|
قم للمعلم وفه التبجيلا........ بس وين المعلم اللي يستاهل؟؟! السلام عليكم ورحمة الله قم للمعلم وفه التبجيلا.................... كاد المعلم ان يكون رسولا بيت من الشعر كلنا حافظينه كلنا كنا نسمعه من ايام الابتدائي سمعناه وحفظناه لكن هل كنا مقتنعين بمحتواه خصوصا ذيك الايام؟ هل كان بالفعل يستحق كل المعلمين اللي مروا علينا هذا البيت بمافيه من احترام وتقدير ومكانة رفيعة؟؟ الدنيا كلها تغيرت مع مرور الزمن ويمكن التغيرات صارت اسرع واوضح في العشر سنوات الاخيرة مدرس الحين غير مدرس زمان وطالب الحين يختلف عن الطالب اول اول كان المدرس يصير مدرس لانه ( مؤمن ) بمهنة التدريس ومحب لها لذلك كان مخلص جدا في عمله وكان هدفه الاول تخريج طلاب يفتخر فيهم بغض النظر عن الاساليب المتبعة زمان سواء الضرب او غيره الا ان الاخلاص كان واضح جدا وحب المهنة ماكان يحتاج لدليل انا مااتكلم عن 30 او 50 سنة انا اتكلم الى قبل 10 ويمكن اقل من السنوات الحين الوضع اختلف تماما الحين مهنة التدريس مهنة من لا مهنة له الحين اللي مايلقى مكان بالتخصصات المطلوبة او بالعسكرية يلجا للتدريس كخيار اخير الان المدرس ( غالبا ) مايصير مدرس حبا بالتدريس يصير مدرس لانه الخيار الوحيد قدامه لذلك مو غريب اننا نشوف مخرجات التعليم اقل من اول لذلك مو غريب اننا نشوف عيالنا يوصل لرابع ابتدائي و ( يمكن ) يطلع من الابتدائي وقراءته ضعيفة واملائه سىء مع الاسف الشديد ( غالبية ) مدارسنا ومدرسينا ماقدروا يواكبون التقدم والتكنولوجيا بشكل معقول مع الاسف الى الان طرق وادوات التدريس ماتغيرت الطبشورة والقلم والمساحة والسبورة بس مع الاسف الحين صار المدرس ينتظر نهاية الحصة اكثر من الطالب علشان يروح يسولف والا يروح لشاشة الاسهم التعليم ياجماعة رسالة قبل مايكون وظيفة التعليم امانة واللي مو قد هالامانة لا يتحملها لكن بعد بالوقت نفسه لابد اننا نراعي ظروف المعلمين والمعلمات الرواتب والمميزات اللي ياخذها المدرس او المدرسة اقل بكثير عن اول بعض المعلمين يقولون ( وهم صادقين باللي يقولونه ) يقولون ننقهر لما نشوف زملاءنا من قدامى المدرسين يشتغلون نفس شغلنا ويمكن اقل بعد لكن يستلمون رواتب اعلى منا بكثير كثير من المدرسين والمدرسات يشتغلون في مناطق بعيدة عن اهلهم ويتحملون عناء السفر وبعضهم يضطر حتى للسكن بمدينة غير مدينته وهذا يكلفه تكاليف اضافية تضاف الى قلة الحوافز المادية اللي ياخذها بدون شك مثل هالشىء راح يأثر على نفسيتهم وبالتالي قدرتهم على العطاء يعني المسالة صعب ناخذها من جانب واحد او من وجهة نظر وحدة لابد بالبداية نعترف ان عندنا مشكلة حقيقة بالتعليم وبعدين نحاول نعرف اسبابها وبالتالي نحاول نعالجها اتمنى اننا مانتأخر بحلها لان كل دقيقة نتأخر فيها راح تكلفنا شىء كثير |
قل للمــــــعلم إن أردت مكانة،،،،،،،،،، قم للأمانــــة وفها التبجيلا شكرا للأخ افتخر بالزعيم على هذا الطرح.. لكن.. تَبَقّى من الطالب المجد في طلب العلم أن لا تؤثر فيه تلك المنغصات بل فليقف شامخا في مجال العلم بتوفيق من ربه ومن ثم بهمته فالعلم لا يتوقف أخذه على المعلم فقط.. |
وعليكم السلام ورحمة الله وبركاته الله يعطيك العافيه يا افتخر بالزعيم موضوع في وقته الان انتهت الدراسه والكل لازم يحاسب نفسه سواء معلم أو باحث عن العلم أنا ماراح أقول طالب لأن الباحث عن العلم هو من يستحق يكون طالب والمعلم هو المطلوب لأنه فعلا مطلوب منه رساله يؤديها بكل أمانه ليس الهدف نجاح الطالب فقط لا الهدف اتقان الطالب ومن ثم نجاحه لايعني نجاحك كمعلم هو نجاح كل من قمت بتدريسه دليل نجاحك هو تميز من قمت بتدريسه واتقانه للشي الذي قمت بتدريسه له انت بتقديمك النجاح له تضره ما تنفعه كيف يقاوم مرحله ثانيه وهو لم يتجاوز المرحله الاسهل لانه من الطبيعي ان تكون المرحله الثانيه اصعب من الاولى المعلم فعلاً فقد هيبته وفقد تميزه وفقد قدرته على ايصال المعلومه فأصبح دوره كدور الملقي فقط يأتي ليلقي الدرس فهم من فهم ومن لم يفهم لايهم درجات المساعده موجوده الأب الفاهم والأم المدركه لا يرضيهم نجاح مايسمى (بالدف ) فالكره الان في مرمى الوالدين بامكانهم البحث عن الخلل ان كان في المدرسه ومعلميها أو في ادراك ابنهم واستيعابه فالعلاج اما بتغييير المدرسه او بعدم السماح بنجاح الواسطه وعليهم تنبيه ابنهم الى ان العلم لن يتوقف على مرحله او مرحلتين وزيادة درجه او اثنتين العلم طريق طويل وفيه من الصعوبات الشي الكثيران لم يكن على درايه من الان بوضعية المستقبل فيكون مصيره مثل مصير من علّمه علم دون درايه اذاً علم لا فائدة منه بصراحه الحديث عن التعليم وأسراره طويل وشائك والكل له حقوق وعليه واجبات ولكن الخلل أصبح الان واضح ايام ماكنت في المدرسه كنت أدرس كانت عندنا معلمه تجي وتفتح الكتاب وتقراء حتى ماكانت توقف كانت جالسه على الكرسي ولاتجيب معها لادفتر ولا شي ولا كانت تسألنا ولا كانت تدري احنا حلينا الواجب او لا جايبين دفاتر ولا ماعندنا من الاساس مهتمين ولا مهملين كله واحد عندها لكن شوفوا الفرق اذا جت الموجهه تصير انسانه ثانيه مو استاذه ثانيه حتى شكلها يتغير تهتم بنفسها وتهتم بأدواتها وطريقة كلامها معنا ونشوف الدفتر كله ورد ونشوف كيف تقوم وتسألنا وتدور على البنات وهل هم حالين واجابتهم أو لا يعني ندري انه فيه موجهه جايه من اللوحه والادوات والتعامل الغير يعني الان هي فاهمه ان هذا دورها الاساسي واللي من البديهي وشي طبيعي تسويه بس ليه هالاستخفاف مدري!!!!! الحل: حملات اسبوعيه على المدارس من قبل الموجهيين وبغته بعد عشان يعرفون من الجيد من الرديء الاهتمام بالتجديد والتغيير مو طالبه ام عشر سنوات تدرسها وحده ام 50 سنه اش جاب لجاب !!!! اختبار قدرات غير التطبيق المدرسي يعي تقعد المدرسه شهر تحت الملاحظه لاثبات جدارتها بهالمكان!! الاهتمام بتغيير النشاطات تغيير نمط الدرجات واجب مشاركه نشاط كلها امور تقليديه الطالب يبي يغير مشاركة الطالب نمط اسئلة الاختبار اشعار الطالب بأهميته وانه عنصر مهم من عناصر التعليم وجزء مهم في هذه المنظومه الرائعه والي ماراح تكتمل روعتها الا بتكامل العناصر واستشعاره البيت الجميل اللي تصدر أول الموضوع قم للمعلم وفه التبجيلا كاد المعلم ان يكون رسولا والله يعطيك ألف عافيه على الموضوع الموفق في طرحه وفي وقته |
صدقت بس ولله الحمد يوجد مدرسين اكفاء ولاكن قليل وثاني شيء عنوانك بطل وتشــــــــــــــــــــــــــــــــــــــــــــــاو |
الله عليك يا افتخر فعلاً حطيت يدك على الجرح عمرنا ما اقتنعنا بهالبيت ولو أول ما سمعت من الشعر هو كان كرهت طاري الشعر أتذكر وحده من البنات دايم تقول قم للمعلم وفه التبقيسا كاد المعلم أن يكون إبليسا هي هبله كثير ولأول مره أتفق معها لأن عمري ما شفت معلمه حقيقيه شغلتهم تلقين في تلقين فهمت زين ما فهمت موشغلهم أما التربيه آآآآخر شي يفكرون فيه بصراحه قطاع التعليم حووووووووووسه وعلى قولتك مهنة من لامهنة له كل الشكر لك أفتخر أفتخر بوجودك بيننا بالحب والإشراق |
التعليم رسالة .. ووظيفة .. أيهما يسبق الآخر في نظر أي مدرس يحدد لك نوعيته .. شكرا لك،، |
| الوقت المعتمد في المنتدى بتوقيت جرينتش +3.
الوقت الان » 08:15 PM. |
Powered by: vBulletin Version 3.8.7
Copyright ©2000 - 2025, Jelsoft Enterprises Ltd