تراني لك على الاشهب دخيل ... ابو موسى بحذيـانه وطــاني
يصبحني بشــره كـل يــــوم ... ولا جاء الليل نومي ما هناني
يمكن بعضكم يذكر سالفتي مع السفيره موضي والاحداث اللي صارت لي في بلاد الفرنجه وانتهت تلك الاحداث بان توسط لي أحد الاشخاص من جنسية عربيه عشان آخذ حقوقي، واللي ما يذكر السالفه ممكن يخشخش هالموضوع:
ما اعرف اضبط الرابط عموما الموضوع كان بعنوان:
سعادة السفيرة موضي تعلمني معنى اللهده
ما زلت أتابع أمر معالجة شخص من أعز الناس على قلبي ، و رافقته في جميع رحلاته العلاجيه السابقه و راح أستمر بالوقوف الى جانبه باذن الله الى ان يمن الله عليه بالشفاء وهذا شي واجب علي ولا لي فيه أي منّه ولا فضل ..
لكن أن تسعى مع شخص مريض يتلقى علاجه خارج المملكه ، فهذا معناه انك راح تشوف أشياء ماتسر وراح تنقهر وتنلهد ويرتفع ضغطك في كل مكان تراجعه وفي كل مشتشفى تزوره داخل المملكه، وراح يكون لك مليون موقف وموقف وعشر طعش ألف قصة مؤلمه، وراح تضطر انك تذل نفسك للناس في بعض الاحيان ، أو تضطر انك تستخدم طرق غير شرعيه من أجل انسان ابتلاه الله بالمرض..
ما علينا انا رجال أحب أضحك وانبسط حتى لوكان الموقف أو القصة تخلي الواحد يرغي ويعّيط من القهر..
رتبت أمور سفرنا( فيزه وحجوزات وحجز سكن) لتلك الدولة واخذت موعد مع الطبيب المعالج وكل هذا تم بعد عناء ومشاكل وواسطات
ارسل لي الطبيب خطاب يطلب فيه ارسال اشعة (من نوع معين) للمريض بأسرع وقت ، وأكد على ضرورة ارسالها له قبل الموعد المحدد لمقابلته..
اخذت اسم الاشعة واتصلت على احد المتشفيات الخاصة و بكل ثقه قلت لهم ودي أصلح أشعة نوعها ... متى انسب موعد عشان اجيب المريض (وعلى نياتك يالهاوي ) ؟؟
قال لحظه وحولني على قسم الاشعة ، ردوا علي وقالوا لي للاسف ما عندنا هالنوع من الاشعة!!
اتصلت على مستشفى ثاني وقالوا لي ما عندنا هالنوع من الاشعة!!!
هاه وش السالفه؟!!
اسبوعين وانا ادور على المستشفيات الحكومية والاهليه ولا فائدة تذكر وآآآآآه ياليـــــــــــــــل..
بالاخير قالي احد المختصين ان هذا النوع من الاشعة لن تجده الا بالمستشفى الحكومي الفلاني قلت الحمد لله ولا بقى مكان ما سجدت به سجود شكر لله
الهاوي راح للدوام، ووقع واشتغل شوي ، ثم راح للمدير وقاله اذا سمحت لي يابومحمد ابطلع عندي شغل ابقضيه..
وصلت للمستشفى دخلت وانا فاق خشتي و رحت لقسم الاشعة وسألتهم :
عندكم هالنوع من الاشعة؟؟
قال ايه نعم
من فرحتي بغيت أخمه وقلت طيب ودي اسويها وشلون؟؟
قال رح جب تحويل من اي دكتور
ذهب الهاوي وهو سعيد منبسط يكاد يتشقق من الفرحه وكان يظن هو ووجهه انه اذا ذهب الى قسم المواعيد وطلب موعدا مع اي طبيب عام ، سيعطونه موعدا باكر أو عقب باكر أو على الاكثر عقب اسبوع ..
ولكن المفاجأه كانت أن أقرب موعد هو بعد 45 يوما في هذه اللحظات الهاوي بغى يصيح لكنه عندما أدخل يده في جيبه ولم يجد مناديل قال وشوّله أصيح وبدأ يكركر حتى سقط أرضا من شدة الكركره والناس تنظر اليه بدهشه والجميع يتسائل ماذا جرى لهذا الرجل
على العموم انا واخو قلبي سفرتنا بعد أقل من شهرين تقريبا، والاشعة يجب ان تذهب بأسرع وقت ، يعني 45 يوم هذي ما تنفعنا ابد
دخلت على مدير العيادات الخارجيه وشرحت له الوضع وأخبرته ان المريض وضعه حرج ونحن نحتاج هذه الاشعة بأسرع وقت ومعي الادلة والبراهين على صدق كلامي ، وعرضت عليه خطاب الدكتور المترجم الى اللغة العربية الفصحى
لكنه رفض بطريقة فيها الكثير من قلة الادب مما جعلني أفقد أعصابي و أتهاوش معه واخرج وانا منقهر لاني اعلم ان كل ما اريده هو أشعه
كالعادة بحثت في جوالي عن أي رجل رشيد يتوسط لي والحمد لله تذكرت ان واحد من العيال اخوه دكتور في نفس المستشفى
اتصلت عليه لكنه قال ان اخوي له شهر في امريكا
اتصلت على اكثر من واحد من العيال ، وبالنهاية قال لي واحد منهم :
اسمع يالهاوي أبعطيك رقم هندي كهربائي بنفس المستشفى وراح يخدمك
قلت له : يابو نوره ضف وجهك ولا تقعد تستهبل تراي منااااب فاضي لك
قال والله اني ما أستهبل وراح أكلمه لك وخذ رقمه سجله عندك وترى اسمه أرشد..
تعوذت من ابليس واخذت الرقم واتصلت على صديقنا الواسطه أرشد:
رد علي وقلت : سلام عليكم أرشد، كيف هالك ، انتا معلوم ابو نوره ، انا فيه صديق ابو نوره..
قال أرشد: معلوم معلوم كيف هالك ، ايش فيه مشكله؟؟
قلت: يا أرشد ازا ما عليك واحد كلافه ، أنا يبغى يجيب صديق أنا عشان سوي أشعة جلدي جلدي(يعني بسرعه )
قال : ما فيه مشكله، انتا يجي بكرا صباح وسوي اتصال انا..
قلت : شكرا يا أرشد والله لايهين أنتا و يسوي كثير نفر من أمثالك..
من بكرا أخذت أخو قلبي ورحنا للمستشفى واتصلت على أرشد ، والحقيقه الرجال ما قصر فزع معنا من دخلنا للمستشفى الى ان اخذنا الاشعة.. لا وازيدكم من الشعر بيت قلت لأرشد : خلهم يعطوننا الاشعة على سي دي من حقي أتفسقن مادام واسطتي أرشد
أقسم بالله اني ما استهبل عليكم ولا احاول استخف دمي ولكن هذا اللي حصل ..
عندما كنت في الخارج توسط لي واحد من جنسيه عربيه الله يجزاه خير عشان آخذ حقي من سفارتنا السعوديه!!
وعندما كنت في الرياض قدّر ظرفي وتوسط لي واحد هندي الله يكثّر من أمثاله في مستشفى حكومي سعودي!!
ياجماعة حرااااااام اللي قاعد يصير في المستشفيات ، والله العظيم ان الاجانب اللي فيه هم أكثر المستفيدن من هالمستشفيات ينفعون أنفسهم وأقاربهم وأصادقائهم وحنا يا غافلين لكم الله:sad:
تقول الوالده : يوم كنت منوّمه بالمستشفى كانت بجنبي حرمه لبنانيّه ، وكانوا الممرضات يهتمون فيها اهتمام غريب ، وحنا مهملين والسبب ان احد الطبيات اللبنانيات تصير اخت هالمريضه!!!
اقــــول كم رقم ارشد .. الدنيا غير مأمونه .. !
والله ناك صادق .. صار القريب يتنحش ماله فايده .. والبعيد صار ينفع ويخدم ..
بعدين لاتستغرب من املواعيد .. انا واحد كانت مقرره له عمليه في عينه بعد شهرين وهو معاد يشوف ..
وبغى يجيه العمى لولا روحته لمستشفى اهلي ..
ثاني شي.. دوله كبيره عدد سكانها اكثر من 20 مليون .. وعدد المقيمين ضعفها .. ولا فيه الاشعه اللي تبغى ..
اقول .. اشكر الله وادع بسلامة ارشد .. الله يخليه لأميمته ..
والله يشفي مريضك .. وكل مرضى المسلمين ..
دمت بخير ..
ياجماعة حرااااااام اللي قاعد يصير في المستشفيات ، والله العظيم ان الاجانب اللي فيه هم أكثر المستفيدن من هالمستشفيات ينفعون أنفسهم وأقاربهم وأصادقائهم وحنا يا غافلين لكم الله
أجانب وجاين ,,, بس هم المستفيدين
ومو بس في المستشفيات , في كل مكان هم نافعين انفسهم
بين مستشفيات و أطباء يلهثون خلف ( فلاشات ) الكاميرات عندما تصورهم و هم ينقذون أطفال الأجانب و بين مستشفيات لتلقي العلاج فيها عليك معرفة أجانب الصيانة بتنا نقول لا نريد العلاج المجاني !