نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

الهلالي- ابوسارة · #11 22/11/2005, 12:42 PM

:

بسم الله علينا ..

قاعد من شوي ألعب مع بنت أخوي أمرا شبرا وفتحي ياوردة ومبسوط ثم عفست جوّي بفلم الرعب حقك

أكتب لك وانا يديني تتنافض .. أنا في الصيف ويديني في المربعانيه

اعنبوا بليسك يا ظهراني بيه مسكت بي خط ماهوب طبيعي انت وقصتك ..

أخبر البداية جالس أضحك واحسب الدعوى كوميديا ..

شوي وإذا بالموضوع يتحوّل بشكل ديموقراطي ( يسمع بالديموقراطيه :p ) إلى موضوع مثير ..

شديتني في سردك الجميل للموضوع .. لدرجة أني حسيت اني معك وارجوك اعترف ماكنت مشغّل أغنية الاماكن ؟؟

سمعتها من زود التركيز في ثنايا القصه ----> مهوب يكذب أبد

شوي .. إلا وأقرأ:

رجل يخرج من بين الاشجار وهو مليء بالدماء

شهقت وابعدت مترين عن لاب توبّي وحسيت أني محتاج الوالده ولسان حالي يقول:

حسبي الله على هالظهراني وش ناوي عليه وين بيوصّلني

بـ صراحه موقف لا تحسد عليه .. والله يشفي الرجال اللي تقول مليان دم ..

تصرّفك أعتبره شجاع جدا .. جدا .. جدا .. والدليل ألو لوه:p ( ياشيني صح

)

الدليل أنك ماتركته .. دقيت على الدوريات .. ولو كان واحد غيرك كان مشى وقال : وانا مالي

-----------------------------

يقول الشاعر: موقف يجّر موقف .. وسالفة تمحط بـ سالفه ..

وانت ذكرتني بموقف حصل لي وانا طالع الساعه ثنتين ليلا من استراحتنا اللي انت خابر والزكرتيه اللي فيها

استراحه بين استراحات كثييره وكلها أجار وعزابيه وحووسه

المهم .. أدق سلف ومن زين الطبايع قاعد ( أكدّ ) شعري بالمشط واناظر في المرايه وأغني ياسارية خبريني

سمعت واحد يصوّت ينادي ؟؟أدقق .. أتفحص . . أمعنت النظر .. واشوف زول آدمي متجه نحو السيارة ..

قسم بالله خفت .. وما عاد تسمع في قلبي الا خبيتي وطبول وسامري وانواع النفضه

قلت هذا واحد من اثنين :

1- جاي يبي توصيله او حاجه او غرض او اشتراك لسيارته ( وهذي استبعدتها )

2- جاي يسرقني أو يقتلني أو ..... ( كلّه عاد الا الشرف

)

والله ان ام الركب طقتني ولا عاد أدري وين الفرامل من دوّاسة البنزين ( نسيت السواقه وقتها

) ..

يوم اقترب من قزازة السيارة طاح !! فتحت الباب وأثر الرجال يصيح ويوّن وطلع شاب يمكن عمره 17 أو 18 سنه ..

مطعون في اليد ووجهه أنواع الزراق والخضار .. يعني تشوفه تحلف بالله على طول أنه مطقووووق طق ملعون أبو خيّر ..

فكرت أمشي وأخليه لا يبلشوني الشرطه ويقولون أنت سارقه أو طاقّه ..

خلاص قررت امشي .. بأحرّك السيارة وقلبي يكاد ينفطر ألما على الشاب المسكين بس حيل الله أقوى ..

فــجــأة !!

.. أبرقت السماء وأرعدت .. وطلعت بين السحب صورة جدي الله يرحمه وقعد يصرخ:

أخس عليك ياولدي يابوسارة ماهقيتها منك فضحتني بين الشيّاب الميّتين معي

ايييييييه مالك باللونق ( الطويله ) .. سريع سريع طمرت به للمستشفى ودخلوه الغرفه .. وانا ركّوني لين جاء كم شرطي..

تحقيق .. على كم سؤال .. اثباتك .. كيف وجدته وهل تعرفه وماذا أجب مع التعليل وأسألتهم اللي سألوك بالزبط ( نصأب)

يوووووووووه تعبت بعدين أكمل لكم

المهم طلعت سالفته كالآتي :

جالس في استراحتهم ( حولنا ) هجموا عليه كم واحد .. لعنوا مندوبه ودبجوه مسكين .. سرقوا اسيفر الاستراحه على كم دبّة غاز

ألف ريال كانت معه وخذوا مفتاح سيارته وسرقوها وراحوا وخلّوه مغشي عليه ساعتين لين صحى مشى ولقاني في دربه

الحمدلله الحين هو صديق لي وتعرفت عليه من وقتها وكل يوم يشكرني ويكبّر راسي ويسميني الشهم

------------------------------------------

همسة ساخره:-

لما كان الولد بين الحياة والموت .. قال الشرطي: ترى لو حصل له مكروه او مات مانعرف الا انت !!! قلت: انا فاعل خير..

قال: بلاك خبل !! أبلشت عمرك كان رحت وربّك يتولاه

(( جعله منيب قايل

))

عموما مشكور عالموضوع والظاهر ان ردي طلع اطول من موضوعك بس السموحه سبحان الله اللي أحبهم أقطّ معهم في مواضيعهم:p

--------------------

اخوي الداوود .. مشكور على مرورك اللي أعطى الموضوع بعد آخر

اخوي دبل كيك .. تحياتي لردك الرائع والله لايبلاك مثلي ..

الثقفي .. الله حيه ومرورك كالعاده رائع ..

اختي الماسه .. تعليقك حميل والله يوقف الجميع ..

يالربع ماكني استحليت الموضوع