السلام عليكم ورحمة الله وبركاته ...


أخباركم ؟ <=== تحسون واحد يبي سلف بس مستحي


بصراحة ماعندي شي أقوله <=== لا ياشيخ

..


..



أمزح معكم قسم .. عندي موضوع وعندي سالفة قسم قسمات ..


سالفتي اليوم يا أصدقائي هي عن اللاعب الكبير .. جيــوفـــــــاني <=== قاعد أمغّط بالحروف عشان تحسون اني فنان


هاللاعب ياناس هو ضالة الهلال في الوسط .. وصناعة اللعب بالتحديد ..

فيه جماهير طالبت بتغييره .. وناس حكمت عليه بالفشل .. وناس وناس وناس وناس <== علق

لكن الأكيد إني جيوفاني صاحب تمريرات ساحرة ..

يضعك أنت وضميرك قدام المرمى .. وهالشي شفناه في مباراة النصر .. وقبلها الأهلي والوحدة ..

وبصراحة أنا عن نفسي أشوف قفزات كبيرة في مستوى هالنجم من مباراة لأخرى ..

لاعب بخبرة جيوفاني .. وعالمية جيوفاني .. يحتاجه الزعيم ...

سامي كبير في السن ... ومع ذلك يقدم مستويات كبيرة ...

جنرال الهلال الشريدة في فترة من الفترات ورغم كبر سنة الا انه ماشاء الله عليه مبدع كأنه ببداية العشرينات ..


الوسط الهلال فيه الشباب وفيه السرعة .. بوجود كماتشو والشلهوب والتمياط ..

لكنه يحتاج للخبرة ...

جيوفاني محتاج صيحات الأعجاب .. وليست صرخات الاستهجان ..

جيوفاني يحتاج دعم الجماهير داخل الملعب .. يحتاج للهتاف باسمه ... عشان يقدم كل اللي عنده ...

مثل ماندعم كماتشو وتفاريز ... لازم ندعم هالعالمي ...

أتمنى أن تؤمن الجماهير بأن جيوفاني لاعب لن يخون تاريخه الكبير .. والنجم يبقى نجم ...

وصدقوني متى ماوقفنا مع لاعبينا المحليين والأجانب راح نخلق جو بطولات وجو انتصارات ...


أتمنى من قائد الرابطة وأسد المدرجات إنه ماينسى لاعبينا في الأهازيج ... لأن الجماهير هي المحفزة للاعب ..

ومتى ماستخدمنا وووووووووووو والسب والشتم .. راح نخسر فايدة حضورنا .. ويكون جلوسنا في البيوت أفضل ..


اللي موب مقتنع بجيوفاني .. أتمنى يرجع للمباريات اللي لعبهن ويشوف خطورة جيوفاني من لمسة أو تمريرة فقط ..


جيوفاني مايحتاج يركض ولا يحتاج يتحرك كثير .. يكفي إنه لو استثمر لاعبي الهلال تمريراته أمس كان طلعنا بـ 4 - 1



موضوعي كله عن جيوفاني .. وأملي في جماهير الزعيم كبير ..

يعطيكم العافية على مروركم مقدما ....,,


ويالله كل واحد يقابل شغله


وعلى فكرة ...

العين بياكلها

ابوساري

ياخي انا مثلك استغرب من اللي يتهجمون على جيوفــاني



ومن هنا .. من موضوع الساري بالتحديد .. اطالب الجماهير الهلاليه بالوقوف مع جيوفاني



ومشكور بو ساري على الموضوع

بالعكس جيوفاني كل مباراة افضل من اللي قبلها

يتطور مستواه

مشكور يابو ساري
جيوفاني نجم لكن أنتظروه في المبارياة القادمه

صدقني لوكان عندنا أثنين مثلك كان صار عددهم ثلاثه
ههههههههههههههههههههههههههههههه

حيا الله ابوساري
مبروك الفوز على جارنا النثر الحالمي
ماشاء الله عليك جبتها صح
انا جاي باكتب عن جيوفاني بس الله يجزاك خير خليتني اريح اصابعي ;)
جيوفاني لو يستثمر المهاجمين ربع تمريراته ان كان نفوز بتاريخيه على اكبر الفرق واقواها
انا اطالب الجميع انهم يتذكرون كيف كانت بداية ابو الكمتش
الكل كان يطالب بإنهاء عقده ولا ياخذ ولا ريال بعد
والحين يطالبون بالتعاقد معه سنه اخرى
جيوفاني بدايته احسن من بداية كماتشو ويكفي انه مثل برشلونه
يعني لاعب يبي يحافظ على سمعته
اتمنى من الجميع دعمه معنوياً وتشجيعه ليرتفع مستواه

عموما يعطيك العافيه <<< يحس انه بدا يخربط

تحياتي لك وللجميع

جيوفانى قال يبيلة 3 مباريات حتى يتئقلم مع جو الهلال

السلام عليكم ورحمة الله وبركاته ...,,

هلا بكم أصدقائي الالكترونيين في شبكة الملايين شبكة الزعيم ..,,

أخواني أصدقائي جيوفاني .. <== يمديكم

يعطيكم العافية ...,, جدا وأكثر أبو شي على المشاركة في أحزاني وأفراحي



عبادي

هلا أبو العبد ... عز الله مقامك <=== فاهم غلط

ياحبي لك بعد .. أحسن شي إنك قلت من موضوع الساري بالتحديد

بعدي والله ... وتراهم اذا وقفوا مع جيوفاني بيصير أطول منهم <== ياشين التنكيت المالغ

يسلم لي مرورك ياعبادي والله لايحرمنا منك ياأخطبوط العود <=== دخل جو مع الرد

ماقصرت



نزيه المشاعر

أخوي نزيه هذا اللي نشوفه من جيوفاني ...,,

ومانبي الا الصبر عليه بس ..

يعطيك العافية والمزولا على المرور أخوي



بدر المحارب

الله يسلمك بدر وترى شهادتك بجيوفاني وسام على صدره .. ياحبي لك قسم

بالنسبة لكثرة الأبو ساريات بالمنتدى راح يسبب ربكة داخل الـ 8 طعش .. عشان كذا يكفي أنا

يعطيك العافية بدر على المرور والدوريات ..



هلالي حتى الموت

حي الله هلااااااااااااااالي حتى المووووووووت .. أسفرت وأنورت واستهلت وأمطرت

الله يبارك بعمرك .. هو مهب جارنا بس من عيال الحارة ...

بعدين فزنا على الوحدة والحزم قبل .. موب غريبة نفوز على النصر

عندي احساس انك كنت بتكتب مير أفز واقف وأكتب الموضوع عنك يابعدهم .. كم عندنا من هلالي ..

شف ياهلالي هم بيقعدون يصايحون ويتكلمون بعد شهر جيوفاني بيسكتهم لاتخاف

بس أبو الكمتش لحالها ... قسم لقب محترم

ايه اشوفك بديت تخربط وجايب لي قصة حياة كماتشو .. ياخوي اختصر <=== نذل

ياحبي لك هلالي قسم قسمات اني أحبك في الله

مشكور على مرورك العذب ويعطيك العافية والعربي




إس إف أو أربع مية وخمسطعش

فعلا جيوفاني من مباراة لمباراة يتطور مستواه وينسجم مع طريقة اللعب ...

وان شاء الله مباراة العين يقدم فيها مستوى أفضل ...

مشكور أخوي إس إف أو ... ماقصرت على المرور





تحياتي لكم ...,, ولي رجعة

أبوساري

مشكور يابو ساري

وجيوفاني يتحسن من مباراة الى مباراة


والقادم افضل انشاء الله

اهم شي انه تأقلم اخيرا وبدأ يقدم مستويات مقبوله

هلا ابو ساري

مبدع واللــــه

مشكوووور يا غالــي على الموضوع المفيـد

وبالنسـبة لجبوفاني .. بروزه مع الهلال مسألة وقـت .. لا غير

يحتاج لشوية لياقــة فقــط

تحياتي

الأمل البعيد ...,.,,

بإذن الله جيوفاني قادر على إسعادنا كجماهير نطمح في خبرة لاعب كبير ونجومية لاعب بحجم جيوفاني ...

المباريات القادمة بإذن الله تكون انطلاقه له ..,,

أشكرك على المرور أخوي ,,,





الغالي 558

تسلم أخوي على ردك ...,,

وبعض الجماهير تبي اللاعب يسجل هدف وبس ...,,

حتى لو كان مطلوب منه أدوار دفاعية أو صناعة لعب ..,,

مشكلة كذا ,,,

يعطيك العافية على المرور أخوي وماقصرت ..,,




هلالي يموت بسامي ....,,

تشكر أخوي على مرورك ..,

وجيوفاني فعلا يتحسن مستواه بشكل كبير ..,,

ولاحظ مباراة النصر الأخيرة كيف صنع أهداف محققة بس لاعبينا ماستغلوا الفرص ..,,

يعطيك العافية على المرور ..,,





لولوة الزعيم ...,,

أشكرك أختي على المرور ..,,

وفعلا جيوفاني قدم مباراة كبيرة قدام النصر ..,,

ولكن لاعب بحجم جيوفاني عنده الكثير ليقدمه ..,

بس يبي لنا ندعمه معنويا ..,,

والجاي أفضل ..,, ماقصرتي أختي ..,,





محمد ...,,

تشكر أخوي على المرور ..,,

والوقت كفيل بإذن الله بإعطاء الجو المناسب لجيوفاني من ناحية الانسجام واللياقة والتعود على الأجواء والعادات ..,,

وكفيل براحته نفسيا ..,,

وبذلك نكسب نجم كبير في منطقة صناعة اللعب ..,, اللي هي أهم منطقة في الفريق ..,,

تحياتي لك أخوي وماقصرت ..,,



أبوساري .........,

هلا بريحة التميز .. أقصد الغالي

هلا بك افغاني عاش من شااااااافك يا أدع ..,,

هلا بريحة الشات

سبحان الله .. كله في محله

مافي مشكل صديق