صباح الخير .. لمن استمع لزقزقة العصافير ..
ونظر لشروق الشمس .. وودّع الأمس ..

مساء معطر بشذى الورود .. وعطر الزهور ..
مساء كله صفاء .. مساء كله إخاء ..
اخواني اخواتي ..

اعود من جديد بعد غيبابي لمدة اسبوعين لسفري ..
ودي اجلس أكثر بس الشوق جابني لكم ..

ملاحضه/قبل البدء في موضوعي .. سيوجد على بعض الكلمات (*) يدل على ان له معنى في
الحاشيه في اسفل الموضوع

المهم كنت ناوي اقضي بعض الاشغال في صباح يوم الثلاثاء ..بعد ماحسيت اني نشيط هذاك اليوم
قلت يالله نروح ونقضي بعض الاشغال .. ونمر على احد الدوائر لتكملة اجراءات .. ونفطر بالطريق ..

ركبت السياره .. مشيت <<اجل طرت :p .. المهم في الطريق اكيد راح تقابلك اشارات .. والاشارات
احياناً من سوء الحظ تكون زحمااات .. والزحمات في بعض الاحيان تؤدي الى فقدان الشهيه .. مما ادى الى
صرف النظر عن الفطور .. وانا جالس انتظر الاشاره تولّع للمره الثالثه وانا ماوصلت لها ..
الا وأسمع زجاج السياره .. طق طق طق .. والتفت وفي وجهي علامة تعجب

واحصل ولد في السادسه تقريباً من عمره يقول عطني مما اعطاك الله .. بيني وبينكم مع اني اشك فيهم .. الا اني ارحمهم احياناً
.. قلت له الله يعطيك .. بس الولد مصر شوي ويسحبني من النافذه. وفي روايه الدريشه
قلت يالله بدور له فكه !! وعطيت مما اعطاني الله :p

شوي وامشي واوقف عن الاشاره الثانيه .. الا وهذاك اللي جايلي يمشي 220 يقول تشتري ماء ..
انا والله ظميان .. بس مدري قلت يمكن بعبيها من اي ماء .. مع اني راحمه .. .. قلت مشكور ..

واتعدى الاشاره بسلام .. واقوف عند اخرى ... ويجيني واحد ويقول دييين عود دييين عود (دهن عود وعطورات )
وكريمات .. قلت بسلامتك انا ناقصك بعد .. وشوي وواحد يبيع شماسات
<<كأننا الحين في مدينة يمر فيها خط الاستواء *(لمن لايعرف ذكر خط الاستواء سيجده بالحاشيه في الاسفل )

الموهم .. رحت وقضيتي اشغالي اللي مابغت تخلص من تعقيدات اجرائات بعض الدوائر الحكوميه ..
وانا راجع .. والشمس في كبد السماء .. عز القايله <<نقلاً عهن جدي ..

جاني باكستاني وانا عن احد الاشارت الغثه .. ومعه جوال بيبيعه متهالك .. بدون ابراج .. من شفت الباكستاني
جايني وانا اقول في نفسي عسى مو مكتوب علي حراج بن قاسم * وانا مدري ..
جاني الباكستاني ويبدوا عليه الحاجه .. والتعب ..
وقال لي .. استري .. قلت كم ؟ <<لمجرد الفضول فقط ..
قال 150 .. قلت مايسوى .. قال يبغى يشيل 100 ... قلت انا اعطيك 150ريال خليه معك
ولا تستغربون لما تشوفون واحد جاي بثلاجه عند الاشاره للبيع .. او اثاث مستعمل

قلت لا ما ابغاه .. ونفسي راقيه بين حاجبيّ .. من الحر الشاوي .. والجو الكاوي ..

وبعدها ولعت الاشاره خضراء .. بعدما صغرت عيناي لرؤية اللون .. << طقوس خاصه لمن لديه ظعف في النظر
ورجعت للبيت بعد رحله متعبه .. لأجد السرير يغريني بشكله المرتب << اقول لايكثر بس
لأهجم بكل قواي العقليه والبدنيه على السرير .. على وجهي :p


===========================================================================

مايستغرب في الموضوع .. أين مكافحة التسول ..عن هؤلاء ..
أم انهم لازالوا كما كانوا في سباتٍ عميق ..
فالمتسولين يشوهون منظر بلادنا وبالاخص الرياض الذي تمتلأ الارصفه منهم .. ومنهم المحتاج الحقيقي
وكثير منهم كاذبون .. ويخدعونا بمناظرهم الكاذبه .. ونحن من ندعمهم ..
قال احد المشايخ على الشخص ان لا يدفع لمن يتسول عند الاشارات ..
لان هنالك مايسمى بالجمعيات الخيريه .. والضمان الاجتماعي ..

ثانياً / ايضاً البائعون الذين حول الاشارت .. اين المسؤلين عنهم .. الطرق ليست اماكن للبيع ..
نعم هم يترزقون .. ولكن هنالك اماكن أخرى للبيع ..
ونحن نسمع دائماً حوادث الدهس لاطفال يشحذون او يبيعون... ولكن لانرى عقوبه رادعه لمثل تلك ..
امام الاشارات ..

هذه المناظر غير حضاريه ابداً .. وتشوه مناظر بلادنا الحبيبه .. لذلك اتمنى زوالها ..
ولو اني اشك في ذلك .. لعدم وجود رقيب ولا حسيب ..

عموماً اعتذر عن الاطاله .. واتتمنى اني ما اكون غثيثاً كغثة اجراءات المرور وبعض الدوائر ..


الحاشيه ..
* اكثر المدن التي يمر بها خط الاستواء تكثر بها الامطار في فصل الصيف بغزاره .. مثال /: الخرطوم
* حراج بن قاسم .. حراج في جنوب الرياض .. كل من هب ودب يبيع فيه .. اشياء جديده واشياء مستعمله..
ويقولون في زحمه غير طبيعيه ..


ولكم مني أرق وأعذب التحايا..
ودمتم أحبتي بكل الود وعبير الورد ..

كلاسيكو