السلااام عليكم ورحمة الله وبركاته

حبيت أحط موضوع بس للأمانة مو أنا اللي كاتبته .. "أختي الكبرى" اشتغلت قريحتها بأحد الأيام وطلع معها هالموضوع .. وجربت ترسله لجريده توها بالمهد وما نشرته .. عاد ماجاها احباط أبد أبد

ماعلينا .. حبيت أتكرم عليها وأحطه بين أيديكم طالت أعماركم .. خصوصاً إنه يمسني>>هع

عاد هي تقول اللي يجوز له الموضوع يرد .. واللي ما جاز له مهوب لازم يرد .. مو ناقصه<<<تسمع اختي بالروح الرياضيه

خلاص ماراح أطول .. هذا موضوع الآنسة

ابدأ من مقولة (من يعيش كثير.. يشوف كثير) أو.. (عش رجباً ترى عجباً) أو.. (لين شافوني سكتوا..)>>>ولا مالها دخل؟

ما علينا.. موضوعي هذا قد ألمس به رغبة العديد من بنات جنسي>>>حسيت إني مثقفة!

بشرح لكم حاجة هنا بعدين أخش في صلب الموضوع.. أنا_وأعوذ بالله من كلمة أنا_"كنت" البنت الوحيدة.. ولكم حرية التخيل بكثر الدلع اللي كنت أحظى فيه بطفولتي السعيدة ولله الحمد.. و"ولدت أمي بنتاً صغرى".. وانبسطت لأن جت من تشاركني الدلع بدل القعدة مع أخواني ولعبهم الجفس.. بس كانت أختي مفاجئة لنا كلنا على مر السنين (مو لازم أقول ليه عاد) بس زيادة على إننا أبداً مانتشابه خارجياً, حتى داخلياً نكتشف يوم عن يوم مدى الاختلافات الفكرية الكبيرة بيني وبين أختي الصغرى الوحيدة.. وتخبرون أكيد سن المراهقة ومايرافقها من مسكات وهوايات غريبة عجيبة.. قدر الله علينا وصارت أختي الصغرى من أحد أشدّ متابعي الرياضة.. وكرة القدم بالتحديد.. أتحدى أحد يعرف خبر بالكورة قبلها.. لو يجرب أحد بس ويسألها عن لاعب ما يعرف إلا رقمه وبأي فريق بتعطيه نبذة وافية تتضمن اسمه وعمره وعمره الرياضي وآخر عقد كان بكم الخ... يعني باختصار: أختي (قوية) فيما يختص بعالم الكرة..!

في الآونة الأخيره.. بعد انضمام المملكة لمنظمة التجارة.. حس بعض الناس بموقف أقوى,ليش؟ ما أدري. في هذي الفترة طلع الكلام عن سواقة الحريم والأزمة الاجتماعية اللي حصلت بالديرة جراء هذي المناقشات والمواقف المتباينة. وإحنا بغنى عن إعادة الموضوع.. لكن بعد هذا الموضوع المثير للجدل استغلوا بعض البنات الله يهديهم شعار (حقوق المرأة) في بعض المطالب اللي ماتصب في مصلحة المرأة بالأساس كثر ماكانت أحياناً مجرد وجاهة أو تقليد للغير بدون أي حساب للظروف الحالية.. وأكيد محد يغفل من كنّ ممثلات بكل فخر للبنت السعودية بالعقل والعلم والرأي السديد.

عودة إلى "أختي الصغرى" أو ((رئيسة رابطة مشجعات فريق الـ(....) )) وأعضاء رابطتها الموقرة كانت جمعاتهم واجدة.. وخصوصاً وقت مباريات فريقهم أو الفريق اللي ارتبط اسمه كمنافس أزلي لفريقهم وأكيد ماتهون مباريات المنتخب.. وتمخضت>>>لحد يسأل عن هالكلمة جادت فيها قريحتي عليكم.. المهم أنها تمخضت عن مطالبة مهمّة ومستعجلة مِن مَن هم مثل أختي إلى من يهمه الأمر بـ
]إقامة قسم للإناث "أو العوايل مو مشكله" في الملاعب[ لحضور المباريات وتشجيع الفرق.. ويفضل بأن يكون القسم يكون كله مظلل>>>طالبين جمس الأخوات الظاهر؟؟.. التظليل لأسباب أمنية بحتة.. ومن أحد أسباب مطالبتهم بإنشاء ذلك القسم فضلاً عن حبهم الشغوف بتلك الرياضة هي: أن اللي برا مو أحسن منا.. وما تتخيلون أعزائي القراء مدى صدمة أختي وأعضاء الرابطة يوم شافوا الحريم اللي دخلوا ملعب الملز بطلب من لاعبي منتخبهم لتشجيعهم!! والسخط بسماح المسؤولين لهم بينما يرفضون للسعوديات ذلك>>>هذي وجهة نظرهم
بصدق هذي الأمنية صارت الشغل الشاغل لأختي الصغرى ومن مثلها بالتفكير والآراء.. وصدقوني ماأكذب لو أقول لكم إني عرفت في حياتي من تقول ]سببين لتخلفنا>>قوية الكلمة, منعنا من السواقة ودخولنا الملاعب[ >>!!!

تعبت أنا من كثر الكلام .. وماراح أقول إلا

(أهم شي الأخلاق)

[COLOR="Red"]

أخت هلاليه

[/COLOR