عطوهم الدوري والكاس .. ورجعوا لنا لاعبينا + الشيخ أبو سارة وفن وإبداع - نادي الهلال السعودي - شبكة الزعيم

ابوساري · #1 29/03/2006, 08:52 AM

السلام عليكم ورحمة الله وبركاته

أصدقائي الالكترونيين ... هلاليين وهلاليات ..

أنا أحب الوطن ... ودايم أردد .. >> روحي وما ملكت يداي فداه .. وطني الحبيب وهل أحب سواه <<

عشان كذا لاحد يقول اني أفضل الزعيم على الوطن ... مع ان حبي للزعيم مرات يطغى على كل شي

توقعنا بيكون فيه تعويضات للهلال .. مدرب وطاقم طبي ولياقي وعشر لاعبين ..

أقل شي تأجيل مباريات الحسم ... مثل مباراة القادسية والشباب ...

أقل شي يسوونه هو إنهم يتركون الدوليين يلعبون هالمباراتين اللي تحدد مصير الصدارة والوصافة ...

ولكن من هالحين أقول ... البطولة ليست هلالية إذا استمرت محاربة الزعيم

قمة القهر .... تدفع 22 مليون في لاعب ...

ثم يجي الوطن .. ويحرمك منه بسبب مباراة ودية لاتقدم ولا تأخر ..

قمة القهر .. مستويات قوية بداية الموسم ... ومدرب أكثر من رائع .. وانسجام غير طبيعي ...

ثم يجي الوطن ... ويهدم مابنيته من خلال معسكر إعدادي غير نافع لا للوطن ولا لأنديته

نداء الوطن .. شمل جميع الأندية .. باستثناء نادي الوطن ...

... نادي وطن إيه اللي بتؤول عليه

الكرت الأحمر فقط للاحتجاج على الحكام ... الانبراشات وتعريض حياة اللاعبين للخطر شي طبيعي ... عندنا بالسعودية فقط

هل جلست مع نفسك .. وسألتها ... ليه الهلال يسلب مجهوده ... ويتركون للمنافسين بالتشفي منه في ظل نقصه ..؟؟

فقط لأنه الهلال ... وإن بغيت تكسب الهلال .... احرمه من 12 لاعب + المدرب ... واعط الحكم حرية القرارات .. وراح تكسب بإذن الله

لو كان الاتحاد السعودي يخاف على الوطن ... كان أصدر قرارات وعقوبات على لاعبي الاتحاد .. وياليل الانبراشات

أتمنى يكون حرمان الزعيم من لاعبيه ومن مدربه له فايدة على المنتخب في كأس العالم ... عشان ماننقهر منك ياوطن

شي أتمناه ... بدال مانتعب ونتمنى ... ونحزن ... وتضيق صدورنا على الفاضي ...

ياليت توزعون البطولات المحلية مابين الاتحاد والأهلي والشباب ....

وترجعون لاعبيننا ننافس بهم على كأس آسيا ...

الشيخ أبو سارة

هالنجم الهلالي ... بريق الشبكة ... <== بريق موب حق الشاهي

بصراحة أنا هلالي موت .. وأعشق الهلال للنخاع ...

ولكن إذا صرت أقرأ كلمات هالكاتب ... أحس اني نصراوي من قوة هلاليته

لله درك يابوسارة ... والله لو بيدي منحتك عضوية شرفية مع كامل الصلاحيات ...

اعجابي بهالكاتب خلاني أستغني عن الجرايد وعن زاويا المتملقين .. اللي يكتب كره في نادي منافس واللي يكتب لأجل الشهرة ..

على فكرة ... أبو سارة آخر موضوع له كاتب عن الشيوخ ... الشيخ من(ثور) .. والشيخ الضفدع كامل ...

والله يابوسارة ... إنك شيخ ... وفوقها حبة راس

لكن اللي ملاحظه أنا ... مواضيع أبو سارة ماصارت تتثبت مثل أول ؟؟ ... فيه مشكلة والا وش ؟؟

كلمة شكر قليلة في حق هالكاتب ... وموضوع مايكفيه والله ...

شخص أدخل الشبكة عشانه وعشان بعض الكتاب ... والا أخبار الزعيم ماصارت تعني لي كثر نتايجه ...

وياخبر اليوم بفلوس بكرا ببلاش <=== وش يبي ذا

شي أخير ...,,,

يمكن مثلا مثلا يجي واحد ويقول إني أكتب في أبوسارة .. أتملقه ... أو على بلاطة أحتك ...

لكن أبوسارة ... يدري إني أحبه لله ولله ... القصد شريف قسم

... ولنا معه صولات وجولات في الشبكة

أبو سارة مايحتاج شهادتي ... وأنا موب محتاج أكتب عن أحد عشان أشياء ثانية ...

لكن مثل ماكتبنا عن نجوم ولاعبي الهلال ..... نكتب عن نجوم في الشبكة ... اللي أهم نجم فيها أبوسارة ...

وإذا لاعبين يدافعون عن الزعيم بلعبهم ... أبو سارة وغيره يدافعون عن الهلال بأقلامهم وكتاباتهم ...

وماتوقع فيه فرق ....

لذلك لايطلع لي واحد مادري من وين ويقعد يقول كلام همّن أحمق عليه أحمق الحامقين

تحياتي لكم .... وللوطن .... وللشيخ أبو سارة ....

أبوساري - طوكيو

هلالي...حتى المووووت · #2 29/03/2006, 09:22 AM

هلا بحبيب الكل

هلا والله يابوساري

إقتباس


	روحي وما ملكت يداي فداه .. وطني الحبيب وهل أحب سواه

وانا دايم اقول ][][ فووق هام السحب وان كنتي ثرى ][][

لكن ماتلاحظ ان الوطن زودها شوي ;)
10 لاعبين + الجهاز الفني

والمصيبه اخذوا اللاعبين في مباراة تجريبيه مع منتخب عادي

اظاهر لو يقابلون البرازيل مدري وش بياخذون

ماباقي الا ياخذون ابو سلطان

بصراحه هالموسم حققنا بطولتين وهي كاس الامير فيصل بن فهد

والبطوله الكبرى استمرار سمو الامير محمد بن فيصل في رئاسة الزعيم

والله هذا احلى خبر سمعته هذا الموسم

نرجع للوطن ونادي الوطن

نلاحظ ان الوطن يحاول ايقاف الهلال عن مسيرته بشتى الطرق والوسائل

يعني غياب الفريق الاول كاملاً + حكم منسم شوي

لمباراة القادسيه

أما الاتهاد + النثر يقدم لهم حكم مهزوز يريد انتهاء المباراه دون ما يجيه رفس اوضرب او بقس

خمس دقايق في المباراه يكون نثراوي وربع ساعه يكون اتهادي المهم ماينطق في المنصه

والزعيم يجيه حكم حاقد عليه ضربة الزاويه تتحول الى ضربة مرمى

الاعتراض عليه = كرت اصفر وراه احمر ويمكن ايقاف للنجم الصويلح

بنلتي مافيه

فاولات

فاول يحسب وعشره لا

استفزاز اللاعبين

وش باقي ماصار

ماباقي الا يقولون السنه هذه لاتلعبون خلوا النوادي الثانيه تجيب بطوله

وبعد هذا كله نقول نحن الزعماء الوطن أولاً

اللي يشوفهم يقول بيجيبون كأس العالم

ليه ماتم تأجيل مبارياتنا الحاسمه

والله مدري وش تبي منا الرئاسه العامه لرعاية الاتهاد ;)
على العموم شكراً
ياوطـــن ..

إقتباس


	الشيخ أبو سارة

هنا ما اقدر اقول شيء

أبو ساره الكاتب الأول للزعيم والزعماء

وان شاء الله مافيه اي مشاكل __ الله لايجيب المشاكل

وبإذن الله إنه مستمر في الشبكه

في الختام شكراً ابو ساري

الهلالي- ابوسارة · #3 29/03/2006, 09:52 AM

إقتباس


	أبوساري - طوكيو

ياخي أقص يدي إن كانك مو في الجرادية الحين

أجل طوكيو يا ابوسارى ههههههههههههه لا يكون رايح تفاوض ناكامورا

أولاَ : أشكرك على كلامك عن شخصي المتواضع والبائس جداَ , وهذا إن دل على شيء فإنما يدل على أنك مصلحجي تحاول تشبكني بس معصي

(( يا سفابك :p ))

سابع شيء : - تعجبني روحك الفكاهية في ردودك وتعجبني أكثر وأكثر سفرياتك المتكررة ,, أمس كاتب موضوع تقول انك في النمسا واليوم طوكيو والظاهر بكرة في التشيك ههههههههههه منتب عاقل يا ابوثامر يابو طيارة خاصه

إقتباس


	هالنجم الهلالي ... بريق الشبكة ...

تسلم لي والله يا زمزمية الموقع ويا دلة المنتدى (( من جد فاهم غلط :p ))

إقتباس


	ولكن إذا صرت أقرأ كلمات هالكاتب ... أحس اني نصراوي من قوة هلاليته

شباب صيده صيده ,, مندس أبو سارى طلع نصراوي (( قلت لك من جد فاهم غلط ! ))

إقتباس


	لله درك يابوسارة ... والله لو بيدي منحتك عضوية شرفية مع كامل الصلاحيات ...

على طاري كامل الصلاحيات , وش رايك في كامل الموسى ؟ (( يحاول يصرفك سمع طاري عضوية شرف وخاف يحسب الموضوع فيه دفع فلوس, كأنه بعض أعضاء شرف الهلال

))

إقتباس


	لكن اللي ملاحظه أنا ... مواضيع أبو سارة ماصارت تتثبت مثل أول ؟؟ ... فيه مشكلة والا وش ؟؟

فعلاَ الجو اليوم خااالع ينفع الواحد يطلع البر (( الله يرجك يابو سارى تكفى طلعنا من الكلام في السياسه

))

إقتباس


	لكن مثل ماكتبنا عن نجوم ولاعبي الهلال ..... نكتب عن نجوم في الشبكة ... اللي أهم نجم فيها أبوسارة ...

وانا اقول ليش أتعرض دايم لرقابة لصيقه أثري أهم نجم

بالعكس يابو سارى الشبكة كلها نجوم وأبوسارة والله من أقلهم إن لم يكن أقلهم فعلاَ ,,

كلكم أساتذتي ومنكم أستفيد وما انا إلا واحدُ ُ منكم إن أصبت فصفقوا لي وإن أخطأت فـ سلكوا لي ,,

إقتباس


	يمكن مثلا مثلا يجي واحد ويقول إني أكتب في أبوسارة .. أتملقه ... أو على بلاطة أحتك

شوف يابوسارى ترى حركات النص كم هذي ماتمشي علي

تجي وتحتك فيني وتقعد تدور عندي بالكامري حقتك وعلى بالك بي إم وتبيني أركب معك لا اسمح لي :p

أبو سارى يا المطرطع الله يرجك على هالموضوع اللي على الصبح وش انت ماكل ؟

تسلم على كلامك وشهادة أعتز بها و وسام غالي راح أعلقه في غرفة السواق

بس ماااش أحس أن موضوعك ما راح يطول وراح يطير زي غيره ;) على العموم يكفيني شعورك وشعور الاخوان تجاهي وهذا اللي مخليني أستمر وتسلم لي والله

هذا والله أعلم ,, أقول ما سمعتم وإن اصبت فمن الله وان أخطأت فمن ابوسارى . والسلام عليكم

الهلالي أبو سارة , من امام الجدار العازل , القدس - أريحا , شارع الغرابي !

zaidan · #4 29/03/2006, 02:06 PM

والله كرهونا في شي اسمه منتخب

واذكركم واحلقوا شنبي اذا مادخل المنتخب بتشكيلة كاس العالم ومافيها الا ثلاثة بس في التشكيله

وعلى فكره هذا اللي دايما يصير يعطلون الزعيم من لاعبينه عشان المنتخب واذا جات المباريات الرسمية في كاس العالم مايلعبون

وكل هذا من اجل تعطيل الزعيم

رد الله كيدكم في نحوركم ياخونه

روحي الازرق · #5 29/03/2006, 02:20 PM

العافيه على الكلمات الجميله

اما بالنسبة لابو ساااااااااره

فهو كااااااااااتب منتاز

لكن يعيب عليه البطء بعض الاحيان

خخخخخخخخخخخخخخخخخخخخخخخخ

الموضوع هذا ردوده مصررررررررقعه

مشكوووووووووووور

تحيااااااااااااااااااااااااااااااااااتي

صفر واحد · #6 29/03/2006, 03:46 PM

خخخخخخخخخخخخخخخخخخخخخخخخخخخخخ
من جد فيه ناس مهويه هنا

ابو ساري والشيخ ابو ساره جوكم رايق هو من المؤشر مرتفع ولا شي ثاني

توت عنب · #7 29/03/2006, 04:19 PM

إقتباس

الرسالة الأصلية كتبت بواسطة الهلالي- ابوسارة


	على العموم يكفيني شعورك وشعور الاخوان تجاهي وهذا اللي مخليني أستمر وتسلم لي والله هذا والله أعلم ,,

منتب عاقل يامحمد بن فيصل ( ابو سلطان )

بس كفو والله ابو سارة

انصفك الصراحة ابو ساري

ابو ساري... هيه رد ابو ساااااااااااااااااااي يرجم امك رد

الصراحة انك انصفت ابو سارة

هتلر الرياض · #8 29/03/2006, 04:30 PM

أبو ساري..

أنت و الهلالي أبو سارة عينان في رأس منتدى الجمهور الهلالي..

أقسم بالله إني أحبك في الله...

الله يعطيك العافية...

ألف شكر لك..

عبدالله.ع · #9 29/03/2006, 04:35 PM

رحمك الله يافيصل بن فهد

عزاه ياقلب تعلق بمدرجات الاستاد علشان مباراة العين واخرتها ماهنا دوليين <<< مطلع قصيدة

ياقاهرهم يالهلال · #10 29/03/2006, 04:39 PM

ههههههههههههههههههههههههههههههههههههههههههههههههههههههههههههههههههههههههههههههههههههههههههههههه ههههه ابو ساره الله يروووووووووووووووووووووجك ياشيييييخ

(كلكم أساتذتي ومنكم أستفيد وما انا إلا واحدُ ُ منكم إن أصبت فصفقوا لي وإن أخطأت فـ سلكوا لي ,, )

(هذا والله أعلم ,, أقول ما سمعتم وإن اصبت فمن الله وان أخطأت فمن ابوسارى . والسلام عليكم

الهلالي أبو سارة , من امام الجدار العازل , القدس - أريحا , شارع الغرابي !)

ههههههههههههههههههه كم مره حاولت اشبكك من نكات ثانيه بس ماقدرت يالثقيل

سوولتان · #11 29/03/2006, 05:43 PM

يعطيك العافية يابوساري ..

نعم الهلال ظلم هذا الموسم ،، كالاتحاد ،، لكن الاتحاد في مواسم ماضية ،، وفر له كل سبل الراحة

%%%%%%
الهلال ياوطنيون لايريد الا حقه فقط ،،

انصفوه كما انصفتم غيره .. فقط

%%%%%%

اما ابوسارة ،، فهو نجم المنتدى

بس الله يهديه لا يطول علينا !!

الروشن · #12 29/03/2006, 06:41 PM

حيا الله ابو ساري

تسيف أنت ؟؟؟؟ ووش علومك ؟؟؟؟

وش خليت ابو ساره ملح الزعيم وكلامه ينجرع ما عنده فلسفه كل شي واضح

مع السلامه

فتى الأمل · #13 29/03/2006, 07:10 PM

ابو ساري + ابو ساره

الشكر لكم يا نجوم الشبكة

أحلاهم · #14 29/03/2006, 09:21 PM

:p تجمـعوا منسـمين المنتدى

خخخخخخخ

ابوساري · #15 31/03/2006, 01:17 PM

باااااااااااااااااااا ( وبلاش أحضان ) اااااااااااااااااااااااك

نرجع لكم أصدقائي صديقاني فلذات أكبادي .. عشان أرد على المشاركات الحلوة قسم قسات

قسم جتني ظروف حالت دون ردي مبكرا على الموضوع <=== وش عندي يامدرس القواعد

بسم الله على بركة الله

هلالي...حتى المووووت

حي الله اللي لفانا ياهلا .. نذبح له من الذبايح ماغلا ... ترم ترم ترن ترن ترن تراااا ... <== ماشي مع الايقاع

أخبارك ياأدع .. فين الغيبات ياباشا ...

من ناحية إن زودها فهو زودها وماينعطى وجه <==== ماخربها أبد

لكن مثل ماقلت أنت .. فوق هام السحب وإن كنتي ثرا

تدري ياحبي لك انه ماقهرن إلا هالشي .. نتعب ونقعد نهايط وحنرأص البتاع والبتاع .. ثم يرقعوننا بخمس ستة

بس خلها على ربك ... محكوم علينا نشوف تركي الصويلح ظهير أيمن

أشكرك جزيل الشكر ... على المرور اللي أمرر مرور زين شفته

الهلالي- ابوسارة

هلا أبو سارة ... وش حشيشه وش بطحاه وش جراديته ياحبي لك .. قلنا لك بطوكيو

إقتباس


	سابع شيء : - تعجبني روحك الفكاهية في ردودك وتعجبني أكثر وأكثر سفرياتك المتكررة ,, أمس كاتب موضوع تقول انك في النمسا واليوم طوكيو والظاهر بكرة في التشيك ههههههههههه منتب عاقل يا ابوثامر يابو طيارة خاصه

يعني افهم من كلامك ان السنارة غمزت وعادي أرسل برايفت

..

يعني أغني أما رمانا الهوى ونعسنا واللي شبكنا يخصلنا ..؟؟

..

تسلم أبو سارة أقوى واحد بالحارة على كلماتك الرئيئة عني ...

مع اني منب دايم أسافر .. بس اذا طفشت

إقتباس


	شباب صيده صيده ,, مندس أبو سارى طلع نصراوي (( قلت لك من جد فاهم غلط ! ))

عاد مايبي لها هذي ... الحين بيطبون عشرطعش واحد وينشبون لمرسولي ... ياحبي لهم أعضاءنا بس مايصدقون يسمعون نصراوي

إقتباس


	كلكم أساتذتي ومنكم أستفيد وما انا إلا واحدُ ُ منكم إن أصبت فصفقوا لي وإن أخطأت فـ سلكوا لي ,,

ياحبي لك أنت حسبت ولد أخوي .... <== أحم كح

نصفق لك لو أنت غلطان يابعدهم <=== موب يرفّع أبد

والله يابوسارة منك نستفيد ... ونتعلم

من ناحية الاحتكاك والدوران بالكااااامري مهب بيدي .. مايسمن راسي الا اذا شفت باب بيتكم

همانا كلنا هلاليين

إقتباس


	هذا والله أعلم ,, أقول ما سمعتم وإن اصبت فمن الله وان أخطأت فمن ابوسارى . والسلام عليكم

أجل إن أخطأت من أبوساري

...

تشكر أبو سارة لتواضعك وقراءة كلماتي البسيطة فيك .. واعذرنا على القصور ..

فيه كلام بقلبي كثير بقوله ... بس خله على الرسايل الخاصة

.. العذال يابوسارة

تسلم على المرور .. وماقصرت

zaidan

هلا والله أخوي زيدان ...

دوري البلد ... يلعبون في مراحل الحسم بدون دوليين ... يعني تحس ان نظام الدوري شوي غبي

والا ياخوي زيدان ندري ان ياخذون عشر لاعبين واذا جاء المونديال رجعوا سبعة ..

آآآآآمين يارب ...

تسلم أخوي على المرور ...

وماقصرت

روحي الازرق

هلا هلا أخوي الأزرق

..

ياحبي لك بطء ابو سارة من الرقابة اللصيقة ...

وتشكر أخوي على المرور ..

صفر واحد

هلا صفر واحد ..

منور الموضوع .. وماقصرت على مرورك ..

بالنسبة للموضوع والروقان ياحبي لك الأسهم مرتفعة <=== يقاله مساهم يعني وهو تسذوب

تسلم أخوي على مرورك

توت عنب

هلا بك توت عنب ...

بالنسبة لأبوسارة والله ان اللي قلته قليل بحقه ...

انصاف ابو سارة المفروض يجي من الشبكة ...

تشكر أخوي على المرور

هتلر الرياض

هلا بك هتلر ...

والله كلكم تاج الشبكة ياحبي لك ...

وأقسم بالله إني أحبك ياهتلر

..

ومنور مواضيعي دايم ..

ماقصرت على المرور

عبدالله.ع

الله يرحمه ويغفر له

واوه من قلبن فقد عز سامي ...<=== يكمل القصيدة

يسلم قلبك على المرور والقصيدة

ياقاهرهم يالهلال

هلا بك ياقاهرهم ...

منور الموضوع ياقلبي ...

وبالنسبة لأبوسارة خلك مثلي اسدح موضوع وماعليك يبي يصير صديقك مع انه صديقي منذ مبطي

مشكور وماقصرت على المرور

سوولتان

هلا بك أخوي سولتان ...

الاتحاد دايم يلعب بكامل نجومه ...

وأذكرك الآسيوية بيكمل بنجومه ولا كأن فيه منتخب

اتحاد كرة قدم مسخر لفريق الاتحاد لكرة القدم

تسلم أخوي على مرورك

الروشن

هلا بك الروشن ...

والله بخير دامك بخير ... وإن شاء الله تكون بخير ...

والله أبو سارة ملح الشبكة ياحبي له ... ملح ولا يرفع الضغط <====

تسلم أخوي على المرور ..

فتى الأمل

تسلم أخوي فتى على كلامك ..

وماقصرت على مرورك ..

لاهنت يالغلا

أحلاهم

هلا بك أحلاهم ..

اي والله اللي يبارك باللي جمعهم <===

مشكور أخوي على مرورك ..

ألف شكر على المرور ... ماقصرتوا

أبوساري