من وين تبون ابدأ ؟؟ << كاتب ديمو(خ)راطي
ببدأ من لحظة دخول اليوم وهو الساعة 12 بالليل ..
كنت قبلها بشوي واصل من الرياض .. تعبان ومالي خلق .. اخذت لي سحور بسيط وتسحرت بدري الساعة 12
!!
دخلت الشقة وانا نفسي بطرف خشمي << بيفقد الشوربة اللي مايذوقها الا في الويكند
..
تسحرت وجلست شوي ودخلت النت وجلست افر بالمنتديات والمواقع شوي ..
الا وصلتني رسالة من سندريلا الهلال تقول انت وخشتك ترانا مختارينك تبي تكتب لنا يومك والا نبي نتصرف معك تصرف ثاني !! قلت ابشري والله ياهي تخوف بعد في الخاص :sad: !! تهاوش وتنافخ :sad: !!
طبعاً بالطق والموت دخلت النت لان عندي مشاكل الله يعلم بها انا وهالنت :sad: !! عمركم شفتوا dsl مسكون !! والدايل اب مسكات يشبك احياناً واحياناً لا
!!
عقبها صلحت لي ابريق شاهي يحبه قلبك وجلست امزمز عيه واكيف
!! ومع النت والفرفره فيه لا يخلوا منها تشييك بسيط على القنوات .. نشوف فيه شئ والا لا ؟؟
جت الساعة 3 وانا دايخ ما اشوف قلت مالها داعي انام الحين والفجر مابقى عليه شئ خل نصبر لين نصلي وعقبها ننام ..
عاد تخبرون الشيطان ملعون
اذا قربت الصلاة زين لك النوم
عشان تنام وتسحب على الصلاة .. لكن هالمره وطينا خشمه وصبرنا لين صلاة الفجر ..
..
صليت الفجر وانا متوقع اني بنام في المسجد من كثر النوم اللي فيني
ويوم انسدحت اتقلب ابي انام ماقدرت !! جلست لين 6 ونص وانا بس اتقلب حسبي الله على العدو !!
صحيت الساعة 9 و 10 عشان الدوام .. طبعا الساعة حاطها على 9 لكن ما حسيت فيها ولا شئ .. صحيت على اصوات العمال وهم يشتغلون في العمارة !! الظاهر مسكت مع راعي العمارة انه يصلحها اليوم بس
!!
قمت وانا كاره عمري .. رحت الدوام على 9 ونص وصلت ووقعت وشرحت لطلابي وحبايبي درسين الاول والثاني .. وعقبها رجعت للشقة لان ماعندي الا الدرس السادس
!!
قلت زين نحاول ننام لنا شوي بس ماقدرت بسبب هالعمال
!! انواع الازعاج
!! جلست اقلب في هالنت شوي واتسدح ابي اضيع الوقت شوي .. ماش الوقت يالله يالله يمر
!! لين جاء وقت الدرس السادس ورحت شرحت لطلابي وحبايبي << طبعاً هم غير حبايبي اللي قبل
..
عقبها يوم خلص الدوام رجعت للشقة قلت نحاول ننام لنا شوي لاني مانمت الا اقل من 3 ساعات بس
!! والعمال للحين يشتغلون
!!
الزبده اني مانمت خير شر
..
جت مباراة ليفربول وبولتون .. جلست عليها شوي وانا نصي نوم
.. طبعا حاطها ومتابعها على خفيف .. واللي زاد الطين بله انهم منهزمين وانا ضايق(ن) صدري عشان جيرارد واكزافي الونسو .. ماودي انهم ينهزمون عشان هالطخمان بس
طبعا ابليس الملعون منقهر عشاني كسحته
في صلاة الفجر جاء وحاول يغريني اني انام قبل صلاة العصر .. لكن قلت له اها بس يالملعون انقلع بس
صليت العصر وخلصت بعض الامور .. عقبها يوم جت الساعة 4 ونص وانا انقز اروح اجيب لي فطور .. هالمره مقدم شوي بالعادة اروح اجيب الفطور الساعة 5 بس عشان فيه مباراة للأرسنال قدمنا الوقت شوي
..
طبعا العزوبي اللي مثلي ياكلها في رمضان ..
.. منب مثل هلالي الظهران مطاعم وحركات ماشاء الله عليه !!
لا انا وش عندي يا مخابز السلمان والا الأرياف بس !!
واللي مثلي يقدر الشوربة ويموت فيها وش يسوي ؟؟ :sad: ؟؟
طبعاً مهوب اي شوربة لا .. لازم شوربة الوالده الله يحفظها (( صورة قلب كبر الدنيا واكبر منها بعد ))
يوم جبت الفطور ودخلت الشقة على الساعة 5 .. الا المباراة توها تبدأ .. قلت حلو وصلنا على الوقت
<< اكبر همه
جلست اناظر الشوط الاول .. وانا متحمس ودايخ
واللي زاد الطين بله اننا مهزومين في الشوط الاول
يوم بقت خمس دقايق على نهاية المباراة اخذت لي غفوة ما دريت الا المغرب مأذن وانا مادريت
ابليس الملعون وينه ما صحاني
قمت صلحت القهوة وجبت الدله وافطرت طبعا لازم قشطة المراعي والا ما يصلح الفطور
عقب ما تقهويت وكل شئ وزان الراس وبديت اعرف وين انا فيه ووش صاير << كل ذا من خرمة القهوة
صليت المغرب وجلست اكمل المباراة طبعاً مع تشييك كل شوي على طاش ما طاش ..
بالعادة اكون هالحزة اتعشى بس لاني ما افطرت الا متأخر عشان كذا قلت نأخر الفطور شوي ..
ونسيت اقولكم احسن شئ ان الأرسنال فاز وقلب الهزيمة لـ فوز
بهدفين كل واحد يقول الزود عندي من فان بيرسي ..
..
طبعاً الفيمتو قبل كل شئ اسويه عقب المغرب
.
افطرنا وعينا من الله خير وكل شئ وزانت الامور .. (( طبعاً الفطور فرق بين امس واليوم :sad: امس فيه شوربة واليوم لا :sad: امس فيه اهلك حولك واليوم لا :sad: << ما تلاحظون قال الشوربة قبل اهله
))
جلست على التلفزيون شوي لين أذن العشاء وصلينا وخلصنا وكل شئ .. عقبها لازم ابريق شاهي عشان نكيف ;) .. صلحنا الابريق وشربنا الشاهي وزانت الامور صدق
.. جلست على التلفزيون احتري هالمباريات طبعاً مع دوران في شوارع النت ..
ضاع الوقت وجت الساعة 11 إلا قلت خل ندخل الزعيم عشان نرسل هالموضوع ونرتاح اخاف تفرشنا العله سندريلا
طبعاً الحين برشلونة مهزوم
ويارب تنتهي المباراة على تسذا
<<< ما امداني اكتب هالكلمتين الا بويول البثر جاب التعادل
!!
وانتهى الشوط الاول بالتعادل بين اتليتكو بلباو وبرشلونه بهدف لكل واحد فيهم ..
وانتهى بكذا يومنا
من عنده سلف شوربة كويكر اصبر نفسي فيها لين الويكند :sad: ؟؟