السلام عليكم .. كل عام وانتم بخير .. مبارك عليكم الشهر وعساكم من عواده وقوامه ..
ارحبوا كل ابوكم قعودا وركبانا ..اطفالا وشيابا.. ورجاء خاص لا احد يقوم ويبوس! خدي وانا حر فيه ..ولا أحد يقول خشمك! يرحم امكم فكوه مو بناقص اغمزه ببيالة الشاهي يوم اشربه! ولا أحد يجلس يرحب ويهلي! نعنبوا ابليسكم ترى الكلام البايخ هذا ما أحبه.. يرحم أم أمكم فكوني من هالرسميات ترااها واصله معي ,,
سيداتي وسادتي الصائمون منكم والفاطرون انا داخلن على الله ثم على وجهوكم البشوشه النيره( ايييه هين ) انكم ما تقرون اللي بكتبه بعد شوي .. ارجوكم اذا حسيتوا بفراغ وشفتوا موضوع نزلته هذي حقتكم المستشاره سندريلا مضيعه نعلتها انكم تتعوذون من ابليس واتفلوا ثلاث مرات على الشاشه وروحوا افتحوا موضوع صدى وحوسوه ولا امسكوا مسلسل وحللوه .. سووا اللي تبونه بس المهم فكوني من شركم:sad: ..
تخيلوني طفل يتيم ومرة ابوي لاعنتن خيري واستحق الشفقه.. اعتبروني فقير دخل عليه رمضان وماعندي حق فطوري واستحق الرحمه .. اهم شي حققوا طلبي ولا تقرووا اللي بيجي ..
ملاحظه .. ادري انكم كل ابوكم قلوبكم قاسيه ومتحجره ياوعيين ولهذا باكمل بقية السوالف مع الاعتذار لسندريلا والجميع اني بخرج عن ستايل الموضوع شوي وبشطح كثير لان كل اللي سويته بالايام اللي راحت مايجي نص يوم من اللي تسوونه بيومكم اليومي ,,
يوم الجمعه الماضي والناس تحتفل باليوم الوطني ومصبغين سياراتهم طحالب ومعطلين نص شوارع الرياض وخذ رقص ومسخره وتحرش قررت انا وزمرة من الشباب الصالح اننا نحتفل باليوم الوطني بطريقه حضاريه بمزرعة جدي في (هيت) ونفلها كوره وبلوت وشوي ومعسل .. صلينا المغرب وحركنا وقبل ناصل المزرعه بشوي تجي رساله لخويي -تاب الله عليه وانار قلبه - من جوال النصر مضمونها ان بكره رمضان ..
طبعا ماصدقنا هالنصراوي وتوقعنا ان جوالهم يبي يسوي سبق غير الوعود الكاذبه خصوصا وان تووه بدري على توقيت الاعلان المعتاد!! لكن بعد نصف ساعه جانا الخبر الاكيد وذلنا هالنصراوي تقول جايبين بطوله هم وجوالهم ..
المهم كملنا سهرتنا وتسحرنا ورجعنا على الفجر وكانت ليلة رمضان مميزه ,,
اما الايام اللي راحت من رمضان بقسمها قسمين : اليوم الاول وانا بالرياض.. والايام الباقيه وانا بالشرقيه..
آآآآه يارمضان ويازين رمضان عند اهلك وياشينه وانت متلحط بلحالك
بالرياض كان يومي الاول هو اليوم اللي فعلا حسيت اني برمضان .. صحيت الظهر وصليت بالمسجد ورجعت قرات قرآن حق ثلاث ايام قدام .. وجا العصر وصليناه .. وعقب العصر رحت لمحل النظارات استلم العدسه الطبيه اللي فصلتها .. ولا تسالوني ليه فصلتها بس مسكت معي وقررت استبدل النظاره بعدسه ..
المهم جلست انا والفلبيني ساعه الا ربع علشان يدخل فرده وحده بعيني .. هو يقرب اصبعه وانا اغمض عيني هو يقرب وانا اغمض الين خلصنا نص علبة المحلول وخلصت دموعي وبعد جهد جهيد ركبنا العدستين .. من جد ازمممممه وقررت انها اول واخر مره البس العدسات بس تحسفت على الدراهم وقلت لازم احللها ..
رجعت قريب المغرب وعيوني حمر .. افطرت ذاك الفطور حق اسبوع قدام .. وريحت شوي وناظرت طاش .. ثمن طلعت بدري قبل ما يأذن علشان الحق مكان مع الشيخ ياسر الدوسري ..
بعد ماخصلت من التراويح صارلي موقف بايخ .. عقب مانزلت من المسجد وركبت السياره الا وشايب يطق قزاز السياره!! هالشايب عطيته عمر هه هه اثنين برا 2, (لغير لاعبي البلوت .. اثنين برا = 102 )
قال لي .. ياوليدي ابيك توصلني البيت ! جابني ولدي وراح!
قلت له .. تفضل يا خال اركب .. وانا اقول بنفسي يالله ياولد توك مصلي التراويح اكسب اجر بهالشايب..
قلت له .. ياخال وين بيتكم ؟
قال .. انت وصلني الروضه وبعدين انا ادل الباقي..
امري لله ادق مشوار للروضه والمشكله اني ما أدل فيها زين .. وابثرني هالشايب بالسياره .. انت من؟ وولد من ؟؟ وايش جابك فيذا؟
مابقى سؤال ينسئل الا وسأله .. حتى سألني ليه ولده حطه وراح؟! .. ومابقى زر بالسياره الا وضغطه ومافيه درج الا وفتحه ومافيه عطر الا وبخبخ منه ..
المهم وصلنا الروضه تحديدا شارع عبدالرحمن الغافقي .. قلت له يا خال هذانا بالروضه وينه فيه بيتكم؟
قال .. خل القبله على حجاجك اليمين ثمن امش تلقى شارع فيه مطبات وبعد المطبات فيه بيت به نخل هذاك بيتي
والله الوهقه اللي توقهت بها بذا الشايب .. عياله قطوه وانا بلشت به ..تزاحمت في راسي الاسئله ومن كثرها طفحت وقامت تطيح من مخي .. الحين وشلون اصرف هالشايب؟ وشلون اوصله بيتهم ؟ وشلون ادل القبله الحين؟
اصلا شرهتكم على اللي يعرف وشهو الحجاج الايمن
بعدين وش هالبلشه؟ فريت به حواري الروضه نص ساعه واللي يغبن صح ان هذاك الحي مطباته كثر اسئلة الشايب .. كل بيت عنده مطبين .. طيب يا خال يا والد ماتعرف اي رقم نتصل عليه؟ ابد مابه فايده:sad: .. طيب انت يا الشايب بتدل بيتكم ولا انزلك ..
اخيرا وبعد عدة محاولات خاطئه تذكر رقم بيتهم .. دقيت عليهم ورد علي واحد وقلت له.. شف شايبكم عند السدحان ان كانكم تبونه تعال وخذه ..
المهم .. نزلت هالشايب ورجعت البيت على اساس اني انام شوي الين السحور لاني كنت بحرك للشرقيه عقب الفجر وعلى المحاضرات مباشره..
انسدحت بالسرير وتذكرت العدسات لازم افصخهن:p .. قمت عند المرايه وعقمت يديني وجبت العلبه والمحلول (<< يوصف باخلاص ) وبدأت معاناه من جديد .. نص ساعه ابي انزل عدسه وحده وعجزت .. كل ماقربت اصبعي قفلت عيوني:sad: .. بعد ما يئست بدلت ملابسي ودزيت للصيدليه ..
وصلت للصيدليه .. قلت السالفه من طقطق للسلام عليكو .. رد المصري بابتسامه وقال مابعرفش روح للمستوصف من الناحيه دي:sad: .. وادز للمستوصف .. واقول السالفه من جديد للنيرس الفلبينيه .. ردت بابتسامه وقامت ترطن فلبيني مع خويتها .. جات الثانيه وهي تذب علي هي ووجهها ..
المهم .. عقب ثلث ساعه من الاحضان والمحاولات والشد والاخذ طلعت العدستين .. يوم ركبتهم كنت ناوي احللهم بس هالحزه عطيت العدستين للفلبينيه وقلت خليها لك
ع فكره باقي 5 اجواز عدسات اللي يبيهم يدفع عشره ريال للحبه .. ونبيع جمله ومفرق .. اللي يبي الفرده اليمين بعشره والفرده اليسار بخمسه .. اليمين اغلى لان الضعف فيها اكثر ..
المهم .. رجعت البيت ونمت الى السحور .. قمت وتسحرت وصليت الفجر ودزيت للشرقيه ..
ايييييييه وصلنا لرمضان الشرقيه .. ياناس مستعد احلف لكم ان مابه اي احساس برمضان وروحانيته وجمعة الاهل:sad: باستثناء صلاة التراويح ..
يومي برمضان نفسه مايتغير .. انام عقب صلاة التراويح الى الساعه 2 .. اقوم اتسحر بأي مطعم وبعدين اروح القهوه اصقع راس باعشن الين يأذن .. ارجع اصلي الفجر واقرأ كم صفحه من القران ثمن اشوف وش عندي من اختبارات وواجبات واحلها .. ثمن اروح للمحاضرات الين الظهر ثمن ارجع اصلي واسدحها نومه الى قبل المغرب بساعه .. اقوم واصلي العصر ثمن الفطور وعقبه طاش ..واختمها بالتراويح وهكذا:sad: ..
دعونا نتبحر في بعض التفاصيل ( ولاعاد تزعجوني يا الملاقيف ) ..
صلاة التراويح .. عاده ما اصليها بمسجد الشيخ سعد الغامدي .. وبصراحه اذا كنت من اهل الشرقيه لاتفوتك الصلاه بمسجده على كورنيش الدمام .. واذا تكاسلت ادق مشوار للدمام صليت بمسجدنا ..
طبعا بعد صلاة التراويح اكون متوسد المخده الى الساعه 2 .. يعني الوقت اللي تنزل فيه سندريلا هالخرابيش بكون بعالم ثاني .. اما السحور مايفرق كثير اي مطعم والسلام .. وعقب السحور لازم اعدل المزاج واهضم السحور وهالساعه الوحيده اللي اتخلص فيها من كل شي ,,
عقب صلاة الفجر والقران .. امسك ذي الكتب خصوصا واني مثقل هالفصل بالمواد وكلها مواد تخصص:sad: .. واذا ماصار عندي شي هاك اليوم ادخل النت بهالفتره .. ثمن تبدا المحاضرات من 8 الى 12 .. محاضره بظهر محاضره .. وعقبها نوووووووووووم الى قبل المغرب بساعه ..
عاد الفطور أزمه من جد:sad: .. اول شي فطور وانت بعيد عن اهلك اقسم بالله ماله طعم:sad: .. بعدين تبدأ ازمة وين بنفطر ؟وايش فطورنا؟
العاده انا واخوياي مهند وسعود ومحمد نختار مطعم عنده بوفيه مفتوح ونسير عليه .. مابقى مطعم بالخبر ماطبيناه .. قبل امس (ابل بيز) وامس راحوا الشباب مطعم يقاله(البردوني) واليوم ان شاء الله ناوين( مكسييم) ..
واحيانا يصير الفطور عندي غير مثل أمس:sad: .. البارحه ياطويلين الاعمار قمت متاخر قبل المغرب بعشر دقايق ! انسدحت الين اذن المغرب .. قمت وغسلت اربع تمرات وتوضيت ..
اكلت الاربع تمرات بدون حتى ماء:sad: وصليت ثلاث ركعات جنب السرير وكملت النومه الى ماقبل التراويح:sad: وعقب الصلاه رحت اكلت مناقيش:sad: ..
باستثناء الاربعاء والخميس والجمعه اللي نتعامل فيها مع حرمه كبيره يقالها خاله خديجه .. هذي من الليله اللي قبلها تتصل تسال وش تبون بكره على الفطور علشان الصبح تتطلع تتقضى من سوبرماركت المزرعه ( هذي عجوز مودرن ) ونمرها قبل المغرب بساعه ناخذ فطورنا حسب الطلب بحافظات .. كل شخص بـ 30 ريال ..
فطور هالحرمه الله يطول بعمرها من اروع مايكون بس لا احد يسئلني عن عنوانها لانه حنا ما اقنعناها تضيفنا لقائمتها الا بالواسطه ..
ع طاري المطاعم .. الف مبروك يا أهل الرياض افتتاح شيليز واخيرا بتفكونا من زحمتكم بس يقولون يبيلك 3 ساعات الين يجي دورك ,,
عقب الفطور .. نرجع نريح شوي الين يبدا طاش .. ومن بعده التراويح وهكذا ..
على طاري طاش .. تدرون اني هالسنه ما اتابع ولا مسلسل;) .. اذكر اخر مسلسل تابعته كان ( يوم اخر) ولا ازيدكم من الشعر بيت وصلت الى الحلقه قبل الاخيره ثمن ماكملته ..
ما اقول هالكلام من باب التزام- الله يهدينا وياكم- لكن من جد مافيه وقت ابدا:sad: بعدين المسلسلات كل ابوها تنعاد طول السنه لو تبون! حرام تضيعون وقتكم بالشهر في متابعتها .. زود على كذا المسلسلات صايره ماسخه ومعروفه نهايتها ..
يعني يايجيكم مسلسل خليجي ويطلعون الدمعه بالغصب وتجيك زينب العسكري تقول .. ليه يااا حيوواتي وغنوواتي (حياتي وغناتي بالبحريني ههههه) تخونني يوم شفتني بالفندغ ( بحريني بعد ) .. او تجيك حنان ترك وميرفت امين ويسوون نفسهم هاي كلاس وهم حدهم شبرا .. ولا تجيك سلافه فواخرجي (قلوب من هنا الى سوريا ) وتخقق العالم وتخرب صومهم ..
اووكي انا بعطيكم مسلسل من قصه واقعيه وانتم احكموا من مسلسلاته احلى انا ولا هالكديش
المسلسل من بطولة سعود وريما ..
سعود.. دائما مايبحث عن حضن دافي ويهوى التنقل من حضن لاخر .. ومايفكر بالزواج قبل عشر سنين ..
ريما .. الباحثه عن الحب وفاقده حنان ..
الفكره مأخوذه من جوال سعود .. وهي تمثل قصه واقعيه ..
السيناريو .. رسائل جوال نصيه وصلت الى جوال سعود على تتالي الايام والمرسل طبعا ريما ..
الحلقات (الرسائل) ..
الحلقه الاولى.. فرحان بصورتك ورقمك وترسله على البنات؟!
الحلقه الثانيه.. وش أسوي بعد الزمن ماتركلي قلب قاعده أدور قلب حنون!(مسكينه تكسر الخاطر )
الحلقه الثالثه.. بس أخاف كم يوم ويجرحني مثل غيره!
الحلقه الرابعه.. توعدني هالعلاقه تكون بيني وبينك ورقمي لك وبس!!
الحلقه العاشره.. للناس قدر وقدرك بخافقي غير ×× لهم مكانه وانت لك اغلى مكانه!
صدري سما وأنت بداخله طـير ×× والطير مايرضى ابد يغير مكانه!
عبرت لك عن خافي الحب تعبير ×× وعطيتك عـيونـي بكفك أمانـه!
الحلقه الحاديه عشر.. الله لايحرمني منك حبيبي!
الحلقه الثانيه عشر.. وضعت صورتك على شاشة جهازي وكلما رأيتها رددت بهمس "أيها المجنون كم احبك" .. وامتلأ قلبي بفرح العالم وكأني اراك امامي حقيقة لا خيالا!!
الحلقه الخامسه عشر.. وربي ماطلبت الا تطمني بس ايش سويت؟!:sad:
الحلقه السادسه عشر..اذا فاضي دق علي ارجوك:sad: !
الحلقه السابعه عشر.. ماعندي الا انت اقوله .. سعود ضايق صدري وكل اهلي لاحظوا حتى من فطوري ما اكلت ولا ابي اكل! سعود ادري اني أرسلك وأنت بتتركني بس وربي تعبانه:sad: !
الحلقه الثامنه عشر.. ذبحتني الله يسامحك!
الحلقه التاسعه عشر.. ودعتني بلا وداع ودعت انا الدنيا معك ×× وحسيت عقبك بالضياع والقلب خلفك يتبعك!
امري لله ادق مشوار للروضه والمشكله اني ما أدل فيها زين .. وابثرني هالشايب بالسياره .. انت من؟ وولد من ؟؟ وايش جابك فيذا؟
زين انه ما قالك جب لي دلة قهوة ..
إقتباس
اخيرا وبعد عدة محاولات خاطئه تذكر رقم بيتهم
وراه ما قلتله وش اسمك همن دق على 905 و يعطونك الرقم ؟! .. (( عـاد الشيبان الله يهديهم اذا قلت وش اسمك قالك :_ مناحي بن مطلق بن سعيد بن قراضي بن جلهم بن .. بن .. بن .. بن آدم ! )) ..
إقتباس
قال .. خل القبله على حجاجك اليمين ثمن امش تلقى شارع فيه مطبات وبعد المطبات فيه بيت به نخل هذاك بيتي
جيبو القهوه جيبو التمر الله حيه مير من دخل رمضان مالك حس ولاخبر
انا حاسه ان يومياتك بتخليني اصيح من امس وانا متجهزة وجايبه كلينكس معااي :sad:
إقتباس
ملاحظه .. ادري انكم كل ابوكم قلوبكم قاسيه ومتحجره ياوعيين ولهذا باكمل بقية السوالف مع الاعتذار لسندريلا والجميع اني بخرج عن ستايل الموضوع شوي وبشطح كثير لان كل اللي سويته بالايام اللي راحت مايجي نص يوم من اللي تسوونه بيومكم اليومي
في هذي صدقت ماشاء الله ايامهم حافله بالاحداث
إقتباس
المهم جلست انا والفلبيني ساعه الا ربع علشان يدخل فرده وحده بعيني .. هو يقرب اصبعه وانا اغمض عيني هو يقرب وانا اغمض الين خلصنا نص علبة المحلول وخلصت دموعي وبعد جهد جهيد ركبنا العدستين .. من جد ازمممممه وقررت انها اول واخر مره البس العدسات بس تحسفت على الدراهم وقلت لازم احللها ..
إقتباس
ذكرتني ابي البس هالعدسات الزينه الصراحه انا خوافه واشوف مع بنت عمي عدسات واقول بجربهااا وجلست ساعه بدون فايده من اقربها اغمض عيوني :sad: ورجعتها للبنت مافي امل البسها الله لايحوجنا لها
إقتباس
امري لله ادق مشوار للروضه والمشكله اني ما أدل فيها زين .. وابثرني هالشايب بالسياره .. انت من؟ وولد من ؟؟ وايش جابك فيذا؟
ياكرهي للي يسال كثير
إقتباس
عاد الفطور أزمه من جد:sad:
ورى ماتسون انتم بانفسكم واحد يزين لقيمات وواحد شوربه والثالث يلف سمبوسه والرابع يزين التوت >>>>ماطبخو البنات يطبخون الشباب
إقتباس
على طاري طاش .. تدرون اني هالسنه ما اتابع ولا مسلسل;)
الله يديم هالطبع فيكم كلكم وانا معكم ويثبتنا يارب ولايخلينا نشوف هالقلق انا بعد مالي نفس اشوف مالي مزاج اتابع شي
من الظهر مجهزها ياحليلك
اسبوعيات حافله بالاحداث وابرزها والي دخل مزاجي الشايب
الله يرجعكـ لاهلك سانم غانمـ مرفوع الراس وبيدك اليمنى الشهاده واليسرى الشنطه والهدايا لنا >>>>تحب الهدايا
والشهر عليكـ مبارك اعاننا الله على حسن صيامه وقيامة
إقتباس
الله يحفظــك لأهلك وان شاء الله السنوات الجاية كلها معهم
يوميات شيقة وشامله الله يعطيك العافية
انتظروا يوميات الغد فقد تكــون مفاجأة لكم انتظروا المنتدى الاستشاري...
اقولك شيء ياهلالي الظهران شكلك اكل مقلب فالخبر ؟؟!الا على فكرة ماتلاقالي وظيفة بالدمام ..<<<< يبي يعزب معكم ...
بس شف الله لا يهينك ... عسكرية مانبي .... عسكري عندي امي ازين ...
اذا عنكدكم نقص دكاتره والا تبوون ممرضين ... او الدخاتره " بالجامعه" بيغيبون ويبون استاذ مساعد .. تراني موجود ...
هلالي الظهران ... ياخي والله العظيم انك بسطتني الله يبسطك دنيا واخره ...
بس اااااااااااااه لو تبطل من باعشن ... احبك اكثر و اكثر... <<< ترى المغازل في رمضان حرام >>
تحياتي,,,
ايييييييه وصلنا لرمضان الشرقيه .. ياناس مستعد احلف لكم ان مابه اي احساس برمضان وروحانيته وجمعة الاهل
الله يعينكم ..
من حظكم .. البترول يعطلون 18 رمضان .. يعني ان شاء الله بتلحقون على أهلكم نص رمضان
ودامكم من أصحاب البوفيهات .. انصحك بـ بوفية كارلتون المعيبد !
إقتباس
صلاة التراويح .. عاده ما اصليها بمسجد الشيخ سعد الغامدي
هلا هلالي الظهران ...
كل عام وانت بخير و عافية..
مشكووور على الموضوع و اليوميات الرااايقة.
بس اللي قاهرني هالشايب يوم يقول:
ليش ولدي حطني هنا وراح؟؟؟
خخخخخخخخخخخخخخخخخـ