سمو الامير محمد بن فيصل .. الله يهديك .. - نادي الهلال السعودي - شبكة الزعيم

الهلال فوق الجميع · #1 09/03/2006, 09:13 PM

سمو الأمير رئيس نادي الهلال .. بالغت في مدح جمهور العين .. وهضمت حق جمهور الهلال ..
عطني ملعب بكراسي مريحة (موب صبة برتقالية اللون ) ..
وعطني دكة يوقف عليها حقوي ..
و اشتر تذاكر المباراة للجمهور كله (موب تسكتونا بألف مدري الفين تذكرة مجانية )
و عطني امن يبتسم لك وانت داخل وطالع موب ماسك عصى العلم و يسلخ ظهر كل من تسول له نفسه ادخال ولاعة ..
و عطني مدرجات قريبة من الملعب ..

أنا مشجع هلالي حضرت كل مباريات الهلال هذا الموسم في الرياض ..
والمشكلة اني كل ما احضر لازم اشوف شي يكدر خاطري ولا يستفزني في الملعب ..
و مع هذا اقول يالله كله يهون لعيون الهلال ..
و بعد كل هذا أقابل بالنكران منكم .. وتصفون الجمهور بانه مقصر .. الله يلوم اللي لام الجمهور الهلالي يوم يغيب ..
ياخي علم لتفاريز وكماتشو كل مباراة أشوفه يتعلق وانبسط انه تعلق اقول والله بترفع معنويات كماتشو و تفاريز وجيوفاني لين شافوا علم بالبرازيلي .. و كلللل مباراة يجيني عسكري ( غبي ) و يفكه ..
عطني نص اللي تعطيه ادارة العين لجمهورها وابشر بالجمهور ..
بين الشوطين اطلع و يمنعني العسكري ارجع ادخل .. ياخي ترانا بشر .. موب دجاج تحجرونا ساعتين في الملعب ان لم يكن أكثر ..
الاسلوب الاستفزازي من بعض العساكر يخليك تتفاجأ .. تحس انه ما يخاف من قانون ولا نظام ولا كأننا بشر ومواطنين سعوديين ..
واذا اشتكيت للضابط يقول لك .. ياخي هذول مساكين من العصر واقفين هنا يفتشون على الجمهور وانهم مساكين يقابلون اشكال و نوعيات من الناس (منحطة) (يقصد الجمهور) ويا حرام ولا تزعلون .. ياخي انا مو مجبور اني اروح الملعب و اتعرض للاهانة و الاستفزاز و في الاخير تجيني سموك وتزيدها علي وعلى غيري .. و تقول اننا مقصرين ..
مباريات عديدة كان الجمهور يحاول الدخول للدور الثاني في استاد الملك فهد و الامن يرفض بحجة ان اللي تحت ما امتلى .. يعني لازم ننرص في الدور التحتي علاشان تفتحون الدور الثاني .. مثالها مباراة الوحدة اللي في كاس ولي العهد في الرياض ..
انا آسف لكن من الحين لن أحضر مباراة للهلال الا كل شهر مرة .. حتى اشعر ان الوضع تعدل ..
أو على الاقل رجع للجمهور جزء من كرامته ..
وش الله حادني

؟؟؟؟؟؟؟؟؟؟؟؟؟؟؟
(أتمنى في مباراة الاياب ان يكون الدخول مجاني للمباراة مثل ما فعلت ادارة العين )

المهاجر2004 · #2 09/03/2006, 09:27 PM

مجانناً اذا وافق الأمير سلطان بن فهد

عادل الروضة · #3 09/03/2006, 09:43 PM

إقتباس

الرسالة الأصلية كتبت بواسطة المهاجر2004


	مجانناً اذا وافق الأمير سلطان بن فهد

.... والله انك صادق

الأمل البعيد · #4 09/03/2006, 09:59 PM

شكرا

انا والهلال واحد · #5 09/03/2006, 10:13 PM

ياعزيزي ((الهلال فوق لجميع )) الأمير محمد ليس بالمسؤل عن جودة الكراسي وليس بالمسؤل عن السكيرتي اوعن الحشرة ساعتين في الملعب

انا برأي انه مسؤل عن النادي وليس مايدور في الملاعب

انا معاك المفروض مايقارن بينا وبين غيرنا وإحنا نحاول نبذل قصاري جهدنا كجماهير هلاليه
وخاصة الجماهير البناتيه الي من وراء الكواليس

ونصيحه شكواك عن رداءة الملعب وجها بالأحري للمسؤلين في المجال هذا

الهــ(زعيمهم)ــلال · #6 09/03/2006, 10:19 PM

الله المستعان

الزعيـم_80 · #7 09/03/2006, 10:47 PM

هلا بك اخوي والله كلامك صحيح وحصلتلنا نفس المواقف اللي صارت والعن بعد
بس وش نسوي مدام ان هناك جماهير فوضويه وانت عارف الشر يعم والخير يخص

اذكر مباراه جلست بالاستاد من العصر لين صفر الحكم وانا بطني فاضي والمثانه مفوووله
والعسكري يقولي(( انقلع هناك ))...... خلها على ربك بس ...

بس ماعليه لعيون ابوسلطان والزعيم يهون كل شي

الهلال فوق الجميع · #8 09/03/2006, 11:05 PM

أنا مو جالس اقول انه ليه ما يبني لنا كراسي و يصلح الملعب و كل شي .. لكن انه يمدح جمهور العين المدح المبالغ فيه اللي شفناه وانهم جمهور مثل جماهير الفرق الاوربية و مدري وشو بعد .. ويقعد ينتقد جمهور الهلال .. أنا كلامي كله لتوضيح سبب الفارق .. وتوضيح انه جمهور الهلال لا يقارن بغيره في اي نادي خليجي ..
مع انه هناك كم موضوع يمكن له انه يحسنه .. مثل شراء التذاكر للمباراة .. هذي بعد ننتظر المسؤولين يسوونها ؟..
محمد بن فيصل عمل للهلال الشيء الكثير و محد ينكر .. لكن يخف علينا شوي كجمهور ترانا بعد هلاليين ومجانين هلال بعد .. وش تبونا نسوي ؟ ؟ ؟

راعي الوسيطى · #9 09/03/2006, 11:21 PM

يقول رايه بكل صراحه بس انكم شرهتو عليه

انا والهلال واحد · #10 10/03/2006, 12:50 PM

في التذاكر انا معاك

ورايك عالعين والراس (( الخلاف لاغير للود قضيه ))

الكاسر9 · #11 10/03/2006, 01:17 PM

بيض الله وجيهكم كل اللي حضروا مباريات هذا الموسم سواء الداخليه او الخارجيه وحمد الله على السلامه اللي جوا من
من الأمارات واقولك ياهلال فوق الجميع معاش من يهينك ....
وترا ابو سلطان يوم يشره على الجمهور يمكن توقع الجمهور بيجي اكثر من كذا خاصتن ان في باصات غادرت من هنا واوفقت يوم الثلاثاء ومن بكره الأربعاء على العموم ابو سلطان شرهته معززززززززززززززززززه