند الجدار وارفع رجل لين اقضي ..
الحمد لله انهيت اللعبه بـ 414 نقطه واتوقع اني مع المتأهلين بكرى نعرف ..
خرجت مسرع ودقيت على أم حاتم أوديهم من حيث أخذتها أول مره

ومسكت الدائري متجه للدورة حيث ادرس على حساب الدولة شبكات . يقولون نبي نأهلك
ونرسلك لامريكا علشان ترجع لنا خبير

.. قلت افلقوني ان عديت هالسمستر ..
أنا الآن بالسمستر الثاني والاختبارات على الأبواب ( ادعوا لي )

كان اليوم اختبار بالوحده اختبرت وقيمت المدرس غاثيني مع كل اختبار لازم نقيم المدرس والدوره ..
طلعت وأنا راجع للبيت دقيت على بيت الأنساب وردت خالتي قالت من معي قلت لا يكثر

حلالي يطلع لي عن الباب قالت عرفتك أنت سهل

> مذيهم على كلمة حلالي .

رجعت البيت شيكت على المسابقة وسولفت مع الاستشاريين بمنتداهم ورجعنا للساعة ثنعش أعلاه ..

ـــــــــــــــــــــــــــــــــــــــــــ
الله يعطيك العافية يامشرفنا سهل على هاليوم الرائع والله يحفظ لك حاتم ان شاء الله

وتتواصل باءذن الله ابداعات الاعضاء وغداً ان شاء الله موعدكم مع مقـدر الهــلال