يـخـرب بـيـتـك يا إيـاد مـدنـي شـوي شـوي علـيـنـا !! تلفـزيـونـكـم إنهـبـل يا رجـالـه - صفحة رقم 6 - نادي الهلال السعودي - شبكة الزعيم

الهلالي- ابوسارة · #1 01/09/2006, 05:10 AM

صبحهم بالنور والسرور .. الله حيهم كل واحدن باسمه .. واللي ماعنده اسم الله يحييه باسم أخوه (( بدت المصاله )) !

والله من زمان عن المجلس العام .. لي عنه فوق السنتين يمكن .. شكل المشرفين يقولون من هالبثر اللي دلّـه على مكاننا من جديد .؟

..

يا إخوان يا أخوات والله اني جاي أحط راسي وأرقد .. مافي راسي نية لكتابة موضوع .. بس الشكوى لله .. فيه حدث مدوي خلاني أقتحم المنتدى عشان اكتب لكم عنه ..

يا جماعة الخير يالمسلمين يا النشامى .. تلفزيوننا العزيز من تالي مهوب صاحي أبد .. قسم بالله فيه بلاوي قاعده تصير من تالي بس مااحد طق لها خبر مدري ليه ..

أذكر في السابق .. كانت الاعلانات التجارية يجيبون حريم متسترات محتشمات شوي قسم بالله ويلبسن دسوس .. ويقعدن يسولفن ويتميصلن ثم تقول وحده لخويتها : ماجربتي المنتج الفلاني ؟ تقول خويتها : لا واللهي ماجربتهوش .. تقوم خويتها تعطيها المنتج اللي يتكلم عنه الاعلان ثم بعدين تجي تشكرها وتقول فعلاً منتج مهوب صاحي فادني كثير وينتهي الاعلان ويا دار مادخلك شر ..

الحين لا .. الحين الوضع اختلف .. إياد مدني اكبر من هالاعلانات السطحيه

إذا ما طقت الحرمه الجنز .. وفلت الشعر .. وقامت تتدلع وتمشي باالكريم أو الشامبو وتهز عمرها .. مايعتبر هذا إعلان عند أبو مدني

أنا أذكر أن تلفزيوننا في السابق ينقلون مباراة أوروبية أو كأس عالم .. يقوم المخرج ياخذ فرة على الجمهور الحاضر للمباراة أو يتابع الأمواج اللي يسويها الجمهور.. ومن أول ظهور لمرأة متبرجه تنحاس الشاشه فوق حدر و النقل يتوقف ويحطون صورة ثابته على برج التلفزيون على بالهم منظر .. ثم تسمع محمد خيري يقول بصوت مقتضب : عذراُ للخلل الفني وسنعود لمواصلة البث بعد قليل <<< شكلهم راحوا يطقون المخرج الأوروبي ههههههه

لااااااااا الحين الوضع اختلف عند إياد باشا .. :-

من كان يصدق يا جماعة الخير أننا راح نشوف في يوم من الايام نور الشريف او أحمد زكي في أحد أفلامهم السينمائية على شاشة قناتنا الأولى ؟

نوووور !
نور الشريف يا أبو مدني ؟
نور الشريف اللي ماخلا حرمه في أفلامه الا وغمرها بحنانه تقوم ترزه في قناتنا يامدني ؟ أنهبلت يا ابو الشباب

أجحدوا اللي فوق كله .. وكلموني عن مشهد اليوم .. يا هو مشهد .. هبال يا مدني قسم بالله هبال :

جالس أنا والوالد في جو مفعم بالروحانية الأسرية .. في جو تملأه السكينة والوقار والحنان الأبوي .. وقاعدين نتفرج على القناة الأولى :-

"يبه أصب لك شاهي ؟ .. لا وانا ابوك توني متقهوي عند واحد .. لا يبه خلني أصب لك بياله على شاني ..بس ياولدي مالي فيه الحين والله .. ! وش اللي مالك فيه لا والله ان تشرب من يدي الجدا تراها بياله.. لعنتن تلعنك وانا أبوك وراك حقنه أقول لك ماأبي شي !"<<< طاح وجهه

المهم ..شوي إلا وجابوا فلم أمريكي .. طبعاً أنا ما تدخلت ولا غيرت القناة من باب تجديد الثقه في إياد مدني وانه ماراح يخذلني قدام الوالد بمشاهد ساخنه ..

بدأ الفلم .. البطلة ممثلة شقراء كل الزين فيها . . مرة بنطلون مرة برمودا مرة تنورة قصيرة وانا مازلت صامد ولا أفكر أغير القناة .. يخرب بيتك يا مدني على بيت اللي يثق فيك شوفوا اللي حصل :

البطلة دخلت الحمام أكرمكم الله .. أنا اللي في راسي أن المشهد راح ينقطع .. لكن للأسف أستمر المشهد والكاميرا لحقت الحرمة وسط الحمام وأبو الشباب مدني لحقهم بعد ولا قطع الصورة

موقفي الأن ضعيف لو غيرت القناة راح يشك الوالد إني ألعب عليه وان هالقناة مهيب مظبوطة وعلى باله قافطني .. خليت الأمور وانا أرجي خير واقول ماراح يطول المشهد أكثر ..

البطلة مصختها يا جماعة الخير .. قامت وترست البانيو مويه ورغوة صابون .. ومازال إبااد مدني وتلفزيونه العزيز حاضرين وحالفين الا يورونا البطلة وهي تتروش

دخل عليها في الحمام رجال

.. قامت تضحك هي وياه والكاميرا ثابته على رقبة البطلة وطبعاً اللي تحت الرقبة من غير هدوم وما طلعه المخرج بس الرجال اللي قاعد يكلمها أكيد يشوف !!

جاء الرجال وعطاها سماعة التلفون وهي في البيانو .. قصدي البانيو ! لعنبو دارك يا مدني انت وأفلامك خليتني أخربط في الحتسي

المهم أنتهى المشهد الحميم في قناتنا الأولى !

هنا الوالد ألتفت علي وقد فقد أعصابه وقال :وش هالخنبقة الله يجزر عمر الظالم مانيب قايل عمرك .. وبحركة من حركات الكونغفو حقت الأولين صكني بالملعقة في خشتي ! واستطرد قائلاً : يالخسيس ياالهيس الأربد والله اني داري ان الدش اللي مركبه انت واخوانك يجيب قنوات فرنسا وتكذبون علي تقولون بس يجيب مباريات ! ..قلت: يبه الله يجزاك خير والله انك تسمع بفرنسا وش جاب فرنسا وقنواتها والله ان هذا تلفزيون دولتك انا وش دخل أهلي في الموضوع .. قال يا التسذوب أبو متعب لو درى ان التلفزيون فيه هالمراجة ماقعده دقيقه بس أنت تسذوبن أبقع وسمرمدي طالع على خالك محمد !

تدخلت كتيبة المشاة اللي هي أميمتي وقالت وش دخل خاله محمد هااه ؟! خاله محمد عيذه بالله مصلي مسمي مايدوس العيب.. ماجذبه والله الا انت واخوانك ,, الوالد طقته أم الركب وقام يبولع ريقه .. المهم يوم شفتها قبست بين الوالد والوالده وانا اللي أحط رجلي وأطلع غرفتي وأجلس اكتب لكم هالموضوع ..

يا عيال منتداي .. والله اني مانيب أدّعي الخير أو أقول اني ما أناظر أفلام .. لكن قسم بالله قوية ان تلفزيون المملكة العربية السعودية اللي ينقل الصلوات الخمس والتراويح والقيام يصير فيه هالتطور السخيف !

الله يذكر الفارسي بالخير .. كان رجالن أجودي ومنظبط وماله في هالأمور .. أذكر أنه قد جاب فيلم كنت قد شفته على الفيديو وكان فيلم مليء بالمشاهد الساخنه .. لكن الفارسي أذكر أنه قصقص الفلم وقطع فيه تقطيعن مهوب صاحي وأختصره من ساعه ونصف إلى 23 دقيقه بس ..

صح ان القصة أندمرت والبطلة ماشفناها أبد والمشاهد تخش في بعض وصار الفلم غير مترابط وغير مفهوم لكن يحسب للفارسي انه جاب فلم حلو وجديد ولم يخدش الذوق العام

الله يذكرك بالخير ياابو فارسي.

أرجع للحبيب اللي بايع أمها بريال إياد مدني

أشوفه مكثف البرامج الحوارية النسائيه .. وساحب على محمد خيري والسليمان وعوني كنانه والشباب .. مدري هو بزعمه الحين انه يناصر حقوق المرأة ؟ أو على باله شوفونا ياعالم ترانا تحررنا والمرأة السعودية تقدمت وصارت تطلع كاشفه ! مدري هو عنده خبر أن نصفهن فلسطينيات والنصف الآخر من مصر أو مايدري أبو الشباب..

واحد يقول لي قسم بالله يابو سارة ان في القناة الأولى من فترة جايبين نادية الجندي في فيلم وطالعه بقميص نوم يظهر أكثر مما يخفي ! هههههههههههههههه لعنبو بليسك يا إياد صاقع في باب الوزارة قبل تدخلها ؟ من جد أنواع اللحسة وقاااااضي هالوزير

رسالة لأبو مدني :

ترانا نفهم وفينا مثقفين ويجي منا .. مدري من لاعب عليك وقال ان مشاهدينكم دلوخ !! عمر التطوير ماكان بالتعري والتحرر وجيبوا فلانه خلوها تقدم وأفلام مدري وش تبي وتجميع هالساقطين والساقطات ..

أفلام وما أفلام هذي عادية في أي قنوات ثانيه .. لكن قناتنا قوية.. ترانا شعب له خصوصيته أو ماتدري ؟

البرامج الثقافيه في تلفزيونك دمار وقديمه شفناها مليون مرة من يوم اننا صغار.. وينك عنها وعن تطويرها؟ ..
في الرياضه تلفزيونك دمار ومافيه بطولة كبرى نلقتوها لنا ومنتخبنا ماشفناه من سنة ونصف ولا أدري وش قاعد تسوي؟ ! في تلفزيونك أنواع الركاكة في الإخراج والتصوير ولا انت داري ! في تلفزيونك يعك المقدم ويلت ويعجن مليون مرة ولا عنده ثقه في نفسه مثل غيره من المقدمين في القنوات الاخرى..

أعتقد أن كل ماتقدم تطويره أهم وأبدى من مشهد البانيو وأخواته ولاّ إيه يا مقلع

رساله للمسؤؤلين (( أقول لاتتحمس واجد

))

والله إن كان الوضع جايز لكم .. فالله يخلف .. وان كان الوضع مايرضيكم فشوفوا لكم صرفة في هالوزير .. أقروا عليه ..عالجوه.. ودوه الصمعاني يتسويه أي شيء .. تراه مهوب جايبها لـ بر ولا تتفاجئون بكرة ان شفتوا في قناتنا راشد الماجد يغني مشكلني هو ودرزن الفرافير اللي معه

ختاماً .. آسف للإطالة وأدري أن بعض التقدميين ماراح يجوز لهم رأيي وطرحي فلا أقول لهم سوى : والله هذي الساعه المباركة انت وياه<<< حقيير ههههههه

المووضووع للنقاش وتجاذب الآراء ويمنع منعاً باتاً التطاول على المسؤؤلين وأولهم كاتب المووضوع

وكان معكم الناقد الفضائي أبو سارتن الهلالي وإلى اللقاء مع حكاية نقد جديدة وكشف حساب وزير آخر (( حطوا رجلينكم جاب العيد

))

بس قبل لا أطلع :-

برايفت إلى والدي العزيز :-

أمووت وأعرف ليش ماطقيتني الا يوم أنتهى المشهد ؟

كان بإمكانك تدبغني في منتصفه أو في بدايته لكن مدري وش سالفتك يا أبو عبدالله

.. آآآآخ منك يامفتري ههههه

هـمـسـة الـعـدد :-

((

)) <<<< أمووووت وأعرف : ذا وش يبي