مرحبـا مليون بالشباب

يالله حيهم .. اخباركم ان شاء الله مرتاحين

اقتراح من واحد من الشباب بـزياره ملـعب أولدترافورد .. وبأقتراح من الغالي hilalemooot بـ تحويل الزياره لـ شبكة الزعيـم .. كـانت بدايه هذا الموضوع

مدينـه جميله وملعب أجمل وأجمل



وبالفعل تمت الزياره وتصوير الـزياره من طقطق لـ السلام عليكم لعيون الشباب في شبكه الزعيـم

الموضوع متعوب عليه مابين الصور و تصغير أحجامها علشان يكون الموضوع متناسق والكتابه عليها لا يسرق الموضوع زي متحف زيدان وموضوع راكان وأشكر اخوي هلالي موت كثيير أوي أوي على مساعدته لي في رفع الصور

الصـور الأصل كلها موجوده عندي وزيادهـ .. بدون شعارات وبحجمها الطبيعي .. اللي تعجبه صوره ويبغاها ينسخها ويرسل خاص ويبشر بعزهـ .. لكن الشعارات والحجم زي ماقلت منع لـسرقه الموضوع و تصغير الحجم علشان يسهل تحميل الصور ويكون الموضوع متناسق

لا أطول بالكلام .. هذي الصور أتمنى تعجبـكم : )

-

( موقف مضحك )

أول ماطلعنا من محطه الترين .. بشكل طبيعي ركبنا التاكسي وقلنا أولد ترافورد .. الشيخ ماتحرك ويناظر من المرايه نظرات استغراب او تعجب .. قمت اناظر يمين يسار لا نصير ركبنا مع مدني من الحماس .. لا والله تاكسي وش السالفه .. كررنا الكلام .. قال بس انا مقدر اروح لمنطقه ترافورد عامه .. كيف اروح للأولد ترافورد .. قلنا واي ؟ .. طلع الاخ من مشجعين مانشستر سيتي .. بس مع الكاش كل شي يمشي لو اقول له خش في ارض الملعب ماقال لأ .. وهذي صورته الله يرج أبليسه




-

طبـعا لازم يكون عندك حجز قبل الذهاب للملعب .. الزياره تنقسم لـقسمين .. فيه زياره المتحف بـس وهذي بـ 5 جنيه أسترليني " باوند " .. وفيـه زيـارهـ المتحف وجوله على الملعب وهذي بـ 10 جنـيه أسترليني " باوند "

هذا الأستثمار الله يخلف على جوال الهلال

-



خريـطه الملعب كـامل




مقاعد الأنتظار وصور لاعبيـن كثر التراب .. ماخذين مقلب بأعمارهم << بيقهر الأخضر



مجموعه تي شيرتات للنادي .. طبعا شي من عام 1999 وشي من 2005 وشي من 2001 وزي كذا ومعاها عينات للبطولات زي بطوله أوربا مثلا ً





هذي شعارات النادي منذ تأسيسه على ما اعتقد حتى يومـنا هذا .. كلها حلوه ماشاء الله : )




هذي طريقه حلووه .. كل كابتن للنادي تـؤخذ منه أول فنيله لأول مبارات كان فيها الكابتن الرسمي للنادي ويوقع عليها هو وبعض المسؤولين في النادي واحيانا بعض اللاعبين .. ومعها أنجازات اللاعب وميدالياته و الدروع اللي حصل عليها ... الخ .. يعني زي مايقولون متحف مصغر عن الكابتن .. عاد يقول انه اول كانت الزاويه هذي لـ روي كين







أنواع الذهب .. بالفعل نادي خيالي ماشاء الله




هذي آخر بطوله دوري للمان يونايتد .. وعازلينها لحالها حتى يجي الكاسـ الجديد وتتحول لـ المتحف العام وتحل مكانها الجديدهـ حسب كلام الشايب .. وان شاء الله تتحول للمتحف العام الموسم القادم ;)





دوري أبطال أوربـا " نسخه "



السير اليكس فيرغسون مع الثلاثيـه الشهـيره



وهنا شاشات في كل مكان في النادي تعرض ملخصات للمباريات المهمه والمباريات الحاسمه وعلى وقتي لقيت مبارات اليوفي وراين غيغز يسجل الهدف






هذا متحف خـاص بالثلاثيه الشهيره .. صراحه شي يجنن .. طبعا المتحف المصغر يحتوي على الكؤوس الثلاثه .. وميداليه لكل كأس .. وبعض الأوراق الخـاصه بالمباريات كـ ذكرى .. و فيه انواع الدروع راح اعرضها واحد واحد اللحين ان شاء الله





ورقه المبارات النهائيه للـ FA كاب ضد نيوكاستل



درع من قنـاة الـ آي تي في للـنادي



درعـ من قـناة البي بي سي الشـهيره



درع من الآي أف أف أس << عجزان يكتبها أنقلش



هذي طريقه صراحه مجنونه .. سيب أو ممر خـاص بالمباريات الحاسمه للمان يونايتد في بطوله أوربا اللي كسبها .. وطبعا مع الممر فيه منافذ زي اللي فوق .. كل نافذه خاصه بـ مبارات معينه وفيها عينات حلوه مثل طقم الفريقين و بعض جزم اللاعبين اللي لعبوا المبارات وانتم بكرامه وكوره المبارات وتوقيتها وشاشه صغيره على الجنب تعرض ملخص المبارات .. وعلى الجانب " على الجدار يعني " صور للمبارات وأجمل اللقطات .. وكالعاده اي لقطات حلوه يكون ديفد بيكهام هو الأكثر فيها ..

واللي فوق نافذه مبارات اليوفنتوس




نافذه الأنـتر




نافذه البايرن ميـونخ



لعبه مجنوووونه جربها كل لاعبين المان طبعا وممكن تجربها انت .. تآخذ كوره وتشوتها بقووه وفيه جهاز خلف المرمى يقيس سرعه الكوره بالميل طبعا ً .. واذا فزت يسجلون أسمك في لوحه صغيره مسجل فيها النتائج .. الأقوى طبعا واين روني و كرستيانو رونالدو بـ سرعه 77 ميل .. وبعدهم فان دار سار .. وبعدهم تيم هاورد ..

-




-



تخيلوا يا ناس ان الكبينه اللي فوق هذي بـ 65 الف جنيه استرليني " باوند " للموسم الواحد .. وعليها ويتينغ ليست لـ أكثر من 15 سنه قادمه

بالفعل نـادي عـالمي ولا غرابه في انه ياخذ اغنى نادي بالعالم مرتين او ثلاث متتاليه




الأصلاحات تمت تقريبا ً .. وتمت اضافه 4 الآف مقعد بالزاويه هذي .. ونفس العدد بالزاويه الأخرى ليصبح الملعب يسع لـ 67 الف متفرج .. ماوسعوه علشان يحرقون دم حقين طياران الأمارت أبد ترى



كبينه قناة المـان يونايتد

-

تحفه فـنيـه





-



قاعة المؤتمرات .. السير اليكس فيرغسون ومعه لاعبين قبل كل مبارات تشامبينز ليغ .. والبريمر ليغ اظن المدرب فقط يكفي





مكان الأعلاميين .. مكان راقي مبرد مزود بـ بوفيه مجاني للأعلاميين وخدمه أنترنت " واير ليس " وبالسلك وحتى الدايل أب




أكثر اللاعبين صـور داخل الملعب " نستلروي , بيكهام , كانتونا , راين قيقز "





وهذا مطعم يقول صاحب الجوله أنه آخر وجبه قبل المبارات يتناولها اللاعبين مع السير اليكس فيرغسون وبعض مسؤولين النادي سوا .. وقبل المبارات بـ 4 ساعات يمنع اللاعب من أي أكل عدى بسكويت يعملونه هم وموز فـقط

والدولاب يحتوي على كـل انواع المشروبات من المويه للمويه المعدنيه .. لأن الشراب ممنوع قبل المبارات بيومين وأي لاعب يسويها ويشرب قبل المبارات بيوم أو يوم ونص يلعن خيره فرغسون




كراسي مخصصه لكبار الشخصيات والـ vip واللي على الويتنغ ليست للكباين يجلسون هنا .. وطبعا بنص سعر هذيك تقريبـا ً

-






-




هذا الممر المؤدي للملعب يدخل منه اللاعبين في مباريات التشامبينز ليغ اجباريا ً .. ويقول صاحب التور انه الجدار الأبيض هو الشي الوحيد اللي بالملعب منذ تأسيسه والباقي كله تغير .. لان الملعب طاحت عليه بليه بالحرب العالميه وراح غلطه ومابقي منه الا الجدار ذيا .. وكلش جددوه الا هذا << ضاعت الفصحى



مضمار التسخين واللي واقف هذا اللي اخذ فينا اللفه وأعلمكم كلامه تحت ..



دكة البدلاء للفريق الضيف



الهيتر اللي تحت كراسي البدلاء لدكه المان يونايتد .. ويقولون انه صحفي قال ان مانشستر حاطين مدفئه تحت مقاعد بدلاء فريقهم عكس المقاعد الأخرى .. ولكن كله كلام فاضي والمقاعد الأخرى فيها نفس الشي



هذا المكان يوقف فيه فرغسون من يوم مسك الفريق .. ويقلده خوينا يتكتف ويعلك ويناظر الساعه




غرفه الأسترخاء وفيها لوحه شرفيه بـ اسماء جميع اللاعبين اللي مروا على النادي واستمروا معه لموسم أو أكثر من جميع الجنسيات




الأسترخاء قبل المبارات وأبعاد اللاعبين عن الشحن النفسي قبل اي مبارات مصيريه هو دور هذه الغرفه





غرفه تبديل ملابس اللاعبين .. مزوده بكل شي وجع أدور شي ناقص مالقيت .. جكوزي و خزنه للخواتم وغيره من الأغراض الخصوصيه للاعبين و حمامات مزوده بـ كل شي وانتم بكرامه و تلفزيون وفيديو لـ عرض أشرطه مسجله للفريق المنافس .. عاد خوينا يقول انو هنا فيه تلفزيون وغرفه الفريق المنافس فيها كاميرا .. بعدين قمط وقال تصدقون ؟؟ ... طبعا لا




فيه واحد يموت على ذالأثنين .. صوره أهداء خـاص لـه .. وتراه يقول انهم قريبين من بعض واللي طمر للثاني هو فيرديناند .. لأنهم كانوا حاطينه آخر شي وطلب تغغير مكانه علشان يصير جنب هاينزه .. بس الأغلبيه مايجلسون في أماكنهم الطبيعيه .. مايجلس الا الرود وقيقز .. وذب كلمه على الأخير وقال انه يسوي شي قبل كل مبارات بس كلو مشفر



يشرح لنا الخطه .. فيرغسون :p





خخخخخخخخخخ يقول انه روني أتصل على اليكس فيرغسون قبل اسبوع وقال له ينقله من الجهه المقابله للمقعد المجاور لـ رونالدو .. وبعدين ضحك وقال انهم اصدقاء جدا جدا وانا اشوفهم دايم مع بعض وما اتوقع تأثر على صداقتهم الحادثه الأخيره




مقعد السير ومساعده




وهنا الممر المؤدي للملعب " الثاني " وهنا قسمنا الشيخ فريقين واحد لمشجعين المان والثاني لمشجعين الأنديه الأخرى وشرح لنا طريقه تعامل الحكم مع الفريقين والكلمات اللي يوجهها لهم دائما .. اللحين هو الحكم

حتى وهو مايدري وش التحكيم قال كلام قوي .. والمعجب يقول لعب قوي ونبا لعب نظيف والسنتره مع سامي .. وين يالغالي مفرقين بـ سطح بيتكم

-



-



الممر المؤدي للملعب من غرفه الملابس وهذا اللي ينزلون منه أحيانا بمبارايات البريمر ليغ .. لكن بالتشامبينز ممنوع .. وبنفس الوقت ممكن يؤدي لخارج الملعب في الحالات الطارئه والحرائق




الكابينه W31 خاصه بفيكتوريا ويقول انها من اكبر عشاق المان يونايتد

--

لأي واحد ناوي يزور الملعب .. المدينه نفسها خياليه .. واذا رايح للملعب لازم تمر الـترافورد سنتر .. وهو تابع لمنطقه ترافورد " الأغلبيه فيها مشجعين مان يونايتد " .. ومنطقه السيتي أوف مانشستر العكس .. المهم انه اكبر مجمع في أوربا ومافيه محل بالدنيا موب فيه وصراحه تزوره ولا تزور الملعب اصرف لك من زياره الملعب وعدم زياره المجمع



000000000000000

ريـش

1 قال في أول الجوله كل واحد يرفع يده ويقول الفريق اللي يشجعه .. واحد رفع يده قال تشيلسي .. قال أووه عندكم فوت بول تيم ؟؟ طبعا المقصود ان النادي لسى يبني تاريخه

2 قال : " الملعب افضل ملاعب العالم من ناحيه الأمن والخدمات .. وفي حالات الشغب نمتلك زنزانه للنساء وزنزانه للرجال وزنزانه لمشجعين الآرسنال "

3 يتكلم عن الصفقات .. وقارن صفقه اللاعب الكوري بـ صفقه شون رايت فيلبس .. قال " 20 مليون أو أكثر .. وافضل المواهب الأنجليزيه تدمرت .. كريزي "

4 قال ان واين روني سجل هدفين في مبارات وكل مره كان يبغى يروح يحيي أهله بالمدرجات ويروح للجهه المقابله ولا يلقاهم ويرجع .. دلخ المربع مرتين عاد << هذا انا مب هو

5 آلاف المشجعين زارو الملعب باليوم هذا .. طبعا على شكل قروبات .. كل واحد 10 باوند .. نضربها في 6.80 .. يعني تقريبا 70 ريال الشخص .. ونضرب 70 بالآلاف نقدر نقول النادي دخل اكثر من 10 الآف بيوم واحد من الزيارات فقط غير المحلات داخل الملعب وغيره من ملايين الأستثمارات .. شي عالمي وشغل ذكي .. لكن المحزن أنه من أمتلك الأمريكي النادي وهم يعانون من خسارات فضيعه .. واذا استمر الوضع على ماهو يقول انه خلال 10 سنوات راح تحل كارثه اقتصاديه بالنادي .. بغيت اقول قم انقلع لو مايجيكم الا حق الزيارات .. اذا ذي كارثه اقتصاديه وش اقول بالأنديه السعوديه .. كوارث

-

بالنهايه أحب أشكر مشرفنا الغالي hilalemooot على مساعدته لي في رفع الصور .. وهذا هو دايم خدوم من عرفته ابو حميد .. وهو صاحب الفكره .. وماكان ينقصنا في هالرحله الا واحد يشجع المان يونايتد زيه

أتمنى الموضوع يعجبكم .. وزي ماقلت الموضوع والصور خاصه لـشبكه الزعيم اتمنى محد ينقلها برا المنتدى .. اللي يبي اي صوره اصليه وبدون شعارات وبحجمها الطبيعي يحط رابط الصوره ويرسل لي خاص ويبشر بعزه

تحياتي لكـم .. أخوكم احمد : )