السلام عليكم ورحمة الله وبركاته


انا من زمان ما اكتب بس اللي خلاني اكتب هالمنتخب المتخلف الله لايبارك فيهم ... بالله هذا منتخب اكبر دولة للبترول بالعالم ؟؟ هل يستاهلون ذولا رفع كلمة لا اله الا الله ؟؟؟
والقاهرني اكثر هالمدرب المتخلف باكيتا ، اجل يلعب الحارس مبروك زايد بعد نكبة الهدف الثاني حق تونس ؟؟ لا ويلعب حسين عبدالغني بدل الخثران ؟؟ صحيح عبدالغني لعبه زين لكن الخثران افضل بكثير واخلاقه زينه ، وكيف يلعب نواف وهو اساسا مصاب قبل فترة قريبة وخاله ميت ؟؟ ما يدري ان حالته النفسيئة سيئة ؟؟ وبالمباريات التجريبية الاخيرة كان تعبان ؟؟
لا ومحمد نور ما ادري وش قصته ، بالاتحاد يلعب لعب مهوب طبيعي لكن بالمنتخب ما عندك احد ... وما ادري سامي ليه يدخله متأخر كثير ؟؟؟ قالوا لياقته تعبانه ، طيب حنا عارفين كذا لكن يدخله المدرب على اخر دقايق ؟؟؟
سامي لو يدخل من اول المباراة وما يلمس الكورة بيكون مفيد للمنتخب لأنه تأثيره نفسيا على اللاعبين ممتاز ، واشوف اشراكه من بداية الشوط الثاني ممتاز ، وكفاية انه يلعب بقلب وروح ...
لا كله كوم وتكر كوم ... الظاهر انه حالف الا يطلعنا من المونديال ... نعنبوا داره كل الاهداف بسببه .. لا عشان ما نظلم الرجال ، الهدف الثاني لأوكرانيا ماله فيه ذنب ، لكن الهدف الاول لتونس كان بسببه لأن طلع الكورة براسه على ظهر الدوخي بدل ما يشوتها بره، و الهدف الثاني عاجز الخال يرفع رجله ويبعد الكورة عن الباب ، اما مباراة اوكرانيا يتضح فيها انه مبيت النيه، اجل يناول للحارس وحولينه لاعبين من اوكرانيا ويردها له ويناولها من جديد ؟؟؟
اه لو اشوفه ..؟؟ لا والاخ طالع بالتفلزيون يقول : والله اول مرة نيلأب بالمتر ...
والله صرنا فشيلة قدام العالم .. الان عرفت ليه الشيبان يقولون ياليت المنتخب ما يتأهل .. ما الومهم ، من كثر الفضايح ، على الاقل خلوا فضايحنا بيننا لاتصير قدام العالم ..
لكن الحق حق ، هناك لاعبين كانوا جيدين جدا ومنهم سامي ومالك معاذ ، وكنت اتمنى يكون الشلهوب بدال نواف لكن ظروف الشلهوب كلنا نعرفها والله يرحم امه و كل المسلمين برحمته ..
اما اللي ما نقدر نقول فيه كلمة وحدة و حرام يلعب بهالمنتخب فهو ياسر القحطاني ... ياسر مستواه اعلى من مستوى المنتخب بكثير وعقليته ماشاء الله متطورة ولكن مالقى من يلعب معاه صح ويناوله ، اتمنى يحلون الادارة العامة لرعاية الشباب ، خلاص ترى والله شينه ، كل مرة نقول بنصير احسن وما عندك احد ..
وما نبي نتأهل لكأس العالم مرة ثانية ، اذا صار عندنا اللعب صح ولاعبينا تركوا الدلع واحترفوا برا البلد وصاروا رجاجيل نصير نفكر بالتأهل ، وبعدين وش حركات المبزرة والهواش بين اللاعبين ؟؟
والله لو كان في فيصل بن فهد حي كان قص رقاب كل اللاعبين ..











اخوكم ماجد الشمري