(هــيـفـاء)
جاءت العنود إلى بنت خالها(هيفاء) وجلسوا البنتين يلعبون ويلهون مع بعض،وبالأخير طفشوا..قالت العنود: عندك انترنيت..!!!
قالت هيفاء: آيه
قالت العنود:يالله خلينا نشتغل على النت
فتحت هيفاء الجهاز..قالت ها وش ودك ندخل..!!!
قالت العنود: أدخلي mirc
قالت هيفاء: وشو ذا!!!!
قالت العنود: برنامج شات
قالت هيفاء:ما أحب الشات ولاعندي برامج له
قالت العنود: الله يصبرني عليك خلينا نحمل البرنامج.
حملوا البنات البرنامج ودخلوا غرفة الرياض..ومسكت العنود الدفة وبدت تطير عيون الشباب الي ماصدق يشوف اسم بنت..وبدت تستهبل على الشباب كلهم
الا في واحد كان ثقل ومااعطاها وجه..انقهرت العنود..دخلت عليه برايفت
وكذلك مطنشها …طلعوا البنات من الشات.
من بكرى جت هيفاء بتدخل على المنتدى الي هي مشاركة فيه ولقته مسكر
كانت طفشانه..قالت خلني أدخل الشات أتتسلى
دخلت الشات ..وجلست تتفرج على الي يشاركون بدون ماتشارك هي
ومع الوقت في واحد لفت انتباهها مؤدب وخلوق مع الجميع تكلمت معه برايفت ولقته انسان أخلاق ..أصبحت تدخل الشات يوميا على شانه
يوم من الأيام قالها عندك ماسنجر!!!!
قالت:لا
قام وصلح بريد على الماسنجر وقالها لو سمحتي أضيفيني عندك
قالت:أبشر
مع الأيام ازدادت العلاقة بينهما وتطورت لمكالمات وقصة حب
وجلسوا حبايب فترة من الزمن لايعكر جوهم شيء
حتى…..


(فــيـــصل)
ترن..ترن..يرد فيصل : هلا أحمد خمس دقايق وطالع لك..بعد خمس دقايق يطلع
فيصل وهو مرسم وركب مع خويه أحمد وراحوا يتمشون في العليا ومن سوق لسوق ..ومن شارع لشارع ..يحاولون يتزلقون في البنات بس محد عطاهم وجه..في آخر الليل وهم راجعين لبيوتهم زهقانين الا يشوفون بنات بيركبون لوموزين ويرجعون ..اثر البنات ركبوا اللموزين ويلحقونهم ويطلعون لهم المعروض..واعطوا الرقم البنات ومشوا…كلها خمس دقايق الا دق جوال أحمد
ويطلع صوت ناعم..رد أحمد ومن اللخمة قال :أأأ من معي!!!
ضحكت بوجهه وحدة قالت نسيتني الي تو باللموزين شكلك اليوم مرقم بنات العليا كلهم….أللخم أحمد ماعرف وش يقول.
قالت: أنت الي كنت راكب جنب السواق!!!!!
قال : لا أنا السواق..قالت عفوا ممكن تعطيني الي جنبك.
أعطى فيصل الجوال ووجهه طايح..كلمها فيصل وأعطاها رقمه..راح البيت
وكلمها طول الليل ..ومرت الأيام ..وهو على نفس الحالة وتقابلا أكثر من مرة.
شذا(وهو اسم البنت) كان فيصل أول شخص بحياتها مثل ماكانت هي أول فتاة
بحياته…تعلقت شذا بفيصل وهو كذا..كان يكلمها في اليوم من خمس الى عشر مرات.
شذا كانت تحب فيصل بجنون الانثى قالت مرة له:
اشتاق لك لاجابوا الناس طرياك…..واذكرك لاقامت تهب الهبايب

وفي احدى المرات تخلف عنها لعدة أيام فقالت:
مازلت أعيش أيام عمري برجواك…….وجروح قلبي من فراقك عطايب
أمني النفس الحزينة بلـــقياك……..…وأفرح بشوفك يازعيم الحبايـب
أبطى غيابك وأحسب القلب يسلاك.. وأثره على ذكراك شد الركايب

وفي أحدى المرات سمعت كلاما..وانه ربما يتركها لغيرها فقالت:

نسيت ليا سمعت أسمك فؤادي بالحشا يختال..
وادنق..وابتسم..بسمة خجل واحاول أخفيها
أحبك..آه لو تدري بحبي يامريح البال..
غرامك حاضر أيامي وقادمها وماضيها
لك الله..كل من يقرأ بعيني لوعة الترحال..
ليهاب الحب وأشواق الغرام ينهيها..
تعبت أرجيك واستلطف ضميرك وانظم الأمثال..
تغيب الشمس..ماتسمع ندى شخص يناديها

واستمرت العلاقة بينهما بين مدى وجزر حتى،،،،،



(عمري مافكرت فيك )
كان فيصل من محي النت وبخاصة منتديات الحوار..تنقل فيصل في منتديات كثيرة
وفي الأخير طاح في أحد المنتديات..ارتاح فيه كثيرا ..بدء يكتب فيه كثيرا
يطرح المواضيع ويرد ويناقش حب هذا المنتدى كثيرا.
كانت هناك عضوة ارتاح لها كثيرا تعرف عليها في الماسنجر
أصبح يتكلم معها بحرية تامة وهي كذلك.
في يوم سئلها عن أسمها قالت : هيفاء
كان يجلس معها ساعات طوال على النت حكت له عنها وعن اشياء كثيرة تخصها وهو كذلك..كان يعتبرها مثل الأخت بالنسبة له.
في يوم من الأيام قالت له انها راح تسافر بعد كم يوم…سولف معها شوي وطلع
قابلها من بكرى ..قالت فيصل وش فيك!!!
قال: مافيني شيء
قالت : الا فيك شيء فيصل تغبي عني!!
قالها: هيفاء تعرفين أغنية ياخسارة حقت راشد الماجد؟
قالت : لا
قالها : اسمعيها وراح تعرفين كل الي فيني..بااااي
تركها وهو طول يومه يفكر فيها..قام الصبح وفتح بريده لقا منها رسالة
قالت : انها سمعت الشريط وفي اسئلة حايرة براسها لازم تشوفه اليوم بعد الظهر
..لقاها بعد الظهر..قالت:وش قصدك بالاغنية.!!!
قالها سمعتيها!!!وش كلماتها طيب!!!
قالت يقول:

ياخسارة حبيت واحد مادرى عني..
ياخسارة أشقين نفسي بالتمني..
الحقيقة الزين ..الزين مايدري..
هو في دنياي شمسي وبدري..
آه..آه ..يازمـان
ليش أنا ساكت..
آه..آه ..يالقهر..
عيوني مانامت..
فجرت آهات القهر….وطال في عيني السهر
ودي أصرخ واقول اني أحبك..
وأعترف قلبي مات في ودك
لكن الخوف سيطر على أحساسي..
أخاف أتفاجىء برده القاسي
ويقول.. مأحبك..يتغير الحال..يتغير الحال
أفضل سكوتي وأقول ..الزين مايدري


قال: حلو وش فهمتي!!!
قالت: انك حبيت وحدة وهي مادرت أنك تحبها وبما أن الكلام موجه لي
فمعناتها انك تحبني!!!صح تفسيري!!!
قال:بالضبط هذا الي اقصده
قالت:وحبيبتك شذا..!!!
قال: صدقيني اني تهومت اني أحبها ومن يوم عرفت الحب الحقيقي معك تركتها
ماابي اغشها.
قالت:فيصل أنت متأكد من كلامك !!!!!!!
قال:ايه.
قالت:شف اليوم أنا بسافر وبرجع بعد شهر..وش رأيك نخلي هالشهر أختبار
لمشاعرنا.
قال:زين والله يصبرني على بعدك عني.
قالت: الحين بطلع توصيني على شيء
قال : ابدا بس فكري فيني لو مرة.
قالت: بفكر فيك كثير مره..باي

بعد شهر دخل النت لقاها موجودة على الماسنجر
دخل عليها وسلم وبعد الترحيب جاء بيفاتحها بالموضوع.
قالت فيصل أسمع هذي الأغنية

عمري ما فكرت فيك وما خطر في البال حبك
لين قلبي قال أبيك وقالت عيوني أحبك
صرت عندي أغلى شي وأغلى من نفسي علي
ما لك بقلبي شريك بعد ما فكرت فيك
عمري ما فكرت فيك

كنت أشوفك من قريب مع جميع الناس عادي
ما تخيلتك حبيب رايح بقلبي وغادي
قمت أفز لشوفتك وأتحرى جيّـتك
أنتظر حبي الجديد بعد ما فكرت فيك
عمري ما فكرت فيك

لا تتعجب من غلاي مثلك إحساسي تعجب
وإنت في يدك هواي مهتني ولا معذب
يا عساني ما انحرم إنت يا أجمل إسم
لأترك الدنيا وأجيك بعد ما فكرت فيك
عمري ما فكرت فيك
قال أخيرا
قالت: والله أني من زمان حبيتك بس كنت خايفة أخرب
بينك وبين شذا.

وتم التعارف أكثر وأكثر وبعد فترة تم الزواج
وغنا الفنان الكبير محمد عبده هذه الاغنية

الليل ياهيفاء

دايم يالكاسر قصصك غارقه بالرومانسيه ,,,

الرومانسيه حلوه بحياتنا .... لكن تصويرك لها فيه بساطه ماهي حقيقيه وصعب تلفاها في حياتنا اليوميه ,,,

حياتنا العاديه ماتكون فيها الأمور بالبساطه هذي , النفوس والقلوب صعب تتوافق وصعب تحصل الأمور كذا " بسلاسه " , فيه أمور كثيره تقف كحاجز لتحقيقها .... طبعا أنا الحين قاعد أناقشك كون الموضوع مجرد قصه ولا لها أي دخل بالواقع ولكن من منظور حياتنا الواقعيه , ولا كان الرد إختلف بشكل طبيعي لو إن الموضوع حقيقي ويتكلم عن حياتنا العامه ,,,

حلو كل الكلام اللي قلته , ويداعب المشاعر والأحاسيس بصوره تلقائيه , يعني النهايات الحلوه بشكل تلقائي تعجب القارئ خاصة في الأمور هذي ,,,

قصه حلوه يالكاسر وتسلم إيدينك عليها ,,,

تحياتي لك ,,,

اخوي ابراهيم

زين انك صرت عاقل وماتفلسفت وانت عارف ان القصة خيالية

نقاطك الي ذكرتها في انتقادك

بحاول انتبه لها وان كنت اشوف ان مافي شيء مبالغ

لك تحياتي يابعدي

قصه حلوه بالمره بس مو بمستوى القصه اللي قبل ذيك هبااااال ;)
يعطيك العافيه وانتظر الجديد..

مشكور ياغالي وماقصرت الله يسلمك.

بالنسبة لرامبو / لاتستغرب انه صاير عاقل --- ترى هالأيام انتخابات مشرفين جدد;)

ومسوي نفسة اخلاق وهو ماعندك أحد

رووووووووعه
من زمان والله عن القصص الرومانسيه

اخوي الكاسر

والله اني احب قصصك

والقصه مررررررررررررررررره حلوه

ياحبي لك يالكاسر ...

وصدقت يا هيمو ... الولد رومنسي مررررررررة ...

ومشكور ياغالي ...

ولك تحياتي ...

أخوك / سفر المرزوقي .

الكاسر قصة رومانسية وبقووووووة ;)

كثر لنا من هالقصص حلوة ;)

الاستاذ الكاسر : حقيقه خيال خصب وحكايه اقرب منها الي الواقع لاشي ...

ولكن عمري مافكرت فيك اعتقد قويه شويه ثمن تهيم فيه يعني انا ماجازت لي بس الكلمات معبرة مؤثره واجد واجد .......


تسلم ولو ان موضوعك عذبني كل مااحاول ادخل لمه يرفض جهازي الظاهر جهازي زعلان عليك .............

نايف ياهلا ومسهلا حبيبي

اتقبل وجهة نظرك ولك اغلى تحياتي

JAJ والله ونعم فيك وفي رامبو

اللورد حياك الله يالغالي وشكرا لك


سعود يعطيك العافيه ونورت الموضوع ياغالي

البرنس سفر المرزوقي شكرا لك ياحبيبي

والله يسلمك ويسلم عمر رامبو
ولي عودة اخرى مع الردود وشكرا

الأخ الغالي الكاسر :

ياسلام على قصص الرومنسية الجميلة وعقبال نشوف لك مواضيع جميلة في الجمهور الهلالي بس تكون بعيدة عن سامي

عندي استفسار بسيط وهو هل قصة هيفاء والعنود لهم علاقة بقصة فيصل !!!!

اعتقد لا ..


والقصص جميلة جداً وخاصة بأن فيصل بطل القصة الثانية

أخوك
أبو فيـــصل

ولهان الليل هلا حبيبي وابشر بسعدك يالغالي

الاستاذ سلمان99999

حياك الله نورت الموضوع

ويمكن جهازك يتغلى تعرف مستحي(تقول بنت جا خطيبها يشوفها
بالنظرة الشرعية )=======>> يلعن ام الخطمة
حياك الله

جابر عثرات الهلال نورت الموضوع ياقمر


طلال حبيبي اه فشلتنا الله لايبلانا

هيفاء بطلت القصة مثلها مثل فيصل
وحطيت مقدمة لك واحد فيهم

كيفك حبيبي طيب وكيف القمر فيصل
سلملي عليه