اول شي مدري وش اقول هاردلك لجماهيرتشيلسي على الخساره او أقول أحمدو ربكم على هالنتيجه أو اقول لجماهير البارسا هاردلك على هالنتيجه المتواضعه !!!
اليوم البارسا أسكت جميع منتقديه على انه لعب سيرك او لعب علشان المتعه بعيداً عن النتيجه .. وياحظنا بهالفريق بصراحه فريق فيه ساحر ساحر بمعنى الكلمه وهو رونالدينهو ..ولاعب صدقوني راح ينسيكم ماردونا بالمتستقبل القريب أسمه ميسي .. ولاعب أنا أعتبره ثاني أفضل لاعب تكتيكي بالعالم بعد أميرسون والي هو ديكو.. ومدافع من أفضل مدافعين العالم وهو قلب ألاسد بيول .. ومدافع قيصر خليفة بيكنباور والي هو ماركيز .. ومهاجم من ثلاث أفضل مهاجمين بالعالم بعد شيفا وهنري يجي أيتو غصبً عن الكل .. اللحين عرفت ليش يسمونا جماهير الانديه الاخرى بأنا فشلونه لان البارسا يفشلهم وبأرضهم سواء مع الريال او مع تشيلسي الي لعب بأرض ملعبهم وحولو الملعب من عشب الا طين خوفاً من الفشيله !! بس هيهات هذا فريق السحره لو لعب المباراه في بركة سباحه لفشل الفريق المنافس .. ما علينا نجي للاعبين اليوم
# فالديس .. اليوم أبدعت والخطا الوحيد الي عليك هو الهدف وجى من موتا ومعذور وعساك على هالحال انشاء الله .
# جيو .. أبدعت ونسيتنا جو كول وسكرت الجهه اليسرى بس كمدافع اما هجومياً ما قصر ( سليفنهو ) وسوا الهوايل وانا دايم اقولها سلفينهو أفضل من جيو بمراااحل بس جيو اليوم أبدع كمدافع وسلفينهو أبدع كمهاجم .
# بيول .. اقسم بالله لو الفيفا أو الفرانس فوتبل ما يختارونك من بين أفضل عشر لعيبه بالعالم الموسم القادم فـ أن الفيفا والفرانس فوتبل ما عندهم سالفه , سبحان الله أرتاح نفسياً اذا كانت هجمه ضدنا وكان على المهاجم بيول أتوقع بل أجزم انه راح ينهي الهجمه .
# ماركيز .. قيصر قيصر قيصر بمعنى الكلمه يـناس فيه مدافع بالارض تجيه الكوره يعرف متى يهدي اللعب يعرف متى يتقدم بالكوره يعرف متى يشتت يعرف متى يقع أو يمثل على الحكم , سبحان الله أرتاح نفسياً اذا كانت الكوره في منتصف ملعبنا والكوره بين أقدام ماركيز .
# ألقويرا .. انت يمكن أسوء لاعب اليوم بالمباراه بس على لعبك هاذا أفضل من بليتي كمـدافع أما هجومياً ما يحتاج تهاجم دام الي قدامك مردونا الجديد ما قصرت بس أنشاء الله أدائك بالمباراه القادمه يكون أفضل .
# أدميلسون .. انت بصراحه كمحور أفضل من كمدافع اليوم أخطت أخطا قليله ونسيتنا غياب أكسافي ولو لقليل .
# موتا .. بالشوط الاول عرفت كيف تموت اللعب صح وهاذا تكتيك من ريكارد وما قصرت بس بالشوط الثاني أدائك تغير 180 درجه وتأخر ريكارد بأخراجك ودخل بداله ( لارسون ) الي متعود على أراضي أنجلترا أيام سيلتك وقدم مباراه من أفضل مبارياته طوال سيرته مع البارسا وليتك تعود لأيام سيلتك دائماً.
# ديكو .. هالاعب يعرف يتمركز صح يعرف يناول صح يعرف يقتل اللعب صح كبير والله ياديكو وأسكت أفضل لاعب في تشيلسي على قولتك والي هو مرينهو .
# رونالدينهو .. يناس هالاعب هاذا عليه لمسات أقسم بالله ما شفتو مثلها قبل عشر سنوات ولا بعد عشر سنوات من الان صدق الشوط الاول ما ذكر كثير بس كانت لمساته بالشوط الاول ممتازه وكانت الرقابه عليه أكثر من لاعب بس بالشوط الثاني طلع سحر سحر ما طلع مثله الا ايام مارودنا والدليل بــاصه لإدميلسون بعد ما رفع الكوره من الحارس وشتتها تيري هالباص هاذا يُدرس يناس , نصيحه أخويه للي يشوف رونالدينهو يترك شعره وطريقة كلامه ! ويرى كيف السحر ألي على أصووله ترا هالاعب جى لعالم الكوره بعد ما فقدت عالم الكوره ماردونا تمتعو بأدائه قبل لا تعيشون في أوهام طول الخمس سنوات القادمه , أستمر على هالاداء ياساحر الكره الارضيه الحديثه .
# ميسي .. هالاعب هاذا أن أستمر على هالاداء راح ينسينا ماردونا ورنالدينهو جميع الله يكفيك شر الاصابات بس سرعه + مراوغه +أحتفاظ بالكوره بشكل غير طبيعي ولاعيبة تشيلسي الي معروف انه أقوى فريق دفاعي بالعالم ما نجح بتوقيفه الا بكسر او اصابه حتى هالحل ما نجح مع مرينهو وعياله , اقولها مره ثانيه الله يكفيه شر الاصابات لانه جوهره راح يتذكرها العالم طول تاريخ كورة القدم .
# أيتو .. وش أقول وش أخلي سويت الهوايل ولعبت في كرفالهو لعب , وان قلنا أنه لعب وأبدع يجون بعض الناس ويقول المهاجم لازم يجيب هدف , وجاب هدف وأبدع واسكت جماهير تشيلسي , استمر على كذا يـ أفضل مهاجم عام 2005 .
###وفي النهايه اقولها للمره الثانيه هاردلك لجماهير البارسا قبل جماهير تشيلسي
الوضع العادي
