من الي كان ماسك المكرفون وبأي حق ماسكه ؟
 

السلام عليكم ورحمة الله وبركاته

تحيه طيبه لأعضاء شبكتنا الغاليه شبكة الزعيم والقائمين عليها .

في البدايه عندي اعتراف ابقوله لكم ... الحقيقيه اني في الفتره الماضيه ابتعدت شوي عن الهلال ومتابعة مبارياته ومتابعة اخباره " الا الموجود في الصحف " بسبب مشاغل وظروف الدراسه الخ.

المهم وبسبب اني انا والشباب ماكنا ندري ان المباراة مشفره ولا هي منقوله على الرياضيه قررنا في اخر لحظه اننا " نتجه " للأستاد , نودع لاعب يما امتعني بفنه ولعبه ورفع راسي ايام الغربه , عيب والله عقب الي سواه لنا نجحده في ليلة تكريمه , وحتى اننا " تهورنا " ودخلنا ولأول مره مدرجات " ام 150 ريال " :d

المهم واحنا جالسين ننتظر المباراه الي ما ادري ليه تأخرت ( توقعت ابو يعقوب سحب عليهم :d ) استعدت شريط الذكريات , ذكريات كلها تسحيب وجرجره وكباريات وكعوب وترقيص وظهير ايسر يطيح هنا ومدافع يطيح هناك ( وجزمه وانتم بكرامه تنفصخ وسراويل تتشقق ) وبينيات من نوع انت وظميرك , ولا الفاولات .. ياكثرها ولها طعم خاص اذا كانت قدام الكويت ولا النصر :) اخخخخ بس ياحظهم الي كانوا يجلسون في المدرجات الشماليه في الملز , ياهم يستانسون ونااسه :) .. يازين هلال اول وبس , هلال اليوم مايقصر والله ابداع مستمر , لكن ولو هلال اول شي ثااااني , مدري بس انا الي اشوف كذا ولاحتى انتم ؟ والله مباراة الاربعاء رجعت ذكرياات حلووه مع الأزرق صح ولا لا ؟ من زمااان ماشفنا يوسف وسامي ونواف والدعيع مع بعض .

الزبده يا شباب انا ابي اعرف ... الرجال الي ماسك المكرفون وش يصير ؟ اول مره اسمع صوته ؟ وبأي حق مسك المكرفون ومن الي معطيهياه ؟؟ اتكلم من جد ياناس الرجال فشلنا ؟ انا كنت متوقع بندخل الملعب ونسمع الـ 70 الف كلهم وبصوت واحد ينادون " يوسف يوسف يوسف يوسف ... " ويرجون الاستراحات القريبه رجا مبرحا وتوقعت انهم ينادون يوسف مره ثانيه مطالبين بدخوله مثل ما يصير مع سامي , لكن للأسف الشديد ماسمعنا الا راعي المكرفون يقول " يوسف يوسف وي لف يو " على دقة اغنيه غربيه, وييين احنا فيه ؟ قسم بالله كان فيه اثنين اجانب قدامي مدري هم ألمان ولا اسبان المهم انهم يسمعون راعي المكرفون وينظارون بعض مبتسمين وكاتمين الضحكه !! انا استحيت بصراحه . وكل الجماهير الي حولي يزاعقون :" سكتوه سكتوووه " . الجمهور ما الومه حاظرين من العصر وتعبانيين كالعاده لكن راعي المكرفون فشلنا قدام الاسبان .. ولا يوم يقول " ون تو ثري " يبي يسوي امواج !!! عسى ماشر ؟ بزارين ؟ حتى محد عطاه وجه ! .

وشباب انكان الي ماسك المكرفون واحد معروف وتحبونه انتم رجاءا لا احد يطب فيني , انا اول مره اسمعه وهذا رايي وراي الي الجمهور الي حولي فيه .

كم نقطه اخيره :

* اكثر ما ضحكت عليه اثناء المباره يوم طلعت صورة المفرج وبعدها صورة الخثران , واحد من الاجانب الي قدامي التفت على خويه وهو ساكت ..ولسان حاله يقول : " .. مشينا ؟ ... " :d:d . والشي الثاني يوم ابو يعقوب حاول انه يجر بلاعب اسباني وطاح .. رقعها بسرعة بديها ومسك رجله على انه مصاب مدري لاحضتوها ولا لا ؟ المشكله انه قام مافيه الا العافيه يوم رجعت له الكوره :) حركاته مايخليها ابد ههههههه .

* الحكم وش فيه متحمس ؟ يوزع كروت ما كأنها مباراة وديه .

* قهرني الأسباني الخسيس الي نفخ على الخثران والظاهر مد يده عليه .

* واحد من الشباب الي معي , انتهت المبارة ورحنا تعشينا وهو ما يدري يحسب النتيجه 2-2 !!! الله يخلف عليك يا ...... :)


اشكر الي قرأ الموضوع الى اخره , ادري اني طولت حكي , بس هذا الي في قلبي و ودي اقوله ولا لي غير هالشبكه الغاليه :)

تحياتي للجميع :)

اول مبروك الفوز اخوي وثانيا هذا الي ماسك المكرفون ومو عاجبك هذا اسد المدرجات الهلاليه هذا الي يقطع مسافة 700 كيلو لكل مبارة للهلال عشان يجي يمسك الرابطة هذا هو رئيس رابطة جماهير الهلال الاخ الكبير ابراهيم حقوي في كل مبارة يجي ويأزر ويضحي بصوته لعيون الزعيم فااتمنى منك انك تتاسف منه لاننا نحب الرجال الي ماقصر والله ..وحركة يوسف يوسف اي لف يو تراها احلى حركة سمعتها صراحة لانه غربيه ..وون تو ثري عشان يسمع الاسبان ويشوفون الموج وكلن عطاه وجه الله يهديك اخوي..

بالله واحد صحن قلابه مشكل وكثر البيض :D :D

اما سالفه المفرج والخثران اعقل لا يفجرونك:eek:

أقول تعال أمسك المكرفون بداله وورنا شطارتك!!

هذا أسد المدرجات الهلاليه هذا أبو خليل إبراهيم حقوي..

وتقول بعد ما أحد عطاه وجه هاه؟؟

كل الجمهور يرددون معه ويسوون الأمواج ولا أحد من الجماهير قال ما أحد عطاه وجه


أتمنى إنك تتأسف لرئيس رابطة الجمهور الهلالي الأخ العزيز إبراهيم حقوي

اخوي هذا ابراهيم حقو ي

يعني معقوله واحد يشجع الهلال ولا يعرفه...

هذا ابراهيم حقوس اسد المدرجات
انا متاكد انك اول مره تروح الملعب عشان كذا ماتعرفه هذا من دونه جمهور الهلال ساكت بالملعب مايتكلم يوم جاء ابو خليل حرك المدرجات وصار جماهير الهلال مختلف
ارجو انك تتاسف له

وشكرا

الله يعين ابراهيم الحقوي بس

كل يوم والثاني يطلع واحد ويتكلم كأن الهلال ملكه.



اخوي اذا تقول بأي حق يمسك المايك فأنت بأي حق تتكلم عليه وانت ماتعرفه.




اتمنى تراجع حساباتك قبل تنزل اي موضوع.

انت:thumbup: :thumbup: :thumbup:


الظاهر انك نعسان حيل

مشكووور

تصدق اني مادخلت الموضوع الا علشان اقول

الحمدلله على السلامه يا صحن قلابه

اذكرك عضو مغبر

بس حبيت اسلم

مع اني اختلف معك في كثير مما طرحته

بس برضوا الحمدلله على السلامه و لاتقطع

يااخوان اكـــــــــــــــــــــــــاد اجزم لكم بان الاخ حــــــــــــــــــاقد على الهلال وارجوكم ترفعوا عن الـــــــــــــرد
سلمت انــــــــــــــــــــاملكم يازعمــــــــــــــــــــــــــــــــــــاء