#1  
قديم 15/08/2001, 07:16 AM
زعيــم نشيــط
تاريخ التسجيل: 09/06/2001
المكان: الرياض
مشاركات: 617
قصة بنت في يوم عرسها

هذي قصة بنت في يوم عرسها

يوم عرسي الساعه 6 الصبح
فتحت امي الباب علي ..ودخلت وقعدت جنب سريري تناظر خشتي وانا نايمه(وش الوناسه مدري؟) قمت على صوت شهاقها ولقيت الدموع 4×4
"يمه وشفيتس؟؟جعل الي فيتس فيني"
"مااصدق والله انتس كبرتي وصرتي مره وبتعرسين..." وقامت تشاهق وتمسح دموعها بشيلتها..
تعدلت بجلستي (يعني تربعت) وقلت لها"يا يمه يا يمه ..والله لو اني بموت..انا بعرس بس(يمديكم على الاسلوب؟) بعدين كل يوم انا بوجهك...صبح عصر عشاء اجل وشوله انا متزوجه؟؟ عشان اقول له ودني لم بيت اهلي جيبني من بيت اهلي"
"وش لتس بالعرس يا حصه..خلك هنا معنا انا وبيّك..العرس غثا وقرف..وانتي ماعودناك على الغثا"
<--هااااااا؟؟؟ توهقت
<--تبي الغثا
"يا يمه انا ماودي اصلا اعرس (ايه هين) بس طاح الفاس بالراس..الليله عرسي والكروت توزعت والناس انعزمت والفلوس اندفعت..." (سكتّها)
"ما يخالف اتميرض انا..ونأجل العرس عشاني مرضت ..همن نكنسله؟؟
<--
كسرت اختي الباب وهي تصارخ "وصل فستان عرسك..وصل فستان عرسك " اول مره افرح بجيه اختي.... فكتني من امي
هذا فستان عرسي...صراحه كان معجبني واحد ثاني..بس يوم قلت سعره لابوي غدى وجهه تسذا...
وقال اذا اني عشان افتك من خشتس ابخسر كل هالخساير اخليك عندي ارخص...
فاضطريت اتنازل في سبيل اني اريحه من خشتي...(والله الاهداف النبيله)
***العصر***
دق داحس عليّ ..(داحس اسم رجلي..خالي الله يحييه كان معجب مره بداحس والغبراء فسماه داحس ..وحاول يقنعني اغير اسمي من حصه لغبراء... بس يوم خزه ابوي بنص عين درى انه جدتي ام ابوي اسمها حصه بلع ريقه وسكت)
"ها يا داحس خير؟" <- انواع الرقه
"خير ان شالله.. بس جت خاله امي من الحفر هي وبزرانها...وصعبه يعني يضربون كل ذا المشوار ولا يحضرون البزران العرس؟؟مانتب كاسره خاطرهم يا حصه؟؟"
<-- ضرب الفيوز
"وبعدين معك ..انت كل شوي جايب لنا بزران للعرس مره عيال اخوك ومره عيال اختك والحين عيال خاله امك..شوي وتقول عيال حارتكم بعد؟؟؟؟ماصار عرس ذا صار ملاهي.."
"يابنت الحلال .ماودي انا بعد انه يمتلي بزران بس شسوي انحرج مع الناس وش اقولهم زوجتي ما تبي بزرانكم؟؟؟؟؟؟؟"
" لاالله يسلمك قول لهم اتفضلوا..حوسوا عرسها لا اوصيكم..."
<--خربت الاخلاق
<--سكرت الخط..احلى شي بالجوا ل انه الواحد يقدر دايم يقطع الخط ويحطها بالشبكه....
في الفندق الساعه 11مساء
فوق راسي ذي اللبنانيه تحاول ترسم خشتي صار لها ساعه حايسه..الله لا يلومها انا عشره عمر مع خشتي ولين الحين ماعرف وشلون قايله؟...بس اني مسلكه لها الامور طول اليوم لاطه زبادي بخشتي(سامع يالدباب) ...شوي ودق جوالي ..داحس
"ها يا داحس؟عيال حارتكم هالمره؟"
"كخخخخخ...يا ثقل طينتك"
"الا يا ثقل طينتك انت وبزرانكم..ها وش تبي؟"
"وش تسوين"
"قاعده احط ميك اب"
"وشوله..انت زينه بليّاه"
<--تشققت
<--مخفه(مشكلتها هبله)
"دبرت لك بشت يا داحس؟"
"ايه خذيت حق ولد عمي..يوم عرسه"
"ولد عمك؟؟ ذاك الي طلق من ثاني يوم؟"
"ايه..."
"والله فال خيرما لقيت الا ذا؟...كان خذيت من ابوك..على الاقل 30 سنه معرس ولين الحين صامد"
"قلت له بغى يفرغ الشوزن براسي..هماه دافع حق التذاكر والفندق بايطاليا"
<--تشققت يوم تذكرت اني رايحه ايطاليا
<--حدي الطايف...
"المهم تجهز على الساعه 12 عشان الزفه"
الزفه الساعه 3
المفروض انها الساعه 12..بس لو صارت 12 ماكان بيكون عرس سعوديه..شلون يعني ماالطع الناس؟ المهم اني دقيت على حابس وصحيته من النوم هو وابوي وابوه ..كلهم تلحفوا بشوتهم وناموا..دقيت على اخواني لقيتهم الثلاث مع واحد من الصبابين يلعبون بلوت..
المهم بدت موسيقى الزفه..
.دخلنا اناوداحس..المسيكين خشته متفخه من النوم.وبشته مجعلك اشوى انه شيفه عشان ما يقوولون الناس"حرام ذا المزيون ياخذ هالشيفه.."ربعنا عاد يموتون في النأ (النقد) ..المهم انه وصلنا بامان للكوشه.صح اني طول الطريق وانا تسذا "يا بابا خلاص....يا ماما روحي العبي بعيد..يا بابا لا تدعس على فستاني..خل الورد الله ياخذ وجهك" واختي وامي ماغير يهشون هالبزران عنا..وكل شوي انا اخز داحس.."مبسوط ببزرانكم يا حظي؟؟؟؟؟" اشوى انه نعسان ولا فيه حيل يرد ولا كانت بتصير علوم...
انتهى العرس على خير الساعه 5الصبح واحد من البزران طيح الكيكه على بشت داحس...وواحد كب العصير على فستان خالتي ام داحس..."احسسسسسسسسسن.."
<--ابد ما تشمتت
بس احلى مافي الموضوع انه نشب ولد اخت داحس بداحس الا بيقعد عندنا بالفندق.. داحس عاد تلون وجهه يا بن الحلال ورانا قومه بدري وبنسافر والبزر بدأ يصيح "الا بنام عندكم"...
وداحس يخز اخته يبيها تشيل بزرها..وذي موقعه عقد احتكار مع البلاهه..عاد قلت له
"يا داحس وشوله تكسر خاطره الا ينام عندنا..وش تبي اختك تقول عنا؟مانبي بزرها؟؟"
داحس صار تسذا..."مافي مكان"
"الا فيه..الكنبه الي بالصاله صوفا بيد..تقلب سرير نام انت وولد اختك هناك.."
الحين غدى وجهه تسذا
كخخخخخخخخخخخخ
"اعدين ليه..ما تؤوما تروحوا..."
خلصنا
   

إغلاق الموضوع

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 12:08 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2024, Jelsoft Enterprises Ltd

Google Plus   Facebook  twitter  youtube