مدينة الريــــــاض .. للعوائل فقط !!!!! - صفحة رقم 2 - نادي الهلال السعودي - شبكة الزعيم

متيم به · #16 15/01/2006, 06:26 PM

من جد

عريب عبدالله · #17 16/01/2006, 03:51 AM

آه ما أرق الرياض
تالي اليل
أنا لو بيدي خذتها بيدها
ومشينا

الرياض أجمل مدينه فعيون أهلها
ورغم التذمر تضل الأفضل
المشكله العوايل تشتكي والشباب يشتكون
طيب والبنات مالنا الا الملاهي والمشكله من زينها
أو السوووووق والمنتزهات التافهه اللي يختنق زائروها من الزحمه
والظلم شين مره حطوا الملاهي للشباب الساعه 2 الظهر
والكل يعرف أن أهل الرياض ما يطلعون الا بعد العشا
والله معاناة
لازم هيئة السياحه تشوف حل الكل يشتكي
ورغم كل شي تضل الرياض الأفضل فعيوني
والسبب أنها الرياض
بالحب والإشراق

هلالي راقي · #18 16/01/2006, 06:52 AM

اقول خلك من كثر الهرج رح للمقهى وخذلك راس سلوم والعب بلوت وانتهت السالفه تشوفون مافي تعقيد بلا شوارع بلا اسواق بلا بطيخ

~بنت الزعيم~ · #19 17/01/2006, 11:20 PM

الريـاض آآه يالريـاض
الرياض اظن انها مدينه متكامله وليست مقتصره على العوائل
يعني فيه اشياء للعوائل والشباب بعد
واذا تبي تستانس رح مع اهلك ووسع صدرك على قولت لوحه مميزه
يمكن مافيه اماكن كثيره لترفيه الشباب لكنها موجوده
حنا اللي ضعوف ماكاننا اوادم موب حاطين ولا شي للبنات
لا تقولولي الملاهي انا اكرها ولا اطيقها لانها ماتعجبني اصلاً
صرت ما اطلع من البيت الا على السوق وبس لان ما فيه شي يعجبني
حتى المطاعم ما عاد اروح والسبه اخواني
والشرقيه مافيها الا البحر وش حلاته بصراحه احسدكم عليه
ومجمع الراشد للتسوق وبس
ياليت الرياض فيها بحر كان ارتحنا من روحات الشرقيه

مشكور على هالموضوع اخوي

فيصل القناص · #20 18/01/2006, 05:18 PM

والله من جد
وش ذا القهر
كل شي للعوائل
طيب عوائل بس ... ليه البنات يدخلون عادي...
ليه ما يدخلون مع عوائلهم..؟ ليه يدخلون لحالهم... <--- منقهر

................................................................................................
أخوي لوحه مميزه كلامك حبر على ورق مع إحترامي لك
كله تنظير
بس لو تجي للواقع... العائلة السعوديه بشكل عام بالتسوق هههههههههه فيها بثاره شوي
يعني لازم في قلق
الولد يبي ياخذ راحته... ويتمشى ويتعشى وووو...

وفيه اطفال كل واحد يبي يلعب
ويالله ودني.. وجبني ابي هذا وأبي ذاك

قلق... والبنت تقعد بالمحل تفصفص المحل قطعه قطعه
وبالاخير ما تشتري شي ولا ان كثرت شرت قطعه قطعتين

يعني ما في امل تضبط امورهم بطلعه الا لمطعم مثلا ... والمطاعم ما يشملها هالكلام لانها مفتوحه للشباب
.................................................................................................... ....................................................
إختي سندريلا....
حاسدتنا على هالمخيمات والشاليهات
كل واحد مقابل خشه خويه
وهات لك فقش
سويت كذا وسويت كذاك
تعرفت على هذيك وسحبت على هذيك
80 % من السواليف نصب

لو ما فيه ابرك
وعلى فكره
تراها برضو متوفره لكم
.................................................................................................... .....................................................
وش تبون بالضبط؟؟
ايه نبي سينما... جيبوا لنا افلام ... وقطعوها زي محلات الفيديو...
يعني بالفيديو حلال وبالسينما حرام؟؟
وخلوا الدخول للرجال ايام ... وللنساء ايام....
ويحطون كم وحده تتاكد من البنات اللي يدخلون انهم بنات
عشان محد يتنكر

اذا هي على الاختلاط
.................................................................................................... .......................................
ونبي حفلات... هذاها الحفلات موجوده بجده.... برضو يعني الرياض حرام وجده حلال؟؟؟؟
ولا الرياض من السعوديه وجده من مصر
.................................................................................................... ................................................................
ادري خيالي واسع
لكن ما باليد حيله
.................................................................................................... ...............................................................
بس لاحقاق للحق
في جانب ايجابي من ناحيه منع دخول الشباب للاسواق بالرياض
للاسف الشديد
فيه فئه ضاله من الشباب

يلبسون طواقي طويله

ومصفطين اكمامهم كانهم رايحين يتطاقون
وماسك زقارته ويدخنها على باله جوني ديب

ويسحب رجليه على باله مشيته تخقق
وبعض الاحيان حاط شماغه على كتفه
هذولا يبرد قلبي اذا شفتهم ملطوعين عند بوابات الاسواق وممنوعين من الدخول
لا وبعد يروحون للشرقيه على بالهم رايحين باريس ولا لندن
وهات لك تهبيب هناك....
يخلون الشرقيه حي النظيم بالرياض <==== مع احترامي لسكان حي النظيم

الراشد ايام العطل ودك يسكرونه بسبه هالاشكال... لانهم خربوووها من جد
الا خربوا الشرقيه كللها ... مثل ما قال اخوي ابو عبدلله... صارت ما تنطاق بالاجازات

.................................................................................................... ..........................................................
وعموما كل شخص له وجهه نظر
واختلاف الرأي لا يفسد للود قضيه

ودمتم سالمين

أبو راس · #21 20/01/2006, 01:35 PM

تسلموا يا أعضاء نفرا نفرا على اخراجكم ما في كبودكم وتعبيركم الصريح عما يجول بخواطركم في موضوعي المتواضع

استمتعت بقراءة تعليقاتكم، وكل واحد أحسن من الثاني

عندي تعليقات صغينونة:

*اللي يقول ليه الشباب ما يطلعون مع أهاليهم
=> ممكن، بس مرة او مرتين بالسنة (يعني من العيد للعيد

)
اما اسبوعيا .. فمو معقول
يعني انت في نهاية الأسبوع قابلت خويانك، لازم يكون في مكان تروح له وياهم.. مو بس حرق بنزين ودوران في شارع الملك عبدالله

* اللي يبي حفلات غنائية
=> انا ذكرت في موضوعي مثال قافلة الخير بالدمام .. وانت تبي حفلات مثل جدة
بس انا اخيس في بيتي ولا احضر حفلة غنائية

وش الفايدة اذا بتضيع وقتك في الحرام

*اللي يقول الأندية موجودة:
=> كم واحد يدل وعنده استعداد يروح الدخل المحدود للنادي
عمرك سمعت واحد يتصل على خويه يقوله قمنا للنادي نلعب بلياردو وتنس ونحتسي بعض الأسبريسو خلال مشاهدتنا لمباراة الأنتر في حديقة النادي على شاشة ال [mouseover=Digital Light Processing]DLP[/mouseover] (ضع الماوس على الكلمة ليظهر شرحها

)
كم واحد يعرف اذا الدخول لمنشآت النادي بلاش ولا بتذاكر (

تذاكر ,, ايام عالم الطفل ومنتزه الخيمة)
بالعربي .. مافي تواصل بين النوادي وتعريف بخدماتها وبين الشباب
الا اللي يروحون يتابعون تدريبات فريق الكورة ويلاحقون اللاعبين

ليه زحمة قهوة ابوهيثم أكثر من زحمة النادي

(مو متأكد .. رميتها قصف عشوائي

)

*في ناس يقول مافي مشكلة أصلا .. وش فيها القهاوي والتسكع والتعسيل:
=> ((نعمتان مغبون عليهما كثير من الناس ، الصحة والفراغ))
واذا انت عاجبك كذا، في كثير غيروك ودهم يضيفون قيمة أكبر لأوقاتهم

*اللي يقول مافي آدم بدون حواء:

اذا وصلت للمرحلة هذي، تزوج وانا اخوك .. بيصير عندك حواء 24 ساعة جالسة على قليبك

وبمناسبة هذه الأيام السعيدة، قود لك = good luck = حظا موفقا في الأختبارات

ذاكروا ، وبدون برشمة