تدرون وش صار يـــوم ....!!! ادخلوا وتقول لكم سندريلا الهلال!!!
كل عام وجميع المسلمين والمسلمات بصحة وعافية وأمن واطمئنان...
الحمد لله الذي بلغنا شهر رمضان المبارك نسأل الله تعالى أن يعيينا على صيامه وقيامه ونحن نرفل بنعمة العافية
كل شيء في رمضان مختلف ولكن الاهم ان نتفق على أن قراءة القران والتزود بالطاعات نتفق عليها جميعنا طوال
العام ولكن رمضان يختلف باختلاف مواعيد الاكل والشرب والنوم ..
كل فرد منّا له ذكرياته مع ايام رمضان سواء في الطفولة او عندما يكبر!!
ويوم رمضان بالنسبة للفرد منا يختلف من شخص لاخر في أحداثه ومواقفه..
سيكون موضوعنا ومحور اهتمامنا في هذه اليوميات هي طبيعة اليوم الذي مّررنا فيه ..
فعلى مدار 30 يوماً بأذن الله من أيام شهر رمضان المبارك سنكون مع ثلاثون عضواً لينقلوا لنا يومياتهم الرمضانية التي مروا بها...
ستكون سندريلا الهلال هي الضيف الأول في هذه اليوميات وستحكي لنا يومها الرمضاني الأول كيف عاشته لنعيش معها يومها الأول لحظة بلحظة ...
في الغد بإذن الله يكون موعدنا مع العضوة المبدعة الوردة الزرقاء
السبت : 1\9\1427هـ
بسم الله الرحمن الرحيم
كل عام والجميع بصحة وعافية ان شاء الله
انا وحده من الناس اللي ماتوقعت رمضا ن يكون اليوم حاطه في بالي ان رمضان ان شاء الله بيكون الأحد بس عاد الخضيري الله يخليه لنا شاف الهلال تراه هلال السماء مهب هلال الأرض واعلنوا ان بكرة رمضان
هم يقولون يومتس الاول مهب ليلة رمضان
طبعًا تسحرت وصليت الفجر كنت متعوده اساساً اني ما انام الا الصباح نمت تقريبا الساعه 8 الصباح وقمت صليت الظهر ونمت قيلوله وقمت طبعاً بس اخر مره مهب حلى تقومين وترجعين تنامين
قمت ودخلت المطبخ وقلت يالله استعنى على الشقى بالله قصدي على السمبوسه
طبعاً دخلت المطبخ ولا اخواني الله يخليهم لي كل واحد يدخل جاي من المسجد يدخل ويسدح له اسم طبخه ويطلع
وش عليهم يبي يروحون يقرون قرآن وانا اللي بنكرف طبعاً مهب على كيفهم الدعوه الاكل كنت محدده من زمان وش بسوي طبعاً امي ماجاز لها الوضع وشو تسوين اللي تبين هم اولى انهم يؤخذ برايهم هم صايمين وتعبانين حنا ماندري وش نصير صايمين وفي الملاهي حنا بعد صاييمين وفي المطبخ مرتزين
طبعا وحنا نشتغل بالمطبخ نستغل وقتنا يا بالذكر ولا نستمع لاذاعة القرآن
صلحت 3 جيكات فيمتو عطش مهب طبيعي طبعاً كعادتنا السنويه الله يحفظنا ويجعلها عادة لمدة 100 سنه وللجميع ان شاء الله اجتمعوا اخواني الي مو ساكنين معنا عندنا على الفطور
طبعاً فرشنا السفره وحطينا على السفره في الفطور الاول كالتالي:
تمر 3 انواع شي مكنوز وشي سكري وشي مدري وشو وقهوة وفناجيل تقل غضاره والله مهب فاضيه كل شوي اصب قهوه هالفناجيل الكبار تغني عن الصب كل شوي لو بقعد اصب ماتقهويت
وأصابع العروسه ولقيمات لقمة القاضي ولقيمات بُر وبف باستري ووفيمتو وقمر دين ومويه والسماط كان مكتوب عليه صحه وعافيه لا وبعد لونه ازرق وابيض يفتح النفس
طبعا كنا فارشين بالسور اللي هو (( الحوش)) ويوم قال الله واكبر المغرب ويفطر الجميع ويوم كنا نفطر
بأمان الله مادرينا الا المويه اللي تصب بقووووووه من الماصوره ولا ابوي تاج راسي فاتح ( خزان المويه)
وناسيه وبدت المويه تطلع مع كل مكان بدل ماناكل تمر كل واحد ماسك سلاته ويسلت عشان مايجي اللي يفطرون مويه وتخرب السفره والقعده
والحمد لله عدت هالسالفه على خير
بعد الصلاة جاء دور الفطور الثاني اللي كان عليه كالتالي:
شوربة كويكر وشوربة ماجي وسمبوسه عادي وسمبوسه بُـر وكـبة وصينية لازانيا وصينية دجاج بالفطر والذره عاد هذي انهبلوا عليها مهب لله امدحها عشان انا مسويتها
واكلنا والحمد لله وحمدنا رب العالمين على هالنعمه
بعدها شفنا طاش ماطاش بس ماركزت فيها لان الاطفال الله يصلحهم ويخليهم لاهلهم مزعجين كل واحد يرسم شوارب فيمتو اكثر من الثاني تقل داخلين مسابقه تغسل له من هنا يروح يرسم من هناك
بعدها رحنا نصلي العشاء والتروايح في المسجد وهناك تشوف البصمه الريئيسيه في رمضان شوارب فيمتو
بعدها رجعنا للبيت وصلحنا شاهي وقعدنا نتقهوى ونسولف انا واهلي
طبعا الفتره هذي فتره حره للجميع اللي بينام اللي بيطلع اللي بيتفرج على التلفزيون
يوم جت الساعه 11 رحت وجبت باقي الاكل وقعدنا ناكل لان في الفطور الواحد ماياكل زين لانه بيبروح يصلي لانه لو كثّر اكل ماراح يعرف يصلي
ويوم جت الساعه 12 كنت قاعده امام شاشة الكمبيوتر اكتب لكم ماحصل لي في اول يوم من ايام شهر رمضان المبارك صح نسيت اقولكم ترى السحور مرة علي ومرة على اختي واليوم السحور مهب علي ;) عشان كذا مدري عنه بس اهم شي ان حنا نأخر السحور مانتسحر الا الساعه 4 الفجر
وان شاء الله تكونوا انبسطتوا وانتم تعيشون معي لحظات اول يوم من ايام شهر رمضان المبارك
وهذا يومي الاول بحذافيره
وكل عام وانتم بخير
سنـــــــــــدريلا الهـــــلال
انتظرونا غداً .. مع ضيفتنا الجديدة المتألقة دائماً .. الوردة الزرقاء
.. ( قاعد اكلمكم الان و انا قاعد أتأمل بشوارب اخوي ,, مـا شـاء الله عليه و نعم الـرجل ! عمرهـ 10 سنين و طالـع لـه شنـب كأنها خـط الرياض القصيم السريـع ! ) ..
اخوي ذا اول كان يشرب الفيمتو من العلبة على طــول يعني بدون مـاء ..
عـاد لو تشوفون خـشته عقب الفيمتو .. ( تعرفون الفيمتو بدون ماء قوي ! ) ..
كل من شافـه قال بـسم الله الاخ " مـصاص دمـاء " .. ؟!
إقتباس
بعد الصلاة جاء دور الفطور الثاني
يا سعدكم ,,
انا اليوم كالعادة السنوية " الابـدية " !
حطوا كل الفطور اول ما اذن ..
و الواحد يشوف السمبوسة و الشوربة تضيع علومـه و يدقـها و ما يدري الا و يسمع المؤذن يقيم للصلاة و انت تقول وش يبي ذا منب قادر اشيل هالكرشـة .. ؟! << يحبيلي .. عـص تقل مسواكـ مهنا كـرشة ! او بالاحرى تقل حمامة عندي حويصلة ذيك مدري وش اسمـه اما كرشـة قـوية !
على طاري الشوربـة ..
الـيوم حصل لـنا موقف على مائدة الـفطور ,,
الوالدة الله يحفظه بـدال ما تـحط لـنا مـلح و مع الـخبة حـطت لـنا " مـرة " !
طبعـًــا تعرفون المرة ذيك المأخوذة من كلمة مرارة ..
و جينا على المائدة ..
و كان باقي 6 دقايق على الاذان ..
و حنا نقول وراهـ الوقت صار يمشي ببطئ .. ؟!
.. ( احـس هالوقت عند الفطور رفع معنويات السلحفاة لقت احد تجي اسرع منـه ! ) ..
و طول الوقت مشتاقين للشربـة ..
و يوم سمينا و بغينا نطب نسبح بالشوربـة تذكرنا ناكل تمر و ابشرتس اكلنا d ..
.. ( شكلي من العجلة بلعته على طـول ! ) .. << خله بالحويصلة تحتاجه بعدين ,,
و يوم شـربت الا و احـس اني منب قاعد اشرب شربـة !
قاعدن اكل مـرة ..
و كل العيلة لاحظت هالشئ و بوضوح ..
و بعضهم نط للمغسلة ذبحته المرارة ..
و مار تجي امي و تقول وش بـكم .. ؟!
قلنا يمـه الشربة ما حطيتي بـه ملح حطيتي مـرة !
قـالت هـاتوا خـل اجـرب ..
و مار تقحن ام الشـربة و تقول اي مرة حرام عـليكم .. ؟!
.. ( شكـله قاعده تقطع من جوا بسبـة المرارة ,, لكن هذي الحريم ما يعترفن ان اكلهن بـه عيب ! ) ..
<< هـي تراك كتبت موضوع ثاني ..
ياله السلام عليكم و رحمة الله و بركاتـــــــــه ,,
وقعدت العب بلاي ستيشن لعبة "سايلنت هيل" بعد السحور إلى الساعة 9
وبعدين رحت انام
وبعدين <--- ياكثرتس انتي وهالكلمه
وبعدين قمت الساعه 4 العصر <--- طبعا ماشبعت نوم يوم اني اقوم قمت من الجوع والعطش
وبعدين قعدت اتبطح بالصالة انتظره يأذن
يوم اذن وانا اللي اصب لي من هالقهوه
وآكل من هالتمر
واشرب من هالعصير <-- للمعلوميه عصير توت "المراعي" <--- ترا لي اسهم بهالشركه
وبعد المغرب خفايف شوربه وسمبوسه .. طبعا بس شربت شوربه لأن السمبوسه قايل لي الدكتور بشار <-- عاد تراهم عرفوا الدكتور قايل لي لاتاكلينها قاسيه ... <-- مركبه تقويمـ
كل عام وانتي بخير ,, والله يعين الجميع على صيامه وقيامه يارب ,, بصراحه يوم اكثر من رائع .. كان حافل بـ ( الادهار في المطابخ ) لكن احلى شيء العادة السنويه والله يديمها عليكم يارب .. ولا يفرقكم من بعض ,,
إقتباس
انا وحده من الناس اللي ماتوقعت رمضا ن يكون اليوم حاطه في بالي ان رمضان ان شاء الله بيكون الأحد
بـ هذي صدقتي .. ماحد متوقع انه رمضان .. ماعادا الوالده الله يطول بـ عمرها يارب ,, يوم جيتها قلت لها ماتوقعنا رمضان ,, قالت لا انا حاسه انه رمضان زاد وانا امكـ من العصر وهي ريحة رمضان قلت انا مزكم .. اذا جا العيد بـ علمكـ ان شاءالله
الله يتقبل منا ومنكم صالح الاعمال ويجعلنا وياكم من عتقاء النار يارب ,,
اعذب تحيه لـ الجميع ولـ المنتدى الاستشاري على وجه الخصوص ..
طلعت اصلي العصر رجعت وجلست العب بلاي ستيشن شوي الى قبل الاذان يوم اذن افطرت وتعشيت على طووول واهلي عشاهم بعد الصلاة .. لكن انا مشغول فيه مباراة بعد صلاة المغرب .
طبعاً انها هالسنة عزمت اني ما اشوف طاش ما طاش ... واصلاً الشوط الاول ما انتهى الا وهو يقيم للعشاء رحت صليت ورجعت اكمل يوم خلصت طلعت شوي وبعدين رجعت للبيت ودخلت " النت "
سندريلا يا غناتي وش عندك تستهبلين يا حبي لك بس وأنت تضحكين
تصدقين مع إنه أول مره يصير أصوم أول يوم برمضان بالسعودية إلا أن حالتي أمس نحس استغفر الله العالم تصلي وتقرأ قرآن وإلا عاد تساعد بالمطبخ وأنا أصيح من الصداااع
بس الحمدلله أفطرت على بروفين مو تمر
عاااااااد عقب الفطور لا تسألون وين رحت يا حبي لذاك الشيخ رحت وأخيــــــــراً صليت مع الشيخ عادل الكلباني يا ربي هالشيخ الصلاة معه غيرررر
يالله سندريلا يا بعدهم كلهم تسلمين على تغيير الجو بس سلمي لي على أخوانك وقولي لهم يخفون ترى كثرة الأكل مرض