نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

سندريلا الهلال · #14 29/05/2006, 05:34 AM

بسم الله الرحمن الرحيم

من أسباب رسوب عدد من الطلاب والطالبات هو موضوع هلالي الظهران

أصلاً الواحد في الاختبارات يحلى عنده أي شي حتى الاخبار يناظرها ومستحيل مايشوف كراني وهو يقول درجة الحراره من شد ماوده الواحد يروح يذاكر

أما روحة أبها هذي لها طعم ونكهه ثانيه يازين الطلعات الجماعيه ياحلوها خصوصا ان الرجال هم اللي يطبخون وحنا اللي نتدلع خانس مالح الرز لا ونتأمر بعد الي يبي رز معبوط واللي يبي منتثر ايه وش زودهم يتدلعون علينا حنا بعد نبي نطلب

أما روحة الملاهي يازين ملاهي الروضه الشلال من ندخل الين نطلع وحنا فيه عاد البطله هي اللي تركب في أول القارب عشان الروعه تصير فيها الله من الغباء كلكم في القارب مار هي مايجيها مويه حنا اللي نمتلي

ملاهي الخيمه هي اللي عذاب من ندخل الين نطلع كم لعبتوا حللوا ساعتكم هاللي بخمس وثلاثين وناااسه ندخل بالاعلان اللي قاصينه من الجريده والساعه بخمس وثلاثين والوجبه ب15 ريال يعني خمسين ريال ترفيه مميز

أما عن البنات اللي يتخلون عن حجابهم ويسوون ميك أب كامل هذي الله يصلحها ماعرفت تطور تحسب التطور والتمدن اذا شافوها ماعليها عباة والله والله ان العباة أزين وأجمل وأحلى وأنتي رايحه هناك المفروض تكونين سفيره بحاجبتس مو مكييياج تقل رايحتن حفله تنكريه قسم بالله ان الواحد ينقهر بس عاد الشكوى لله مابيدنا نربي المجتمع

بعدين تقول يجيبون معهم عشر شناط !!

السفره مره بالسنه منحب نتردد حنا الشي اللي يجوز لنا نبي نشتريه والتسوق ترى متعه عاد وشلون اذا صار شي مهب متوفر عندك عسى ما نشتري أكل بس ونجيبه

أجل انا اذا بغيت اسافر اشتري شنطه قماش عشان احط فيها اللي ابي ماتمتلي بسرعه تاخذ كل شي

اصلا ما اخذ معي ملابس ولا اغراض كثيره كله عشان اللي ابشتريه وحده تفكيرها لبعيد

والله يعطيك العافيه على موضوعك اللي بصراحه استرجعنا معه سيناريو المراحل كلها وانا عندي قناعه ان اغلب السعوديين مروا بهالمراحل خصوصا اهل نجد

وبالتوفيق للطلاب والطالبات الله يسهل عليهم ويوفقهم يارب