رجل ثوبه ملطخ بالدماء يطلب النجدة !!! - نادي الهلال السعودي - شبكة الزعيم

هلالي الظهران · #1 22/11/2005, 04:30 AM

السلام عليكم ورحمة الله وبركاته

الله لا يصبحكم ولا يمسيكم الا بكل خير

[ مدخل]

اتمنى قرائة الموقف حتى نهايته ثم ابداء ارائكم حوله..

-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-.-

في مساء اليوم تقريبا بحوالي الساعه الثانية عشر والنصف شعرت ببعض الملل وضيقة الصدر .. وكعادتي في مثل هالموقف أشغل السياره واخرج ادور في الشوارع حتى ارتاح قليلا;) ..

بدون ما اطول عليكم باعطيكم السالفه باختصار وبلغة سهلة وواضحه. .

خرجت الساعه 12:30 تقريبا وركبت السياره ودقيت سلف وخطر في بالي اطلع اتمشى في الطريق الساحلي - طريق العزيزية الهافمون- وبالفعل اتجهت الى بداية الطريق الى ان وصلت الى اول خط الهافمون..

طبعا ماشي على اقل من مهلي في الخط لحالي ولا حولي اي سياره وفاتح الدرايش مع الجو الخيالي والمسجل على انغام ابو نوره ;) وبديت اتصارح مع نفسي

..

المهم مالكم بالطويلة.. بعد ما مشيت مسافه ليست بالطويله تقريبا عشرة كيلو متر.. وانا ماشي في المسار الايمن ومافي حولي اي سيارة ..

لاحظت من بعيد شخص خارج من بين الاشجار ويلوح بيده.. بصراحه انا استغربت وقمت اهوجس واتعوذت من ابليس .. فركت عيني والصوره ماتغيرت .. لمن قربت اكثر كانت الصدمه..

والله الذي لا اله الا هو رايت شاب ثوبه ملطخ بالدم ومن كثر النزيف الثوب صاير لونه احمر والشاب يالله يقوا يوقف على رجوله(يترنح).. ولحاله في الخلا لا سيارات ولا اوادم غيره..

انا بصراحه صدمت من المنظر وحسيت جسمي كله يرتجف من المنظر .. واحترت وش اسوي..

تجاوزت الشاب بمسافه قصيره وطالعت من المرايه الخلفيه لقيته ملقى على الارض..

صراحة ضاق صدري بزيادة وعجزت افكر وشلون اتصرف؟؟!!

فكرت امشي واتركه ولا كاني شفت شي لكن بصراحه ماقدرت..

فكرت اشيله بالسياره واخذه معي لكن خفت يصير له شي وهو راكب في سيارتي واتوهق انا بالسالفه واتحمل ذنبه.. ايضا خفت يطلع شخص مطلوب لاي قضيه ويعتبروني معه بالسالفه.. وصل معي التفكير ان اللي قدامي مشهد تمثيلي لعصابة سرقه او ما شابه..

ولا تلوموني بصراحه من فجعة المنظر ماعرفت وش اسوي.. وفي الاخير الحمدلله ربي هداني اني اتصل على المرور او الشرطه..

اتصلت على 999 وبصراحه ردوا علي بسرعه وحكيت له السالفه بسرعه .. رد علي وقال اتصل على 993 هذا شغلهم

..

اتصلت على 993 لكن محد رد علي

.. بعدها بدقيتين اتصل علي رقم جوال ورديت عليه .. سالني شخص انت اتصلت على المرور .. قلت له نعم وحكيت له السالفه.. قال حدد الموقع.. بعد ما وصفت له المكان ..قال لي خلاص تقدر تروح

..

بعد ماقفلت الخط معه .. حركت لكن على اقل من مهلي وانا ما ادري وش اسوي ولا وين اروح..

المهم.. مع اول لفة u-turn (فوق تحت) رجعت .. وانا ماشي اشوف سيارتين دوريه .. واحد واقف في نص الخط والثاني داخل جهة الاشجار والتراب.. طبعا كانوا مضيعين.. رجعت لهم بسرعه .. رحت للدوريه اللي واقف على جنب وفتحت الدريشه حتى اكلمه لكن دريشته هو مقفوله .. ضربت له بوري فتح فتحه صغيره يسمعني منها:p ..قلت له انا اللي مبلغ.. قال تعرف مكانه

.. قلت ايه .. تعالوا وراي ;) ..واتجهنا الى مكان الشاب..

وصلنا عند الشاب.. نزلوا اربعة من الدوريتين باتجاه الشاب اللي كان ملقى على الارض فاقد الوعي.. نزلت من السياره ورجال الشرطه ملتفين حول الشاب ووجهه كله دم .. قلت لهم اشيل بالسياره نوديه المستشفى.. قالوا لا انتظر الاسعاف يجي

..

واحنا في انتظار الاسعاف .. الشاب كان يغيب عن الوعي ويفيق مجددا.. ورجال الشرطه يحاولون ياخذون منه اي معلومات.. كل اللي فهمناه منه ان مجموعة هجموا عليه وسرقوا سيارته واللي معه وطعنوه بسكين في رقبته وكتفه.. بغض النظر عن صحة اللي يقوله لانه كان شبه غايب عن الوعي..

تقريبا في خلال 20 دقيقة وصل الاسعاف واخذوا معهم.. وطول هالفتره تتوافد سيارات الشرطه بشكل كبير جدا .. عدد سيارات الشرطه كان كبير وبداوا يفتشون الاماكن القريبه.. الطريف في الموضوع وصول سيارة دفاع مدني مع فرقة اطفاء

:p ..

طول هالوقت وانا افكر وش مصيري الحين:sad: .. توجهت للنقيب وسالته وش المطلوب مني.. قال ابد بس شاف الهويه واخذ اثباتاتي ورقم جوالي وقال اذا بغينا شي منك اتصلنا عليك وانت بامكانك الحين تمشي..

وهذي ياطويلين الاعمار كل السالفه .. رجعت للسكن وحرمت اطلع مره ثانيه في هالوقت بلحالي .. طبعا النوم مافي امل يجي هالحين .. قلت خليني افتح النت وامحط السالفه..

لكن السؤال.. ابي كل واحد يحط نفسه مكاني وشلون بيتصرف؟؟ وهل فعلا تصرفي كان صحيح؟؟

واعذروني على الاطاله وعلى الاسلوب الركيك في الكتابه..

فمان الله