مجلة طريق الإقلاع .. > العدد الرابع < .. - نادي الهلال السعودي - شبكة الزعيم

مجلة طريق الإقلاع · #1 01/04/2006, 05:03 AM

عدنا اليكم من جديد .. لنبحث عن مايرضيكم ويجوز على رضاكم ..
في عددنا بحثنا عن التجديد .. والفائدة .. والطريف ، لتنالوا منها مايرضيكم ويسعدكم ..
كما نأمل باننا في عددنا هذا الرابع ان يكون لنا حضوراً في قلوبكم وتواصلاً معكم ..

هلالي الظهران وهيفاء وهبي في دويتو على مسرح ستار اكاديمي

[مدخل]

بسم الله الرحمن الرحيم

لو سمحتوا بدون احراجات ورسميات .. قهوتكم مشروبه.. لحد يوقف ويسلم .. مقامكم عزيز كل ابوكم..

وجع !! اخلصوا علي واسمعوا مني, اثابني الله واياكم

,,

[مقدمه]

في ذات مساء جميل وبينما أخوكم يغط في قيلولته فاذا بي انقز فازعا ومستبشرا من نومي في آآن واحد:p ..
فاذا بصوت اخي الرخيم .. كسبت المليون هالمره ولا سحبوا عليك

!!!

[لمحه عن ابطال المغامره

]

محدثكم هلالي الظهران وفي رواية مخاوي ابليس

.. شاب .. سعودي.. على قدر كبير من الحياء .. طموح ويحلم بالثراء والشهره .. يقدر السهر وحياة العزوبية .. حياتي اليوميه لا تخرج عن ثلاث امور..

اولها المذاكره والتحصيل العلمي

( يا نِجر اعقل ولا تعطي القراء الافاضل من الكبير

) .. وثانيها السهر في الاستراحة مع الشباب وممارسة البلوت والبلاي ستيشن

.. والامر الثالث هو مراسلة كل قناه تعلن عن مسابقات او رسائل sms

اواهداءات ,,

نِجر .. هذا اسم ابليس اللي مخاويه او هو اللي مخاويني .. ماعلينا المهم انه مستشاري وصديقي الصدوق

وائل .. شقيقي واخي الوحيد ..شاب رومانسي من الدرجه الاولى .. حياته كلها شعر وخواطر .. يحبني ويقدرني لابعد الحدود ولا يرفض لي طلب .. مع اني دايما اهزئه واحوس مندوبه ..
يقلع ابو ابليسه ودي يوم واحد بس انام بدون مايفتح النور لان ماتجيه الخواطر في راسه الا وقت نومي بس ابشركم بعد العلقه الاخيره صار يستخدم لمبة الجوال

..
امكن انا متعقد من وائل لان بابا وماما الله يسامحهم دايم يفرقون بيننا

.. تخيلوا يسمونه وائل وانا مدحت

..تخيلوا سيارتي كورولا وهو باسات

..

من منبري هذا اطالب الاباء والامهات بتربية ابنائهم كويس واحفظوا كوتاب الله وبلاش ترزز ورا الكاميرات

<< انثبر لا تجيب العيد

,,

الشخصيه القادمه هو .. سعيد ولد جيراننا .. انسان ما يحمل من هالكلمه الا اسمها

.. بالرغم اننا في عمر واحد بس انا قربت اتخرج من الجامعه وهو عاده بثاني متوسط

.. عربجي .. مهجد عيال المتوسطه .. مفحط درجه اولى ومايركب الا عيال المتوسطه

.. يقدر الكامري بجنون .. بالمناسبه هو نصاب درجه اولى

,,

الشخصيه الاخيره .. المحشش خوي سعيد .. هذا كل اللي اعرفه عنه .. محشش 24 ساعه على 24 ساعه ويقولون هواه خليجي

..واذكر مره سعيد يناديه صفوق مدري هو اسمه ولا يقصد مصفوق :p ,,

[تفاصيل الرحله]

بعد ما فزيت من نومي وجاني صوت اخوي الرخيم ..فزت بالمليون ولا سحبوا عليك!!!
قمت اصرخ وانقز على السرير والفرحه ماهيب شايلتني ..

اخوي يقول بلا مبالاه .. هاه جورج قرداحي عطاك المليون !!

مسكين وائل كل يوم يشوف هالسيناريو لان هالحلم يتكرر معي كل يوم:p .. لكن اليوم غير .. ايه اليوم غير عن كل يوم!!!

اليوم حلمت بشي جديد .. حلمت اليوم اني في الاكاديميه مع الطلاب والطالبات وبالادق كنا في حصة ميشيل

.. ايه انا مخاوي نِجر في ستار اكاديمي .. ليه لأ!!!!

في ذاك اليوم .. مارحت للجامعه ولا ذاكرت وطول وقتي وانا سرحان وهيمان بستار اكاديمي .. حتى يوم رحت الاستراحه بالليل لا لعبت بلوت ولا بلاي ستيشن بالرغم من استفزازات الشباب لي خصوصا اني رقم واحد بهاللعبتين

..الشباب يسولفون معي وانا لاهي عنهم .. فجاه قطع تفكيري واحد من الشباب يقول .. شفتوا كاتيا وش سوت اليوم بستار اكاديمي..

نقزت من مكاني ورحت جلست عند الشباب واسمع سوالفهم عن ستار اكاديمي .. وسالفه تجر سالفه ..الى ان زل لسان واحد من الشباب وارتكب اكبر غلطه شهدتها تاريخ الاستراحه وقال مواعيد التقديم للاشتراك في البرنامج

..

هو قالها ولا ما قالها .. وانا اقوم واصارخ ومن الفرحه خميته بقوه وما ادري وش صار عقبها

..ما بقت علبة ببسي ولا بيالة شاهي الا انكبت ومابقت جمره على راس معسل

..وبعد ماحست الدنيا سيده على بيتنا ..

قبل لا ادخل لقيت ولد جيراننا سعيد عند الباب .. قلتله ابسافر لبنان اقدم على ستار اكاديمي .. قال عندهم بزران

.. قلت لا .. قال .. شف غيري

,,

طلعت لوائل على طول .. قلتله اللي براسي .. قال انت من جدك ولا تستهبل!!!
قلتله.. ماعمري كنت جاد في حياتي مثل هاللحظه!!!
قال .. اذا ودك بهالشي قدااااااام;) .. يا حبيله وائل قلتلكم مايردلي طلب

..

انا قمت ارتب اغراضي وشناطي ..وفكرت اني اخرج اشتري عود عراقي حتى اتعلم عليه ومره وحده اشتري جيتار تعرفون لزوم الكشخه

..قلت لوائل تبي شي من برا ..
قالي لحظه انت ماتترك الطفاقه عنك:p .. قال يا أخي لو قبلوك الحين انا شلون ارجع للسعوديه لوحدي ؟!
لازم يكون معنا واحد ثالث..

انا قلت مالنا الا سعيد ولازم اقنعه ..

رجعت لسعيد مره ثانيه وحاولت معه بس معيي .. يقول ما اقدر افارق عيال المتوسطه

.. بديت اقردن فيه..اقوله ترا عيال لبنان احلى وانظف ..يقول لازم نشجع السياحه الداخليه

وعيال ديرتنا اولى

.. قلتله طيب لا رجعنا بستاجرلك كامري اسبوع

.. بدا يفكر بس ما وافق .. قلتله ابخليك تصير مشهور وتطلع بالتلفزيون وكل عيال السعوديه يعرفونك

.. وافق على مضض بس شرط علي انه ياخذ خويه المحشش معنا

.. قتلتله لا مايصير .. قال اجل مانيب رايح

.. قلت لاصار لك عند الكلب شي قوله يا عمي .. قام الاهبل يضحك يحسب اني قايل نكته :p ,,

حددنا موعد السفر وحجزنا على بيروت وقطعنا التذاكر وطلبت من سعيد وخويه يجهزون اغراضهم وحاجياتهم كلها .. وانا وائل جهزنا شناطنا وشرينا العود والجيتار

..

جاء اليوم الموعود يوم السفر الى بيروت .. مرينا انا ووئل على سعيد وخويه .. كان وائل يسوق السياره ..لكن المحشش عيا يركب السياره الا اذا هو اللي يسوق

.. قلت سعيد من اولها كذا ..قال لا هو يحب دائما يكون القائد بكل شي وكل اللي عليكم تسوونه انكم تعطونه جوه

..

أكدت عليهم قبل لا نمشي .. كل واحد ماخذ جوازه وفلوسه واغراضه .. كلهم قالوا ايه ما عدا المحشش يقول ابي امر الصراف :p .. قلنا طيب .. مشينا للصراف .. دخل البطاقه واخذ الفلوس والايصال ووقف ينتظر ما مشى

.. قلنا له حرك .. قال لحظه مانزلوا المغاط

..

وصلنا للتفتيش اللي عند المطار .. اشرله الشرطي بيده علشان يوقف ..وقف وفتح الدريشه .. الشرطي يساله وين هـــويتــك ؟

قاله .. كرة القدم والقراءه

..

من حسن حظنا اني جالس جنبه وبيدي الجوازات .. نقزت من مكاني وعطيتها للشرطي وفكنا ربي من وهقه من تحت راس المحشش,,

دخلنا صالة المطار وراح وائل يقطع البوردينق وحنا ننتظره .. تاخر وائل

.. رحت اشوف وش سالفته.. لقيته جالس ويكتب بيتين شعر يتغزل بعيون السريلانكية شغالة العايله اللي جنبنا:p ..قطعنا البوردينق ورجعنا لسعيد وخويه .. لقيت سعيد يلعب باصره مع واحد من الاطفال وخويه المحشش هو الحكم والتحدي عن شيبس ليز

..

جا وقت الصعود الطائره وانا ادعي من ربي يسهل هالسفره مع النكبات اللي معي

.. طلعنا الطياره وتهاوش سعيد وخويه من يركب جنب الدريشه.. قلت لسعيد هماك تقول هو يحب يكون القائد و لازم نعطيه جوه

..

أقلعت الطائره بسلام واستقرت على ارتفاع 32 الف قدم ..جابوا لنا الوجبه ومسحوا الشباب الصحون .. لحاله سعيد اكل ثلاث وجبات:p .. رحت دورة المياه--الله يكرمكم- اغسل يديني.. رجعت لقيت سعيد وخويه فكوا اوتار العوود ينظفون فيها اسنانهم

.. ووائل في عالم ثاني جالس يكتب خاطره في المضيفه:p ,,

حسبي الله عليكم .. خلاص مابي شي بس رجعوني السعوديه.. انا الغلطان اللي اطلع مع هالاشكال

.. على صراخي جات مضيفه لبنانيه وتسال اذا فيها شي مضايقنا وتطلب مننا الهدوء.. انا واللي معي في لحظة فهاوه وكأن على رؤسنا الطير (

<< تمعنوا في هذا وبتعرفون)..

صفوق يقول هذي شمس ولا قمر

.. اول مره يقول شي مفيد

.. وائل من كثر ماخق معها شقق كل الخواطر اللي كتبها من طلعنا للمطار

..

المضيفه تناظر فينا وهي مخبيه الضحكه تقول..شوو المشكله؟!

رديت انا .. هاه ايش مشكله مين انا حنا لا ...

راحت المضيفه ولا واحد نطق :p ..اما سعيد اللي يكره جنس الحريم يقول لي تعرف الحب من اول نظره

..قلت اسمعها في المسلسلات.. قال حبيتها من اول نظره

..

الشباب هدا وضعهم وبدا يغلبهم النعاس.. قلت فرصه انا انام شوي بعد لان وراي مجهود واذا صرت بالاكاديميه ما يخلونا ننام زين:p ..

صحيت على صراخ المحشش صفوق وهو يقول.. مو بشغلي ابسووق الطياره

.. طالعت في سعيد والتفت علي بخبث وقال .. هو يحب يكون القائد ولازم نعطيه جوه

.. طيب والحل؟

قال دبر عمرك وتوسط للطيار انه يسوق:p ..وبعد محاولات عده اقنعناه ان اللي يسوق الطياره جهاز الي وتقدر تتحكم فيها بالريموت اللي عندك في جنب المقعد

واخيرا عطيناه جوه

..

اما سعيد امتحن المضيفه اللبنانيه كل شوي ضاغط ازرار طلب المضيفه .. مره يقول ابي ماء ومره ابي مخده ومره يقولها ابيك تبعدين فتحة المكيف عني لاني بردان ( حشا جاريه ذي مهيب مضيفه

) ومن زود شفاحته جالس على الكرسي القريب من الممر وحاط كوعه وكل ما مرت صقعت فيه

..

المهم .. اعلن الطيار اننا على وشك الهبوط وكل واحد ينثبر مكانه ..فاجانا صفوق بسؤال يمتزج بالغباء والبراءه.. وراهم ما اعلنوا عن مكان الميقات ؟!:p

الفاهي ما ركب طياره الا مرتين من الرياض الى جده ويحسب الميقات محطه نعبي فيها بنزين

..

وصلنا بسلامة الله وحفظه الى مطار بيروت الدولي والساعه تشير الى الثامنه مساء..دخلنا صالة المطار والى عالم اخر .. سعيد يعلق بانبهار..وين حنا في الجنه يالله من فضلك

..

قررنا نصلي المغرب والعشاء جمع لانه فات وقت المغرب وحنا بالطياره .. سالنا عن مكان المسجد قالوا مافيه .. طيب مصلى قالوا بعد مافيه

..بالصدفه شافونا مجموعة خليجين وحنا نسال..قالوا تعالوا فيه مكان صغير في زاويه ضيقه عند المصعد فيها سجاده نصلي هناك..

توجهنا للمكان المطلوب باستثناء صفوق اللي راح يتوضا

..وبحكم ان المكان ضيق ومايوسع الا لصف واحد ومننا مجموعه لا بأس بها اتفقنا على اننا نثبت باب المصد بشنطه ونخلي الامام يصلي داخل المصعد ومره وحده يصير له محراب

..

بالفعل تقدمنا وائل علشان يصلي فينا بحكم انه رومانسي وصوته حلو

.. اقمنا صلاة المغرب وقضينا منها ثمن اقمنا لصلاة العشاء .. كّبر وائل وصلى الى ان سجد في الركعه الثانيه .. مرت دقيقه وحنا ساجدين ومرت الدقيقه الثانيه ووائل ما كّبر

..وحنا ساجدين اسمع صوت ادمي يضحك

..وبعد لحظات نفس الصوت يقول .. تلعبون طش انتم وين امامكم

.. الصوت كان صوت صفوق المحشش وبحركة نذاله منه شال الشنطه من على باب المصعد

.. انا ما زلت ساجد واسمع ضحك الربع اللي يصلون معنا .. رفعت راسي والقى باب المصعد مقفل ووائل مو موجود

..بعدها بلحظات يفتح باب المصعد والامام وائل منسدح على ظهره من كثر الضحك

..

بعد نصف ساعه من الضحك صلى كل واحد صلاة العشاء بلحاله

..

المهم .. خرجنا من المطار وتوجهنا الى احد الفنادق .. اخذنا غرفتين وحطينا اغراضنا وعينا من الله خير وقررنا نطلع نتمشى شوي ونتعشى ونرجع بدري علشان بكره ورانا صحوه من بدري علشان التقديم للاكاديميه(حشا والله لو انه اختبار قبول في الجامعه

)..

خرجنا الى مطعم قريب على احد سفاح جبال بيروت الشامخه .. كان الاكل لا يقاوم والجو ولا اروع وصوت الموسيقى الهادئه اللي فجرت الابداع عند وائل .. وحنا منهمكين في الاكل جانا طفل وسيم وبهيئه نظيفه وقال الاتي بالنص ..( عمو ممكن تطعميني من هالاكله الله يرزئك بصبية حلوه )..

اموووت على الناس الذوق والدعوه اللي تفتح النفس مهو بشحاذينا يا حسره

.. وبدون تردد يسحب سعيد كرسي ويجلسه جنبه

..

لا تناظروني ما كنت بوافق بس يستاهل والله على هالدعوه صح ولا لأ؟

..

انتهينا من تناول الطعام .. قمت انا ووائل نتمشى في الجو الخيالي والمناظر الرائعه

..رجعنا للطاوله ولقينا سعيد وصفوق كل واحد في يده علبة بيره ويشرب منها

..

اقولهم وش تسوي انت وياه

.. قالوا شفنا الطاوله اللي جنبنا عندهم علب خضراء وحسبنها سفن وطلبنا من حق البوفيه يجيب لنا مثلها :p :p ..

ما يحتاج اقولكم وش سووا بعد ما بدأ تاثير البيره عليهم لاننا صرنا فيلم كوميدي لكل رواد المطعم

.. سعيد يمسك غطا علبة المويه ويحاول يصكر جيك العصير

.. صفوق يناظر في يده وهي تتحرك ويقولها وقفي يا بنت الكلب

..واحنا على هالحال جانا رجل كبير في السن ومن ملامحه انه سعودي ورجل اعمال محترم يبي ينصح سعيد وصفوق ودار بينهم الحوار التالي ..

الرجل .. يا ابني وشلك وهالبلى اللي تذبح فيه عمرك حتى الحيوانات تفرّق في هالاشياء..انا بسالك سؤال!!

سعيد ببجاحه .. اخلص علينا

.

الرجل..الحين لو حطينا سطل مويه وسطل خمر قدام الحمار- الله يكرمكم- وش يشرب؟!

سعيد .. اكيد المويه!

الرجل بفرح .. طيب تدري ليه؟

سعيد..لانه حمار يا أخي

..

ههههههههههههههههههههههههههههه الله يرجك يا سعيد فضحتنا

,,

المهم .. رجعنا للفندق واتجهنا لغرفنا وكانت الصدمه !!!
اغراضنا كلها مسروقه

.. اخذوا كل شي حتى المنديل المعطر والمجله اللي زرفها صفوق من الطياره سرقوها

..

طيب والحل؟؟!!

كلمنا ادارة الفندق وقالوا مو مسئوليتنا اذا ماحطيتوا شي بصندوق الامانات

.. قررنا ننام والصباح رباح!!!

وفي الصباح .. قمناا وتعبثنا في المكان ندور وش بقى من اغراض ما انسرقت لكن للاسف مالقينا اي شي سوى الجيتار

..

بيني وبينكم انقهرت.. حراميه ما تقدر الفن والفنانين <<< وش عنده بتهوفن:p .. ما يدرون ان هالجيتار لافضل مغني عربي في المستقبل القريب وان سعره بيطق اضعاف سعر المنديل حق ام كلثوم

(حشا والله لو اني رياض السنباطي ولا الدبلي

)..

نزلنا الساعه السابعه نفطر في مطعم الفندق .. تخبرون لازم افطر فطور صحي عندي تقديم الساعه 11

..فطرنا وتوجهنا للوبي .. الشباب جالسين يشربون كوفي وانا سارح وشايل هم الدنيا على راسي

..سعيد يقول وش فيك ؟!!

قلتله ما يكفي ان التقديم اليوم وتجي سالفة سرقة اغراضنا وفلوسنا

..

قال انت شد حيلك في الاولى وخلي الثانيه علي .. قلت شلون؟!!

قال عيب عليك سر المهنه

..

كان معنا في اللوبي ناس كثير مختلفين الاشكال والاجناس والاعمار .. من بينهم شاب سعودي رافع خشمه ومعه خويته اللبنانيه

.. هالسعودي اللي رافع خشمه نادى الجرسون يجيبله الفاتوره .. بالفعل جاب الجرسون الفاتوره وعطاها اياها .. الرجال طلع من جيبه 100 $ دولار وحطها فوق الطاوله مع الفاتوره وقام من على الطاوله ..

في نفس الوقت يقوم سعيد باتجاه طاولة الشاب وياخذ الــ 100$ ويحطها بجيبه كذا عيني عينك

.. ودار بين الشاب وسعيد الحوار التالي ..

الشاب.. خير يابو الشباب تسرقني عيني عينك

..

سعيد بخبث .. مين انا ؟! يا رجال لا تتبللى علي

..<<< صدق ان وجهه مغسول بديتول

الشاب وبجنبه خويته ..اقول رجع فلوسي ولا يكثر

..

سعيد .. طيب اثبت ان الــ 100$ اللي معي لك;) ..

الشاب .. هذي فلوسي وهي لي شلون اثبتها .. طيب اتحداك انت تثبت انها لك;) ..

سعيد بثقه .. لا تتحدى;) ..

الشاب بسخريه .. مابقى الا انت تتحداني;) ..

سعيد واخلاقه بدت تقفل.. بدون حكي فاضي لو اثبت انا الــ 100$دولار لي باخذها وتعطيني مثلها والعكس صحيح

..<<< تهور سعيد الله يستر

..

الشاب بتحدي .. اتفقنا ..يالله هات اي شي يثبت ان الــ 100$ دولار لك؟!

سعيد بثقه يقول.. 10637474

الشاب .. وش تخربط انت؟!!!!

سعيد ايضا بثقه .. هذا الرقم التسلسلي للمية دولار;) ..

سعيد طلع الــ 100$ واذا بالرقم نفسه

ويطلع الشاب مية دولار ثانيه ويعطيها سعيد

ويقوله انتظرني بروح مشوار ساعه وراجعلك

..

مشى الشاب السعودي المخفه

.. انا بسال سعيد نفس السؤال اللي ودكم تسالونه الحين

..

سعيد شلون عرفت الرقم التسلسلي؟!

سعيد.. هذا سر المهنه يبو.. يوم اخذت الفلوس قزيت الرقم بسرعه وحطيتها بجيبي;) .. انت اصبر بس وانا اطلعلك مثل الــ 200$ عشر مرات

..

بعد اقل من ساعه عاد الشاب الى الفندق بس هالمره بلحاله وجاء باتجاه سعيد وجميع انظار من في اللوبي متجهه عليهم.. وكملوا كلامهم كالتالي..

الشاب بتوسل .. يا اخي يرحم والديك رجع فلوسي

..

سعيد.. وين هالكلام اول يومك تزاعط قدام خويتك

..<< من جد لا صارلك عند الكلب شي قوله ياعمي

الشاب .. انا اسف وحقك علي ..

سعيد .. شوف برجعلك الــ 200 دولار اذا فزت بالتحدي الجاي اما اذا انا فزت انت بتعطيني 200$ ثانيه..

الشاب .. بشرط اني اعرف وشهو التحدي قبل؟! <<< ياضعيف

سعيد .. اني اقولك وش لون سروالك الداخلي

..

الشاب .. من جدك انت

لكن دام الدعوه فيها 400$ قابل التحدي

..

سعيد.. اوكي لونه وردي

..

الشاب بانتصار .. لا غلطان لونه ابيض ..

سعيد ..انا متاكد انه وردي

..

الشاب بتحدي .. اقولك لونه ابيض

..

سعيد .. اثبتلي ان لونه ابيض وفسخ بنطلونك وورينا اياه

..

الشاب بتهور ينزل بنطلونه ويقول .. شف لونه ابيض

..

سعيد يلتفت على كل اللي موجودين باللوبي ويقول ..ما قلتلكم انه بيفسخ سرواله

.. لا تتحدوني مره ثانيه يالله كل واحد يطلع الــ 100$ دولار

..

وه منك يا سعيد رجع الفلوس اللي انسرقت منا وبزياده بخشيش في ساعه وحده

.. بيني وبينكم رفع معنوياتي قبل التقديم

,,

خرجت الى محل قريب للفندق علشان اشتري بدله جديده وخذيت معي وائل بحكم انه رومنسي وصوته حلو

( من جد فاهمين الرومانسيه غلط

)..واشتريت احلى بدله مع كرفته حمرا تعجبكم ..رجعنا للفندق وبديت اجهز نفسي للمقابله مع الانسه عفوا اقصد العجوز رولا سعد مديرة الاكاديميه ,,

توجهت للاكاديميه مع مرافقيي الثلاثه .. وصلنا للاكاديميه وكانت عجقه كتير (بلهجتكم زحمه موت <<جحدهم

) .. وكان المكان مليان شباب وصبايا بس غالبيتهم من الشام او المغرب العربي ..

دخلت على رولا في القاعه ومعي الجيتار

.. في البدايه ما عطتني وجه:sad: لكن من عرفت اني سعودي تغير الوضع 180 درجه

.. اعطيتها ملفي وكان في الملف شهادة الثانويه وشهادة حسن سيرة وسلوك و4 صوره شمسيه 4×6 وورقة تخفيض حق الخطوط وملف علاقي اخضر

..

مسكت الملف بطرف اصابعها وكأن فيه جرب

.. بيني وبينكم والكلام للجميع جاتني ام الركب وانا اتنافض

..قالت رولا الله يقصف رقبتها .. هالاشيا كلياتون مهن مطلوبات

..
قلتها وشهو المطلوبين كلياتون ياروح امك

.. قالت بدك الصراحه ولا بن عما

.. قلت لا الصراحه لي وابن عما لسعيد

..

قالت حبيبي اسمع مني .. عندي تنين سعوديين وانت التالت وطبعا لازم نختار واحد منكم .. وواحد من التنين يحرء حريشوو مانفع معنا .. بائي انتا والصبي التاني بس شكلوا فئراني (يعني راعي فقر

) ومو خرج الاكاديميه ..ازا بدك تنئبل معنا انا عندي تلاته شروط..

اول اشي نغير اسمك من مدحت الى مادي

.. والاشي التاني هالجيتار المعفن بدي تحرئو وماشوفوا تاني .. واهم اشي وخلي بيناتنا بدك تدفع ,50,000$ كاش موني

..

قلت الشرط الاول احسن شي وانا ودي بهالشي من زمان والشرط الثاني لعيونك العسليه حاضر وتحت امرك بس ليه الــ 50,000$ دولار

..

قالت شو بدك كل اشي بلاش .. ما احنا راح نعلمك كيف ترئص وكيف تركض وكيف تضحك وكيف تبوس ومن اللي الزي منو

.. قلت طيب وراي 20 مليون واحد بيصوتون لي ويكسبونكم ذهب ..

قالت .. هاالحكي اللي عندي ازا ماعجبك اتكل ئالله .. قلت لا سعيد مايقصر والــ 50,000 اكراميه لعيونك الحلوين

..

قالت .. مبروك عليك مادي ومابدي اوصيك بدياك روش ودمك عسل بدي الجمهور يحبوك ومن بكره جيب خزانة ملابسك وتعال نجهزك للاكاديميه بعد اسبوع

,,

خرجت من عند رولا واحس اني احسن حاجه شي بالعالم ومحدن قدي .. رجعت للشباب وبشرتهم .. وطول اليوم وانا اضبط اموري واخذ كل شي احتاجه .. والشباب جهزوا امورهم علشان يرجعوا للسعوديه ..

ومن بكره وانا في الاكاديميه

.. طبعا اسبوع كامل سمكروني فيه وعلمني كيف امشي وكيف اكل بالشوكه والسكين وكيف اربط حزام الميكرفون اللي ماله مكان

.. علمووني كل حركاتهم السنعه

..

وجا اليوم الموعود .. اول جمعه في الاكاديميه .. مايحتاج اقولكم كيف الربكه واللخبطه وانواع النشاز بس عادي بتصير

.. انتهى البرايم الاول ورجعنا ننام .. الشباب بغرفه والصبايا بغرفه .. ومن بكره بدات الحصص .. وكنت مبدع جدا في حصة الرقص وحصة الرياضه وخصوصا اننا نكون ببجايم النوم

.. وبديت انفذ وصية رولا اني اكون روش .. صرت امزح مع هذي واضحك مع ذيك والعب مع الثانيه وارقص مع الرابعه .. اما الشباب اسوي فيهم مقالب او حركات نذاله ( تدرون هذا تخصصنا يا السعوديين

) طبعا باستثناء شباب لبنان لعيون سعيد وحتى يحبوني الجمهور ويشجعوني

.. ومن يوم ليوم وانا اكسب الصبايا والشباب وطبعا الجمهور السعودي الوفي خلفي

..ورولا ماتقصر معي في البرايمات مايخلوني اغني الا اغنيه او ثنتين بالكثير حتى مايبين صوتي النشاز

..

ويوم ورا يوم البنات يعجبون فيني والشباب يزيد حقدهم .. مع البنات انواع الضحك والرقص والاستهبال ويا ويل اللي يزعلهم خصوصا لجين ورانيا

..

ومره من المرات زعل مصطفى المصري مني وراح اشتكى عند رولا

.. السالفه ان وحده معجبه ارسلت له قطعة قاتوه وحاطها بالثلاجه ومزعجنا فيه .. كل شوي المعجبات والمعجبات .. الين قفلت معي وقررت اني اربيه

.. رحت فتحت الثلاجه واكلت قطعه من الجاتوه ووزعت على الشباب كلهم الا هو

.. الضعيف راح يشتكي علي عند رولا .. يقولها مدام رولا دي الجاتوه بتاعتي وجايتني هديه يئوم هوه ياكلها دا زولم وافترى وربنا مابيحبش الزولم

.. قلتلها مدام رولا بالعقل الحين لو حطيتي ليره في ماكينة الببسي مين ياخذ الببسي

وانا فتحت الثلاجه واكلتها

..<<< يا برررريء

..

عاقبتني رولا بانها حرمتني من العشاء

.. طبعا بما ان البنات في صفي والشباب كسبتهم بعد ماوزعت الجاتوه عليهم اتفقت معهم اننا نسوي في مصطفى مقلب .. جبنا مصطفى وكتفناه وجبت مروحه ونغزتها على رقم واحد وخليتها قدام عيونه

..

من بعدها مصطفى يضربلي سلام لا شافني مع اني ماهضمته ولا مشالي من زور .. وصاروا ينادوني الكينج

..

وفي مره من المرات مصطفى كان يحلق شعره قبل البرايم .. وجاني نِجر يوسوس لي ليه ما تخرب شعره اللي فرحان فيه

.. غافلت الحلاق وقلتله مدام رولا تبيك

.. جيت لمصطفى القاعد على الكرسي وكان الحلاق في نص حلاقته .. قلتله مصطفى عاوز الحته دي من شعرك .. قال باستهبال لامش عاوزها .. قصيتها بالمقص ورميتها بالزباله

.. مصطفى عيونه طارت

.. قلتله طيب عاوز الحته دي من الناحيه التانيه .. قال اه عاوزها .. قصيتها بالمقص ورميتها له

.. وانحشت طبعا

..

لكن هالمره كانت عقوبتي قاسيه لان رولا حطتني نومنيه

وكله من تحت راس نِجر ..لكن على كثر ما تضايقت قبل البرايم على كثر مافرحت بعد البرايم لاني اكتشفت ان لي شعبيه هائله خصوصا اني فزت وبنتيجه ساحقه جدا

..

ومن بعدها كل يوم تزداد شعبيتي واسهمي عند الجمهور والاساتذه يتفادون يحطوني نومنيه حتى لا تتكرر النتيجه الساحقه .. واصبح مادي محبوب الجماهير

..

الى ان جاء واحد من البرايمات وكالعاده حطولي اغنيه وحده بس

.. لكن هالمره تجرات ومسكت الميكرفون وقلتلهم عندي اغنيه وبؤديها بشكل منفرد.. طبعا رولا والاساتذه تفاجئوا وخافوا من الفضيحه

.. في ذيك اللحظه استجمعت كل قواي وامكاناتي وبديت اغني ..

حمام جانا مسيان ولا سلم عليا ×× على ما مر زعلان على فرقا خويه

وكان المسرح في حالة ذهول .. الاساتذه البوهه طايرتن بهم .. الجمهور مستغرب .. الفرقه ساكنه تماما .. وانا اغني .. وساعدني المشتركين الخليجين في التطبيل والترويس وصحصت الفرقه واخذوا يطبلون على ايقاع صوتي وترويس الشباب .. انتهيت من الاغنيه ..

اطالع الجميع في حالة ذهول .. وفجأه بدا التصفيق وتحول الى دوي هائل ثم ردد الجمهور بصوت واحد..

تاني .. تاني .. تاني .. تاني .. تاني

ماكان مني الا استجبت لطلب الجمهور واعدت غناء الاغنيه لكن هالمره مع الفرقه الموسيقيه وتصفيق الجمهور وحماسهم منقطع النظير

..

بعدها شكرت الجمهور وطلبت منهم المره الجايه كل واحد يجيب شماغ او شال لاني مسويلهم مفاجأه

..

حمام جانا مسيان اصبحت الشغل الشاغل للجميع واكثر اغنيه تردد في الفضائيات .. وما يخفى عليكم ان شعبيتي صارت خرافيه

.. وكانت في مفاجاه ساره لجميع الطلاب ان الفنانه هيفاء وهبي بتشاركنا في البرايم القادم

,,

وجاء البرايم ..والوضع تمام التمام وانا مجهز المفاجأه الجديده للجمهور

ومن حظي ان هيفاء موجوده ..

نزلت هيفاء على خشبة المسرح وطلبت المقدمه مني ومن اللبناني جورج مشاركاتها الغناء .. بدات هيفاء تغني ..

رجب حوش صاحبك عني ×× رجب صاحبك جنني

وانا وجورج نشاركها الغناء والرقص وكان ثقيله الطينه جورج يتلصق فيها الين زهقها فما كان من هيفاء الا ان تحرف الاغنيه وتقول ..

مادي حوش صاحبك عني ×× مادي صاحبك جنني

والجمهور في حالة هيجان وصراخ غير عادي وكلهم بصوت واحد .. مادي مادي مادي

..

انتهت الاغنيه وجا دوري اغني منفرد واقدم الهديه للجمهور .. طلبت من الجمهور كل واحد يطلع الشماغ او الشال ويتلثم فيه .. وكان من بين الجمهور شباب سعوديين خليت الجمهور يقلدهم وبديت اغني ..

ياللاه لالاله ياللاه يا لالاه واللي هجرني وزود الهم فيا وشاب الشعر يا عبيد

×× بيني وبين الموت باقي شويا وشاب الشعر يا عبيد

..

الطلبه اللي معي قاموا يرقصون والاساتذه يصفقون والجمهور متلثم وقوة تصفيق وتنكس وكلهم بصوت واحد .. شاب الشعر ياعبيد

..

تخيلوا اللبنانيات بالجينز والتيشرتات البودي ومتلثمات ويرقصن

.. المسرح اصبح في حالة هيجان غير طبيعيه

.. انتهت الاغنيه وكملنا البرايم الى ان جاءت هيفاء وطلبت منها المقدمه تغني اغنيه من اغنياتها بلحالها ..

لكن المفاجأه ان هيفاء اشرت علي باصبعها من بين كل الشباب وقالت تعال

.. همست في اذني بكلام .. رحت لمايسترو الفرقه وقلتله الاغنيه الجايه وبدا الدق والترويس ..

هيفاء وهبي ومادي يغنون دويتو "حمام جانا مسيان" على مسرح ستار اكاديمي

..
وهيفاء وهبي استنزلت في الرقص على مادي وشكلوا ثنائي رائع مع تشجيع غير مسبوق من الجمهور

..

وقبل لا ينتهي البرايم كانت ادارة الاكاديميه مجهزه لي مفاجاه وهي .. اني اقضي 48 ساعه مع هيفاء وهبي في باريس على حسب طلبها

..

من بعدها دوروا خويكم (سابقا

) هلالي الظهران .. مادي حاليا

..اصبح من المشاهير وما يتكلم الا بحساب ومايمشي الا بحساب وعلشان تكلمه او تقابله تحتاج موعد مسبق بشهر

,,

- تمت -

خطمه سريعه .. حتى مايجيني واحد ماسح الطبلون ويشربك بالبوري ويقول انت فيك ومافيك .. هالقصه كلها خياليه ومجرد توارد خواطر في يوم جمعه ومالها اي علاقه بالواقع

.. ايه نسيت اقولكم اي واحد من الشباب يرد على المجله له هديه وحده من المعجبات

.. اما البنات اي وحده ترد فيهم لها توقيع من مادي

او لسه باقي صفوق المحشش ما انحجز اللي تبيه ترد اول

..

انقشعوا من خلقتي جميعا

,,

يسرنا من خلال هذه الفقرة الخاصة بجديد السيارات ان نعرض اليكم آخر اخبار السيارات الحديثه والتي سوف تكون في الاسواق مع بداية عام 2007 باذن الله ..

انتشر في وقتنا هذا وبشدة مايحدث للشباب من اهتمام زائد لـ اجسامهم وبشرتهم ، بالاضافة الى اننا نرى مع كل يوم تقليدهم للغرب من ناحية الملبس وقصات الشعر .. !

من هذا المنطلق سيكون قضيتنا لهذا العدد عبر هذه القضيه التي نسئل الله ان يحفظ شبابنا منها ..

قمنا بدعوة مجموعة من الاعضاء للمشاركة حول رآيهم تجاه ذلك السلوك الخاطئ .. اليكم ماذا قالوا ..

صالـــح

(( بالنسبة لقضية الإهتمام بالبشرة والشعر .. والله انكم صااادقين قسم بالله ! يعني انا اتمنى ان المرأة ما تسوق السياره بالسعودية .. بس عشان ادري عند الاشارة اللي جنبي جمع مذكر سالم والا جمع مؤنث !! والله يسترررر ان ماكان جمع تكسير

من جدددد الواحد صار مايقدر يفرررق !!!

حنا مانقول .. لا تهتم !!! بالعكس !! لكن للأسف .. بعض الإهتمام ( مخجل ) !!! حتى من ناحية الملبس ..!! صرنا نعكس التيار .. العيال يلبسون لبس البنات بدون ادنى خجل ! والبنات يلبسون لبس العيااال بلا حياااء ..!!

ياخي الله يرحم والديك .. شف نفسك بالمرايه ؟؟؟

<< مو كأنه عصب شوي ؟؟

عزيزي الولد

عزيزتي البنت :

ما نقول " لا " !! بالعكس ... لكن فيه حدود !! البعض للأسف يتجاااوزها بدون " جواااز رسمي " !!!

ختاما ً : ارفقوا

0
0
0

صلوووحكاااا

دبــل كيــك

سـبـحـاااان الـلـه ... انـعـكـسـت الـمـفـااااهـيـم ... وتـبـدلـت الـثـوااابـت ... وتـفـشـت الـمـحـظـورااات ... .

ان جيـنـااا مـن نـاااحيـة ديـنـيـة ... فـهـم مـلـعـووونيــن ... ملـعـووونيــن ...
وان جيـنـااا لنـااااحيـة اجـتـمـاااعيـة ... فـهـي لاااا مـن علـوومـنـااا .. ولااا هـي مـن سلـوومـنـااا ولاعـااادااتـنـااا ولاتـقـاااليـدنـاااا ... عـرف(ن) عـجـيـب(ن) غـريـب ...
وإن بتـلـنـااا صـووب العـقـل ... فلااا واللـه لااا يقـبـلـهـااا مـنـطـق ولاااا عـقـل ... ولااا فـطـرة سـلـيـمـة ...

أسـبـااااب الـخـكـرنـة .. والـتـقـليــد ... كثـيـرة .. ولكـن لـعـل مـن أهمـهـااا عـدم التـمـسـك بـالمـبـاااديء الإسـلااااميــة واتـخـاااذ رسـوولنـااا عليـه أفضـل الـصـلااااة والـتـسـليـم كقـدوة .. أيضـاً انـعـداااام الـثـقـة بالـنـفـس ... وإحـسـاااس بـالـنـقـص ... يـعـنـي تـراااهـم فـاااهـميـن السـااالفـة غلـط ...

واااحــد(ن) لاااطـخ وجـهـه بـكـيـس طـحـيـن (فـاااخـر) .. وواااحـد (محـقـط) الـجـنـز والفـنـيـلـة ... والـلـي (مـنـمص) الـحـواااجـب ... والـلـي يـكـثـر مـن (الشـاااني والفـنـتـو) ... تـمـيـع فـي الـمـشـيـة ... ونـعـوومـة فـي الـهـرج ... ولـيـن فـي الـحـركـااات ... وسـلـهـمـة بالـرمـوووش ...

رجـاااال ... لاااا واللـه الااا يهـبـووون ... مـااا هـنـاااا رجـااال ...أشـبـاااه الـرجـااال ... أنـااا كـنـت أفـكـر بـعـبـااارة (مـاااتـوا الـرجـااال) ... وكـنـت أقـوول مـهـوووب صـحيـح ... مـااا مـاااتـوا ... والـلـي قـااالـهـااا يـمـكـن غلـطـاااان ... بـس للأسـف ... طلـعـت أنـاا الـغـلـطـااان ...

يـاااخـووفـي يـجـي اليـوووم اللـي يصـيـر فيـه مـعـد بـه نـااااقـد .. ولااا مـنـقـووود ...

عـش رجـبـاً ... تـرى خـكـري ..

خـااااتـمـة .. فـيـنـي شـي(ن) يـحـوووم بـتسـبـدي ... ولـو بيـدي ابفضـفـض بـثـمـااان صـفـحـاااات ...

والمـعذريـة عـلـى الـتـأخـيـر ... لإن شـرط الـ8 سـطـوور .. خـلاااانـي أحشـر كـلاااامـي بـدووون مـسـااافـااات .. وبـدوون مـط كـلاااام ...وحـجـم الخـط 1 ... بس بـعـديـن هـونـت قـلـت الربـع بيـعذروونـي ... كلـهـااا طلـبـة وحبـة خشـم ...ولهـذا أتمـنـى استـثـنـااائـي مـن شـرط الـ 8 سـطـور .. وتقـديـر مـط الـحـرووف .. والمسـاافـااات ...

لـكـم مـنـي كـل محبـة وتقـديـر ...

أخـووكــم // دبــل كيــك ...

صدى الامس

الو السلام عليكم .. مجلة طريق الإقلاع ممكن اشارك ؟؟
مجلة طريق الإقلاع : تفضل اخونا صدى الامس اكيد ممكن تشارك والا ليش انت ووجهك متصل علينا !! (( صورة وجه المذيع وهو مقفلة معه ))
احب ارحب فيكم واقول ان اهتمام الشباب في بشرتهم شي حلو ويبشر بالخير لان ملينا وحنا نشوف خشش هالشباب وكلها شقوق وملعوب فيها من عوامل التعرية

يعني زين ان الواحد اذا قام الصبح دهن خشته بكريم تسودها تلين شوي

مع اني انصح بـ استخدام فازلين ضد القشرة يمدحون حتى جابوه مره في برنامج اقوى رجل في العالم

.. ويقولون ان الواحد اذا استخدمه خشته تلق وتلمع من زود الصفاوة ولا صفاوة DVD << واحد توه طايح بالأفلام

..

اهتمام الشباب بالبشرة شي حلو لكن الشئ ان زاد عن حده انقلب ضده .. مهوب معناتها ان الواحد يربص نفسه بـ نيفيا ويغدي تسنه بنت !! لا .. المشكلة مهوب ان الواحد يهتم في بشرته المشكلة اللي نشوفه من بعض الشباب انهم يقلبون بنات من كثر حرصهم

!! الحين ربي خالقهم رجال ما اعجبهم الوضع والا وشلون !!
يعني بالمختصر المفيد ادهن بشرتك مرتين باليوم الصبح اول ما تقوم وقبل ما تنام وقضينا على خير اما انك تقلبها سالفه كل شوي وانت جايب الكريمات ومغير تدهن بعمرك ما يمشي ذا الكلام .. احسن لك البس مريول وداوم بدال اختك في الثانوية 18665

!!

واما سالفة انهم يقلدون الغرب في قصات الشعر واللبس عاد هذا موضوع ثاني بعضهم فاهم انه عشان تكون cool << اقسم بالله اني منب سهل 888

.. لازم تقلد الغرب في كل شئ !! صح قلدهم في الشئ الزين واللي بينفعك مهوب كل ما طقة حصاة عصى رحت تركض وراهم مثل حركات ربعنا إذا سمعوا ان فيه اكتتاب

!! لا خلك ثقل

!!

يؤ صح انتم تقولون ما تبون اكثر من 8 اسطر عاد والله هذا اللي طلع معي عجبكم كان بها ما عجبكم بكيفكم والله من قالكم تسمحون لي اشارك .. الخسارة انا اللي اتحملها لان الظاهر انا اللي متصل عليكم انتم وبرنامجكم هذا

..

فرصه ضايعه

وش خليتوا لنا ؟؟؟؟
شي يهوّل العقل .. مناظر والله عجب .. كنا نتعجب من حركات البنات ولبسهن لعباياتهن في السوق أو غيره والحين ماصاروا يلفتون انتباهنا

... جاء شي أعظم

...

مرة كنت بالسوق وأشوف واحد مشخص بالشماغ وشعره فاله طالع من تحت الشماغ إلى نص ظهره

أطول من شعري والله

وشكله ياليته زين الحمد لله والشكر بس ....

والشي اللي يقهر صدق ذا اللي هابين فيه هالأيام اللي يسمى low west لوا يلوي ابليس .. اللي حد (******)

وشوي ويطيح

... شفت واحد لابسه ودي كل شوي ارفع له بنطلونه

وإلا عاد اللي يفقع المرارة ....هاللي ينتفون حواجبهم ويحطون قلوس ( ملمع )وفاوند ايشن (الأساس) وش بقى لنا ؟؟ الله يعافيهم ولا يبلانا

أنا ماأقول لا تكشخون بس ماله داعي الجنز لازق مررررررررره

( مايقدر يبوبز فيه يخاف ينشق من ضوقه

)

وه بس ... ياحظهم من يلبس الواحد الثوب والشماغ ويسكر الغالوقه يطلع شكله كشخه

....من دون مايتعبون أعمارهم ... الله لا يشقينا;)

لوحة مميزة

بسم الله الرحمن الرحيم ..
والصلاة والسلام على نبينا محمد صلى الله عليه وسلم وعلى آله وصحبه أجمعين

لاشك أن قضية إهتمام الشباب بـ بشرتهم ومحاولة تقليد الغرب من ناحية الملبس وقصات الشعر .. !
قضيه تسبب إزعاج لي
بالنسبة للإهتمام بالنظافه لاشك أنها مطلب
لكن أذهب للشق الثاني من قضيتكم ( ومحاولة تقليد الغرب من ناحية الملبس وقصات الشعر .. ! )
هذه القضية هي التي كما ذكرت تسبب إزعاج لي خاصة أولائك الذين يتزينون بملابس فيها تقليد فاضح وقصات شعر غريبه
مشكلة بعض الناس فاهمين التطور غلط

يعني بعض الناس يحسب إنه إذا لبس بدله بجنز ولبس نظاره شمسيه يحسب أنه خلاص محد قده

عمر التطور ما كان في تقليد الغرب بالملبس أو بالشكل أو حتى بالمظاهر أو حتى بالألفاظ
التطور بالثقافه
والعلم والإطلاع ومحاولة كسب الخبره وأخذ الصالح منهم وترك الطالح
مثلاً هذي عاداتهم وتقاليدهم بجانب ثقافتهم وصناعتهم الخاصه
ليه ناخذ عاداتهم ونترك علمهم وصناعتهم ؟!!؟
هذا اللي أستطيع أكتبه بحدود عدد الأسطر اللي ذكرتوه ولو أني أسترسلت زياده بلا شعور
أعتذر
وصلى الله وسلم ..
تحياتي ..

(ترحيبة الحزن والليل )

(هلا ... يا حزن ...
هلا بالصاحب الطيب ...
ابد ... لو تبعد قريب ...)

هكذا أطلق البدر ترحبيه بالحزن والليل .. وإذا حضر البدر فيجب على الشعر أن يقف احتراما لهذه القامة الشعرية الشاهقة ..

بدر بن عبدالمحسن .. مهندس الكلمة وبدر الشعر يُطل علينا من خلال هذه القصيدة الرائعة .. وهي أحد روائع ذلك المبدع .. فتعالوا بنا نبحر سوياً في هذه القصيدة :

لما يبعد ... في المسا طيف المسافر ..
لما يخفيه الضباب ..
لما يرحل ... بالأمل وبفرح باكر ...
لما ينسا لي عذاب ...
هلا ... يا حزن ...
هلا بالصاحب الطيب ...
ابد ... لو تبعد قريب ...
هقيت إنك مع الفرقا ... تبي تنسى حنينك لي ...
هقيت انك بعد مليت ...
من الماضي عذابك لي ...
عسى ما جرحك فرحي ... عسى يا حزن ...
أنا لو خنت في جرحي ...
وضيعني ... الهنا ليله ...
ترى ما في يدي حيله ...
هقيت إني لمحت النور ...
بيمسح دمعي المبهور .. بمنديله ...
سحرني حلو ترتيله ...
لما يسري في الفضا .. نجم السهاد ...
لما يطفيه السحاب ...
لما يملى عمرنا الماضي السواد ...
تصبح البسمه ... صواب ...
هلا بالليل ..
هلا والله ..
يا ضاوي لو أضمك لي ..
على صدري ... وافني فيك أشواقي ..
أماني ...عمري الباقي ...
هلا بالليل ...
حبيبي كسر الفرحة على صخر الجفا الجاير ...
حبيبي حزنه الزاير لياليا ... يحبك ليل ...
يقول ازرع ضنى شوق النوى فيا ...
وأنا في موعد الشكوى ...
أبي شكوى ... أبي دمعة ضنى تسوّى جراح العمر ...
هلا بالليل ... يا ضاوي بالحنين المر ...
هلا ... والله ...

ضيفنا في هذا العدد العضو المقلع واحف زاحف ..

له منا كل الشكر والتقدير على قبوله دعوة اجراء المقابله معه

..

اليكم المقابله مع المقلع واحد زاحف ..

حيا الله ضيفنا [ واحد زاحف ] تفضل أشرب القهوة وعين من الله خير ، وعطنا بطاقتك الشخصية نشوفها

؟!

الله يحيكم ويبقيكم هلا ومسهلا صب القهوه ياولد

..
بطاقتي الشخصيه انا توني مابعد طلعتها

>> طراه التفاتيش اول

الاسـم / ثامر
العمر / 17
الجنسيه / لبناني

.. (متسعود :p )
الحاله / عازب

>> قل قا ! :p

1/ سولف لنا عن بداية طقطقتك بالكيبورد

؟

اول بدايتي صراحه ماخفيها عنكم كنت بصف سادس ابتدائي وعلى ذيك الايام ماكان احد بعمري يعرف النت وبصراحه كنت قنبله تبشر بموهبه ابداعيه في شباك العنكوبتيه

وكانت بدايتي بمنتدى سامي

والى الان احوس وارجع الى الزعيـم :p

2/ ياأخي وش سبب أختيارك لـ واحد زاحف

؟

بصراحه كان يوزري السابق يوزر يفشل بكل ماتعنيه الكلمه

فقلت اخترع شخصيه جديده ومالقيت الا واحد زاحف !

بس موب معناه اني زاحف عاد

تراني عاقل :p ..

3/ واحد زاحف ، ماصلة القرابة بينك وبين التمساح

؟

التمساح هو خال ابوي من امي بالرضاعه :p

4/وأنت ماشي في هالحياة مامر عليك موقف وحلفت أنك ماراح تنساهـ طول عمرك

!

امممممممم المواقف كثيره بس فيه موقف دخلته وفشلني مع اصدقائي حيث يوم جيت اوقف السياره صدمت بالبلكه على الارض مانتهبت لها :p >> فاهم السؤال غلط هههههههه

بس فيه موقف ههههه اضحكني كثير

في منتدى سامي بعد طول غياب كثير جتني رساله خاصه من عضو ناسي يوزره والله بس ماكنت اعرفه نهائيا ً ارسل رساله مضمونها (( انت زاحف وانا زاحف امش خل نروح نفحط بالكامري حقتي ))
بصراحه واانا اللي وجهي ميت من الضحك هههههههههه

..

5/بيت شعر تحب تقوله

؟

بصراحه كل الاشعار احب اقولها

وكلها تعني لي الشيء الكثـير . .

6/عضو تحسه فاهمك وعارفك في المنتدى

؟ وعضو رافع ضغطك وودك تتمشكل معه

؟

اوه الكثير الكثير صراحه وكلهم غالين على قلبي وربي

لعل اقربهم تواصلا ً مساعدي الايمن لوحة مميزة

>> بتصفق

وعضو رافع ضغظي بصراحه ماهنا احد

7/ وش طموحاتك بـ هالحياة

، وتحقق شي منها

؟

رضا الوالدين والناس عني

..
واني احقق كل مايفيدني ويفيد اخوياي

8/ كلام ودك تقوله وتختم فيه اللقاء

؟!

اشكركم على اللقاء وعلى الاسئله

واحب اسلم على كل العالم اللي يعرفوني قبل والناس اللي مايعرفوني اقولهم اهلا وسهلا ً ..

واتمنى الاستمرار على منوال المجله كذا

لاني بطيح سوقكم ان شاء الله ان الله كتب

وشاكرين لكم على تحملنا

اطيب تحيه

..

مغرور حدي · #2 01/04/2006, 08:13 AM

صباحكمـ ورد

هلالي الظهران

الله يهديك بس

يعني انت شجعتني اروح للبنان بدال ماأجي للرياض احضر النهائي

قصه خياليه روعه لاتحرمنا من جديدك يعني القصص هذي كثر لنا منها .... خاصه الي يتعلق بلبنان وطق هذي .

يمال العوافي والله يامااااااااااااااادي

.

ياراعين المجله خلوا الشباب تتنظف يعني عاجبكم وضع اول ماتنظفون الا بالشهر مره

لا بجد الي اشوفه هاليومين شي مقرف خاصه بتقليد الغرب وعلى قولة لوحه فاهمين التطور غلط

واحد زاحف أحلى تحيه لك

والله هالمجله ماقصرت بكل شي ابداع وخلتنا نشوف يوزرات اشتقنا لها ..

من ابداع لأبداع ياطريق الاقلاع

تحياتي للجميع
أحمد

فرصه ضايعه · #3 01/04/2006, 03:09 PM

حرام عليكم

....

المشكله مقدر أرد وراي سفر

...

....

بس والله إبداع

....

إذا عندي وقت بفصفص المجله

...وأعلق على الموجود

...

واصلوا يامبدعين

.... والله أننا نحتريها من شهر لشهر

....

أدمنا عليها

هلالي حتى التجمد · #4 01/04/2006, 07:20 PM

مشكورين يا أحلى مجله

عاشقه الزعيــم · #5 02/04/2006, 03:52 PM

روعــه ... روعــــه

مشكـوريـن يالقـائميـــن عليهــا..

ولنـا رجعـه..

الكلاسيكي · #6 02/04/2006, 06:00 PM

أشكركم اخواني على المجهودات الطيبه اللي قمتوا فيها

هلالي الظهران اخوياك فله وين الاقيهم ... يبي لهم استراحه هع

اما من ناحية اهتمام اشباب ببشرتهم واجسامه فهذا شي طيب ولكن .. بالمعقول

يعني ان الله جميل يحب الجمال بس لا يكون مبالغ فيه كحال النساء

يكفي للرجل ان يكون بزي نظيف وقلب نظيف

اشكركم على المجله الممتعه

اتمنى ان تكون المجله في العدد القادم اكثر تميزا

البارق · #7 02/04/2006, 11:40 PM

ماشاء الله عدد مميز وضيوف مميزين ..

الحين هذي مجلة وإلا موضوع لهلالي الظهران اللي مسك بنا خط بهالمجلة

..

يا طوووول فقرته بس والله ممتعة ..

ويكفي إنكم طلعتوا صدى الأمس من تحت الأنقاض عشان يكتب ..

أما عاد واحد زاحف ..

ما نقول إلا الله يوفق في دراسته ..أجل من سادس إبتدائي وهو بالنت ..

حنا بسادس وما بعد عرفنا ( صخر ) ..

يعطيكم العافية يالغالين والله يقويكم ويوفقكم وعساكم على القوة يالغالين ..

تحياتي للجميع ،،،

ساميو حضر · #8 03/04/2006, 10:52 AM

يعطيكم العافيه على هالمجهود الكبير _

رون9الدو · #9 03/04/2006, 02:39 PM

يعطيكم العافيه

الكناري الأزرق · #10 03/04/2006, 02:51 PM

الـــسلام عـــليكم و رحــمة الله و بــركاتـه..,,

بــدايةً اقــووول خـــلني احط ذا الـلـون مـا دام أغـــلـــب الـــشباب طـايحين فيه<===== مـع الـــخيل يـا شـــقرا

و امـا عـن الــموضوع<== وش فيك قالب علينا اليوم فصحى:p

فــما أقـــووول اننكم مـجنونون لأنكم اذهلتون و قدمتم مستوى مأمول<=== الأخ يــحــلـل مــباراة

و اما عن قصة هلالي الظهران فما اقول لو قريت قرأن عدد سطور هـذه الــقـــصة لــختمت الـقرأن و بـدون جــدال

لـــذا أســـفون لأنـنا لـم نقرأ الـــقصة:<=== أغدييك قريت قرأن

و شــكرًا لـلأخوووة الــــباقين..,,

@ابو بندر@ · #11 04/04/2006, 12:22 AM

صباح الفـُل أقولها لكـم قبل الكـُل

مقــال العـــدد

يــُعاب على هذا المقال انهو لا يجب أن يـُسمّى مقالا ُ بل قصة ُُ ُ ... <<<<<<<<من أولها انتقاد

بــالمــُناسبة كان قلت لنا نجيب لك تعزيزات

بالنـّسبة لأجار الكامري ما عليك لا تشيل هم ّ بس خل سعيد مدري حنش مدري مصطفى

يســيّر علي وأعطيه أحلى كامري سوح وقير عادي يفل ّ أبوها وهذا انما هو تقديرا ً للفن ّ والفنّانين !!

أما بالنسبة لحمام جانا مسيّان فأرجو منك تأديتها بعد استأجار براطم صناعية

لأن الأغنية حازت على الاعجاب السعودي بصوت الطقـّاقة موضي

ولا يمنع أن يتم الاتفاق مع أحد الخوال لمدّة اقصاها ساعة وذلك للتمتع بالاستنزال وأم العبيد

الا وانا أخوك ودي أخاوي سعيد ذا أبيه يعوض جوالي اللي انسرق بعد مباراة النصر

تحياتي لك والى الامام يا شكسبير العرب

صور السيّارات

^
^
يا حلالاه بس

القصّات

..لي رجـــعة ..

تحياتي لكل طاقم المجلة

هلالي شامخ · #12 04/04/2006, 12:14 PM

يعطيـــكـــم العــــافيـــة ..

عـــدد مميـــز كالعـــادة .. مــواضيــع جميــله وخفيفـــه ..

لقــاء رائــع مـــع اللبنـــانــي الزاحـــف (مــا الومـــه)

مــزيــد مــن التــألــق ..

تحياااتي ؛؛

عظيم يا هلال · #13 04/04/2006, 12:38 PM

مشكووووووووووورين ع الجهد الكبير صراحة

هلالي الظهران وربي احسبك عاقل اثاريك زاحف خخخخخخخخ

من اول اشوف كتاباتك وتحليلك اقول ماشاء الله عليه هذا يا انه يقرب للشتالي

او انه يقرب لمحمد عبده << وش دخل ابو نورة الحين

الله يوفقكم رسمتوا البسمة ع شفايفي < وخر عنه اللبناني خخخخخخخ

عظيم مر من هنا ...