11/08/2001, 05:36 AM
|
 | زعيــم نشيــط | | تاريخ التسجيل: 03/08/2001 المكان: الرياض
مشاركات: 926
| |
|
تعالوا واسمعوا سوالف جدي وخذوا العبرة والحكمة
هذه سالفة قديمة لااعلم ان كانت حقيقية ام لا . لكنها والله تحمل من العبر والحكم الشيء الكثييييييييير فانا من محبي جلسات كبار السن فهم لايتكلمون الا بالحكم والمواعظ وحقيقة ان جلساتهم لاتُمل فهم يتحفوننا بالقصص الشيقة والقصص التي بها مواعظ وحكم لمن هم في سننا من الشباب فقديما قالوا في الامثال (( الاول ماخلّى للتالي شي )) اي ان الجيل اوالرعيل الاول من ابائنا واجدادنا لم يدعوا لنا شيئا الا واخبرونا عنه ولن اطيل عليكم فاليكم القصة او السالفة كما يسميها الشيبان .
عنوان القصة (( اصحاب الهيم ))
وسوف احكي لكم القصة باللهجة العامية حتى تكون اسهل واسرع ويكون التشويق فيها اكثر .
====================
كان فيه رجّال شايب وكبير بالسن وكان مغنيه الله وعنده خير وحلال يالله من فضلك ولاالراجحي هالحين المهم كان عنده ولد مهستر ومبذر ولاهمته الدنيا ولا حسب لها حساب وكان ابوه ينصحه ويقوله ياوليدي اغد رجل واعقل وانتبه لدنياك ودينك وانتبه لمصالحك وخل عنك الشلات التعبانة وانتبه لمالك اللي تبي تارثه عقب مماتي بعد عمر طويل لكن الولد ماجاب خبر لابوه ولاهرجه معه وكان الولد هذا عنده شلة يسميهم اصدقاء وابوه دايم ينصحه عنهم ويقول تراهم ماينفعونك انتبه منهم تراهم بس علشان انك تكد عليهم وتصرف عليهم وكل يوم تعزمهم وتوكلهم وتشربهم ولاّ لو تحتاج احد منهم ولاّتطلب منه فلس واحد مانعوك ولا لو تطيح بمشكلة او تورط ماحد نفعك منهم .
المهم الولد ماهتم لكلام ابوه وصار دايم يعزم ربعه ويكد عليهم ولاعمره جربهم او قال ابشوف عن خوتهم ورفقتهم هم ربع ينشد بهم الظهر ولا لا .
المهم في يوم من الايام قام الولد وعزم ربعه وحط عشاهم بصحن من نحاس (كانوا يسمونه الاولين ’’الهيم’’)المهم الصحن هذا كان منثلم شوي وسأل ربعه قال يالربع والله مدري وش في الهيم هذا منثلم بس اظن الفار قارضه طبعا هو يتمهزاء بس هم قالوا والله انك صادق اكيد الفار قارضه طبعا يجاملونه ولاودهم يقولون انت دبشة ولا الفار مايقوى النحاس لكن يمشونها له مجاملة علشان بطونهم .
المهم يوم من الايام جاه ابوه وقال ياوليدي انا ماهم عاجبينن ربعك قال الولد ليه يبه قال بس انا ودي انك تجربهم وتشوف هم ربع صدق ولا ربع صحون وضرب بالخمس بس قال الولد وشلون نجربهم قال انا اعلمك وشلون المهم الشايب جاب ذبيحة وذبحة وطبخة وغطاها بشرشف بالمجلس ونادى ولده وقال شف هذي ذبيحة بس ابيك تروح لربعك واحد واحد وتقول لهم انا ذبحت رجال بالبيت تهاوشت انا وياه وذبحته والحين هو هناك بالبيت وبلشت به ابيكم تفزعون معي نشيل جثته ونقلعة بعيد قال الولد خلاص وراح لاخوياه واحد واحد وكل واحد يقوله مثل ماوصاه ابوه يصك الباب بوجهه ويقول تقلع بس انت جاي تبلانا ببلواك ماعرفك ولاتعرفن المهم راح لهم كلهم ولاواحد جاء معه ولا فزع قال ابوه شفت اني قايل لك ان ربعك خرطي هالحين اوريك شلون الخويا صدق رح لفلان وقله ابوي يسلم عليك ويقولك انا ذبحت رجال وابي فزعتك نبي نقلع جثته .وفعلا راح الولد لرفيق ابوه اللي ارسله لمه وقال له مثل ماوضاه ابوه قال الرجال للولد رح لبوك وقله يقول فلان هالحين انا جايك ورح وانا الحقك .وفعلا مامدى الولد ياصل بيتهم الا الرجال مع دربه ودخل على الشايب وقال سلامات يافلان قال ابد بس ذبحت رجال ابي فزعتك نقلع الجثة بعيد قال رفيقه ابشر وينهي بس مشينا والله ياخذه على المجلس قال الشايب لخويه ارفع الشرشف شف منه اللي انا ذابح والله ويرفع ذاك الشرشف الا الذبيحة وهو يتبوهر قال وش ذا يابوفلان قال ابد شوفة عينك بس انا سويت كذا اعلم ولدي عن الرفقة الصدقية ماهي رفقة خوياه المصلحجية .
المهم الولد اعتبر من درس ابوه بس حب انه يسوي باخوياه شي ماينسونه وفعلا رجع لمهم وقال لهم اني خلاص تصرفت بالجثة وسوى نفسه مازعل منهم ولا شي ورجع معهم زي اول ومرة من المرات قال لهم ان ابوه خسر كل شي وصار فقير مرررة قاموا خوياه ينسيحون شوي شوي عنه المهم راح لمهم قال خلاص حنا بنسافر انا وابوي وابي اسوي لكم عشى خفيف قبل اودعكم ووافقوا المهم سوى لهم عشى وحط خمس قرصان بس واكل شوي من حدى القرصان قبل يجون يبي يختبرهم ويوم جوا شافوا القرص مقروض قال والله يالربع غفلت عن القرصان شوي يوم رجعت لقيت الفار قارضٍ منه وقاموا يناظرون بعض ويضحكون يعني يستهزؤن منه عارفين انه هو قارضه من الجوع قالوا يافلان الفار يقرض القرص ماخبرناه يقرض القرص . والله وهو يقوم عليهم ويطردهم كلهم قال لعن الله من جمعكم يعني هاك الحين يوم اني غني والفار يقرض النحاس وهالحين يوم اني فقير صار الفار مايقرض حتى القرص عزالله انك رفقة مصالح تقلعوا لاعاد تشوفكم عيني غير ماشفتكم .وصارت السالفة تسمى اصحاب الهيم .
واااااسف على الاطالة لكن انشالله تعجبكم .
الاسير الهلالي - الرس |
الوضع العادي
