..: يتيمه ، لأ أم ، لأ أب ، لأ أهل :.. - صفحة رقم 3 - نادي الهلال السعودي - شبكة الزعيم

الفيروسه الزرقاء · #1 25/09/2006, 05:05 AM

مرحباً الساااع

..

[ مدخل ]

ودي انزل موضوع عن حبيب القلب Bleach و Naruto ، وأتكلم عنهم ولا أنسى بلود

بس شكل مااابوه فرصه

" مهيب فرصة ضايعة

" هذي فرصة ماجات

----> ياويلها من خط 06

هـ الموضوع بفضفض فيه عن عمليتي والاحداث اللي صارت قبل وبعد العمليه

..

.. [ قبل عمليتي

] ..

اجتمع الدكتور معي بعد أن التمت جروحي -----> صار للحادث سنه وأكثر توها تتلائم الجروح

..
وقرر إجراء العمليه لي فـ الاسابيع اللي راحت " نصاااابه ابد ماهيب هالاسبوع سوتها

" .. المهم اعلنت لخوياتي وقلت لهم بسوي عمليه هـ الاسبوع

ومادري وش بيصير فـ حالي

، كلهم تمنوا أني اتنوم بـ المستشفى

وقالوا جعلتس تتنومين قلت ليش وش سويت لكم

، قالوا أنتي اول البنات بتسوي عمليه بـ ****** " مشفر

" ، وودنا نزور صديقتنا بـ المستشفى ماقد زرنا صديقة لنا بـ المستشفى

قالت لي توفي ، فيو تنومي والله لاجيب لك كنج سوفت كرتون منه

انا مدري اوافق والا لا

الدعوه فيها كنج سوفت

، والا الثانيه تقولي بجيب لك جواهر جالكسي بس تنومي ......إلخ من العروضات
اتركوا عنكم عروضات خوياتي تعالوا لعرض بنت عمي

قالت فيو تنومي بالمستشفى وابجيب لك باقة ورد كبيرررة مكتوبه من شبكة الزعيم الى فيو بس تنومي

قلت مدري القرار موب بيدي بيد الدكتور

---->> ودها توافق وماودها بسبب هـ العروض

...[يوم العملية ] ...

قبل لا أروح لـ موعد عمليتي قابلت أنموله " انامل ;) " وقلت لها يـ الله انهجي وراي عمليه قالت أفاا ماقلتي لي وش عمليته

، قلت : هذي عمليه تكمله للعمليه اللي سويتها قبل سنه مدري سنتين

قالت : باااااااعااد سويتي ولا علمتني

قلت : وربي معلمتس

انموله تذكرين الحادث الشنيع اللي سويته مع يزن فـ ********* قالت بس بس تذكرت

هي ماتدري تضحك وإلا تبكي

تقول حادث مؤلم ماعليه تصبري لتس اجر

، يـ أنا قرفت العالم بهالحادث

كل اهلي ع صديقاتي تقرفوا بسببي

كل ماقول لهم القصه الحادث وإلا بس اذكرهم قاموا يحلمون فيني والا يضربون عن الاكل

كسبت اجر فـ اللي يبون يسوون تخسيس

..

المهم ، نرجع لنمولتي

..
قامت تدعي لي البنيه ، تقول : الله يسر لك امرك وان شاء الله سهله العمليه

، قلت انموله ودي اسال الدكتور سؤال بس مدري تهقين انه بيرد ع وإلا بيفطس ضحك !
قالت وش ودتس تسالينه علميني قبل لا تورطينا وتفشلينا ، قلت بسأله هو بعد ماسوي العمليه اقدر اناقز

تخبرين العيد بيجي ودي اناقز وانطط ، بس إذا كنت ممنوعه من التنطيط

بقول لاهلي : مايجيبون نطيطات خوفاً ع مشاعري

----> اشوى انهم بيجيبون علشان يقهرونك

انموله دوروها ماتلقونها انقلبت الشاشه كلها خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ ووجيه ميته ضحك

تقول روحي الله يتكفل بك

----->> " تغريد لا تنسين تضحكين ع هـ الكلمه

"

سكرت بوكس انمولتي العزيزه " وهـ بس يازينتس

" ..
رحت اتحمم واتجهز لـ العمليه ..

إلا واتصلت ع كيفوه

وهـ بس يازينها بعد هـ الثانيه

" ..
قالت : كيفيك فيو وش اخبارك هاه سويتي العمليه وإلا بعدك !
قلت : لا توني دعواتك لي يالابله

تراني خايفه

قالت : سهالات إن شاء الله

قالت : يـ الله فيو حصتي بدت والله يوفقك ان شاء الله
قلت : وياااك ، سي يا

المهم ، لبست وتجهزت وطسيت مع اختي لـ المستشفى ، رحنا وعطينهم الموعد ودخلنا فـ غرفه

--->> لا ياشيخه !!
جتني النيرس وقالت يـ الله فسخي ملابسك

قلت : ناااعااام وشوله افسخ ملابسي

انا عمليتي موب فـ كل جسدي

اختي فطست ضحك ع ، قالت عادي عادي ، فسخي ملابسك والبسي هـ الاخضر قلت وااااااااا عيباه ، طب اطلعوا برا

قالت : اختي هييييييييه لاتفصخين التيشيرت بس فصخي التنوره ، قلت طب بفصخ وفصخته ولبست هـ الاخضر لا وجت النيرس وقلبته

قالت خلي اللي فيه الربطات من قدام اسهل ع الدكتور

وانا البسه قلت ياااااااربيه كنه روب نوم

.

قالت اختي يالله بدك شي ! قلت وين بتروحين

قالت وراي مشاوير فاضيه لك

قلت أفااااااا تروحين وتخليني

ماهقيتها منك قالت : اجل اجلس بـ هالغرفه لين تطلعين من العمليه

بخلص شغلي وبروح قلت : خيتو بتخليني القي مصرعي لحاااالي

قامت طاحت ع الارض من الضحك

قلت اسكتيييييي لا تفضحينا بيقولون وش هـ البنات المجانين اللي بس يفطسون ضحك

..
طلعت اختي وتركتني وحيده

، كني يتيمه

لأ أم لأ أب لأ أخوان لأ أخوات

جالسه بـ الغرفه بس لحالي

شوي الا وتجي النيرس وتسالني اسئله غبيه وكانت فاتحه الباب

طبعاً انا لابسه لكم هالروب الاخضر

" قمة الاغراء

"
جاء دكتور موب دكتوري

" عارفه دكتورها الشايب

" قالي : سلامات اختي وشفيك ! قلت ابد مافيني شي

قام يسالني ويعبي البيانات تشتكين من شي ! فيك مرض .....إلخ من الاسئله الغبيه وانا مطمنه راسي " حيويه

وكل اجاباتي لأ ، الحمدلله

... شوي الا وقال تفضلي وقعي قلت : لأ

قال وش لأ

ماتبين توقعين ع العمليه ، لازم توقيعك علشان لا نتحمل المسؤوليه

قلت : هاه ، إن شاء الله ورحت وقعت

..

طس الدكتور وجاني دكتوري الشايب

قالي ، اهلاً فيو هاه كيفك ان شاء الله تمام مستعده !
قلت ايه

..
قام نادى النيرس تجي تلبسني الجزمه وتحط فوق راسي قرطاسه زرقاء " امحق من وصف

" ..
قالت يـ الله امشي معي لـ غرفه العمليات

قلت وشوووووووو
وين اروح له ! قالت غرفه العمليات ! قلت طب اطلع كذا !

قالت : يس
قلت وش ايه شوفي لي الطريق فيه رجال وإلا لأ

باااعاد يشوفوني ويقولون هذي بـ مستشفى المجانين

قالت مافيه رجال يالله امشي
قلت طااايب ومشيت بسرعه ، شوي وادف النيرس اللي قدامي

خايفه ينحاش واحد من هالمستشفى والسبب انا

..

..[ فـ العمليه ]..

طبيت فوق السرير وحطت ع الشرشف وقراطيس كثيره ع موضع العمليه

، شوي الا وجاء دكتوري الشايب

، وقال : السلام عليكم ، كيفك فيو ، قلت فـ نفسي حلى هو كل شوي تسالني عن اخباري

..
حط لي بنج ثم قام جاب دبوس وينغز فـ المكان يقول تحسين بالم قلت اييييييييييه
قام وحط لي ابرتين بنج

غير الاولى

قام وجاب الدبوس وجرب يقول تحسين قلت لأ !
قام يقول ع بركة الله

ويقولي رددي وراي

: اللهم لا سهل الا ماجعلته سهلاً وأنت تجعل الحزن إذا شئت سهلاً ، ويدعي وانا كاتمه الضحكه

قلت داخله اختبار وانا مدري

..
يقولي وش حافظه من الادعيه

حافظه دعاء الافطار ! سافهته مارديت عليه

همي كله مع العمليه

..
شوي الا وينط ويقولي تدرسين باي صف ، يبي يسولف علشان ماتوتر

قلت له : فـ الجامعه قال : ماشاء الله ، قام عاد يبربر ع ويسولف وانا اسولف معه

والنيرس : سااكته

شوي الا وتحركت من مكاني

بقوم قالي ارتاحي لاتقومين توني ماخلصت قلت لا بس مليت ابي اشوف وش تسوي

" لقاااااااافه " هو ماات ضحك يشتغل وهو يضحك ، عاد قالي يالله تطبقين وش سويت قلت اييه

قامت عاد ورجعت لمكاني

قالي ذكريني الحادث كيف صار
انا كتمة الضحكة قال لهالدرجه مضحك

، قلت هو مضحك وغريب ومبكي في نفس الوقت

..
قام يسولف الدكتور وانا ساكته ، مالي خلق ع السوالف ودي اخلص واروح انام

" رايحه مواصله " شوي الا ودخل علينا دكتور اللي قام يسالني قبل لاادخل العمليه

ويسوي نفسه فاهم ويشوف وشلون يشتغل هـ الدكتور ثم قال دكتوري : لا بسيطه هالعمليه قال الدكتور المتطفل

مابدك مساعده شي قال دكتوري الشايب : لا تسلم ،
وطلع وانا ودي اقول لدكتوري الشايب وشوله يدخل ع حلى هو يدخل وهو موب دكتوري

بس فضلت السكوت ع الكلام

لأن الرجال ماينعطون وجه

..

خلص الدكتور من العمليه وجاء بيحط ضماد ع الموضع ، عاد انا نطيت من مكاني وجلست

واشوف لمساتهم الاخيرة

، جاب ضماد ثاني وحطه وهو يكلم النيرس بس مافكه قمت انا ملقوفه فكيته وصلحته

هو قال شكراً ساعدتيني ، انا قلت في نفسي والله ماساعدتك لله فـ الله ابي اطلع بسرررعه

..
خلصنا من العمليه انا واقفه عند الباب ، قالت النيرس يـ الله روحي غرفه انتي ، قلت طب شلون اطلع

بيشوفوني العالم بروب الاخضر

" صايره وطنيه بهاللون

" ..
قالت لحظه اشوف طريق

قالت يالله بسرعه مافيه رجال واحط رجولي واسرع لغرفتي وميزة غرفتي قدام باب العمليه بس تعرفون الاسياب

..

.. [ بعد العمليه ] ..

رحت وفصخت روبهم ولبست لبسي وعباتي وشوي الا وبحط شنطتي ع كتفي

---> ابد موب عجله ،،
دخل ع السوري الممرض وعطاني ورقة الاجازة وقالي اجازه سعيده

.. قلت ازين مافيه هـ العمليه الاجازه

لأ والدكتور قبل يقولي ماراح اعطيك اجازه بخليك تداومين ، لازم تكونين شاطره وتداومين قلت معصي باخذ اجازه

..

اخذت شنطتي وطلعت الا ويدق الموبايل ، وطلعت المتصله بنت عمي تقول هاه بشري وش صار قمت اقص لها وش سويت فطست ضحك ع خبالي

، وقالت تنومتي

قلت : لأ انقهررري بطس لبيتنا تبون الفكه مني مااااافيه جالسه ع قلوبكم

، قالت لأ حرام عليك بس ابي اشوف اذا تنومتي من بيكون مرافقك ! ودي ارافقك واجي واكون عندك

قلت حسااااافه ماصار اللي تمنيتيه

خيرها بغيرها ، إن شاء الله تسوين عمليه واصير مرافقتك

، قامت ميسو ياحبي لها تعطيني نصايح تقول لاتحطين الاب توب ع رجولك ، وخذي راحه من النت
قلت ترى فيه بي سي

يعني لا مفر جالسه ع قلوبكم جالسه ع قلوبكم

..

بعدها شفت شاشة الموبايل ولقيت اكثر من مسدكول قلت ايه لو ابتصل عليهم هـ البنات كلن بيقول بشري تنومتي ! قلت اسكر الموبايل واروح للبيت اصرف واخليهم يحتارون

..
رحت لبيتنا واستقبلوني اخواني البثرين ، وهم سلامااات وشفيك ورينا وش صار لك

، جلست ابربر مع اخواني واكتشفت انهم مستانسين

يقولون حان موعد الانتقام منك يـ فيو ، نأخذ اغراضك بنضربك ماتقدرين تلاحقينا بسرعه

بناقز قدامك نقهرك ماتقدرين تسوين شي

قلت ايه بيعذبوني ، بس مصيري منتقمه منهم

...

طبعاً رحت ونمت وحطيتها نومه

، لا افطرت ولا صليت تراويح ولا شي نوم فـ نوم

لين ماصحتني امي غصباً ع وقالت قومي كلي لك شي لاتموتين علينا ، لازم تتغذين .. اخاف يابنيتي يجيك نزيف داخلي وتموتين

خفت عاد اموت واخليكم

رحت واكلت وتصحصحت

وقالت لي ميسو نزلي الحادثه اللي صارت لك هـ الايام بـ المجلس وسعي صدورهم

، ونزلتها لكم مع أن ودي اتكلم عن ناروتو وبيلش بس يـ الله