السلام عليكم ورحمة الله وبركاته ,,

بصراحه شفت اليومين هاذي الجو ما يطمن كله حروب وتقفيل مواضيع .. قلت خل ألطف الجو شوي بهاذين اللغزين :
وهو يعتمد على المعلومات العامه وبنفس الوقت يبي له شوي ذكاء .. يعني لغز ولاهوب لغز ... ويمكن يكون مار عليكم ..

الاول : لماذا يسمى الذباب بهذا الاسم؟؟؟


الثاني: في هذا البيت اضف شيئا حتى يكون المعنى صالحا .. يعني مثل تعجب او استفهام او نقطه او غيره ..

يقول الشاعر :

لا يكون العير مهرا .... لا يكون المهر مهر

ويالله عاد .. ورونا شطارتكم

اختي العنود جواب السؤال الاول لماذا يسمى الذباب بهذا الاسم لانة بثر
اما السوال الثاني فنضيف علامة تعجب

للاسف الاجابتين خاطئتين ..
بالنسبه للاول قربت شوي بالمعنى ..

وبالنسبه للثاني المفروض تكتب البيت وتضيف الاضافه عليه(علامة الترقيم المناسبه) ..
حتى يكون المعنى صالح .. لا ن البيت اللي انا حاطته فيه تناقض بالمعنى ..

حاول مرة ثانيه .. وشكرا .. وياليت الباقين يشاركون ..

اخواتي واخواني ..

الى هالدرجه السؤالين صعبات ؟؟؟؟

يعني اقول الحل؟؟

.... خيبتوا ظني فيكم

الذباب يسمى هكذا لانه سمي هكذا بالقرآن الكريم ولا اذكر الاية بالنص الصحيح لكنها عندما تحدى الله سبحانه وتعالى ان يخلقوا ذبابا. واعتقد سمي كذلك لان اسمه مشتق من الذبّ وهو الوقوع على الاشياء بعشوائية .

لا يكون العير مهرا .... لا يكون المهر مهر .
اعتقد انها نقطة لان البيت صحيح حسب مايبدوا لي . لانه يقصد بهذا البيت انه لايمكن ان يكون العير (الحمار) مهرا للزواج فبذلك لايصبح المهر مهرا صحيحا. وكلامه صحيح لاعجب فيه ولاغرابة فتكون النهاية نقطة ختاما للكلام .
والاحتمال الثاني هو انه يقصد انه ليس من المعقول ان نسمي العير مهرا (صغير الحصان) لانه بذلك لايكون المهر مهرا اذا اطلقنا اسمه على الحمار . وايضا كلامه صحيح لاعجب فيه ولاغرابة .

اتمنى ان يكون اجتهادي صحيحا ولكِ تحياتي .

اخوي الاسير الهلالي ....

اولا شاكرة لك مشاركتك ..

بالنسبه للاول .. فانت قربت للسبب الرئيسي للتسميه ... واذا تبي تقول الحل بشكل كامل .... دقق في كلمة ( ذباب) وفصفصها وتلقى الحل بشكل كامل ..

اما الثاني .. هو معنى البيت يتعلق بالاحتمال الثاني اللي انت قلته ..

يعني الشطر الاول ينكر كون العير( الحمار ) مهر .. وهذا صحيح ..

اما الثاني فكيف لا يكون المهر مهر ؟

اظن اني قربت مره للجواب ..

حاول مرة ثانيه

بالنسبه للذباب انه يفصل الاسم اسمين وهو يعني كثير الذهاب والاياب
اما بالنسبه للسؤال الثاني اذا عرفت الحل لي رجعه انشاء الله

وش ذا صعبه مررره ذكرتيني بأسئله الجيويلوجيا ايام الثانويه

<====يبي يعلمكم انه علمي:p

يبدوا اني وصلت متأخر لاكن ماعليه اعذروني زحمة المواصلات وبيتنا بعيد



المهم بالنسبه للغزين :


الاول : سمي بالذباب لانه يذب وجه على الناس يعني يتلزق رغم ان الناس تكشه ههههههه حلوه تكشه (( متعوب عليها )) ويمكن سمي بالذباب لانه يذب الجراثيم على المواقع اللي يهبط عليها <----- طيارة مو ذباب :p


اللغز الثاني : لا يكون العير مهرا .... لا يكون المهر مهر .

الشطر الاول لايكون العير مهراً يعني لا يكون الحمار خيل او مهر (( لا يكون احد قالها قبلي ))


والشطر الثاني : لا يكون المهر مهر .

يعني لا يجوز ان يدفع الخيل او الفرس مهر للعروس
او
لا يمكن ان يكون الخيل حمار .

أختر وحده ;)




تحياتي وكثر لنا من الالغاز

سلاااااااااااام

انا اقول والله اعلم ان الذباب سمي بهالاسم لأنه يذب الاشياء يعني يرميها
ذب يذب فهو ذباب أي يقوم برمي الاوساخ في الاماكن التي يقع عليها

وبالنسبه للثاني تكون بهالشكل :
لا يكون العير مهرا .... لا يكون!! المهر مهر .

يعني نفي ان يكون العير ( الحمار) مهر ، واكد النفي مره ثانيه .... بعدين قال ان المهر مهر ( خيل)

<==== نحوي بزياااااااااده ;)

سلاااااااااااااااااااااااااااااااااااااام

السلام عليكم ..

اشكركم جميعا للمشاركه ..
اما بالنسبه لحل السؤال الاول .. فالجميع اقترب كثيرا للاجابه .. وهي :

سمي الذباب بذلك .. لانه كلما .. ( ذبّّّّ ) .. بضم الذال وفتح الباء , .. (آآب) ..
اي كلما ابعدته عن اي شيء .. عاد اليه .. الاياب .. هو العودة..

****************
اما بيت الشعر .. فاللذي اجاب الاجابه الصحيحه هو ريفيلينو

فيكون البيت كالتالي :

لا يكون العير مهرا ... لا يكون , المهر مهر

اي ان البيت الثاني تاكيد للاول بان المهر مهر ..
ولو عدنا للاعراب البيت .. نجد ان المهر مهر .. مبتدأ وخبر .. يعني جملة مستقله..
ولو كانت خبر ليكون لكانت هكذا .. لايكون المهر مهرا .. لزادت الف في اخر مهرا .. وكان الحل مثل ماقلتم ..


اسفه على التاخر بالرد .. واتمنى يكون الحل اعجبكم ...