هلا فيك اخوي واشكرك على تواصلك

بالنسبه لكلامك ان البحري ابدع في خانة الظهير ممكن تعطيني مباراه واحده ابدع فيها البحري في خانة الظهير !!
يا اخي البحري اخر شي يوصل لخط النص وبس ولازم يكون قدامه لاعب مهاجم ايمن او جناح ايمن والعاده يكون محمد امين يعني لازم يكون فيه اثنين لاعبين في اليمين ولو الدوخي موجود راح يملى الخانه اليمين لوحده والدوخي معروف بنزعته الهجوميه ورفعاته الحلوه خصوصا وعندنا العنبر ماشاء الله عليه ارتقائاته وضرباته الرأسيه حلوه

بتقولي الدوخي يتقدم كثير وينسى التغطيه انا بقولك وش فايدة الدفاع يعني الدوخي لياقته عاليه يتقدم ويرجع للخلف وفي الوقت اللي يتقدم فيه يغطيه واحد من متوسطي الدفاع او لعيبة النص بعكس البحري اللي مو قادر يتأقلم مع خانة الظهير ويتعامل معها كمدافع وبس يعني مانشوفه يتقدم حتى مع اضعف المنتخبات وبعدين على فكره ترى الظهير اذا كان عنده نزعه هجوميه ويتقدم صدقني ماراح نحتاج لتغطيه مكانه لأن اللاعب المنافس او الظهير في الفريق المنافس ماراح يتقدم اذا كان الظهير اللي قدامه هو البادي في الهجوم واعتقد انك تشوف الخثران شلون يتقدم ويساند الهجمه وهذا هو الحل وهذي هي طريقة باكيتا المفضله والي هي انك تجبر الاظهره في الفريق المنافس على التراجع يعني بتصير تدافع من نصف ملعبك وتعمل ضغط على الفريق المنافس مو تنتظر الين يتقدم ويهجم عليك ويوصل للدفاع وهذي الطريقه افضل طريقه

وبالنسبه لبديل الدوخي كلنا شفنا المنتخب السعودي للشباب وكلنا شفنا لاعب المنتخب الشاب الظهير الايمن ( ابراهيم شراحيلي ) بصراحه لاعب واعد وله مستقبل كبير وطريقة لعبه تشابه الى حد كبير طريقة الدوخي وارجع لمباريات المنتخب الشاب مع سوريا وعمان في تصفيات اسيا وراح تصدق كلامي ولاتنسى الظهير الشاب القادم بقوه بأذن الله بس تنقصه شوي الخبره بس بعد اتوقع له مستقبل كبير جدا وهو الكابتن ( ياسر الياس ) ويجي بعدهم ايضا الكابتن ( محمد العصفور )

وفي اليسار فيه عندك الكابتن ( عبدالعزيز الخثران ) وبعده الكابتن ( حسين عبدالغني ) وانت تقول عبدالغني مايجيد الناحيه الدفاعيه ارجع واقولك نفس الكلام الضغط الهجومي اذا كان من عبدالغني راح يخلي الظهير المنافس مايتقدم وماراح نحتاج لتغطيه دفاعيه لان ظهير الفريق المنافس راح يتراجع ولو احتجنا تغطيه ارجع واقولك هذا بيكون دور متوسطي الدفاع ولعيبة النص وهو تغطية الاظهره في حالة الهجمه وبعد عبدالغني عندك الكابتن ( زيد المولد )

يا اخي هذولا سبعه لاعبين ثلاثه اظهره يسار واربعه اظهره يمين

وبالنسبه للدفاع او قلوب الدفاع عندنا : المنتشري , رضا تكر , جفين البيشي , احمد خليل , احمد البحري , زكريا الهداف , فهد المفرج , صالح صديق

وهذولي بعد تسعه من افضل متوسطي الدفاع في الانديه السعوديه وارجع لمباريات الدوري

وبعدين ترى الكوره ماتعتمد على لاعب دفاع ولاعب وسط او هجوم يعني زياده على متوسطي الدفاع لازم يكون دور المحاور هو قطع الكرات قبل ماتوصل لمهاجمين الفريق المنافس يعني الدفاع المفروض يبدا من نصف ملعبنا يعني ماننتظر الين يوصلون لمنطقة ال18 وبعدين نقول للمدافعين يالله تصرفوا ولا وش فايدة المحاور

وانا اتوقع عندنا محاور كثير يجيدون التغطيه الدفاعيه وعلى رأسهم الكابتن ( خالد عزيز ) والكابتن ( سعود كريري )

يعني خذ مثال بسيط دفاع المنتخب الانجليزي مافيه الا قلب دفاع واحد واللي هو ( لامبارد ) ومعاه قلب دفاع ثاني بس مايقارن بلامبارد ومع كذا مافيه اي مشاكل لأن عندهم لعيبة وسط ومحاور يرجعون ويغطون الدفاع في حالة الهجوم عليهم يعني ماتجيب خط دفاع وتقوله خلاص انتوا اللي تدافعون وبس يعني لازم المحاور يقطعون الكور قبل ماتوصل الهجوم عشان ماتجي اهداف من غلطات دفاعيه

يا اخي صدقني عندنا لعيبه وعندنا مواهب واسماء واعده وكبيره بس وين المدرب اللي يقدر يوظف امكاناتهم ويستفيد من كل واحد في خانته

وبالنسبه لكلامك عن التأهل انا ذكرت هالشي ان موجموعتنا ومع احترامي لهم كانت ضعيفه ماعدا كوريا الجنوبيه ولو ان كوريا بعد ماكانت في مستواها

واشكرك مره ثانيه على تواصلك