اكتشفت أخيرآ انة يبيلي ادرس من جديد بالمدرسة!!! يعني اروح اسجل باولى ابتدائي واعيد كل الى درستة!! لانة حصلت انى مخبط ولا عندي سالفة وكل الى تعلمتة من المدارس قبل غلط او يمكن بعد انهم كان يعطوني معلومات صح بس لاني مقفل ما فهمت زين !!


كنت عند نفسي سيبوية زماني !!! وكنت مسوي فية المنجد للغة العربية!! يعني من يوم اسمع كلمة عربية اعرف وش يقصدون فيها وش معناتها !!! بس اثري مادري وين ربي حاطن واثر هالمعلومات حقتي مثل وجهي!!!


يعني انا كنت احسب انهم اذا تكلمو عن شي اسمة مشقه !!ان قصدهم مثلا جندي واقف يحرس قدام بوابة لمدة ثمان ساعات يوميآ والجو موت حر وشمس ولا يتحرك ولا حتى يقدر يقعد!!!!!! واثرة لا ماقصدهم كذا هم قصدهم بالمشقة انة شلون تقدر تطابق لون المشلح على لون الجزمة!! وشلون تصير وانت رجل وحاط حمرة شفايف ولا يين للناس انك حاط!! ولا حتى شلون تصير لابس غترة بعزيمة وتنتبة لة عشان ما تعرفط!!! ولا شلون تقدر تاكل كبسة بيدك بدون ملاعق اذا صرت معزوم بالبر !!! وحتى تراة مشقة كبيرة انك تجيب سيارتك بنفسك الى موقفة بعيد شوي عن باب الفندق لانة السواق ماجا معك!!



حتى اذا تكلمو عن الكفاح!!! اثرهم يقصدون غير الى انا كنت احسبة مثل واحد ملعن ابو خيرة بوظيفتين بالصبح والليل عشان يقدر يجيب فلوس يدير بة بيتة الى فية عيالة العشرة وامة وابوة!! ولا مهوب هذا الكفاح !!! الكفاح المقصود بة انك شلون تصبر ست اشهر ولا تغير سيارتك المرسيدس لوحده جديده!! ولا حتى انك تقعد لمدة اسبوع كامل بالرياض بالصيفيه من غير ماتسافر !!! ولا حتى شلون تقدر تروح كل يوم لمدرستك الاهلية الى بثلاثين الف والفصل فيه عشرة بس والكراسي حقات الفصل كنب هو صح انك ماتدرس وتقعد بس تسولف مع اخوياك عن وش اخر شريط لريكي مارتين !!وش ازين كان ولا نيس !!!بس ولو انت كافحت لآنك تروح كل يوم للمدرسة!! وحتى تراة مكافح الى راح للحلاق يسوي تنظيف بشرة وقدر يقعد لمدة ربع ساعة على الكرسي من غير مايتحرك هو صح انة كان بنفس الوقت واحد يقص اضافره واحد يسوي له مساج وقاعد هو طول هالوقت يتكلم مع زميلة بالجوال!!



اما ان الواحد يصير عصامي !!! هذي عاد كنت من زمان متاكد منها !! وهي مثلا ان الواحد يصير يتيم وغير متعلم ويبسط كل يوم بسوق الخضرة ويجمع من هالفلوس ولا يصرف شي على رفاهيتة وتدور الايام معة ويصير تاجر و وعندة 500 محل لبيع الخضرة واللحم والدجاج !!! واثري حتى بذي انا مقفل ولا افهم اذا قالو ان الواحد عصامي المقصود انة واحد خريج اثار ومعة واسطة وعيّن بمستشفى بقسم الابحاث !! وغيره صيادلة وخريجين علوم واحياء واطباء ماكان معهم واسطة وقعدو ببيوتهم يهشون ذبان!!! ولا حتى ابوك عندة شركه ومن يوم تخرجت حطك مدير فيها وصرت مسؤول عن الف موظف مع انك حتى خمسه بخمسه ماتدري كم!!! ولا حتى انت عصامي لانك قدرت تشبك مع وحدة وانت اصلا ماشفتها الا بالسوق واغريتها بسيارتك الروز!!!


تدرون وشلون انا عرفت هالمعاني الصحيحة هو من سماعي لسواليف بعض الناس !!!ومن قرايتي لبعض الكتاب!! ومن استماعي لبعض القصائد الشعرية!!!!

......................تنهدات

1=احد الشخصيات الاوربية السابقة يوم شافت العالم مسوين ضجة قا ل وش فيهم قالو انهم زعلانين عشان الخبز غلا قال مهيب مشكله خلوهم ياكلون جاتوه!!!


2=واحد اعرفة يقول اما مسكين الى ماعندهم الا بحسابة مليون ريال وشلون يدبر امورة!!!


3=كنت مسافر مع واحد يقول الحين ذولي وراهم يتعبون انفسهم ويركبون سياحية كراسيها صغيره ورا مايركبون الاولى اريح رديت لة وقلت يمكن ماحصلو حجز!!!


4= كنت اقرا قصيدة لواحد ويتكلم فيها عن العذاب الى هو عايشة والتعب الى يعانية من مشقة حياتة بصراحة كسر خاطري وحتى كان بجيبي عشرة كان ودي اتصدق له !! بس قالولي هذا ابوة واحد من اشهر التجار!!


5= واحد شاف الناس يبيعون خضرة وجح بالشارع قال وش يبون ذولي بالحر وش مقعدهم كذا!!!


--------------------------------------------------------------------------------
باي ايميل