الصــيف قرب والسفر حان طـــاريه!! - صفحة رقم 3 - نادي الهلال السعودي - شبكة الزعيم

هلالي الظهران · #1 25/05/2006, 06:42 AM

[مدخل]

مساؤكم جميل مفعم بحيوية الاختبارات وطاري الاجازه .. الكتاب باين من عنوانه .. ادري تونا ماخلصنا اختبارات ولا بدت الاجازه الصيفيه بس اخاف مايمديني عقب الاختبارات

.. خصوصا اني متعود اخرج من قاعة الامتحان لاقرب طياره لاي مكان بس انحاش من الجامعه والقريدات

,,

[تمهيد]

بقسم الموضوع الى ثلاث محاور او جزئيات على حسب الفئه العمريه اللي مريت فيها .. وبالطبع انتظر مداخلاتكم وتعليقاتكم حول المرحله الاجمل لكل واحد فيكم

..واللي توه مامر بكل المراحل يطلع منها ويعلق على قده

..والشيبان اللي مروا بمراحل اكثر اقولهم على شحم ومالكم الا هالثلاث مراحل

,,

المرحله الاولى..

مرحلة الطفوله او مرحلة الابتدائي .. او بالاصح خلوني اسميها مرحلة سفرات ابها وعالم الملاهي

..

ايه يا الطفوله والله ايام .. واي ايام.. بالنسبه لي هالفتره لايعلى عليها ولا تقارن بغيرها.. ايام كنا بس ننتظر اجازة الصيف علشان نسير على ابها طوالي ..
كانت فترات ذهبيه يوم كنا بزارين واهالينا توهم شباب وخفيفين والدنيا تمشي بسهوله ومن غير تعقيد.. كنا نطلع جماعات لاتقل عن عشره عوايل

..
طلعات في غاية البساطه والوناسه .. تخيلوا اكثر من عشر سيارات تمشي ورا بعض متجهه الى احد منتزهات ابها ..القرعاءاو السوده او الدلغان او الحبله او الجره او المسقي .. من صباح الله ..الطلعه تبدا من تشرق الشمس الى ان تغرب.. من بعد الفجر يطلعون الرجال يقضون وياخذون كل الاغراض وماتجي الساعه 6 الى الجميع بسياراتهم .. تبدا المتعه من ركوب السيارات والسباقات اللي تصير بتحريض من الاطفال

..علشان كل واحد يستعرض ويقول ابوي يسوق اسرع ووصلنا قبلكم

..

طبعا ما اظن ان كان فيه احد يوصل قبلنا

.. علشان كذا تلقون كل ابو دايم ماخذين افضل الاماكن

.. والفطور يكون على الحريم ..تلقاهم مولمين كل الاغراض وخذوا هذاك الفطور بالصبحيه في جو ابها الرايق شكشوكه على نواشف والشاهي بالحليب سالفه ثانيه ..وتلقى كلن في عالمه .. الرجال سواليف ولعب ورق وضومنه وشيش

.. والحريم سوالف وضحك وهبال واونو

..والمبزره من جبل لجبل وقوة تصييد ذيك الحشره السودا اللي يقالها ام اربع واربعين

وشوي لعب كوره .. ثمن يجي دور الرجال يذبحون الخرفان وهاتك سلخ وتقطيع وتغسيل .. وكلن له وظيفته ..بس مدري ليه دايم كان تقطيع البصل والطماط علي انا

.. طبعا الحريم وظيفتهم السوالف والقرقه بس

.. وبعد الذبح والتقطيع يبدون الرجاجيل الطبخ وعلى حسب المزاج يوم مقلقل ويوم كبسه ويوم شوي

..

وماتجي صلاة العصر الا والجميع شبعان ولله الحمد.. بس مايمنع اني انا والشباب اللي بعمري علينا انواع الاوامر التعسفيه ..يعني حنا اللي نقطع البصل والطماطم وحنا بعد اللي نغسل القدور والمواعين

.. وخبركم العصريه في الصيف طويله ويكون فيها الجو احلى مايكون .. عاد خذوا لعب كوره ساعه ساعتين والجميل ان الجميع يلعب الصغير والكبير وانواع الحماس والتحديات ..وقبل المغرب بنص ساعه لاجات تظلم كلن يلم اغراضه ويحطها بسيارته ونصلي المغرب جماعه ونحرك ..اذكر ماتمر خمس دقايق الا وكل اللي بالسياره نايمين ماعدا اللي يسوقون

..

ويالله نوصل وكل واحد ينزل اغراضه وياخذ دش سريع الا هو مرمي بالسرير من التعب .. ومن بكره ينعاد نفس السيناريو..الله يسقي ذيك الايام بالخير لها طعم جميل في كل شي حتى النوم يصير متعه ثانيه

,,

والباقي من الاجازه يروح مابين جمعات بالرياض وطلعات للبر وان تبطرنا طلعونا اهالينا لملاهي الروضه

.. ياني اعز هالملاهي بشكل مو طبيعي بالرغم اني خواف درجه اولى

ومافيه شي يخوفني اكثر من الملاهي الا الابره

..<<ياعيني على البراءه

.. لكن فيها ذكريات كانت اول ايام الصياعه

..

اذكر مره مع ولد عمي الوحيد اللي اكبر مني بخمس سنوات(خلص الطب بسعود والحين بكندا يحضر الزماله;) ) كنت اخاف من لعبة السفينه وهو الا يبي يركبني اياها

..اذكر كنت بخامس ابتدائي بالاماريه كان راشد الماجد منزل شريط شرطان الذهب اللي فيه اغنية القمره

.. الزبده ان كانت السفينه مقسومه نصين .. نص للشباب ونص للبنات

.. طبعا اللعبه اذا نزلت من جهه طلعت الجهه الثانيه فوق .. كان الشباب اذا نزلوا تحت يغنون ( اما هي تنزله) والبنات يغنون وهم فوق (ولا هو لها يطلع)

.. وهكذا دواليك .. من يومها وانا اقدر هذيك اللعبه

,,

وفي يوم اخر فظيع جدا حصلت فيه عدة مواقف بنفس الملاهي

.. كنا اربعه انا وعيال خوالي .. انس ومازن وعمار .. اكبرنا بسادس ابتدائي واصغرنا برابع ..طبعا بحكم انا اهالينا محافظين وكلنا بالتحفيظ ومحد بالبيت يسمع اغاني ..كان سماع اغنيه يعد جريمه يستحق عليها عقاب شديد

.. في ذاك اليوم كنت انا وانس في بيت جدي وعارفين ان المغرب بنطلع ملاهي الروضه

.. وكنا الاربعه ناوين نخربها

..فخطرت في بالي اني ازرف المسجل الصغير حق خالتي .. وانس راح البقاله وزرف بطاريات من الهندي

..وانا استعرت شريط اغاني من ولد جيراننا

وما كان عنده الا شريط اغاني المنتخب

.. اذكر فيها هوه ياشبك من شربكك منهو اللي هزك وحركك

..
بالفعل دسينا المسجل تحت الملابس وركبنا بجيب خالي ورا بالحوض حتى محد يصيدنا

..وقابلنا مازن وعمار وحنا نزاعط ومافيه احد قدنا

.. المسجل كان مايخرج من يدي وسماعه باذني والثانيه تلف عليهم بالدور

.. وحنا ماشين فجاه يتعرضون لنا مجموعة بنات غالبيتهم اكبر مننا

..قالوا ممكن المسجل خمسه دقايق ..قلنا لا لا .. لكنهم اصروا بشده وقالوا خمس دقايق بس ونعطيكم اللي تبونه

.. الدلوخ اللي معي قاموا يتلفتون .. مازن وعمار قالوا للبنات والله المسجل حقهم .. علي انا وانس

.. انس عطاني السماعه الثانيه ويقولهم له المسجل (جحدوني الخونه

) وصرت اناظر البنات وانا متوهق .. التفت الشباب حاطين رجولهم وانحاشوا والله واطق النحشه معهم

..اخخخخخخخخ لو يرجع ذاك اليوم بس

..

وفي نفس ذاك اليوم..كنا بنلعب اخر لعبه علشان بنمشي خلاص .. قررنا ندخل لعبة المرايات ..هذيك اللعبه اللي كلها ابواب قزار بعضها تفتح وبعضها لا ..مثل المتاهه تدخل من جهه وتخرج من جهه ثانيه

.. والله ودخلنا ووناسه انواع التضييع والتصقيع بالقزاز

.. ومافيه الا ضحك

.. لكن تاخرنا وخفنا ان اهالينا يمشون او ناخرهم وناكل تهزيء

..وانقلب الضحك الى خوف .. صرنا نبي نطلع باي طريقه بس

..والمشكله ان انس كان يبي الحمام وقرر انه يطلع قبلنا ومشى بلحاله وثلاثتنا الباقيين مع بعض.. المهم بعد جهد شاق قربنا من بوابة الخروج .. كان انس واقف قدام الباب من برا .. وحنا من الفرحه قمنا نجري صوب الباب

.. كان الباب الاخير ماينفتح مباشره لكن اللي جنبه هو المخرج.. طبعا ثلاثتنا مازن بعدين انا بعدين عمار نشوف انس قدامنا وخارجين جري.. وعينك ماتشوف الا النور ثلاثتنا تلصقنا بالقزاز

..واذكر انس من كثر الضحك علينا سواها بنفسه

..مسكين الى يومه وهذي عيارته

,,

وإبتعاداً عن دلاخة البزوره وبلاويهم اللي ماسلم منها احد

.. خلونا نتجاوزهم و نوسع مداركنا ونسمو بأفكارنا <<< ماهقينا منك توسع وسمو بس انجز علينا تكفى

..

المرحله الثانيه..

مرحلة المتوسطه او مرحلة العالم الثاني .. ما ادري ليه اشوف هالفتره ممله بالرغم انها تمثل رغبة كثيرين .. هالفتره بدينا فيها نسافر خارج الديره وبلحالنا .. امكن السبب اني افتقدت جو الجمعات والطلعات:sad: .. ثلاث صيفيات وثلاث سفرات لمصر وتركيا والشام .. جو هالطلعات ينفع للعائلات البيتوتيه وانا من يومي سربوت

وما يناسبني الوضع

.. بالرغم انها كانت جميله وفيها حضارات مختلفه وناس غير واهلي كلهم مستانسين وانا اقلهم وناسه.. من المميزات انك تشوف ناس ثانيه وتفكير مختلف وطبيعه خلابه واثار ومتاحف جميله واسواق وبازارات فريده من نوعها .. اما السلبيات كثيره ..

اولها اننا نروح بثلاث شناط نرجع بعشره

.. لعنبوا داركم ياالحريم مشافيح

..عمركم ماشفت اسواق وخلاقين ..المشكله ان تلقى نفس الاشياء موجوده بالديره بس لا لازم من برا ولازم من الاستعراض والفشخره على خلق الله

..وان عارضتهم قالوا انت جاي تمشينا ولا جاي تحبسنا

..صدق حريم ناقصات عقل<<خربها

.. وعلى الطاري نفسي اشوف شنطة وحده سعوديه مهو مفروط سحابها

.. تشوف الشنطه وكانها حامل في الشهر التاسع

..

ومن السلبيات انك اذا رحت دوله عربيه تلقى السعوديين بوجهك بكل مكان

.. الوجيه هي نفس الوجيه بس الفرق برا تشوفهم رسميين وقمة في الاتيكيت والذرابه اما اذا صاروا بالديره تعالوا شوفوا البلاوي

.. يعني اتحدى اي واحد يروح مع عايلته لدوله عربيه يبي يسهر في مكان بيلقاه كلهم خليجين حتى الفنادق تلقى فيها نفس الوجيه

..حتى الطياره بتلقى فيها بعض الوجيه

.. على الطاري السنه الماضيه يحكوني الشباب اللي طلعوا مصر يقولون تطوروا السعوديين هناك وتشوف كل واحد شايل علم صغير مكتوب عليه i love saudi arabia

.. الله يرجهم وش بقوا للهنود والاندنوسيين

..

عموما هالنوع يمثل غالب حال الاسره السعوديه في الوقت الحاضر .. وللاسف الدعوه صرت فشخره واستعراض مو وناسه ومتعه وفايده .. ونتيجة هالسفر ارهاق مادي ومعنوي

.. والمضحك المبكي انك تحتاج اجازه عقب هالاجازه

تستريح فيها

,,

المرحله الثالثه ..

مرحلة العزوبيه او النضوج

.. بدت معي هالمرحله من عقب ثالث متوسط

.. خربها الوالد الله يحفظه وارسلني بريطانيا شهرين اخذ لغه

.. بس خلوني ساكت لو مو ابوي كان تكلمت:p .. عمركم شفتوا واحد يرسل ولده عمره 15 سنه لديره غريبه بلحاله

.. بس يحمد ربه ان ولده عاقل وناضج وقد المسئوليه

.. تقدرون تقولون اني دخلت حياه جديده .. كل شي فيها تغير .. الله يذكرها بالخير ماما ماريا

.. هذي المسئوله عني عند العايله اللي سكنت عندهم ونعم العائله والله

.. كانت تجربه الاجمل بحياتي ولها تاثيرات كبيره انعكست علي حاليا

.. تجربه مثيره بكل معانيها وفيها مواقف لو بتكلم عنها مايكفيني فيها مجلد

..

وتلت هالصيفيه سفرات كثيره انا وولد خالي لبلدان كثيره اقربها بيروت(آآآآآآه يا بيروت..ما الحب الا للحبيب الاول

) وابعدها قبرص

..وتخللت هالرحلات سلبيات وايجابيات كثيره ..

الدول الغربيه كانت السفرات لها جميله ولها قيمه وفوائد كثيره جدا .. بصراحه اللي يبي يستمتع ويشوف دنيا ثانيه وتكون سفره بمعناها الحقيقي نصيحه يروح لدوله غربيه خصوصا اذا توفق بمرشد سياحي ممتاز

..يعني بيكون معك كل يوم جدول معين محدد وفعاليات مختلفه من اماكن سياحيه ومناظر طبيعيه ومتاحف واثار ورحلات بحريه ومطاعم مختلفه .. بصراحه انا اقدر اللي يسافرون لهالغرض ومن ربعنا يعتبرون قله

..

اما السفر للدول العربيه دي حكايه تانيه خالص

.. وبصراحه اغلبها سلبيات ان ما كانت كلها

.. والمشكله الكبرى في شبابنا وبناتنا هم اللي يساعدون اخواننا العرب يستغلونا بكل سهوله

..

نبدا بالشباب

.. اللي تلقى كل همهم يمشون ورا الخليجيات ويتحرشون فيهم

.. يعني الله يعين البنيات ما افتكوا منهم هنا لاحقوهم هناك بس بعد هم يستاهلون;) ..والمعروف ان المتعه في السفر تكون من الصباح الى اخر اليوم الا ربعنا السعوديين سهر طول الليل ونوم طول الصباح

..بس معذورين اذا هنا بالسعوديه مافيه الا فراره بالشوارع وقزقزه

ماينامون الا الفجر شلون لاصاروا برا

.. المشكله ان السياحه عند الشباب ماتبدا الا بعد نص الليل

.. بالله عليكم وش بيضفهم غير المقاهي والبارات و..

..بس الحق يقال ان هالكلام ماينطبق على الجميع ونستثني فئه قليله جدا ..

اما بناتنا ادهى وامر

.. من اول ماتركب الطياره تتغير الملامح

.. صحيح انهم خففوا من ملابسهم والزحمه واكتفوا بالجينزات لكنهم يعوضون هالتخفيف باطنان من الماكياج

.. يعني تجيك الوحده لابسه ذاك الجينز الي مادخل الا بفازلين وهالبدي الي مظهر أكثر مما هو مخفي وهالشعرالي يهفهف وهالعطور وهالمكياج يعني لو حاضره عرس ماتزينت كذا وماشيه وتقول لا أحد يكلمني !! لا معليش

لو اني بنت كان خقيت فما بالك بهالضعوف الملحطين

..

على طاري الشباب ..ابي اعرف ليه النظره للشاب السعودي بالخارج كان فيه جرب او عنقز

.. والله شي غريب اذا شافوا سعودي يناظرون فيه ذيك النظرات اللي تحقر كانه يهودي:sad: وتلقى ان جاهم واحد خليجي ولا عربي يبتسمون له ويتميلحون عنده;) .. يعني هذول ماعندهم شهوه ومنزهين من الغلط!! والا بس الشباب السعودي هم الغلط اللي راكبهم من ساسهم لراسهم!!!
يعني والله لاصارت مشكله او اي شي لاقدر الله والله مابينفعهم الا السعودي في هالحالات بيعدهم مثل اهله بالضبط!!!
ياناس السعودي مثل غيره من الشباب ان لقى تجاوب من البنت بيجيها وان ماعطته وجه بيسحب عليها عقب مايستبثر عليها شوي

,,

نرجع للبنات وبلاويهم

.. صحيح ان هالنوعيه من البنات اقل من الشباب بكثير بس تاثيرهم واضح .. ومن النادر جدا تلقى وحده من البنيات في دوله عربيه ماشيه بدون ماكياج .. والغريب هنا اذا جيت تبي تخرج تفطر الصبحيه وتسمع ام زياد تغني حبيتك تانسيت النوم

والجو رايق تلقى السعوديات كيلو ماكياج على وجيههم تقول كانهم حاظرين حفله لرابح صقر

.. لعنبوا داركم شلون تتحملون تحطون هالخمبقه على وجيهكم من صباح رب العالمين

.. هذا يهون لو صارت الدعوه بدوله عربيه لكن البلا في اللي تلقاهم بدول غربيه وفل ميك اب

..اموت واعرف بس لمين يتمكيجون

,,

احس بقلبي كلام واجد يقرقع بس بكتفي بهذا القدر .. ادري اني ابثرتكم معي

واعذروني على الخربطه والبربسه بس ان شاء الله تستفيدون<< امحق فايده

..

لكن زبدة الهرج..الاجازه الصيفيه من حقكم للراحه والاستجمام والسفر مانختلف! لكن الواحد يحرص على الاستجمام والتمتع اللائق في اطار معين لان كل واحد منا يمثل بلدنا ويعكس صورتها للعالم الخارجي

,,

خطمه سريعه .. كل واحد يقضب كتابه واذا يبي يعلق على الموضوع ياجله بعد الاختبارات ..اساسا مانيب معطي احد وجه قبل الاجازه

..

[قفله]

الله يوفق جميع الطلبه والطالبات في اختباراتهم ويفتحها عليهم ويسهل امورهم وبالتوفيق للجميع,,