في مثل هذا اليوم......... صار هيك
قبل ما أهرج أبي منكم العذر والسموحة لأني أبتكلم على الفطرة بعيدا عن التكلف والزبرقة والفرتكة اللي مال أمها داعي
ألحين راح أقص لكم سالفة صارت معي قبل تقريبا12 أو13 سنة ومالكم علي يمين أنهاصدقية ولا هيب من بنات ولا عيال أفكاري قسما بالله هه وهذاكم ما حلفتوني...... المهم السالفة وما فيها:
كنت جالس ( حضرتي يعني ) ومعي مجموعة من الشبهات ( نصراويين يعني )
وواحد الله يذكره بالخير أهلاوي وش لون ما أدري ؟ ( جاي معنا تسلل )
ومثلكم عارفين مجالسنا أول ما يبدون بالكورة ، جا واحد من الشبهات
وقعد يتكلم عن ماجد وأخلاقيات ماجد وتواضع ماجد وووووووووووو الخ
وشي طبيعي يدخل سامي بالموضوع وقعد يهرج ويبربر عن سامي الين دخت
طبعا ( حضرتي ) ما سكت وقعدت أرد وهو يراوغ مرة يمين ومرة يسار
ويوم طال الهرج ، قال الأهلاوي الحكيم
:
وش رايكم تثبتون هالشي بالواقع ، قلنا وش لون ؟ قال قله ورقله:
أنت يالهلالي تروح لسامي وتعزمه واذا وافق يثبت فعلا انه متواضع.
وأنت يا لشبهه كذلك تروح وتعزم ماجد ونفس الشي.
قلت بس تم ، وأنا اللي أطق صدري ذيك الطقة اللي الى الحين أكحكح منها
وبس ( لك الله ) يا أهلاوي ، مالك الا عقب باسر أروح له بالنادي ، لا تقولون مخفه
( ترى من الحب ما عزم )
يوم جا مهوب باسر اللي عقبه وانا أصلي المغرب وأنقز وأدق ددسني سلف وانحر العريجا متوجها بحفظ الله ورعايته الى نادي الهلال ، لا ومن وين محرك من الريان شرق الرياض ( كله لعيونك يهون يالذيب الأمعط ) المهم يوم وصلت حول الأشارة اللي عند النادي ولا فيه تفتيش مرور
الله لا يحييهم وش جابهم ؟ وانا اللي ألبق على جنب واقعد أحتريهم يولون ، لكن هيهات شكل الأخوان مطفرين وراعين طويلة ، والله واجيك وأديور متوجها لبيت أهلي
وطول الطريق بس قاعد أفكر بهالشبهات النغول.
أكيد يحسبوني تسذاب ( حاشاني ) ، يوم وصلت وأنا اللي أدق لطمة وبالثاني والبق عند البيت بسرعة لا يشوفوني لأنهم ما راح يصدقون الكلام
اللي صار وأشوى أدخل ولا من شاف ولا من دري.
وبعد ساعة بالضبط دق جرس البيت وفتح أبوي وقعد يصوت لي رح سلقك يبونك عند الباب ( طبعا تربية حديثة )
المهم رحت وفتحت الباب ولاهم صز الشبهات اي والله هذولا سلقي.
قالوا هاه وين سامي ؟
قلت وهو مطفوق أول ما أقوله يجي... المهم أنا صار معي كذا وكذا
وصاروا يتناضرون ويتغامزون ويضحكون ويكركرون......وما صدقوني !!!
قال واحد من الشبهات:
خلاص أنا أروح معك عشان أشوف سامي وهو يفشلك ، قال أيش قال متواضع!
قلت خلاص تم يا مال الضعفة.
ومن باسر وعقب صلاة المغرب وانا اللي أنقز للشبهه واتله مع غالوقته
متوجهين للعريجا بحفظ الله ورعايته والحمد لله هالمره وصلنا سالمين غانمين وندور موقف للدتسين ونضبط له هاك الموقف مقابل باب النادي ونشخص وندق هاك السعابيل بالمرزام وندخل ....................
المهم قعدنا نحتري التمرين الين خلص ونقعد نلاحق الذيب ونتصيده يوم جا يركب سيارته وانا اللي الزه واسلم عليه طبعاً الشبهه كان معي قلت وشلونك سامي عساك بخير من الروعه ما ادري وش اقول .... المهم قلت قل تم قال وش فيه قلت ابي اعزمك قال تم ، بس وين ؟ ومتى ؟
وصفت له البيت ، وقلت حدد اليوم اللي يعجبك. وحدد يوم جعله ما يحاد.
بعدين توكل على الله وراح الله يحفظه ويستر عليه ، وأنا عيوني تراعيه.
عقبين ألتفت على خويي الشبهة وأنا كلي فخر وانتصار ونافخ صدري نفخ شوي وانفقع;) قلت له: شفت أنت ووجهك ؟
شف التواضع شف الأخلاق شف.....شف......شف.....شف........شف........
وأعطيه من هالشف الين وصلنا البيت وهو ولا حس ولا خبر بس كلمة وحدة قالها: ( تصدق أنه رهيب ومتواضع فعلا ) قلت أدري ما جبت جديد.
طبعا أنا ذيك الليلة ما نمت من الفرحة... من قدي سامي معزوم عندي.
يوم جا الموعد المرتقب وأقعد أحتري وأنتظر قلت بس هذي ركبه!!
من ركب رياض الأحمري
يوم دريت ولا والله هاللي يقبل بسيارته
وأنا أستانس وناسة تشققت منها.
قمت وسلمت عليه ودخلته البيت شوي شوي وبدون عجله أبي أحد يمر ويشوفه
عشان أشخص...... بس ماش ما جا أحد.
طبعا معلم أهلي أخواني الصغار قايل لهم ترى صديقي يبي يجي عندي ولموا
العشا وبيضوا وجهي. قالوا: ما خبرناك تعزم أحد.
قلت هذا ماهوب أحد هذا سامي الجابر صديقي
ترى أخواني ما فشلوني ولا قعدوا يبحلقون ويطالعون الين خوفوه ، وواحد منهم يقول أثره شخصية والثاني يقول يازين نعاله ( الله يكرمكم )
وأنا ميت حر ووجهي تقول طماطه.
وبعد أخذ وعطا ومناقشة ، ودعته عند الباب وتوكل على الله ، طبعا ما علمته وش الهدف من عزيمته... والله أني أحبك قوة مرة بالحيل جدا.
نسيت أقول لكم وأنا عند الباب أودعه لمحت الشبهات متوزين ومندسين ورى السيارات اللي قبال بيتنا.
يوم راح... جعل روحه ما تروح ان شاء الله. رحت أطامر وأنا مبسوط وآخر روقان... وقابلت الشبهات وقلت هاه وش رايكم:
متواضع والا لا ؟
متغطرس والا لا ؟
قالوا :
هاه.............. قلت بلا هاه بلا ماه.
يالله ورونا تواضع لاعبكم وعدم غطرسته وغروره!!!!!!!!!!!!!!!
*******************************************************
*******************************************************
الجزء الثاني ( وش صار مع الشبهات ولاعبهم وعزيمتهم )
يبي يجي الزول بحاله وحده 
الوضع العادي
